Hahỹỹh Isaki kah'ỹỹt do panyyg n'aa
26
Ti m' ta see pé noo gó Isaki panang bä ti awät sah. Pooj jé ta yb makũũh Abraãm hawät noo gó hadoo ta t'aah Isaki hã sah. Ti hyb n'aa m' Isaki wén hõm kän Gerah hẽnh Abimerék häj n'aa hẽnh. Abimerék häd näng doo Piris buuj sa wahëh. 2 Ti m' Tak'ëp Hyb N'aa Jawyk Doo ber'oot Isaki sii. Ti m' taky hadoo:—Ahõm manäh Esito häj n'aa hẽnh. Ỹ aheet da hëëj mabaym do pan'aa.
Genesis 26:1-35
3 Babä awäd dó Gerah häj n'aa bä. Õm baad ỹ ky n'aa edëng, ỹ hag'ããs da õm —näng mä. —Ỹ anoo da a panaa sa hã sahõnh hẽ hahỹỹh häj n'aa. P'aa hẽnh ỹ beher'oot ỹ ky däng doo a yb makũũh Abraãm hã. 4-5 ỹ anoo da a panaa sakõõh hawób da. Ỹ anoo da a panaa sa hã sahõnh hẽ hahỹỹh häj n'aa —näng mä Tak'ëp Hyb N'aa Jawyk Do kyyh Isaki hã.
Ti m' taky hadoo ẽnh ta hã:
—A panaa hyb n'aa da sahõnh hẽ hëëj haw'ããts hẽ da ky n'aa kedëë hõm da, ỹ Abraãm ky daheeh do hyb n'aa, ỹ mejũũ doo hã, ỹ maa metëëk doo hã, ỹ ky n'aa jaw'yyk doo hã, ti hyb n'aa da— näng mä Tak'ëp Hyb N'aa Jawyk Do kyyh Isaki hã.
6 Ti m' Isaki baym Gerah häj n'aa bä, P'op Hagä Do ky däng doo bä.
7 Tii kä m' Gerah buuj rabeaanh bä ta hã ta ỹỹm, ti Isaki ky hadoo sa hã ti ta ä̃nh. Tak'ëp hanäm do hyb n'aa ta ỹỹm tajejën, ranaboh jat mahä̃nh, ragat'ëë däk tii bä.
8 Ti m' ta see pé noo gó bäp peej rabajeej däk bä Gerah bä, Abimerék ta tób noo bä naa tabahapäh mä Isaki ragem'ũũnh Rebéka daheeh. 9 Ti m' Abimerék mejũũ ranaëënh Isaki. Ti m' Abimerék ky hadoo ta hã:
—Hëd n'aa maky hadoo ‘ä̃nh ỹỹ’ mabanäng. A ỹỹm né hẽ tii!— näng mä Abimerék kyyh Isaki hã.
Ti m' Isaki ky hadoo:
—Ti ỹ wén d'oo ỹ rananabooh hyb n'aa ta p'ãã —näng mä Isaki kyyh Abimerék hã.
10 Ti m' Abimerék ky hadoo:
—Hëd n'aa tii d’ mawén d'oo ãã hã? ãã uuh aä̃ bä paawä a ỹỹm sii, ãã h'yyb haj'aa hẽ hadoo né paawä tak'ëp nesaa do hã. A ky kabuuj né paawä tii —näng mä Abimerék kyyh Isaki hã.
11 Ti m' Abimerék maher'oot kän sahõnh hẽ ta karapee:
—Jé h'ëëd péh Isaki ta ỹỹm daheeh, tii bä ỹ mejũũ ranabooh —näng mä Abimerék kyyh ta karapee sa hã.
12 Ti m' Isaki ejoom ta joom Abimerék sa häj n'aa bä. Tak'ëp Hyb N'aa Jawyk Doo ky n'aa edëng do hyb n'aa hajõng ta joom s'ëëb. A'oot ta joom. 13 Tii bä Isaki wegãb däk mäh. A'oot ta ma, ti hyb n'aa tak'ëp tawén wegãb däk. 14 Hajõng ta masããh, b'éé, booj yb, kabara. Ta sii moo bok doo na-ããj hẽ hajõk. Ti hyb n'aa Piris karapee rahyb n'aa jewëts kän mä tii bä Isaki. 15 Ti m' Piris karapee ragehaa däk sahõnh hẽ naëng hood Abraãm makũũh sii moo bok do samo haj'aa Abraãm hedëp noo gó, Isaki rahyb n'aa jewës do hyb n'aa. 16 Ti m' ta see pé noo gó Isaki Abimerék mejũũ tabahõm tas'ee hẽnh. Ti m' Abimerék ky hadoo ta hã:
—Ahõm nä tas'eeh hẽnh. Õm tak'ëp mabahadoo däk ãã mahä̃nh— näng mä Abimerék kyyh Isaki hã.
17 Ti m' Isaki rabah'ũũm. Sahõnh hẽ ah'ũũm mä ta sii moo bok do na-ããj hẽ. Ti m' Isaki moo wät kän mä ta tób waëë häj n'aa bä. Waëë häj n'aa häd mä Gerah. Tii bä rababoo bong mä ti noo gó. 18 P'ooj ub mäh, ta yb Abraãm makũũh dajëp noo gó m', Piris buuj ragehaa däk do ta yb makũũh mo haj'aa naëng banäng do paa m' Gerah häj n'aa bä. Ti m' tii Isaki kagoos p'aa hẽnh mä ta yb makũũh mo haj'aa tahedëp noo gó. Tii d’ né hẽ m' ta häd Isaki maneëënh ta yb makũũh maneëënh doo da.
