30
Ti m' Rakéw bahapäh bä ti dooh teta bä, h'yy gajew'ëës ta ä̃nh hã. Ti hyb n'aa m' taky hadoo ta patug hã:—Ỹ metaa däg! ỹ netaa bä ỹ dajëp tii bä! —näng mä Rakéw ta patug hã.
2 Ti m' Jakóh kawajããn wät Rakéw wë. Ti m' taky hadoo ta hã:
—P'op Hagä Doo apäh ỹỹh? Ta kyy gó ti mawén netaah —näng mä Jakóh kyyh Rakéw hã.
3 Ti m' Rakéw ky hadoo ta patug hã:
—Ỹ anoo si ỹỹ moo wät doo Biwa mabaỹỹh hyb n'aa ta sii. Tii da ỹ t'aah näng ta hyb n'aa. Teta bä, ỹỹ da ta t'aah ỹỹn pan'aa —näng mä Rakéw kyyh ta patug hã.
4 Ti m' Rakéw bahaëënh ta patug hã ta sii moo wät doo ta ỹỹm hadoo. Ti m' Jakóh aỹỹh ta sii. 5 Etaa däk mäh. Enyy däk mä ta t'aah. 6 Ti m' Rakéw ky hadoo:
—P'op Hagä Doo tametëëh hã ỹỹ, baad né paa tii ỹỹ gadoo hyb n'aa tah ỹỹ. Tamaa napäh kyh ỹỹ ỹ ets'ẽẽ wät doo. Tanoo däk hã ỹỹ tah ỹỹ pan'aa —näng mä Rakéw kyyh.
Ti hyb n'aa tawén häd n'oo däk mä Dãna.
—Pooj jé ä̃nh ỹỹ j'aa ketsë hã ỹỹh. Hỹỹ kä ỹ j'aa ketsë ta hã —näng mä Rakéw kyyh.
Ti hyb n'aa tawén häd n'oo däk mä Napatawib.
9 Ti m' Leja bahapäh tanetaa wät doo tahaëëj däk ta sii moo wät doo, Siw-pah, ta patug hã ta ỹỹm hadoo. 10 Siw-pah etaa däk mä Jakóh sii. 11 Ti m' Leja ky hadoo:
—Baad tabadäng hyp ỹỹ gó —näng mä ta kyyh.
Ti hyb n'aa ta häd n'oo däd mä Gadc.
—Tak'ëp ỹ h'yy kadajang. Ỹ ramanaëënh h'yy kadajang doo ỹỹj hã —näng mä ta kyyh.
Ti hyb n'aa ta häd n'oo däk mä Aserd.
14 Ti m' triig wah'ëë däk bä, rabakããt bä ta ag, tii bä kä Rubẽnh bahõm gëëw gó. Tĩĩ hẽnh tabawyyt b'aah age. Ti m' tamajëëh ta ỹỹn wë, Leja wë. Ti m' Rakéw etsẽẽ ta ä̃nh hã:
—Na ỹ epooh a t'aah majëëh do wób —näng mä ta kyyh.
15 Ti m' Leja ky hadoo ta ä̃nh hã:
—Õm kamatakëë patug ỹỹ hã. Hỹỹ kä makarẽn makamatakëë b'aah ag hã tah ỹỹ majëëh do hã na-ããj hẽ! —näng mä Leja kyyh ta ä̃nh hã.
Ti m' Rakéw ky hadoo:
—Man'oo bä hã ỹỹ b'aah ag, ỹ mejũũ patuk ỹỹ aỹỹh a sii— näng mä Rakéw kyyh Leja hã.
16 Ti m' Jakóh bajëng bä gëëw hẽnh hana doo, nayyw hẽ Leja gadoo taber'oot hyb n'aa ta sii. Hahỹỹ da m' ta kyyh:
—Bedah mabaỹỹ si ỹỹh. Ỹ epaag hõm b'aah ag me tah ỹỹ majëëh doo me Rakéw hã —näng mä Leja kyyh Jakóh hã.
