Hahỹỹh Jakóh toog Dina häd näng do panyyg n'aa
34
Tasee pé noo gó kä m' Jakóh toog Leja sii, Dina häd näng doo, eg'ããs ta da hadoo do sa wë, Sekẽm panang hẽnh. 2 Amoor, Hiwita buuj, Sekẽm panang bä wahë n'aa m'. Ta t'aah häd mä panang häd. Ti m' Sekẽm bahapäh bä Dina, tamasoo däk tap'ëë hã tabaỹỹh hyb n'aa ta sii. 3 Tabaỹỹh jawén mä Sekẽm hyb n'aa gadoo Dina, h'yy gehot ta hã.Ti m' er'oot baad up ta sii, ta da ta h'yyb hadoo hyb n'aa. 4 Ti m' Sekẽm her'oot ta yb hã tetsẽẽ hyb n'aa maruus ta ỹỹm pan'aa.
5 Ti m' Jakóh heen n'aa nyy däk bä aj'yy mo haj'aa ta toog hã, ti nuujé ta taah rahag'ããs sa masããh . Ti hyb n'aa m' dooh nayyw ter'ood bä ta toog ky n'aa. Tagada mä ta taah rakajaa.
6 Tii bä m' Amoor, Sekẽm yb ahõm taber'oot hyb n'aa Jakóh sii. 7 Ti m' Jakóh taah rakajaa nä bä nayyw hẽ, rapanyyg enäh. H'yy ketón bong mäh, tak'ëp mä rah'yy gaẽẽj bong sa ä̃nh hyb n'aa. H'yy ketón b'ëëh mäh, rah'yy gaẽẽj bong Sekẽm ad'oo nasaa do Isaraéw buuj hã hyb n'aa, Sakẽm haỹỹh do hyb n'aa Jakóh toog sii. Dooh m' taw'ããts hẽ tadoo bä tii da. 8 Ti m' Amoor ky hadoo sa hã:
—Tah ỹỹ Sekẽm h'yyb nejaa wät bë toog hã. Nayyw hẽ paawä ỹ karẽn bë haëëj bë toog tah ỹỹ ỹỹm. 9 Taw'ããts hẽ ãã gatëë bë uuh, bë gatëë hyb n'aa na-ããj hẽ ãã uuh. 10 Baad bë babong ãã mahang, bë begãã bë bajéhn do pan'aa. Ãã panang bä bë ajeej. Bë moo booh bë es'ëëm doo, bë etsẽẽ doo. Taw'ããts hẽ bë etsẽẽ bë panang pan'aa ãã mahang —näng mä Amoor kyyh sa hã.
11 Ti m' Sekẽm ky hadoo Dina yb hã, ta wakããn hã na-ããj hẽ:
—Taw'ããts hẽ ỹ bë hyb n'aa gado. Ti da ỹ banoo jé bë etsẽẽ do hã ỹỹ —näng mäh. 12 —Bë her'ood hã ỹỹ ä̃m ỹỹ pan'aa säm. Bë ky kajäk doo, bë etsẽẽ doo, ti b’ né ỹ bep'aak. Sét up né ti ỹ karẽn, bë haëënh gëët maruus ä̃m ỹỹ pan'aa —näng mä Sekẽm kyyh sa hã.
13 Ti m' Jakóh taah raky gadoo j'ooj madäk doo me, sa ä̃nh Sekẽm masoo däk do tap'ëë hã do hyb n'aa. 14 Ti m' raky hadoo:
—Dooh tahajaa tii da ãã hã. Dooh ãã an'oo bä aj'yy hã ta masuuj noo byyh kanahõk do hã ãã ä̃nh. Dooh tii d’ baad ãã hã— näk mä sa kyyh. 15 —ãã anoo, ãã ky kajäk doo da bë adoo bä. Ãã karẽn bë sahõnh hẽ ajyy sa masuuj noo byyh kehõk, ãã bë behedoo hyb n'aa. 16 Tii d’ bë adoo bä, ãã anoo ãã toog bë hã. Tii bä kä ãã gatëë bë toog. Tii bä bë mahang ãã baboo kän séd ër bahadoo hyb n'aa —näk mä Jakóh taah sa kyyh. 17 —Bë masuuj byyh kanehõg bä, ãã ado hõm tii bä ãã ä̃nh, ãã ah'ũũm tii bä —näk mä sa kyyh.
