Hahỹỹh Jakóh bahõm do ta mayb mahä̃nh panyyg n'aa hahỹỹh
31
Ti m' ta see pé noo gó Jakóh maa napäh Labãn taah, Jakóh hebyy n'aa, sa kyyh:—Jakóh asog hõm sahõnh hẽ ër yb ma paah. Ta wë hanyy däk do sahõnh hẽ ër yb ma paah —näk mä sa kyyh.
2 Tii bä kä m' Jakóh h'yy ganäng ta mayb hã. Ta seeh hadoo däk ta h'yyb ta wë. Dooh pooj jé tahadoo wäd bä tii bä kä.
Genesis 31:1-55
3 Ti noo gó kä Tak'ëp Hyb N'aa Jawyk Doo ber'oot ta sii:
—Abaaj hõm a yb panang hẽnh, a wakããn rahabong hẽnh. A sii né da ỹ bawät —näng mäh.
4 Ti hyb n'aa kä m' Jakóh mejũũ rapanäk ta ä̃j Rakéw Leja daheeh rabana hyb n'aa tamoo wät hẽnh, b'éé tabahag'ããs hẽnh. 5 Rakajaa nä bä Jakóh her'ood kän mä tii bä sa hã:
—Ỹ hegãã bä ta seeh h'yyb hadoo bë yb wë ỹỹh. Dooh pooj jé tahadoo wäd bä. Ti hadoo né P'op Hagä Doo yp ỹỹ h'yy kaha'eeh doo masããh hed'yyt hẽ ỹỹ —näng mä ta kyyh. 6 —Bë hapäh né hẽ tak'ëp ỹ moo wät bë yb sii. 7 Ti hadoo né ỹ tawadii. Ji moo sahõnh hẽ nuu me taky keh'ỹỹt ỹ moo wät do säm hã. Taky keh'ỹỹt né hẽ ỹ moo wät do säm hã, dooh paa P'op Hagä Doo an'oo bä baad nadoo doo mayp ỹỹ moo wäd hã ỹỹ —näng mäh. 8 —Bë yb ky hadoo bä, “b'éé taretẽẽt doo mamoo wät do säm'’, tii bä sa taah taretẽẽt had'yyt hẽ. Bë yb ky hadoo bä, “hỹỹ kä b'éé tebot doo da mamoo wät do säm'’, tii bä ta taah tebot had'yyt hẽ. 9 Tii d’ né hẽ P'op Hagä Doo bad'oo masãh ỹỹ pan'aa bë yb masããh paah —näng mä Jakóh kyyh ta ä̃j sa hã. 10 —Bë yb masããh wahënh noo gó ỹ esëëh. Säh ỹỹ gó ỹ hapäh kabara ajyy tabot doo taretẽẽt doo had'yyt hẽ asëëk ỹỹnh sa jó. 11 P'op Hagä Doo ããs er'oot säh ỹỹ gó: “Jakóh’’, näng. Tii ỹ ky gadäk: “h'ëëd?’’, näng ỹỹh. 12 Tii bä kä ããs ky hadoo: “mahegãã sahõnh hẽ taretẽẽt doo, tebot doo ti hesëëk ỹỹj sa jó. Ti tawén hadoo ỹ hapäh a mayb karẽn tawadii õm. 13 ỹ né hẽ Betéw bä mejëng doo. Tii bä pä p'op mabasäg häng, mahahoog häng ta syyj me ji hyb n'aa es'ee do heen n'aa. Tii bä maky däng hã ỹỹh. Hỹỹ kä nayyw hẽ maberéd däg mabawät doo. Abaaj hõm a panang hẽnh mabenäng do paa bä’’, näng ããs kyh hã ỹỹ— näng mä Jakóh kyyh ta ä̃j sa hã.
14 Ti m' Rakéw Leja daheeh raky hadoo:
—Dooh ti hanäng pé ër ma pan'aa ër yb hanaa. 15 Tas'ẽẽ hẽnh naa hadoo ër yb an'oo bä ëër. Pooj jé tesëëm hõm ëër, ta jawén tahäj jëng ër säm paah. 16 Ti hyb n'aa né hẽ sahõnh hẽ P'op Hagä Doo asog hõm do ër yb ma paah, hỹỹ kä ër ma däk, ër taah ma däk na-ããj hẽ. Ti hyb n'aa sahõnh hẽ P'op Hagä Do mejũũ doo da mabad'oo —näk mä Jakóh ä̃j sa kyyh ta hã.
17 Tii bä kä m' Jakóh ata hõm ta masããh jó ta taah ta ỹỹm, rabahõm tan'oo bä. 18 Ta pooj jé had'yyt hẽ ta masããh rabah'ũũm tan'oo bä m'. Tamahũũm mä sahõnh hẽ ta wag'ããb Padãn Arãm bä naa. Ta yb panang hẽnh mäh, Kanaãh häj n'aa hẽnh mä rahabaaj hõm kän.