Tii d’ né kä m' tabaä̃ kän Leja sii.
17 Ti m' P'op Hagä Doo maa napäh Leja kyyh, ti hyb n'aa tawén p'aa hẽnh tabetaah Jakóh sii. Ji mapooh oow péh däg mä ta taah Jakóh sii. 18 Ti m' Leja ky hadoo:
—Si ỹỹ moo wät doo ỹ an'oo däk do Jakóh hã, ti mabaj P'op Hagä Doo wén n'oo däk tah ỹỹ —näng mä Leja kyyh.
Ti hyb n'aa tawén häd n'oo däk Isakahf.
—Hỹỹ kä P'op Hagä Doo an'oo däk hã ỹỹ baad hadoo doo. Hỹỹ kä patug ỹỹ ỹ tawëhëë kän hỹỹ kä, ji mapooh oow see pé tah ỹỹ ta sii hyb n'aa —näng mä Leja kyyh.
Ti hyb n'aa tawén häd n'oo däk Seburũng.
21 Ta see pé noo gó Leja betaah p'aa hẽnh. Ỹỹnh mä ta toog. Ta häd n'oo däk mä Dina.
22 Ti m' P'op Hagä Doo hyb n'aa esee Rakéw. Tamaa napäh mä taky n'aa etsẽẽ doo. Ti hyb n'aa m' tawén etaah P'op Hagä Doo an'oo bä. 23 Ti m' Rakéw betaa däg kän Jakóh sii. Enyy däk mä ta t'aah. Tabenyy däk bä m' Rakéw ky hadoo:
—Ỹ nu mebyng do P'op Hagä Doo ado hõm mahä̃nh ỹỹ, ỹ netaah do paa hyb n'aa —näng mä Rakéw kyyh.
24 Ti m' ta häd n'oo däk Juséhh. Ti m' taky hadoo:
—Ỹ karẽn P'op Hagä Doo anoo tah ỹỹ seeh —näng mä Rakéw kyyh.
Tamayb masããh Jakóh hag'ããs do panyyg hahỹỹh
25 Tii kä m' Juséh benäng jawén paa bä m', Jakóh ky hadoo Labãn hã:
—Ỹ karẽn manoo ỹ babaaj hõm hỹỹ kä panang ỹỹ hẽnh. 26 Mahaëëj tah ỹỹ, ä̃m ỹỹ ỹ moo wät do säm a sii. Tii bä ỹ babaaj hõm panang ỹỹ hẽnh. Mahapäh né hẽ tak'ëp ỹ moo wäd wät a sii —näng mä Jakóh kyyh ta gód hã.
27 Ti m' Labãn ky hadoo ta hã:
—Ỹ karẽn paawä mabaym nä pa ỹỹh. Ỹ heen n'aa nyy däk, a hyb n'aa Tak'ëp Hyb N'aa Jawyk Doo ỹ tawén taky n'aa edëë wät —näng mä Labãn kyyh Jakóh hã.
28 Ti m' Labãn ky hadoo ẽnh:
—Maher'ood, nyy hẽ makarẽn ỹ bep'aak a hã? ỹ ep'aak né hẽ —näng mä ta kyyh.
29 Ti m' Jakóh ky hadoo Labãn hã:
—Mahapäh né ti baad ỹ moo wäd wät a sii. Baad up ỹ bahag'ããs a masããh. 30 ỹ kajaa noo gó pawóp its dó a masããh. Hỹỹ kä kaood bong a masããh. Tak'ëp Hyb N'aa Jawyk Doo ky n'aa edëng õm ỹ bawät do a masããh sii. Tak'ëp takaood bong a masããh. Hỹỹ kä ỹ karẽn ỹ moo wät ma ỹỹ hẽnh —näng mä Jakóh kyyh ta mayb hã.
31-32 Ti m' ta mayb ky kah'ũũm Jakóh hã:
—Nyy hẽ makarẽn ỹ ep'aak a hã? —näng mä Labãn kyyh.
Ti m' Jakóh ky hadoo:
—Dooh ỹ karẽn bä takepaag bä hã ỹỹ —näng mä ta kyyh.
