Genesis 25

Abraãm taah wób panyyg hahỹỹh ta ỹỹm seeh sii

Sarah makũũh dajëp jawén paa bä m', ta see pé noo gó Abraãm gatëë däk ta ỹỹm seeh. Ketuur mä ta häd. 2 Hahỹỹh mä ta taah sa häd Ketuur sii: Simarãn, Jokasãn, Medãn, Midijãn, Isabak, Suwah. 3 Jokasãn taah pawóp hẽ. Hahỹỹ m' sa häd: Seeba, Dedãn. Dedãn né paa m' ta du na Asuur karapee, Retus karapee, Rew karapee na-ããj hẽ m'. 4 Midijãn taah hahỹỹh: Epah, Epeh, Anók, Abid, Ewadaah. Hahỹỹ sahõnh hẽ Ketuur taah, ta tataah sa häd na-ããj hẽ.

5 Tii kä m' Abraãm haëëj däk ta ma paa sahõnh hẽ Isaki hã. Ta sii moo bok doo, ta tób, ta masããh, naëng majat doo, sahõnh hẽ tabahaëëj däk mä Isaki hã. 6 Tii kä m' Abraãm dajëp pooj jé, ta taah wób sa hã, ta ỹỹm wób sa sii hanaa, tamoo gets'ëë bong sa matym n'aa. Ti m' tamejõ hõm ta taah wób rabahõm sa häj n'aa pan'aa hẽnh papỹỹj hana hẽnh Isaki mahä̃nh.

7 Ti m' Abraãm sahõnh hẽ ta ãn n'aa 175, tii bä m' tadajëb kän.

Genesis 25:7-34

8 Tawah'ëë me tababaaj sëëk mä tawakããn makũũh sa wë. 9-10 Ti m' ta taah Isaki, Is-maéw daheeh radakä jëng ta ỹỹm makũũh pa, gabaho doo gó. Mak-Pewa paa m' ta häd gabaho doo hã. Mameré né daa bä paa m' tii. Abraãm ets'ẽẽ hõm do paa Hit karapee Eperõn, Soah t'aah hã. 11 Ti m' Abraãm dajëp jawén paa bä Isaki P'op Hagä Doo ky n'aa edëë wäd kän. Ti noo gó m' tabagëë wät Beer Rahaj Rooj nedaa bä.

Hahỹỹ Is-maéw Abraãm makũũh t'aah Agah sii panyyg seeh hahỹỹh

12 Tii kä m' Is-maéw, Abraãm makũũh t'aah Agah sii, ta panaa sa häd däk hahỹỹh. Agah häd näng doo Esito buuj Sara sii moo wät do paah. 13-15 Pooj jé Is-maéw t'aah ta häd mä hahỹỹh: Nabajot. Nabajot jawén Kedah. Kedah jawén Abiiw. Abiiw jawén Mibasã. Mibasã jawén Misma. Misma jawén Dumah. Dumah jawén Masa. Masa jawén Adad. Adad jawén Tema. Tema jawén Jetuur. Jetuur jawén Napis. Napis jawén Demah. 16 Hahỹỹh Is-maéw taah hed'yyt hẽ m'. Sa häd had'yyt hẽ sa panang häd. Séd panaa edo hõm ti Is-maéw taah paah. Sahõnh hẽ Is-maéw taah sa panaa sa wahëh hedo hõm. 17 Tii kä m' Is-maéw 137 ãn tabadoo däk bä tadajëp mäh. Abaaj sëëk mä ta wakããn makũũh sa wë. 18 Ti m' Is-maéw makũũh panaa rababoo kän Suur, Awiráh hoo gad'oo bä. Esito häj n'aa nedaa bä paa sa panang. Ti noo gó m' anäng dó ta tyw n'aa Esito hẽnh naa, Asirija häj n'aa hẽnh hahõm doo. Ta tyw n'aa baa bä paa m' Is-maéw makũũh panaa sa häj n'aa. Sam'aa hẽnh paa m' rahabok Abraãm makũũh t'aah seeh panaa sa mahä̃nh.

