Judah taah moo nesaa doo dejëp do panyyg n'aa hahaỹỹh
38
Ti noo gó m' Judah ahõm ta s'eeh hẽnh ta wakããn mahä̃nh tabagä hyb n'aa Adurãm panang bä ta najiis Hirah häd näng do pa. 2 T'ĩĩ hẽnh mä tabaw'yyt ỹỹnh, Suah toog. Suah häd näng doo mä Kanaãh buuj. Tagat'ëë däk mäh, ta sii m' tabaä̃ däk, 
Genesis 38:1-30
3 etaa däk mäh, enyy däk mä ta t'aah. Rahäd noo däk mäh. Eer m' ta häd. 4 P'aa hẽnh mä ta ỹỹm betaa däk ẽnh. Enyy däk mäh, rahäd noo däk mä tii Onan. 5 Etaa däk ẽnh mäh. Enyy däk mä ta t'aah, ta häd noo däk tii bä Serah. Kesib panang bä tabenäng mäh.
6 Ti m' Eer pahëëw däk bä, ta yb tesoos ta t'aah wah'ëëh hadoo doo ỹỹm pan'aa. Taw'yyt do ỹỹnh häd mä Tamar. 7 Judah t'aah, wah'ëëh hadoo doo, Eer häd näng doo, tak'ëp paa m' taky nes'aa. Ti hyb n'aa m' nayyw hẽ tadajëp Tak'ëp Hyb N'aa Jawyk Do an'oo bä.
8 Ti m' Judah ky hadoo ta t'aah seeh hã, Onan häd näng doo hã:
—Aä̃h a hỹỹj makũũh ỹỹm sii tabetaa hyb n'aa, a hỹỹj makũũh panaa näng hyb n'aa. Mahapäh né hẽ tii d’ ji bad'oo —näng mä ta yb kyyh.
9 Ti m' ta hỹỹj makũũh ỹỹm paa sii tabaỹỹh bä, Onan h'yy ganäng tetaa bä dooh ta t'aah tadoo bä; ta hỹỹj makũũh t'aah tii bä. Ti hyb n'aa m' ta wë tabawät bä tũũ ta ma kajäk netaah do hyb n'aa. 10 Baad nado doo tii Tak'ëp Hyb N'aa Jawyk Do matym gó. Ti hyb n'aa ti na-ããj hẽ m' dajëp Tak'ëp Hyb N'aa Jawyk Do an'oo bä.
11 Ti m' Judah ky hadoo ta takaanh hã, Tamar häd näng do hã:
—Abaaj hõm a yb tób hẽnh. Kat'ëë manäh. T'ĩĩ hẽnh mabagä a yb tób hẽnh. Magadaa tah ỹỹ pahëëw däk sa jawén buuj hyb n'aa— näng mä Judah kyyh ta takaanh hã.
Ta t'aah tagad'ooh hadoo doo dajëp sa nemuun ted'oo, ti hyb n'aa tii da tawén ky hadoo ta takaanh hã. Tawadii mä ta takaanh.
Ti m' Tamar abaaj hõm ta yb tób hẽnh tabagä hyb n'aa t'ĩĩ hẽnh. Tadadäk mä ta saroor ji patug dajëp do saroor n'aa.
12 Ta see pé noo gó m', hajõng mä ta ãn n'aa tatabës jawén paa bä, Judah ỹỹm, Suah toog, dajëb kän tii bä. Ta ỹỹm makũũh ta p'ãã oot jawén paa bä m', tahyb n'aa nes'ee wäd bä, ahõm kän mä Timanah panang hẽnh ta sii moo bok do sa hyb n'aa. Taheg'ããs mä ta masããh b'éé wii rehõk doo. Ta sii hahõm mä ta najiis Hirah häd näng doo. Adurãm buuj mä tii. 13 Harë tanyy m' her'oot Tamar hã:
—A mayb ahõm Timanãh hẽnh ta masããh b'éé wii hehõk doo.
14 Ta heen n'aa näng bä m' ta mayb ky n'aa, tii bä m' tahỹỹd däk mä ta saroor, ty kajasuu däk mä saroor sawasaab is doo me, tanahapäh hyb n'aa. Ti m' tabasoo däk Enajĩm tyw n'aa noo bä, ta tyw n'aa Timanãh hahõm doo me. Tii d’ tawén d'oo, tahapäh ti dooh Judah t'aah tagad'oo hadoo doo tan'oo wäd bä ta patug pan'aa tah'yyb.
