Hahỹỹh Isaki ta t'aah wadii do panyyg n'aa
27
Isaki wah'ëë däk bä m' ty tamaa wäd tii bä. Tanaëënh mä ta t'aah Esau wah'ëëh hadoo doo. Ti m' tanaëënh ta t'aah:—Tah ỹỹ —näng mäh.
—Bä agëët ỹỹh —näng mä ta t'aah kyyh.
2 Ti m' Isaki ky hadoo ta t'aah hã:
—Ỹ wah'ëë däk. Dooh ỹ hapëë bä nyy noo gó ỹ dajëp —näng mä Isaki kyyh ta t'aah Esau hã.
Genesis 27:1-28:22
3 Ti m' tamejũũ ta t'aah:
—Madó däk a gatoj, a karaba, ahõm, makawajaa nä har'ëëng tä ỹỹ —näng mä ta kyyh ta t'aah hã.
4 Ti m' taky hadoo ẽnh:
—Mamoo wäd däg da, mamana da ỹ noo gen'aak doo da mamoo wäd ỹ bawëh hyb n'aa. Tii bä da õm ỹ ky n'aa edëë wät ỹ dajëp pooj jé —näng mä ta kyyh ta t'aah hã.
5-6 Ta ỹỹm maa napäh mä ta patug kyyh, taher'oot do Esau hã. Tii kä m' Esau bahõm bä kawajaah doo, ta ỹỹn ky hadoo mä ta hỹỹj Jakóh hã:
—Ỹ maa napäh a yb kyyh a hỹỹj hã. 7 Hahỹỹ d’ ta kyyh: “Makawajaah tä ỹỹ. Mamoo wäd hanaak doo ỹ bawëh hyb n'aa. Tii bä da õm ỹ ky n'aa edëë wät ỹ dajëp pooj jé’’, näng a yb kyyh ta hã.
—éj —näng mä Jakóh.
8 —Hỹỹ kä mamaa newë ỹ her'oot do a hã —näng ta ỹỹn kyyh ta hã. 9 —Ahõm nä ër masããh habëëh hẽnh, mamana pawóp hẽ kabara taah henyyw is doo ỹ moo wät hyb n'aa a yb tä tanoo gen'aak doo da —näng mäh. 10 —Ti d’ mamahũũm a yb tä tabawëh hyb n'aa, õm taky n'aa edëë wät hyb n'aa tadajëp pooj jé —näng mä Rebéka kyyh ta t'aah hã.
11 Ti m' Jakóh ky hadoo ta ỹỹn hã:
—Nyy da m'? Dooh ỹ hewi bä. Mahapäh né ti dooh ỹ hewi bä. Esau hewi. 12 ỹ ee mepaa bä, tahapäh ỹ wadii tii bä. Tahapëë bä ỹ wadii doo, dooh da ỹ taky n'aa edëë tii bä. Ỹ tawas'ee wät tii bä— näng mä Jakóh kyyh ta ỹỹn hã.
13 Ti m' ta ỹỹn ky hadoo ta hã:
—Õm a yb was'ee bä, hã ỹỹ tii bä tabadäng —näng mä ta ỹỹn kyyh. —Ahõm nä õm ỹ mejũũ doo da, mamana pawóp hẽ kabara taah wë ỹỹ —näng mä Rebéka kyyh Jakóh hã.
14 Ti m' Jakóh ahõm t'ĩĩ hẽnh, sa masããh habëëh hẽnh, tamana kän mä pawóp hẽ kabara taah ta ỹỹn wë. Ti m' ta ỹỹn moo wät ta yb tä tanoo gen'aak doo da. 15 Tii bä kä ta ỹỹn adoo däk mä ta t'aah wah'ëëh hadoo doo saroor hanäm doo, tadadäk Jakóh hã. 16 Tii bä ta ỹỹn moo padadëëk mä kabara byyh me tanu k'yy sii hẽ Jakóh wadii hyb n'aa ta yb. Ti hyb n'aa tii da ta ỹỹn wén d'oo. 17 Ti m' ta ỹỹn an'oo däk Jakóh mahũũm hyb n'aa ta yb tä, pãw tagõõj.
18 Ana kän ta yb wë kä. Tamaneëënh:
—Ee.
—Hëëd tah ỹỹ? Jaa õm? —näng mä ta yb kyyh.
19 Ti m' Jakóh ky hadoo ta yb hã:
—Ỹ né hẽ a t'aah wah'ëëh hadoo doo. Ỹ mamejũũ doo da né ỹ bad'oo. Nu gas'ëëg gahëëh mabawëh hyb n'aa har'ëëng dab, ỹ maky n'aa edëë wät hyb n'aa —näng mä Jakóh kyyh ta yb hã.
