Jakóh kataa do pooj jé ta hỹỹj hã panyyg n'aa hahỹỹh
32
Jakóh mä ahõm kän tahahõm hẽnh. Ti m' P'op Hagä Do ããs rakataa ta hã. 2 Tii bä kä m' Jakóh bahapäh bä m' taky hadoo:—Hahỹỹh P'op Hagä Do panang.
Ti m' tamaneëënh ta häd Mahanajĩma.
Genesis 32:1-32
3 Jakóh hỹỹj Esauh awät Séih panang bä Edõm häj n'aa bä. Tii m' Jakóh mejũũ ta pooj jé rapanäk ta hỹỹj Esauh. 4 Ti d’ näng mä ta kyyh:
—Hahỹỹ da d’ bë kyyh wahë ỹỹ hã, Esauh hã: “Mamejũũ do pan'aa kyyh hahỹỹh. Bäp peej ỹ bagëë wät Labãn pa. 5 Ti anyy däk hỹỹ kä wë ỹỹ booj ỹb, jumeto, b'éé, kabara, sii ỹỹ moo bok doo ajyy ỹỹnh. Ỹ mejũũ hahỹỹh panyyg mahawät hẽnh, baad up ỹ magadoo hyb n'aa’’ —näng mä Jakóh kyyh tamejũũ do hã, panäk do hã.
6 Rabaaj nä bä kä Jakóh mejũũ doo, tii bä kä raher'oot kän mä Jakóh hã. Da näk mä sa kyyh:
—ãã eboo nä a hỹỹj Esauh hawät hẽnh. Ti awät da a hỹỹj. A hã takataa. Hajõk ajyy ta sii hana. 400 ajyy ta sii hana.
7 Eỹỹm wät mä tii bä Jakóh. Tak'ëp heỹỹm wät do hyb n'aa m' tetyn hõm tii bä ta sii habok doo, ta masããh na-ããj hẽ pawóp noo gabäh hẽ. 8 Ta h'yyb gó taky hadoo:
—Esauh neboh jëë bä ër wób, ta wób da edëp.
9 Tii bä kä Jakóh ky n'aa etsẽẽ P'op Hagä Do hã:
—Abraãm yp ỹỹ, Isaki yp ỹỹ h'yy kaha'eeh do õm P'op Hagä Doo. Õm né hé Tak'ëp Hyb N'aa Jawyk Do ti ky hadoo hã ỹỹ, “abaaj hõm a häj n'aa hẽnh, a wakããn rahabong hẽnh. Ỹ ky n'aa edëng da õm'’. 10 Dooh its ỹ a matym gó. Ti hadoo né hẽ õm taw'ããts hẽ had'yyt hẽ hã ỹỹh. P'ooj up Joradãn tamiih ỹ hatsëk noo gó jããm né paa tatu ỹỹ moo ỹỹ gó hadäk doo. Hỹỹ kä ti anyy däk pawóp noo gabäh si ỹỹh. 11 ỹ mamo n'aa jesuu wakããn ỹỹ wë. Ỹ eỹỹm ỹ tanoo n'aa maso bä, tah haa ỹỹn, tah haa na-ããj hẽ. 12 P'ooj jé maky hadoo hã ỹỹ, “õm né hẽ ỹ ky n'aa edëng. Ka'oot da ỹ an'oo bä a panaa akajaar k'ããts tëg hawób. Dooh da ji hajaa bä ji etsén bä,’’ noo da õm —näng mä Jakóh kyyh taky n'aa ets'ẽẽ bä.
13 Sét mä ta ä̃h tii bä. Tasëm ta masããh ta hỹỹj hã tanoo do pan'aa. 14 Hahỹỹh tasëm doo: 200 kabara ỹỹnh, 20 kabara ajyy, 200 b'éé ỹỹnh, 20 b'éé ajyy, 15 30 kameer ỹỹnh ta taah ta hata, 40 booj yb ỹỹnh, 10 ajyy. 20 jumeto ỹỹnh, 10 ajyy. 16 Tasëëw hõm doo kä m' tamejũũ ta sii moo bok doo ramahũũm hyb n'aa. Ta seeh mahũũm sét uuh had'yyt hẽ m' kabara, ta seeh mahũũm b'éé had'yyt hẽ m', ta seeh mahũũm kameer had'yyt hẽ m, ta seeh mahũũm booj yb had'yyt hẽ m', ta seeh mahũũm jumeto had'yyt hẽ m'.