18 Amoor ta t'aah dahee m' baad up né hẽ m' Jakóh taah sa kyyh. 19 Sekẽm mä raweh'yyh ta wakããn mahä̃nh. Ti né m' nayyw hẽ kä tabad'oo Jakóh taah ramejũũ doo da, tahyb n'aa gadoo do hyb n'aa sa ä̃nh. 20 Ti m' nayyw hẽ Amoor ta t'aah Sekẽm daheeh rabahõm sa panang noo bä, raber'oot hyb n'aa sa pa hajeenh do sii ajyy. 21 Da näk mä sa kyyh:
—Bok hahỹỹh ajyy ky enyym ër hã. Namajeej ër panang bä. ër esëëm hõm sa hã. Sa hã ër betsẽẽ na-ããj hẽ —näk mä sa kyyh. —Tii bä baad ër getëë hyb n'aa sa toog, ragetëë hyb n'aa ër toog. 22 Rabad'oo doo da ër adoo bä, tii bä rabajeenh ër mahang, tii bä kä séd uuh had'yyt däg kä ëër kä. Rakarẽn sahõnh hẽ ajyy sa masuuj noo byyh kehõg rabad'oo doo da. 23 Ti d’ ër adoo bä, sa masããh, sa ma sahõnh hẽ da ër ma pan'aa. Hamäh, tii da ër bad'oo ramejũũ doo da rabajeenh hyb n'aa ër mahang —näng mä Amoor kyyh ta t'aah daheeh ta pa hajeenh do sa hã.
24 Ti m' sahõnh hẽ ajyy panang bä hajeenh doo ragadoo mä sa kyyh. Baad up mä sa hã kä Amoor ta t'aah daheeh raher'oot doo. Sahõnh hẽ sa masuuj noo byyh kehõg hõm mä tii bä.
25 Tamawoob hẽ tabadoo däk bä m' sa ä̃h, detés nä ajyy sa masuuj byyh noo kehõk doo, pawóp hẽ Jakóh taah, Dina hỹỹj, tii bä rasog däk sa kumããn, rabahõm kän panang hẽnh, ranebooh hyb n'aa panang buuj. Dooh ti babuuj n'aa rah'yy genä bä. Sahõnh hẽ ajyy raneboh jëë kän mäh. 26 Ranaboh jat mä Amoor, ta t'aah Sekẽm. Ragabaaj hõm kän mä tii bä sa ä̃nh Dina, sa tób hẽnh hagëët do paah. Ah'ũũm kän mä tii bä. Moo hed'oo do Simijãw, Lewi mä sa häd. 27 Ti m' Jakóh taah wób ah'ũũm kän mä t'ĩĩ hẽnh panang hẽnh ta wakããn wób raneboh jëng hẽnh. 28 Ti m' rasog hõm panang buuj sa masããh paah, sa wag'ããb sa panang bä hanäng doo, panang bahä̃nh hanäng do na-ããj. 29 Sahõnh hẽ ramahũũm kän mä tii bä, ỹỹj, karapé sii hẽ. Ramahũũm mä sahõnh hẽ tób gó hanäng do paah.
30 Ti m' Jakóh ky hadoo ta taah sa hã, Simijãw, Lewi sa hã:
—Ỹ bë pan'aa takyg kän hỹỹ kä. Ãã wë d’ rakamaj'ĩĩ hỹỹ kä Kanaãh, Pirish buuj, babä bajuuj n'aa. Pawóp its da ëër. Rakataa däk bä ër noo n'aa, sahõnh hẽ da ër bahëëj jëng sa moo gó —näng mä Jakóh kyyh ta taah hã.
31 Ti m' raky gadoo:
—Baad g'e ti a hã ãã ä̃nh hajõõ sii he'ỹỹh do hadoo tan'oo bä? —näk mä sa kyyh sa yb hã.