Juséh s'ëëh panyyg hahỹỹh
37
Ti m' Jakóh bagëë däk Kanaãh häj n'aa bä ta yb makũũh bawät do paa bä.2 Hahỹỹh Jakóh panyyg hahỹỹh.
Tii kä m' Juséh, Jakóh t'aah, ta wakããn sa sii Biwa taah, Siw-pah taah sa yb masããh rahag'ããs mäh. Pahëëw nä m' Juséh. 17 ãn ti noo gó m'. Tababaaj nä bä m' taher'oot ta yb hã ta wakããn sa ky n'aa. Dooh m' baad raboo b’ tanooh.
Genesis 37:1-35
3 Tak'ëp mä Isaraéw kamahä̃n up ta t'aah Juséh ta wakããn sa mahä̃nh tawah'ëë gó t'aah n'aa tah'yyb. Tii m' tamoo wät ta t'aah Juséh saroor tak'ëp hanäm doo. 4 Ti m' ta wakããn rahapäh bä sa yb kamahä̃n sa mahä̃nh, raty n'aa gesyyg däk ta wakããn hã. Dooh m' ta wakããn rer'ood wät bä baad hadoo doo me ta sii.
5 Ti m' ta see pé noo gó Juséh besëëh. Ta s'ëëh tabaher'oot bä m' ta wakããn sa hã, tii bä tak'ëp raty n'aa gesyyg däk up. 6 Taher'oot mä tas'ëëh ta wakããn sa hã:
—Bë maa newë kyh ỹỹ —näng mäh. —Ỹ her'oot säh ỹỹ bë hã. 7 Gëëw gó ër mewyyt triig pan'aa ta natuuh hã. ër mewyyt bä, ỹ mawyyt doo tii bä p'op tabahëë däk nayyw hẽ. Bë mewyyt do hõõh gó mo haj'a ỹỹ bahëë däk. Kametëh bëëh tũũ bë mo haj'aa mo haj'a ỹỹ mahä̃nh —näng mä Juséh her'oot do ta s'ëëh ta wakããn hã.
8 Ti m' ta wakããn raky hadoo ta hã:
—“ỹ da sa wahëh pan'aa’’, näng apäh a h'yyb? —näk mä ta wakããn sa kyyh ta hã.
Ti m' tak'ëp raty n'aa gesyyg däk ta s'ëëh hyb n'aa, ta kyyh hyb n'aa na-ããj hẽ taher'oot do sa hã.
9 Ta see pé noo gó m' Juséh besëëh ẽnh p'aa hẽnh. Ti m' taky hadoo ta wakããn sa hã:
—Bë maa newë. P'aa hẽnh ỹ besëëh —näng mäh. —Säh ỹỹ gó papỹỹj, kamarab, 11 sakõõh tũũ ranu ehyy bëëh mahä̃nh ỹỹ —näng mä Juséh kyyh.
10 Tabaher'oot bä m' ta wakããn sa hã, taher'oot né hẽ m' ta yb hã ẽnh ta s'ëëh. Ti m' ta yb ky ke'ỹỹm mä ta s'ëëh p'ãã. Ti m' ta yb ky hadoo:
—Tii d’ né as'ëëh? Nyy da mahanang péh ti a s'ëëh? A ỹỹn, a yb, a wakããn nu ehyy b'ëëh mahanäng pé g'e ti a s'ëëh? —näng Jakóh kyyh ta t'aah Juséh hã.
11 Ta hỹỹj mä rahyb n'aa jewës tii bä. Ta yb hyb n'aa newëë mä tii bä ta t'aah s'ëëh.
Juséh ta wakããn resëëm hõm do panyyg n'aa hahỹỹh
12 Ta see pé noo gó m' Juséh wakããn rabahõm Sekẽm hẽnh ta yb masããh hag'ããs doo, jawii rabawaa hyb n'aa, ta yb masããh hã. 13 Ti m' Isaraéw ky hadoo ta t'aah Juséh hã:
—Mahapäh né hẽ a wakããn rahag'ããs ër masããh Sekẽm nedaa bä. ỹ karẽn mabahõm t'ĩĩ hẽnh —näng mä ta kyyh.
—Ej —näng mäh.
14 —Ahõm nä mahegãã a wakããn, ër masããh baad radoo bä. Mamana ta ky n'aa —näng mä ta yb kyyh.
Ti noo gó m' Jakóh rabajeenh Eberõn waëë häj n'aa bä. Tii b’ naa m' tamejũũ ta t'aah Sekẽm hẽnh.
Takaja hõm bä m' Sekẽm hẽnh, daap hẽ tabawät mä t'ĩĩ hẽnh. 15 Tii bä m' takataa aj'yy hã. Ti aj'yy eaanh mäh:
—H'ëëd mahawät?
16 —Wakããn ỹỹ tii ỹ esoos. Dooh maky n'aa napëëh n'yy hẽnh rabahõm sa masããh sii? —näng mä Juséh kyyh takataa do hã.
17 —Babä naa ti rabah'ũũm. Ỹ maa newëë raky hadoo, “taw'ããts hẽ ër kah'ỹỹt Dotãn hẽnh’’ —näng mä aj'yy kyyh ta hã.