Ti m' taky hadoo sa hã:
—Bë ahõm poj ỹỹ jé. Dawëë peej da gapadëëk ta seeh hã— näng mä Jakóh kyyh ta sii moo bok do sa hã.
17 Ti m' tamaher'oot pooj jé hahõm up do hã:
—Wakããn ỹỹ Esauh kataa bä a hã, teaaj bä, “Jaa a kariw n'aa? N'yyh hẽnh mabahõm? Jaa masããh näng mamahũũm doo?’’ 18 Tii bä nanäng da da a kyyh: “A karom Jakóh masããh uuh hahỹỹh. Tamejũũ a matym n'aa. Ti awät. Jawén ỹỹ tabana’’, noo da a kyyh ta hã —näng mä Jakóh kyyh tamejũũ do hã.
19 Tamaher'ood däk duu hẽnh hahõm do sa hã na-ããj hẽ, pooj jé hahõm do her'oot doo da raber'oot hyb n'aa rakataa bä Esauh hã. 20 Ti m' taky hadoo sa hã:
—Bë mabaan manäh bë her'oot kyh ỹỹ n'aa ta hã. Hahỹỹ da d’ bë kyyh: “Ti awät a karom Jakóh ãã jawén’’.
Tii da tawén ky hadoo sa hã, hahỹỹ da ta kyyh ta h'yyb gó:
—Ỹ h'yyb en'ỹỹm ỹ mejõ hõm doo masããh ỹỹ me, pooj ỹỹ jé ỹ mejũũ doo. Sa jawén ỹ kataa bä ta hã napäh h'aa kä da baad ỹ tagadoo bä —näng mä Jakóh ta h'yyb gó.
21 Tii paa m' Jakóh bad'oo, tamejõ hõm ta hỹỹj matym n'aa ta pooj jé. Tamejũũ do paa bä sét nä m' ta ä̃h tii bä.
P'op Hagä Do ããs Jakóh daheeh rakamet'yy panyyg n'aa hahỹỹh
22 Ti noo gó atsëm Jakóh bas'ëëg gëët, tamejũũ ta ä̃j, ta ä̃j wób, ta taah rabatsëg hõm hyb n'aa kapỹỹj Jabók häd näng doo ta pooj jé.
23 Rabatsëk jawén paa bä m', tamejũũ sahõnh hẽ ta ma ramatsëg h'ũũm. 24 Ta maab hẽ m' Jakóh bayyw gëët. Ti m' aj'yy metyy Jakóh. Ta hã hẽ m' tabawag hõm. 25 Ti m' aj'yy dooh tahajaa bä Jakóh, ta kóm duuh tamoo däng mäh. Ti m' rakamet'yy bä, Jakóh kóm duuh tagehỹỹd wät. 26 Ti m' aj'yy ky hadoo ta hã:
—Ỹ meréd hõm, bawag däk!
Ti m' Jakóh ky hadoo:
—Dooh õm ỹ eréd bä ỹ maky n'aa nedëë bä —näng mä ta kyyh.
27 Ti m' aj'yy beaanh:
—Nyy d’ a häd?
—Jakóh hät ỹỹ —näng mäh.
28 Ti m' aj'yy ky hadoo:
—Dooh Jakóh tadoo wäd bä a häd. Hỹỹ kä a häd Isaraéw. Õm kamety wät P'op Hagä Do sii, ajyy na-ããj hẽ. Õm j'aa ketsë. Kametyy do hyb n'aa a häd Isaraéw —näng mä ta kyyh Jakóh hã.
29 Ti m' Jakóh ky hadoo:
—Nayyw hẽ maher'ood a häd.
Ti m' aj'yy ky hadoo Jakóh hã:
—Hëd n'aa meaanh hät ỹỹ?
Ti m' taky n'aa edëë wäd kän Jakóh.
30 Ti m' Jakóh häd n'oo däk tii bä Penijew.
—Ỹ hapäh P'op Hagä Doo matym ỹỹ me ỹ edëp nä —näng mä ta kyyh.
Ti hyb n'aa ta häd n'oo däk Penijew.