19 Labãn ahõm nuuje m' ta masããh wii kegãã doo, ti nuujé m' Rakéw bado hõm ta kabariih. 20 Ti m' ta mayb Arãm buuj, Jakóh wadii. Dooh m' taher'ood bä tabahõm. 21 Ahõm kän mä tii bä Jakóh. Sahõnh hẽ m' ta ma tamahũũm. Tetsëg hõm mä tamiih Ew - - - -parah häd näng doo. Tabatsëk jawén paa bä m', tabahõm kän waëë hẽnh Kiread häd näng doo hẽnh.
22 Ti m' tamawob däk mä Jakóh ä̃h, rapanäk Labãn hã Jakóh hah'ũũm doo. 23 Tii bä kä m' Labãn ataa däk ta wakããn rabah'ũũm hyb n'aa Jakóh jawén. 7 tabadoo bä m' ta ä̃ däk, tii bä m' rakataa däk Jakóh hã Kiread waëë hã. 24 Rakataa pooj jé m', raba'yyh bä, P'op Hagä Doo kasee mä Labãn hã tas'ëë gó. P'op Hagä Do ky hadoo Labãn hã:
—Mamatekä maher'oot do ta hã —näng mä P'op Hagä Do kyyh ta hã.
25 Jakóh tama ta tób Kiread waëë hã. Tii bä Labãn kataa ta hã. Labãn, sahõnh hẽ ta sii habok doo sa dawëë bä raba'ỹỹh. 26 Jet'iip hadoo Labãn ky hado kän Jakóh hã:
—Hëd n'aa tii d’ mabad'oo? ỹ mawadii! H'ëëd hyb n'aa tók ỹỹ mamehũũm rakanarẽẽn doo rabahõm. 27 Hëd n'aa makejëën mahä̃nh ỹỹ? Hëd n'aa ỹ mawadii? Hëd n'aa manaher'oot hã ỹỹ? ỹ moo wäd né paawä jäm mababaaj hõm do jäm n'aa. Sahõnh né paawä ër tsebee bong tii bä. 28 Dooh man'oo bä tatah ỹỹ, tok ỹỹ ỹ kedëë wät paawä sa hã. Dooh baad tadoo tii da —näng mä ta kyyh.
29 Ti m' taky hadoo ẽnh:
—Ỹ hajaa né paawä õm ỹ rejãã bä. Ti ỹ wén moo nahadoo P'op Hagä Doo a yb h'yy kaha'eeh doo ỹ tamaher'oot do hyb n'aa. “Mamatekä maher'oot do ta hã’’, näng hã ỹỹ —näng mä Labãn Jakóh hã. 30 —Ỹ hapäh né hẽ ti makarẽn mababaaj hõm a yb panang hẽnh, mahyb n'aa tón däk a h'yyb. Hëd n'aa ti metsëëg hõm kabarih ỹỹ? —näng mä Labãn kyyh.
31 Ti m' Jakóh ky gadoo:
—Ỹ paa eỹỹm hyp ỹỹ. Magabaanh ỹ ed'oo a toog kawajããn gó. 32 Ta ti a kabariih wë däk doo da, dajëp da —näng mäh. —A daaj hẽ mabaheg'ããs mawyyd bä a h'ëëd hät ỹỹ mahang a wakããn sa matym gó. Tanyy bä a h'ëëd, mamahũũm —näng mä Jakóh kyyh.
Dooh paa m' Jakóh heen n'aa nyy bä Rakéw etsëëg hõm do hã ta yb kabariih.
33 Ti m' Labãn heg'ããs Jakóh yt ỹỹh do yt hã, Leja yt ỹỹh do yt hã, Jakóh ä̃j sii moo bok do rayt ỹỹh do yt hã. Dooh m' tawyyd bä. Ti m' tabaheg'ããs jawén paa bä Leja yt ỹỹh do yt hã, ti m' taheg'ãã kän Rakéw yt ỹỹh do yt hã. 34 Labãn bajëë suun pooj jé m' ta yb kabariih Rakéw ejën däk ta duu tyng jó kameer jó tabahõm bä tajasooh do jó. Ti m' tabahyyh sooh ta jó. Labãn esóts wät né paawä m', dooh m' tawyyd bä. 35 Ti m' Rakéw ky hadoo ta yb hã:
—Kawaj'ããn manäh wë ỹỹh. Dooh ỹ hajaa bä ỹ as'ëëg g'ëëd bä a matym gó. Ỹ nas'aa hyp ỹỹ —näng mä Rakéw kyyh ta yb hã.
Ta yb esóts wät né paawä m', dooh m' tawyyd bä ta tób bä kabariih.