Ti hyb n'aa Juséh wén hõm kän mä sa jawén. Dotãn nedaa bä m' takataa sa hã. 18 Dawyy tabawät nä bä m' ta wakããn rabahapäh. Takataa pooj jé m' sa hã rakaner'oot ranaboh jat hyb n'aa sa hỹỹj.
19 —Wät da ta tii ta s'ëëh ỹỹn —näk mä sa kyyh.
20 Ti m' raky hadoo:
—Hamäh ër naboh jat its. Tii bä ër dawäts suun naëng hood t'op kajëng doo gó. Ti d’ ër baher'oot, hahỹỹ da d’ ër kyyh: “tabanas'aa awëë jëng’’. Tii d’ ër baheg'ããs ta s'ëëh bajawaa nyy bä —näk mä sa kyyh.
21 Tii kä m' sa hỹỹj wah'ëëh hadoo doo, maa napäh bä m', tat'yyd mehĩĩn mä ta hã. Ti hyb n'aa m' tawén ky hadoo:
—Dooh ër naboh bä —näng mäh. 22 —Bë naboh manäh. Bë karẽn bä bë dawäts suun naëng hood t'op kajëng doo gó babä banawäng bä. Bë naboh manäh tii —näng mä Rubẽnh kyyh.
Tii d’ tawén edoo mä tado nyyh p'aa hẽnh tamahũũm hyb n'aa paawä ta yb wë.
23 Juséh kaja nä bä m' ta wakããn sa wë, rakabo nyyh ta saroor hanäm doo, 24 radawäts suun naëng hood gó, t'op kajëng doo gó. Rakadawäts gëët doo gó, dooh m' naëng ti noo gó.
25 Ti m' rabatooj däk bä sa tä hawëh doo, dawyy naa m' rabahapäh Is-maéw buuj ramatoonh doo me ratabës. Sa masããh kameer mahũũm mä ji waa ty kamabuuj, ji hawuuk buu benyym doo, ta syyj tats'ooh s'ëëb. Girijad panäng bä naa m' tii. Esito tyw n'aa me m' ramahũũm rabes'ëëm hyb n'aa t'ĩĩ hẽnh.
26 Ti m' Judah ky hadoo ta hỹỹj sa hã:
—H'ëëd ta säm ër naboh jäd bä ër hỹỹj, ër jejëën bä ër mo haj'aa? —näng mäh. 27 —Taw'ããts hẽ ër esëëm hõm Is-maéw buuj sa hã. Dooh ër naboh bä. ër bód up, ër hỹỹj, ër majyyw up —näng mä Judah kyyh.
—Taw'ããts hẽ —näk mä ta wób sa kyyh.
28 Midijãn buuja ratabës bä m', rado nyyh tii bä Juséh naëng hood gó hagëët do paah. Resëëm hõm mä tii bä Is-maéw buuj sa hã. 20 moeed k'ããts tëg hewak doo ta säm. Ti m' Is-maéw buuj ramahũũm kän Esito hẽnh.
29 [Rabesëëm hõm bä, dooh ta hỹỹj wah'ëëh hadoo doo hapëë bä, Rubẽnh häd näng doo]. Tii kä m' Rubẽnh babaaj nä bä naëng hood bajat bä, taheg'ããs ta hỹỹj, dooh tabegëët paah. Tas'ẽẽd hõm mä ta saroor tii bä ta hỹỹj badoo wät do hyb n'aa. 30 Ahõm kän mä ta hỹỹj sa wë.
—Dooh wäd tii bä ër hỹỹj. Nyy d’ ỹ bad'oo hỹỹ kä? —näng mä ta kyyh ta wakããn sa hã.
31 Ti m' kabara ranaboh jat. Rahawug däk mä Juséh saroor paa kabara majyyw me. 32 Ti m' ramahũũm kän sa yb wë. Ti m' raky hadoo:
—ãã awyyd jat hahỹỹh. Baad mahegãã a t'aah saroor tadoo bä —näk mä sa kyyh.
33 Ti m' tabaheg'ããs, ta t'aah saroor né hẽ m'.
—Tah ỹỹ saroor né hẽ. Tabanas'aa awëë jëng né paah. Tabanas'aa ekog wät né hẽ —näng mä Isaraéw kyyh.
34 Ti m' Jakóh bas'ẽẽd hõm ta saroor. Tadadäg kän mä saroor hebaan doob. Aoot mä hajõõ nuu me ta t'aah p'ãã, tahyb n'aa tón wät mä ta t'aah hyb n'aa. 35 Sahõnh hẽ m' ta taah, ta toog rabana ta wë raky n'aa enä wät né paawä m'. Dooh m' ta h'yyb nyyw wäd bä tii bä ta t'aah hyb n'aa.
—Dooh. Dooh ỹ h'yyb nyyw wäd bä. Ỹ aoot do haj'aa ỹ bahõm tah ỹỹ jawén —näng mä sa yb kyyh sa hã.
Ti d’ né paa m' ta yb baoot ta t'aah hyb n'aa.
36 Ti nuujé m' Juséh Midijãn buuj rabesëëm hõm kän Esito bä. Potipah mä ta häd ti rahesëëm hõm doo. Potipah häd näng doo Esito bä wahë n'aa Paraó häd näng do hagã sa wahëh. Esito bä wahë n'aa Paraó häd näng doo.