29
Tii b’ naa kä Jakóh ahõm kän papỹỹj hana hẽnh haj'eenh do sa wë. 2 Tamahõm me tahapäh mä ta pooj jé naëng banäng doo. Ta pa tahapäh mä tamawob hẽ b'éé hagã. Ramanaa mä sa masããh raneëëk hyb n'aa t'ĩĩ hẽnh naëng hanäng hẽnh. Pä aéh ta ty gatsë mäh. 
Genesis 29:1-30
3 Sahõnh hẽ b'éé hagã rakajaa bä m' naëng majat bä, tii bä m' raty gas'ëës raneëëk hyb n'aa sa masããh. Ta jawén paa bä p'aa hẽnh raty gatsëë däk mäh. 4 Ti m' Jakóh kajaa nä bä sa pa teaanh sa hã:
—N'yy hẽnh naa bëëh? —näng mä Jakóh kyyh b'éé hagã sa hã.
—Arãn buuj ããh —näk mä sa kyyh Jakóh hã.
5 Ti m' Jakóh beaanh sa hã:
—Bë hapäh Labãn, Naoh tat'aah? —näng mä Jakóh kyyh sa hã.
—ỹỹ. Ãã hapäh —näk mä sa kyyh.
6 Jakóh eaanh mä tii bä:
—Baad up tabawät?
—Baad tabawät —näk mä sa kyyh. —Mahegãã. Wät ta tii ta toog Rakéw ta masããh sa sii —näk mä sa kyyh.
7 Ti m' Jakóh ky hadoo sa hã:
—P'op nä papỹỹj ti bë manaa b'éé. Taw'ããts hẽ bë an'oo naëng sa hã, rabeëg bong hyb n'aa, ti bë mahũũm. Tahajaa nä rabawa nä p'aa hẽnh —näng mä Jakóh kyyh b'éé hegã sa hã.
8 —Dooh. Dooh tahajaa —näk mä sa kyyh ta hã. —ãã gada ta wób. Sahõnh hẽ rakataa b'ëëh bä, tii bä ãã ty gas'ëës naëng. Ãã ty gas'ëës jawén paa bä, tii bä ãã banoo rabeëëk hyb n'aa— näk mä sa kyyh Jakóh hã.
9 Rer'ood nuujé m' Rakéw kaja nä ta yb masããh ne'ëëk doo. B'éé hagã paa m' Rakéw. 10 Ti m' Rakéw Jakóh hapëëh sii hẽ, ta gód masããh manaa doo naëng rabeëëk hyb n'aa, nayyw hẽ Jakóh ty gas'ëës naëng tii bä. Ti m' Jakóh anoo reëëk naëng ta gód masããh hã. 11 Tii bä m' Rakéw Jakóh kedëë wät. Jakóh mä h'yyb heód wät h'yy kadajang do hyb n'aa [pooj jé tahapäh do hyb n'aa ta wakããn].
12 Tii bä m' Jakóh ky hadoo ta hã ta yb wakããn:
—Ỹ Rebéka t'aah —näng ta kyyh Rakéw hã.
Ti m' Rakéw waj'aa hõm tabaher'oot hyb n'aa ta yb hã.
13 Ti m' ta yb Labãn ky n'aa napäh bä kä ta ä̃nh t'aah Jakóh, nayyw hẽ m' tabahõm tagadoo hyb n'aa. Tawaké däk mäh, takedëë wät mä ta s'aah. Ti m' Labãn majë kän ta sii ta tób hẽnh Jakóh. 14 Tii bä kä m' Jakóh her'oot sahõnh hẽ ta hã. Ti m' Labãn ky hadoo ta hã:
—Uuh ỹỹ up õm —näng mä Labãn kyyh ta s'aah hã, Jakóh hã.
Hahỹỹh ta gód toog Jakóh gatëë padëëk do panyyg n'aa
Tii kä m' sét kamarab tabadoo däk bä ta gód pa hagä do Jakóh, 15 Labãn maher'oot. Sét kamarab däk Jakóh moo wät ta gód sii. Ti m' Labãn ky hadoo:
—Dooh taw'ããts hẽ tadoo, bag hẽnh mamoo wät sah ỹỹ. Taw'ããts hẽ ỹỹ ep'aak a hã. Maher'oot nyy hẽ makarẽn ỹ bep'aak a hã —näng mä Labãn kyyh Jakóh hã.
16 Pawóp mä Labãn toog. Wahëëh häd mä Leja. Ta jawén näh häd mä Rakéw. 17 Leja ta matym had ty gabahũũt mäh. Rakéw mä tak'ëp tabanäm tamahä̃nh. 18 Ti m' Rakéw mä Jakóh hyb n'aa gadoo. Ti hyb n'aa m' taky hado kän ta gód hã:
—Ỹ moo wät 7 ta baab a sii a toog Rakéw ỹ gatëë hyb n'aa— näng mä Jakóh kyyh ta gód hã.