36 Ti m' Jakóh kawajããn wät ta mayb wë.
—H'ëëd mo haj'aa ỹỹ? Ny hadoo péh baad nadoo mo haj'aa ỹỹ a hã ỹ mawén noo n'aa masooh? 37 Hỹỹ kä mesoos do hät ỹỹ mahang, h'ëëd mawyyd kän a tób hẽnh naa? Mametäh a wakããn sa matym gó, wakããn ỹỹ matym gó, rabaher'oot hyb n'aa baad hadoo doo; õm, ỹỹh —näng mä Jakóh kyyh. 38 —Ji moo sahõnh hẽ, ji tsyym sahõnh hẽ ta baab ỹ begëë wät a pa. Dooh noo gó a masããh b'éé, kabara tapanaa dejëb bä móh ỹỹ gó. Dooh ỹ awëh péh a mas'ããh seeh. 39 Tabanas'ãã dajëëb bä a masããh seeh, dooh ỹ metä bä a hã tadajëp bä. Daj ỹỹ hẽ ỹ anoo ta jawén buuj masãh ỹỹ paah. Retsëg hõm bä adëëb bä, atsëm a masããh, ỹ mamejũũ ỹ anoo ta jawén buuj masãh ỹỹ paah. 40 Ti hadoo paa ỹ man'oo bä, adëëb bä tabajuu ỹ bahoop, atsëm hahëëw ỹ bahoop. Dooh ỹ hapëë wäd its hã ỹỹ ty jawyg. 41 Ti hedo had'yyt hẽ a pa ỹ hagëë wäd is noo gó —näng mä Jakóh kyyh ta mayb hã.
Ahõm nä m' Jakóh kyyh ta mayb hã:
—14 ta baab ỹ moo wäd wät a toog säm. 6 ta baab a masããh säm ỹ moo wäd wät —näng mäh. —Ji moo sahõnh hẽ nuu me maky keh'ỹỹt ma ỹỹ säm hã. 42 Ee Hagã do paa tanadoo bä, oow Hagã do paa tanadoo bä paawä, bag hẽnh né paawä ỹ babaaj hõm man'oo bä. P'op Hagä Doo hapäh nyy da ỹ moo wät doo. Naga hẽ atsëm õm tanabuuj gedoo— näng mä Jakóh kyyh ta mayb hã.
43 Ti m' Labãn ky hadoo ta samad hã:
—ỹỹnh tok ỹỹ. Karepé tah haa. B'éé, kabara, sahõnh hẽ masãh ỹỹ. Sahõhn hẽ hahỹỹh hät ỹỹ had'yyt hẽ. Hỹỹ kä nyy d’ ỹ bad'oo tok ỹỹ, sa taah sa hã na-ããj hẽ? —näng mä ta kyyh. 44 —Hỹỹ kä, baad ër kaner'oot. Taw'ããts ër moo wät ër kaner'oot do heen n'aa ër hyb n'aa esee hyb n'aa —näng mä Labãn kyyh.
45 Tii bä kä Jakóh adoo däk pä, tadahäng p'op. 46 Tamaher'oot ta wakããn rabetaa hyb n'aa pä. Ti m' rabat'ëëg häng pä. Rabahajaa bä m', ta pa m' rabawëë käna. 47 Labãn häd noo däk pä rat'ëëg häng doo Jaka Sahadutab. Jakóh häd noo däk Gareedc.
48 Ti m' Labãn ky hadoo:
—Hahỹỹh pä ër at'ëëg häng doo, ër mabaan hõm mahä̃nh ër kaner'oot do heen n'aa pan'aa —näng mä ta kyyh.
—Tak'ëp Hyb N'aa Jawyk Doo hag'ããs ër ketyn boo bä. 50 Tok ỹỹ marejãã bä, ta seeh magat'ëë bä, mahyb n'aa es'ee, dooh ër hapäh péh, P'op Hagä Doo hapäh —näng mä Labãn kyyh.
Ta kyyh hyb n'aa ramaneëënh panang Mis-Pa.
51 P'aa hẽnh Labãn ber'oot ẽnh:
—Häng hahỹỹh pä kat'ëëg häng doo, kasäng häng doo mo haj'aa ỹỹ, ër kaner'oot do heen n'aa. 52 Hahỹỹh ta heen n'aa dooh ỹ tabëëj bä õm ỹ rejãã hyb n'aa. Wë ỹỹ na-ããj dooh matabëëj ỹ hawät hẽnh ỹ manarajãã hyb n'aa. 53 Abrahãm Hagã paah, Naoh Hagã paa ti P'op Hagä Doo. Ti d’ né hẽ hapäh ëër. Tii d’ né moo wät da ër säm baanh ër ky nadahé bä ër kaner'oot doo.
Tii bä kä Jakóh ky däng P'op Hagä Do hã, ta yb h'yy ka'eeh do hã. 54 Ti m' Jakóh tanaboh jat b'éé t'aah, tan'oo däk kän P'op Hagä ta matym n'aa. Ti m' tatsyyd kän ta wakããn rabawëh hyb n'aa ta sii waëë häj n'aa bä. Rabawëh jawén paa bä m', sét nä m' sa ä̃h tii bä. 55 Ti m' jet'iip hadoo bäp paa ta tataah, ta toog Labãn edëë bong. Ti m' taky n'aa kedëë wät. Abaaj hõm kän p'aa hẽnh ta tób hẽnh.