Hahỹỹh Jakóh kataa do ta hỹỹj hã panyyg n'aa hahỹỹh
33
Ti m' Jakóh beg'ããs ta pooj jé, ti m' tabahapäh ta hỹỹj hana doo. Hajõk ta sii han'aa doo. Tii kä m' Jakóh betyn hõm ta taah ta ỹỹn sa wë. Ta wób Leja sii, ta wób Rakéw sii, ta wób ta ta ä̃j sii moo bok do sii. 2 Pooj jé tamejũũ ta ä̃j sii moo bok doo sa taah sa sii, ta jawén Leja ta taah ta sii, tagadëëg up Rakéw Juséh ta sii. 
Genesis 33:1-16
3 Ta maab hẽ m' Jakóh bahõm sa pooj jé ta hỹỹj hawät hẽnh. 7 nuu me m' tanu ehyng mä tũũ ta kataa do hyb n'aa kä Esaú hã.
4 Ti m' Esauh waj'aa däk tahawät hẽnh. Tawaké däk mäh, tedëë wät mä Jakóh. Aód bong mä tii bä ta hỹỹj daheeh. 5 Esauh hegãã kän ỹỹnh, karapé ta sii habok doo, teaanh mäh:
—Jaa ta tii a sii habok doo?
—Hahỹỹh P'op Hagä Doo mo haj'aa, tanoo däk hã ỹỹ ky enyym do hyb n'aa —näng mä Jakóh kyyh ta hỹỹj hã.
6 Kajaa nä tii bä ta ä̃j sii moo bok do ỹỹnh, sa taah na-ããj hẽ, redëng mäh, tũũ mä ranu ehyy bong. 7 Ta jawén Leja ta taah rakajaa nä, redëng, tũũ né m' ranu ehyy bong tii ẽnh. Takadëëg up kä m' Juséh ta ỹỹn Rakéw daheeh. Kedëë bong né m' tii ẽnh, tũũ m' ranu ehyy bonga.
8 Ti m' Esauh beaanh ta hỹỹj hã:
—Nyy d’ mahanäng péh a masããh mamejõ hõm doo ỹ kataa do hã? —näng ta kyyh.
Ti m' Jakóh ky hadoo:
—Tii da ỹ wén d'oo baad up ỹ magadoo hyb n'aa.
9 Ti m' Esauh ky hadoo:
—Ti anyy däk hajõng masãh ỹỹ. Namanäh tii. Dooh ỹ karẽn bä wakããn ỹỹ.
10 Ti m' Jakóh ky hadoo:
—Dooh, mamahũũm a sii. Baad up ỹ magadoo bä, magado ỹ anoo do a hã —näng mä Jakóh kyyh. —Baad up ỹ magadoo do hyb n'aa P'op Hagä Doo ỹ hapäh pé hadoo ỹ hapäh õm hỹỹ kä. 11 P'op Hagä Doo taw'ããts hẽ hã ỹỹh. Ti anäng sahõnh hẽ wë ỹỹ ỹ karẽn doo. Ti hyb n'aa ỹ karẽn a wë tabaym ỹ anoo do a hã— näng mä ta kyy.
Jakóh ky kah'ũũm do hyb n'aa kä m', ta hỹỹj wén gado kän mä tanoo doo.
12 Ti m' Esauh ky hadoo:
—Hamäh ër abaaj hõm ỹ hawät hẽnh. Séd hã ër bah'ũũm —näng mä ta kyyh.
13 Ti m' Jakóh ky hadoo:
—Dooh. Dooh tahajaa wakããn ỹỹ. Mahapäh né hẽ tah haa h'yyb nahabaa padäg. Masãh ỹỹ ỹ tayy ta taah ned'ëëd is do hyb n'aa. Ỹ awät had'yyt bä sét adëëb bä, dejëp sahõnh hẽ tii bä masãh haa. 14 Ti hyb n'aa ahõm nä poj ỹỹ jé. Kajahẽ ỹ bahõm masãh ỹỹ, tah haa rababok doo da. Ỹ kaja hõm pénh ỹ kaja hõm a panang hẽnh Seih häd näng doo hẽnh wakããn ỹỹ —näng mä Jakóh kyyh.
15 Ti m' Esauh ky hadoo:
—Taw'ããts hẽ ỹ mejũũ sii ỹỹ habok do wób rabahõm a sii— näng mäh.
Ti m' Jakóh ky hadoo:
—Hëd n'aa tii? Jããm né hẽ baad up ỹ magadoo. Namanäh tii.
16 Tii bä kä m' Esauh tsyym kadoo habaaj hõm doo kä ta panang Seih häd näng doo hẽnh. 17 Tii bä kä Jakóh ahõm Sukót hẽnh. T'ĩĩ hẽnh kä takas'ëës mä ta panang pan'aa. Ta moo wät mä ta masããh tób n'aa. Ti hyb n'aa m' ramanaëëj kän panang häd Sukótb.
18 Padãn Arãm hẽnh naa baad up Jakóh kaja nä Sekẽm häd näng do panang nedaa bä Kanaãh häj n'aa bä kä m'. Tii bä m' tabaym Sekẽm nedaa bä. Ti b’ naa m' ji hapäh Sekẽm panang.
Genesis 33:18-34:31
19 Ti m' Amoor taah sa hã tabets'ẽẽ hõm ta panang bod. Tepaag hõm mä panang danäh hã 100 moeed k'ããts tëg hawak doo. Ti m' tamoo wät kän mä ta tób tii bä kä. Amoor häd näng doo, Sekẽm yb paa m' tii. 20 Tii bä kä m' Jakóh moo wät kän b'éé tajejuu do tyng. Ti m' ta häd n'oo däk “P'op Hagä Doo Isaraéw P'op Hagä Doo’’.