28
Ti m' Isaki naëëj nä ta t'aah Jakóh. Tii bä Jakóh taky n'aa edëë wät. Ti m' taky hadoo ta hã:—Dooh ỹ karẽn bä magat'ëë bä Kanaãh häj n'aa buuj. 2 Menyyw hõm a h'ëëd mabahõm hyb n'aa Padãn Arãm hẽnh. T'ĩĩ hẽnh mabawät a oow Betuéw pa. T'ĩĩ hẽnh magat'ëë däk a gód Labãn toog —näng mä ta yb kyyh Jakóh hã.
3 Ti m' taky hadoo ẽnh:
—P'op Hagä Doo, Sahõnh Haj'aap Doo, ti d’ né da õm baad ky n'aa edëng. Ti d’ né da hanoo hajõng a panaa pan'aa. 4 Taky n'aa edëng da õm, a panaa na-ããj hẽ, Abraãm taky n'aa edëng doo mé né hẽ, bë ta danäh tabadoo hyb n'aa hëëj babä bë hëj n'aa hã, P'op Hagä Doo ky n'aa enooh do Abraãm hã hëëj —näng mä Isaki kyyh ta t'aah Jakóh hã.
5 Tii bä kä m' Isaki edëë hõm ta t'aah Jakóh. Ti m' Jakóh bahõm kän Padãn Arãm hẽnh, Labãn tób hẽnh. Labãn Betuéw t'aah, Arãm buuj. Labãn Rebéka hỹỹj. Rebéka Esau Jakó sa ỹỹn. Labãn Jakóh gód.
Esau gatëë doo ta ỹỹm seeh panyyg n'aa hahỹỹh
6 Ti m' Esau heen n'aa nyy däk ta hỹỹj ta yb mejõ hõm Padãn Arãm hẽnh tagat'ëë hyb n'aa t'ĩĩ hẽnh. Heen n'aa näng na-ããj hẽ ta yb kyyh hã Jakóh taky n'aa edëë wät bä, dooh takarẽn bä tagat'ëë Kanaãh buuj. 7 Esau heen n'aa näng mä na-ããj hẽ taky daheeh ta ỹỹn ta yb Jakóh wén hõm kän Padãn Arãm hẽnh. 8 Tii bä kä m' Esau h'yy kadawuung kän, tahapëë kän mä ti dooh ta yb ta ỹỹn ragenaag ta ỹỹm Kanaãh buuj. 9 Ti hyb n'aa kä m' Esau wén hõm kän Is-maéw, Abraãm makũũh t'aah wë, tagat'ëë hyb n'aa ta toog. T'ĩĩ hẽnh kä m' tagat'ëë däg kän mä Maharat, Is-maéw tooga. Nabajot mä ta hỹỹj häd. Ti an'oo bä tamawob däg kä m' ta ä̃j Esau hã.
Jakóh s'ëëh panyyg n'aa hahỹỹh
10 Ti m' Jakóh ahõm Beseeba bä naa Arãn hẽnh. 11 Tahahõm noo gó, tug bä däg tabaỹỹh bä, tabaä̃ jat mä tũũ. Tadoo däk mä pä ta nuu tyng tabaỹỹh hyb n'aa. Tii kä m' tabaä̃ jëng. 12 Ti m' tas'ëë gó m' tahapäh war'aa tyng kadatëë s'ëëg doo mäh. Tũũ naa ta duu häng mäh, wë hã ta poo däk mäh. Tahapäh mä P'op Hagä Do ããs rabehyng rabesëëk ta jó.
13 Ta tyng n'aa poo däk bä Tak'ëp Hyb N'aa Jawyk Doo bagëët mäh. Ti m' Tak'ëp Hyb N'aa Jawyk doo baher'oot Jakóh hã:
—Ỹ né hẽ a oow Abraãm, a yb Isaki hag'ããs doo —näng mäh. —Ỹ anoo a hã a panaa na-ããj hẽ mabajat do hëëj, bë häj n'aa pan'aa. 14 A panaa pan'aa k'ããts tëg hawób da ỹ an'oo bä. Ragetyn hõm papỹỹj hana hẽnh, papỹỹj hahyng hẽnh, takarawaa me, takarawaa seeh hẽnh. A hyb n'aa, a panaa sa hyb n'aa na-ããj hẽ da sahõnh hẽ hëëj haw'ããts hẽ da ỹ ky n'aa edëng. 15 A pa da ỹ bawät. Õm da ỹ heg'ããs had'yyt hẽ mahawät hẽnh na-ããj hẽ. Paa me da õm ỹ manaa babä häj n'aa bä. Dooh d’ õm ỹ eréd bä. Sahõnh hẽ ỹ her'oot do a hã, ti hadoo né da ỹ an'oo bä —näng mä P'op Hagä Do kyyh Jakóh hã ta s'ëë gó.
16 Ti m' Jakóh ty gawëëj däk bä, taky hadoo ta h'yyb gó:
—Bä awäd sé Tak'ëp Hyb N'aa Jawyk Doo, dooh ỹ h'yy ganyy bä —näng mä Jakóh kyyh ta h'yyb gó.
17 H'yyb eỹỹm wät mäh, tahyb n'aa newëë ta h'yyb gó. Ti m' taky hadoo:
—Babä ä̃m n'aa näng. Ta seeh nado babä, P'op Hagä Do tób. Hahỹỹh hỹ póng jé nooh —näng mä Jakóh kyyh ta h'yyb gó.
18 Ti m' tabawag hõm bä, bäp paah, ta nuu tyng paa pä tadahäng mä p'op. Tahahoog häng mä ta syyj me, P'op Hagä Doo ji hyb n'aa es'ee do heen n'aa. 19 Tii bä kä Jakóh häd n'oo däk mä Betéwb. Pooj jé ta häd mä Rus. Tahỹỹ däk mä ta häd.
20-21 Ti m' Jakóh ky däng P'op Hagä Do hã:
—Õm ahõm bä si ỹỹ, ỹ mahagãã bä ỹ hahõm hẽnh, man'oo bä wa ỹỹ, saroor ỹỹ, baad ỹ abaaj nä bä ee tób hẽnh, tii bä da ỹ h'yy gasadä a hã. Tii bä da a hã ỹỹ h'yy gasadä doo. 22 Pä ỹ asäg häng doo, tii bä da ji ky n'aa etsẽẽ a hã. Ji moo sahõnh hẽ hadoo doo manoo do hã ỹỹ, sét hẽ tsyt hẽ a h'ëëd. Sahõnh hẽ manoo do hã ỹỹ sét ken'yyh da ỹ anoo a hã —näng mä Jakóh kyyh P'op Hagä Do hã.