19 Ti m' ta see pé noo gó Isaki karapee rakagoos bä raw'yyt mä naëng. 20 Ti m' Gerah buuj b'éé hagã n'aa raky hadoo mä ti naëng sa ma. Isaki b'éé hegã n'aa daheeh ky ked'aak mäh.
—ãã h'ëëd hahỹỹh —näk mä Gerah buuj sa kyyh.
Ti hyb n'aa m' Isaki wén häd n'oo däk naëng rakagoos do häd “ky ked'aak doo’’.
21 Ta jawén, p'aa hẽnh mä Isaki karapee rakagoos ta seeh. Ti hadoo né m' tii ẽnh, ky ked'aak né m' ta p'ãã ẽnh. Ti hyb n'aa Isaki wén häd n'oo däk mä “kamaj'ĩĩ doo’’.
22 Ti m' Isaki rakah'ỹỹt tas'ee hẽnh. T'ĩĩ hẽnh kä rakagoos mä papuuj sa naëng tyw n'aa. Tii bä kä dooh m' raky kedag wät bä ta p'ãã. Ti m' Isaki häd n'oo däk mä “dawë hã’’. Ti hyb n'aa m' tawén ky hadoo Isaki hã:
—Tak'ëp Hyb N'aa Jawyk Doo an'oo däk ër häj n'aa pan'aa badawëë ta wób sa mahä̃nh. Baad ër babok da babä —näng mä Isaki kyyh ta sii habok do sa hã.
23 Ti m' tii b’ naa Isaki kah'ỹỹt Beseeba häd näng doo hẽnh mäh. 24 Ti noo gó kä atsëm Tak'ëp Hyb N'aa Jawyk Doo kasee mä Isaki hã. Ti m' taher'oot ta hã:
—Ỹ né hẽ P'op Hagä Doo, a yb Abraãm h'yy kaha'eeh doo. Eỹỹm manäh. Õm ỹ hag'ããs. A sii ỹ bawät. Õm ỹ ky n'aa edëng da karom ỹỹ Abraãm hyb n'aa. Ỹ an'oo bä da hajõng da a panaa —näng mä Tak'ëp Hyb N'aa Jawyk Do kyyh Isaki hã.
25 Ti m' tii bä Isaki tamaa këë tajejuu do tyng. Ti m' taky n'aa etsẽẽ mä Tak'ëp Hyb N'aa Jawyk Do hã. Tii bä kä Isaki moo wät kän mä ta tób. Ti m' ta sii moo bok doo radu doo rakagoos doo naëng banyy däk hyb n'aa.
Isaki Abimerék rakaner'oot do panyyg n'aa hahỹỹh
26 Tii kä m' ti noo gó Abimerék ahõm mä Isaki hawät hẽnh. Eg'ããs ta wë Gerah bä naa. Ah'ũũm mä ta sii ta hata Ahusat, ta warahén sa wahëh Pików. 27 Rakajaa bä, Isaki eaanh sa hã:
—H'ëëd hyb n'aa bë wén eg'ããs wë ỹỹ —näng mä Isaki kyyh sa hã. —Bë hapäh né hẽ dooh ỹ bë karẽn bä bë mahang. Ỹ bë aheed näh bë häj n'aa bä naa —näng mä Isaki kyyh Abimerék hã.
28-29 Ti m' raky hadoo:
—ãã hapäh né hẽ ti Tak'ëp Hyb N'aa Jawyk Doo hag'ããs õm. Hỹỹ kä, mabahõm ãã mahä̃nh jawén paa bä, ãã hapäh né hẽ ti õm ky n'aa kedëng Tak'ëp Hyb N'aa Jawyk Do an'oo bä. Ti hyb n'aa ãã kaner'oot ãã panang hẽnh. Ãã wén na, ãã karẽn paawä ãã er'oot a sii, baad ãã bahadoo hyb n'aa õm na-ããj hẽ ãã hã. Hamäh haa é, ër ky däng P'op Hagä Do hã —näk mä sa kyyh.
Ti m' raky hadoo ẽnh:
—ãã karẽn paawä bë h'yyb kawanepëën ãã hã ãã wén er'oot a sii. Ãã mahang mahawät noo gó dooh ãã h'yy kawepëën bä a hã. Baad had'yyt paa mabawät ãã an'oo bä. Bë hah'ũũm noo gó, dooh paa bë ãã du naa bä. Tii da ãã karẽn õm ãã hã —näk mä sa kyyh Isaki hã.
30 Ti m' Isaki moo rakaner'oot do waa n'aa. Sahõnh hẽ m' rabawa ta waa n'aa, reëëk mä tahaëëg n'aa. 31 Jet'iip hadoo bäp paah, Isaki Abimerék daheeh, raky däng mä P'op Hagä Do hã, rakamajẽ mahä̃nh. Ta jawén paa bä m' Isaki Abimerék kedëë wät. H'yyb nyyw hõm rabah'ũũm mä tii bä kä.
32 Ti noo gó kä m' Isaki sii moo bok doo, naëng kagoos doo, raky n'aa her'oot raw'yyt naëng rakagoos doo. 33 Ti m' naëng rakagoos doo Isaki häd n'oo däk mä Seeba. Ti hyb n'aa kä ta panang häd mä ramanaëënh Beer Seebaa. Da hẽ na-ããj tii d’ ramanaëënh.