20 Ti m' ta yb had h'yy ganäng mä ta hã.
—Nayyw se mabawyyd har'ëëng, tah ỹỹ. Nyy d’ mabad'oo nayyw hẽ mawén w'yyt? —näng mä ta yb kyyh.
Tii kä m' Jakóh ky hadoo ta yb hã:
—Tak'ëp Hyb N'aa Jawyk Doo, P'op Hagä Doo õm h'yyb kasahada doo, ti ỹỹ masa, nayyw ỹ wén w'yyt —näng mä Jakóh kyyh ta yb hã.
21 Ti m' Isaki ky hadoo ta t'aah hã:
—B'ëëp ana haa é, tah ỹỹ, ỹ mepaa hyb n'aa a hã Esau madoo bä —näng mä Isaki kyyh ta hã.
22 Jakóh ahõm kän tii bä ta yb wë. Ta yb mepaa mä kä. Ti m' taky hadoo ta h'yyb gó:
—Ta kyyh Jakóh noo gedoo. Ta moo Esau hadoo ta hã; hewi— näng mä Isaki kyyh ta h'yyb gó.
23 Dooh m' ta h'yy ganyy bä Jakóh tadoo bä, ta t'aah Esau moo hewi do hadoo do hyb n'aa m'. Ti hyb n'aa tawén ky n'aa edëë wät mä ta hã.
24 Taky n'aa edëng pooj jé sét nuu me ta yb beaaj wät p'aa hẽnh:
—Õm né Esau? —näng mä ta yb kyyh.
—ỹỹ. Ỹ né hẽ —näng mä Jakóh kyyh ta yb hã.
25 Ti m' ta yb ky hadoo:
—Mamana ỹ awëëh amo haj'aa dab. Ỹ bawëh jawén paa bä da, õm ỹ ky n'aa õm ỹ ky n'aa edëng da —näng mä Isaki kyyh ta t'aah hã.
Jakóh anoo däk mä tii bä ta yb tä, tahaëëg na-ããj né hẽ uwa bëëh. Tawëë wät, tahaëg wät mäh.
26 Ti m' Isaki ky hado kän ta hã:
—B'ëëp ana. Ỹ matsanetsup wät —näng mä ta yb kyyh ta hã.
27 Ti m' Jakóh ahõm kän, tatsanetsup wät kän mä ta yb. Ti m' ta yb babuu napäh ta t'aah saroor buu bedoo. Esau ted'oo ti hyb n'aa m' tawén ky n'aa edëë wäd kän mäh. Taky n'aa edëng bä m' taky hado kän:
—Hëëj P'op Hagä Doo baad ky n'aa edëng do buu bedoo. Ti buu bedoo tah ỹỹ.
28 Tah ỹỹ, ỹ karẽn P'op Hagä Doo anoo a hã sakõõh tëg nabëëh baad a joom bawäng hyb n'aa, baad tabeaak hyb n'aa. Ỹ karẽn da hajõng P'op Hagä Doo anoo a hã joom ag, pãw pan'aa, uwa s'ëëb na-ããj hẽ.
29 Hajõng da panaa wób õm raweh'ëëh. Õm, a panaa na-ããj hẽ, bë mejũũ da sa hã.
A wakããn sa wahëh pan'aa da õm. A hỹỹj, a hỹỹj panaa na-ããj hẽ õm da raweh'ëëh.
Jé õm wasee doo, tadaaj hẽ takawasee.
Jé õm ky n'aa edëng doo, a da adoo né tii, ky n'aa kedëng né tii —näng mä Isaki kyyh ta t'aah hã, Jakóh hã.
30 Isaki bahajaa bä taky n'aa edëng doo, Jakóh anä kän mäh. Tanä sii hẽ m' Esau kajaa jëng kawajaah do paah. 31 Ti m' Esau moo wäd kän mä hanaak doo ta yb tä kä. Tamehũũm kän mä ta yb wë. Ti m' Esau ky hadoo ta yb hã:
—Nu gas'ëëg gahëëh mabawëh hyb n'aa mo heja ỹỹ dab, tii bä ỹ maky n'aa edëng hyb n'aa —näng mä Esau kyyh ta yb hã.
32 Ti m' ta yb beaanh ta hã:
—Jaa õm? —näng mäh.
—Ỹ né a t'aah wah'ëëh hadoo doo. Ỹ né hẽ Esau —näng mä ta kyyh ta yb hã.
33 Ti m' Isaki maa newëë däk Esau kyyh, ti hyb n'aa m' ta wén ky panadoo wäd mäh, kajuun wät mäh. Ti m' taky hadoo ta hã:
—Jaa péh ti pooj jé hanoo däk tä ỹỹ har'ëëng dab? Makajaa pooj jé ỹ bawëë wät. Ỹ ky n'aa edëë wät tii. Ti hã ti tabadäg däk ỹ ky n'aa edëng doo, ta wë da tabaym —näng mä ta yb kyyh Esau hã.
