Genesis 35

Jakóh P'op Hagä Doo ky n'aa edëng do panyyg n'aa hahỹỹh

Ti m' P'op Hagä Doo ber'oot Jakóh sii:

—Ahõm Betéw hẽnh. T'ĩĩ hẽnh mabawäd däk —näng mäh. —Tii bä mamoo wäd hät ỹỹ b'éé tyng ỹ kasee paa bä a hã mahahõm noo gó a hỹỹj Esauh mahä̃nh —näng mä P'op Hagä Do kyyh Jakóh hã.

2 Tii bä kä Jakóh mejũũ ta ä̃j, ta taah, ta wób ta sii moo bok doo:

—Bë ahääj jëh kabariih ta wób rah'yy kaha'eeh do paah. Bë ehob booh, bë ehỹỹd hõm bë saroor.

Genesis 35:1-29

3 Ta jawén ër ah'ũũm Betéw hẽnh ỹ moo wät hyb n'aa b'éé tyng P'op Hagä Doo noo n'aa. Ti d’ né hẽ P'op Hagä Doo ỹ ky gadoo ỹ nahajaa noo gó. Ti d’ né hẽ P'op Hagä Doo ỹ tahagãã had'yyt hẽ ỹ bawät bä —näng mä Jakóh kyyh sa hã.

4 Tii d’ né kä m' rets'ëëh hõm tii bä sahõnh hẽ sa kabariih ta wób rah'yy kaha'eeh do paa Jakóh hã. Sa nabuuj gamewow sii hẽ m' rabets'ëë hõm. Tii bä kä m' Jakóh jeh'aa bong b'aah yt hã Sekẽm hẽnh. 5 Tii bä kä m' Jakóh ah'ũũm mäh. P'op Hagä Doo an'oo bä Jakóh ä̃m n'aa nyy däk tan'oo bä sa panang nedaa bä haj'eenh do hã. Ti hyb n'aa dooh Jakóh rano n'aa masooh wäd bä.

6 Ti m' Jakóh kaja h'ũũm Betéw hẽnh Kanaãh häj n'aa bä. Pooj jé ta häd mä Rus. 7 Betéw bä kä m' tamoo wäd kän mä b'éé tyng. Ta häd n'oo däk kän mä Ew Betéw^a. Tii b’ né paa m' P'op Hagä Doo kasee ta hã tahahõm noo gó ta hỹỹj mahä̃nh.

8 Tii bä m' tadajëp Jakóh ỹỹn sii moo wät do paa ỹỹnh, Deborah häd näng do paah. Radakä jëng mä b'aah haéh do yt hã. Betéw nedaa bä m' tabasooh ti b'aah. Ti m' rahäd n'oo däk Arõn Bakut^b.

9 Jakóh babaaj nä jawén paa bä m' Padãn Arãm hẽnh naa, P'op Hagä Doo kasee ta hã p'aa hẽnh. Taky n'aa edëë wät, tanoo mä baad hadoo do ta hã. 10 Ti m' takasee bä P'op Hagä Do ky hadoo ta hã:

—A häd Jakóh. Hỹỹ kä Jakóh nadoo wäd a häd. A häd hỹỹ kä Isaraéw —näng mä ta kyyh.

Ti hyb n'aa kä m' ta häd n'oo däk Isaraéw. 11 Ti m' P'op Hagä Doo her'oot ta hã:

—Ỹ né hẽ P'op Hagä Doo, Sahõnh hẽ Haj'aap Doo. Kaood da, kanekan da. A hã tabana sét panaa. A taah sa panaa, sét hẽ panaa had'yyt hẽ. A panaa hã tabana hajõng sa wahëh pan'aa —näng mä P'op Hagä Do kyyh.

12 P'aa hẽnh P'op Hagä Do ky hadoo ẽnh Jakóh hã:

—Hahỹỹh hëëj ỹ anoo däk doo Abrahãm hã, Isaki hã, hỹỹ kä ỹ anoo na-ããj hẽ a hã. A panaa hã na-ããj né ỹ anoo a jawén —näng mä ta kyyh Jakóh hã.