15 Ti m' Judah bahapäh bä, ty kajasuuh do hyb n'aa, ỹỹnh hajõk sii he'ỹỹh doo ted'oo mäh. 16 Dooh m' tah'yy ganyy bä ta takaanh tado bä. Ti hyb n'aa m' tawén hõm kän tahasooh hẽnh. Ti m' taky hadoo ta hã:
—Ỹ karẽn ỹ baỹỹh a sii —näng mäh.
Ti m' taky hadoo:
—H'ëëd manoo péh ta säm hã ỹỹh? —näng mä ỹỹnh kyyh.
17 Ti m' taky hadoo:
—Ỹ mejũũ masãh ỹỹ uuh kabara t'aah —näng mäh.
—H'ëëd manoo péh ta heen n'aa mamejũũ doo hã —näng mä ỹỹnh kyyh.
18 —H'ëëd makarẽn pé ỹ anoo a hã? —näng mä Judah kyyh.
—Ỹ karẽn manoo a nuu hã hasooh do heen n'aa paah. A tatu na-ããj hẽ matón doo —näng mä ta kyyh Judah hã.
Ti m' Judah an'oo däk ta hã ta nuu hã hasooh do heen n'aa, ta tatu sii hẽ m'. Aä̃ kän mä tii bä ta sii. Etaa däk mä tii bä Judah t'aah. 19 Tamar babaaj hõm bä p'aa hẽnh, takabon nyyh ta maméts jasu. Tadasuun jëng p'aa hẽnh mä ta patug dajëp do saroor n'aa.
20 Ti m' ti noo gó kä Judah mejũũ ta najiis hã kabara t'aah tagabaanh hyb n'aa tan'oo däk do ỹỹnh hã. Adurãm buuj, ta najiis ahõm kän mäh. Dooh m' tawyyd bä ỹỹnh. 21 Teaaj kän mä ajyy sa hã tii bä babuuj n'aa hã:
—Nyyh bä tabagä ỹỹnh hajõõ sii he'ỹỹh doo Enajĩm tyw n'aa me hes'ooh doo? —näng mä ta kyyh.
Ti m' raky hadoo:
—Dooh babä hesóh péh ta tii.
22 Abaaj hõm kän mä p'aa hẽnh, taher'oot mä Judah hã:
—Dooh ỹ awyyd bä ỹỹnh tii bä. Raher'ood bä hã ỹỹ, dooh m' ta tii bä hes'ooh péh —näng mä Judah najiis kyyh.
23 Ti m' Judah ky hadoo:
—Namanäh. Namapadëëk hät ỹỹ ta wë. Ỹ da wawaw n'aa näng, ỹ awäd bä ta jawén tii bä. Ỹ karẽn né paawä ỹ an'oo däk ta hã kabara. Dooh mawyyd bä —näng mä Judah kyyh.
24 Ti m' tamawob hẽ tabadoo däk bä ta kamarab n'aa, raher'oot Judah hã ta takaanh Tamar häd näng doo, ỹỹnh hajõõ sii he'ỹỹh doo hado däk tawén etaah.
Ti m' Judah ky hadoo:
—Bë mana panang bä naa. Bë ajuu tä tadajëp hyb n'aa —näng mä ta kyyh.
25 Ti m' ramanaa bä, Tamar mejõ hõm ta mayb hã taky n'aa. Ti m' ta ky hadoo:
—Ỹ etaah hahỹỹh h'ëëd näng do sii. Mahegãã mahapëë bä jaa ta danäh hahỹỹh heen n'aa, tatu sii hẽ —näng mä Tamar kyyh tamejũũ doo ta mayb hã.
26 Ti m' Judah hapäh, ta h'ëëd né hẽ.
—Ti d’ né hẽ baad up hadoo mahä̃nh ỹỹ, ỹ nanoo do hyb n'aa tah ỹỹ Serah ta hã —näng mä ta kyyh.
Ti hyb n'aa dooh Tamar rajuu wät bä. Ti m' dooh taä̃ wäd bä m' ta sii.
27 Tii kä m' Tamar taah taheen n'aa ta yd enäng doo, gaweréh. 28 Tahenäng noo gó ta seeh moo paa gadëëg däg mä ta seeh mahä̃nh. Ti m' ta hagã n'aa ahũũ däk ta moo hã ta heen n'aa hahiin doo. Ti m' taky hadoo:
—Hahỹỹh wah'ëëh hadoo do pan'aa.
29 P'aa hẽnh ta moo kawahĩĩm jëng bä, ta seeh pooj jé henäng ta mahä̃nh. Ti hyb n'aa ta hagã n'aa ky hadoo:
—Tii d’ né hẽ magas'ëës a tyw n'aa? —näng mä ta kyyh.