Hahỹỹh Isaki taah henäng do panyyg

19 Hahỹỹh Isaki, Abraãm makũũ t'aah, panyyg. 20 Isaki gat'ëë däk noo gó 40 ta ãn n'aa, Rebéka tagat'ëë däk noo gó. Rebéka Betuéw toog, Labãn ä̃nh. Padãn Arãm panang bä naa Rebéka yb. Arãm buuj Rebéka wakããn. 21 Dooh paa m' Rebéka eta bä, ti hyb n'aa Isaki wén ky n'aa etsẽẽ Tak'ëp Hyb N'aa Jawyk Do hã, tabetaah hyb n'aa. Ti m' Isaki Tak'ëp Hyb N'aa Jawyk Doo maa napäh ta kyyh. Ti hyb n'aa ta ỹỹm wén etaa däg kän. 22 Ti m' Isaki taah kawereeh ta ỹỹm sii. Rebéka hetaah noo gó ta taah kamaj'ĩĩ mä ta wog gó, ti hyb n'aa taky hadoo:

—H'ëëd hyb n'aa ti tawén hadoo hã ỹỹ?

Ti hyb n'aa kä m' tabeaanh Tak'ëp Hyb N'aa Jawyk Do hã.

23 Ti m' Tak'ëp Hyb N'aa Jawyk Doo baher'oot Rebéka hã:

—Pawóp hẽ a taah a wog gó hapëë doo. Sa panaa kamaj'ii doo du na do pan'aa. Sét hẽ hejoonh ta seeh mahä̃nh. Sa panaa na-ããj hẽ sa da adoo doo. Ta jawén näh hadoo doo kaweh'ëëh ta pooj nä hã. Sa panaa na-ããj hẽ —näng mä Tak'ëp Hyb N'aa Jawyk Do kyyh Rebéka hã.

24 Tii kä m' ta taah henäng noo gó kawereeh né hẽ m'. 25 Pooj jé henäng do hewi mäh. Hahiin mä ta wii. Tak'ëp hewi do hyb n'aa m' saroor hadoo tahenäng noo gó. Ti hyb n'aa m' rawén häd n'oo däk Esau^a. 26 Ta jawén henäng doo Esau tsyym sug hã m' ta moo gamasoo tabenäng. Ti hyb n'aa rawén häd n'oo däk mä Jakóh^b. Ti noo gó m', rahenäng noo gó m' sa yb Isaki 60 ãn.

27 Tii kä m' Isaki taah ewä hõm mäh, pehäw hõm mä tii bä. Esau mä maa kereet hëëj hã tawäd bä, ti hyb n'aa m' moo ejëëh har'ëëng tesĩĩn bä. Ta hỹỹj mä Jakóh masããh hagã paa m'. Tób bä m' tamaken'aak tagëë bä. 28 Isaki kamahä̃n mä ta t'aah Esau, noo gen'aak do hyb n'aa m' tamo haj'aa har'ëëng hã. Ta ỹỹn mä Rebéka kamahä̃n Jakóh.

29 Ti m' ta see pé noo gó Jakóh ew'uup ta waa kamããn hadoo doo. Tii bä m' Esau kajaa hëëj hẽnh hawät do paah. Asa däk tak'ëp. 30 Ti hyb n'aa taky hadoo mä ta hỹỹj hã:

—Na ỹ awa ty gahiin do uuh. Ỹ h'yyb dajëp sah mahỹỹj— näng mä ta kyyh ta hỹỹj hã.

(“Na, ty gahiin do uuh ỹ awa’’ tahanäng do hyb n'aa m' rawén manaëënh Edõm^c).

31 Ti m' Jakóh ky hadoo ta hã:

—Pooj jé ỹ karẽn man'oo däk hã ỹỹ, ỹ kaweh'ëëh hyb n'aa, pooj jé henäng doo ỹ hadoo däk hyb n'aa a jawén buuj.

32 Ti m' Esau ky gadoo ta hỹỹj:

—Taw'ããts hẽ! Hëëd hyb n'aa ỹ karẽn ỹ kaweh'ëëh. Ỹ h'yyb dajëb kän. Dooh hyb n'aa ỹ karẽn péh —näng mä Esau kyyh ta hỹỹj hã.

33 Ti m' Jakóh h'yy ganäng ta hỹỹj hã tawadii mahä̃nh. Ti m' taky hadoo ta hã:

—Pooj jé maky dëë P'op Hagä Do hã õm ehub tadoo bä, man'oo däk né hẽ hã ỹỹ ỹ kaweh'ëëh hyb n'aa —näng mä Jakóh kyyh ta hỹỹj hã.

Ti m' Esau ky däng né hẽ P'op Hagä Do hã. Ti m' Esau haëëj däk mä ta hỹỹj takaweh'ëëh doo ta jawén buuj.

34 Ti m' Jakóh wa n'oo däg kän mä ta hỹỹj tamoo wät do uuh, pãw sii hẽ m'. Ti m' Esau awaa wät, eëg wät mäh, ahõm kän mä tii bä. Dooh m' tahyb n'aa p'eed bä, teréd hõm mä takaweh'ëëh doo.