13 Her'ood wät do paa Jakóh sii as'ëëg kän mä p'op tii bä.

14 Ti m' P'op Hagä Doo ber'oot bä Jakóh sii, Jakóh asäg häng tii bä kä pä ji hyb n'aa es'ee do hyb n'aa. Tii bä kä Jakóh hahoog häng ji eëëk doo me, ta syyj me m' na-ããj hẽ tabahahoog häng^c. 15 P'op Hagä Doo ber'ood bä ta sii ta häd n'oo däk Betéw.

Hahỹỹh Jakóh yb, Rakéw daheeh radejëp do panyyg n'aa hahỹỹh

16 Ti m' Jakóh ah'ũũm doo kah'ỹỹt doo Betéw banaa tas'eeh hẽnh. Ramah'ũũm me m', dawëë rababok nä Eparat hẽnh hah'ũũm do paawä, tii bä kä Rakéw t'aah benäng. Baad nenyyh ta t'aah. 17 Ta t'aah henäng noo gó, tak'ëp tamahỹỹnh do hyb n'aa ta hata hag'ããs doo ky hadoo ta hã:

—Eỹỹm manäh, õm t'aah nyy däk hỹỹ kä p'aa hẽnh a t'aah aj'yy —näng mä hag'ããs do kyyh.

18 Rakéw h'yyb edaa däk bä dajëp do pan'aa ta häd n'oo däk ta t'aah Bẽn Oni^d. Ta yb häd n'oo däk tii bä Bejamih^e.

19 Ti noo gó m' Rakéw dajëb kän. Radakä jëng mä tatyw n'aa me Eparat hẽnh hahõm doo me. (Eparat häd seeh Belẽnh). 20 Radakä jëng doo jó, Rakéw makũũh jó kä, tii bä kä Jakóh at'ëëg sëëk pä. Da hẽ ji hapäh nä ta heen n'aa.

21 Ti m' Isaraéw bah'ũũm kän. Panang Migadaw Edeh tatab'ëës jawén paa bä, tii bä kä m' tamoo wäd kän ta tób. 22 T'ĩĩ hẽnh mä Isaraéw rahaj'eenh noo gó ta t'aah Rubẽnh häd näng doo as'ëëg gä ta yb ỹỹm seeh Biwa^f häd näng do sii. Ti m' Isaraéw heen n'aa nyy däk.

12 paa m' Jakóh taah. 23 Leja taah Jakóh sii hahỹỹh sa häd: pooj jé Jakóh t'aah Rubẽnh häd näng doo. Ta jawén Simijãw, Lewi, Judah, Isakah, Seburũn.

24 Rakéw taah Jakóh sii hahỹỹh sa häd: Juséh Bejamih daheeh.

25 Biwa, Rakéw sii moo wät do taah Jakóh sii sa häd mä hahỹỹh: Dãn Napatawi daheeh.

26 Siw-pah, Leja sii moo wät do taah Jakóh sii sa häd mä hahỹỹh: Gad Aser daheeh.

Ti d’ né paa m' Jakóh taah Padãn Arãm bä henäng doo tahagä noo gó.

27 Jakóh abaaj hõm kän mä tii bä ta yb hagä hẽnh Mameréh häd näng doo hẽnh. Mameréh häd näng doo Kirijat-Arabah nedaa bä paa m' ti panang. (Kirijat-Arabah häd seeh Eberõn). T'ĩĩ hẽnh né paa Abraãm, Isaki rababong do paah. 28 Isaki bawäd wät paa m' 180 ta ãn n'aa, 29 tabaaj sëëk ta pooj jé dejëp do sa wë. Tak'ëp mä Isaki wah'ëë däk. Ti m' ta taah Esauh Jakóh daheeh radakä jëng mä sa yb makũũh.