19 Ti m' Labãn ky hadoo:
—Taw'ããts hẽ. Taw'ããts né magatëë tas'ee hẽnh naa tagat'ëë mahä̃nh. Pa ỹỹ agëë —näng mä Labãn kyyh Jakóh hã.
20 Ti m' Jakóh moo wät kän 7 ãn Rakéw säm. Tak'ëp tahyb n'aa gadoo do hyb n'aa m' Rakéw, nayyw hẽ tatabës ta hã 7 hadoo do ta baab.
21 Tii kä m' tatabëëj däg bä 7 ta baab Jakóh ky hadoo Labãn hã:
—Hỹỹ kä ỹ karẽn ỹ gatëë. Tabëëj däk ta heen n'aa. Mahaëëj hã ỹỹ ä̃m ỹỹ pan'aa —näng mä Jakóh kyyh ta gód hã.
22 Ti m' Labãn moo wät jäm. Sahõnh hẽ m' tabats'yyt bong ta pa haj'eenh doo. 23 Ti noo gó kä m' atsëm kä, Labãn haëëj kän ta toog Leja Jakóh hãa. Ti m' Jakóh baä̃ kän ta pa kä. 24 Labãn haëëj däk mä na-ããj hẽ ta toog sii moo wät do pan'aa Siw-pah ta häd.
25 Bäp paa Jakóh bahegãã däk Leja, dooh m' Rakéw tadoo bä! Ti m' Jakóh ky hadoo ta gód hã:
—Ỹ mawadii. Hëd n'aa tii d’ mawén d'oo? Mahapäh né ti ỹ moo wät Rakéw ỹ bep'aak hyb n'aa —näng mä Jakóh kyyh ta gód hã.
26 Ti m' Labãn ky hadoo ta hã:
—Babä, ãã babong bä, dooh tagad'ooh hadoo doo pooj jé tagat'ëë bä. Wahëëh pooj jé katëë —näng mä ta kyyh Jakóh hã.
27 Ti m' taky hadoo ẽnh:
—Bë ketëë do jäm n'aa bahëëj jëng bä, ỹ haëëj däk na-ããj hẽ a hã Rakéw, p'aa hẽnh mamoo wäd bä 7 ta baab pa ỹỹ —näng mä Labãn kyyh ta s'aah hã.
28 Ti m' Jakóh ky hadoo ta hã:
—Taw'ããts hẽ —näng mäh.
Ti m' tabahëëj jëng bä Leja ragetëë do jäm n'aa, Rakéw Labãn haëëj däk mä na-ããj hẽ Jakóh hã. 29 Labãn haëëj däk mä Rakéw hã Biwa ta sii moo wät do pan'aa. 30 Ti m' Jakóh baỹỹh Rakéw sii. Rakéw tak'ëp takamahä̃n up mä Leja mahä̃nh. Ti m' Jakóh moo wät kän p'aa hẽnh 7 ta baab Labãn sii.
Jakóh taah panyyg n'aa hahỹỹh
31 Ti m' Tak'ëp Hyb N'aa Jawyk Doo hapäh tii dooh Leja Jakóh kamahä̃n. Ti hyb n'aa m' Tak'ëp Hyb N'aa Jawyk Doo an'oo bä Leja betaah takamanahãn do hyb n'aa. Rakéw dooh m' teta bä.
Genesis 29:31-30:43
—Tak'ëp Hyb N'aa Jawyk Doo hapäh ỹ h'yy katón doo. Hỹỹ kä ỹ t'aah nyy däk do hyb n'aa patug ỹỹ kamahä̃n däk da ỹỹ —näng mä ta kyyh.
33 Ti m' ta see pé noo gó p'aa hẽnh Leja betaa däk ẽnh. Enyy däk ta t'aah, ta häd n'oo däk mä Simijãwb. Tahenäng noo gó m' ta ky hadoo:
—Tak'ëp Hyb N'aa Jawyk Doo maa napäh ỹ dooh patug ỹỹ kamahä̃n bä. Ti hyb n'aa p'aa hẽnh ỹ wén etaah —näng mä ta kyyh.
34 Ti m' tabetaa däk ẽnh p'aa hẽnh. Enyy däk mä ta t'aah. Tabenäng noo gó m' taky hadoo:
—Hỹỹ kä da hã ỹỹ ta h'yyb nyy däk, hỹỹ kä tamewoob däk tah ỹỹ ta sii hyb n'aa —näng mä Leja kyyh.
Ti hyb n'aa tawén häd n'oo däk mä Lewic.
35 Ti m' p'aa hẽnh ẽnh Leja betaa däk. Enyy däk ta t'aah. Tabenäng noo gó m' taky hadoo:
—Hỹỹ kä õm ỹ j'aa etsë Tak'ëp Hyb N'aa Jawyk Doo —näng mä ta kyyh.
Ti hyb n'aa tawén häd n'oo däk Judahd. Dooh m' tetaa wäd bä dó.