34 Ti m' Esau heen n'aa nyy däk bä ta yb her'ood do ta hã, tak'ëp mä tah'yy katón do hyb n'aa m' tak'ëp mä ta kyyh:
—Ee, ỹ na-ããj maky n'aa edëë wäd! —näng mä Esau kyyh ta yb hã.
35 Ti m' Isaki ky hadoo:
—A hỹỹj ewäd nä, ỹ tawadii, ti hyb n'aa ỹ wén ky n'aa edëë wät a noo n'aa paah —näng mä ta yb kyyh Esau hã.
36 Ti m' Esau ky hadoo:
—Ti hyb n'aa né hẽ ta häd Jakóha. Pawóp nuu me däg ỹ tawadii. Ti kamatakëë mahä̃nh ỹỹ ee jawén buuj tabahadoo hyb n'aa. Kamatakëë né hẽ ee ma paa hã. Hỹỹ kä kamatakëë né hẽ ky n'aa kedëng do hã, noo na ỹỹ paa hã —näng mä Esau kyyh ta yb hã.
P'aa hẽnh Esau ky hadoo ta yb hã:
—Ee, dooh wäd a wë ỹ maky n'aa edëë wät péh n'aa? —näng mä ta kyyh.
37 Ti m' Isaki ky hadoo:
—Ỹ ky däng Jakóh né d’ a wahëh. Ỹ ky däng na-ããj hẽ ta wakããn tamejũũ pan'aa. Ỹ ky däng na-ããj hẽ ta hã hajõng pãw pan'aa, uwa s'ëëb na-ããj hẽ. Dooh ỹ ad'oo péh hỹỹ kä a hã —näng mä ta yb kyyh ta t'aah Esau hã.
38 Ti m' Esau ky kah'ũũm ta yb hã. Teaanh mä p'aa hẽnh:
—Sét né hẽ maky n'aa edëng doo? ỹ na-ããj né hẽ ỹ maky n'aa edëë wät ee! —näng mä Esau kyyh.
Tak'ëp mä tabaoot ta p'ãã.
39 Ti m' ta yb ky hadoo ta hã:
—Dawëë da mabawät hëëj banäm do mahä̃nh. Dooh da tanyy bä t'ĩĩ hẽnh sakõõh tëg nabëëh mahawät hẽnh. 40 A kumãn hyb n'aa da mabedëp. Õm, a panaa, a hỹỹj da mejũũ bë hã. Ta jawén, bë h'yyb kawepëën bä ta panaa sa wë jawén paa bä, dooh bë tamejõ wäd bä tii bä —näng mä Isaki Esau hã.
41 Ti m' Esau kawajããn kän ta hỹỹj wë. H'yy kaneréd kä m' hawät kän Jakóh ta yb ky n'aa edëë wät do hyb n'aa m'. Ti m' Esau ky hadoo:
—Edah da ee dajëp. Tadajëp jawén paa bä, tii bä da ỹ nabooh Jakóh —näng mä ta kyyh.
42 Ti m' rabaher'ood bä ta ỹỹn hã Esau kyyh. Tii bä kä m' tamejũũ ranaëënh Jakóh. Ti m' taky hadoo ta hã:
—Ỹ ky n'aa napäh a hỹỹj karẽn õm mä da tanabooh —näng mä ta ỹỹn kyyh.
43 Ti m' taky hadoo ẽnh:
—Mamaa newë kyh ỹỹ! Nayyw hẽ! Ahõm Arãn hẽnh, hä̃j ỹỹ Labãn wë. Tahawät hẽnh mahahõm —näng mäh. 44 —T'ĩĩ hẽnh mabawät dó takawajããn keréd hõm hyb n'aa a hã. 45 Takawanaj'ããn wäd bä, ta h'yyb mabaan hõm bä tii d’ mad'oo do ta hã, tii bä da õm ỹ mejũũ ranaëënh mababaaj nä hyb n'aa. Dooh ỹ karẽn séd nemuun bë dejëb bä séd noo gó! —näng ta ỹỹn kyyh ta t'aah hã, Jakóh hã.
46 Ti m' Rebéka ahõm ta patug Isaki wë. Ti m' taher'oot ta hã:
—Ỹ h'yyb napaa däk Hit sa toog Esau gat'ëë däk do hyb n'aa. Jakóh na-ããj hẽ tagat'ëë bä Hit buuj, taw'ããts hẽ ỹ dajëp tii bä —näng mä Rebéka kyyh ta patug hã.