Ti m' Jakóh ky hadoo ẽnh:
—Ỹ karẽn ỹ her'oot a hã ỹ h'yyb däng doo —näng mäh. —Ỹ asëm bada tsyt hẽ b'éé taretẽẽt doo, rih hewak doo. Ỹ asëm na-ããj tsyt hẽ b'éé taah haad hesus doo. Ỹ asëm na-ããj hẽ tsyt hẽ kabara wii taretẽẽt doo, rih hewak doo. Ti né da säm ỹỹ. Man'oo bä ỹ ky däng do a hã, tii bä da tii ỹ moo wät nä a sii. A masããh ỹ baheg'ããs —näng mä Jakóh kyyh ta mayb hã.
33 P'aa hẽnh Jakóh ky hadoo ta mayb hã:
—Hỹ jawén mabetsén bä ta säm masãh ỹỹ, tii bä mabaheg'ããs ỹ noo gehub bä. Mabetsén bä masãh ỹỹ, samahang maw'yyd bä kabara taretẽẽt doo nado doo, rih hewak doo nado doo, b'éé taah haad hasus doo nado doo, tii bä mahapäh ti ỹ etsëëg bä a mas'ããh— näng mä Jakóh kyyh ta mayb hã.
34 Ti m' Labãn ky hadoo:
—Taw'ããts hẽ. Baad up né hã ỹỹ maky däng doo —näng mä ta kyyh.
35 Ti noo gó né hẽ m' Labãn basëëw hõm tsyt hẽ ta masããh. Tsyt hẽ m' kabara ajyy tebot doo, gehonh doo na-ããj hẽ. Tsyt hẽ m' kabara ỹỹnh taretẽẽt doo, gehonh doo na-ããj hẽ. Sahõnh hẽ m' rih hewak doo. Tsyt hẽ m' b'éé taah haad hesus doo. Tii bä kä m' Labãn mejũũ ta taah rabahag'ããs tii. 36 Tamejũũ ramahũũm dawëë [takamekuuj mahä̃nh]. Tii bä kä Jakóh hagããs ta mayb masããh wób.
37 Tii bä kä Jakóh bahag'ããs bä ta mayb masããh tagekyyt b'aah. Ta baah hes'ooj hõm tatabot hyb n'aa b'aah. Tamewoob hẽ hedoo doo b'aah tagekyyt mä ta pan'aa. Tasee pé ta seeh, ta see pé ta seeh, ta see pé ta seeh. 38 Tii bä kä m' tadatu b'aah rabahe'ëëk doo gó. Rabaheëëk hẽnh mä rabesëëk sa ỹỹm jó. Tii bä rahapäh b'aah tabot doo, ti hyb n'aa sa taah tahẽnh hẽnh tawén hadoo mäh. 39 Ti hyb n'aa m' sa taah wén taretẽẽt, gehonh, tabot, tii da Jakóh bad'oo do hyb n'aa. 40 Ti m' tsyt hẽ Jakóh basëëw hõm sa taah nehewak doo. Hewak do b'éé hasus do nemuun tadabëëh mäh, hewak doo rabaheg'ããs hyb n'aa. Tii bä tyst hẽ m' tabetaa ta masããh pan'aa. Tsyt hẽ Labãn masããh na-ããj hẽ m'. 41 Rakanebét do pooj jé tadatu b'aah tabot doo kehes'ooj hõm doo. Rabenäng noo gó sa taah kanebéd mä tii bä. Ti m' enäng taretẽẽt, tebot, gehonh ta masããh pan'aa. 42 Meras do pooj jé dooh m' tadatuu bä b'aah. Tii d’ tedoo doo meras mä ta mayb masããh, kanebéd mä ta masããh. 43 Tii d’ tad'oo do hyb n'aa m' Jakóh wegãb däk. Hajõng mä ta masããh. Hajõk mä ta sii moo bok doo, ajyy, ỹỹj na-ããj hẽ. Hajõng né hẽ m' Kamelo, jumeto.