Abraãm sii moo bok do sa wahëh tamejũũ tesoos Isaki ỹỹm pan'aa panyyg hahỹỹh
24
Tii bä m' Abraãm wah'ëë däk. P'op Hagä Doo sahõnh hẽ taky n'aa edëë hõm ta hã. 2 Tii kä m' Abraãm ky hadoo ta kaseer n'aa hã, sahõnh hẽ Abraãm ma mejũũ do hã. Hahỹỹ da m' Abraãm kyyh ta hã:—Moo dëëh kóm ỹỹ yt hẽa.
Genesis 24:1-67
Ti m' Abraãm ky hadoo ẽnh:
—Maky dëë haa é Tak'ëp Hyb N'aa Jawyk Do häd gó, danä näng do hã wë hã, hëëj hã —näng mä Abraãm kyyh ta hã.
Ti m' taky hadoo ẽnh:
—Maher'ood haa é! Dooh da ỹ karẽn man'oo bä Isaki gat'ëë bä hahỹỹh buuj, Kanaãh karapee sa toog ër mahang bong doo —näng mä Abraãm kyyh.
4 Ti m' Abraãm ky hadoo ẽnh:
—Ahõm nä panang ỹỹ paa hẽnh, wakããn haa sa wë. T'ĩĩ hẽnh naa mamana Isaki ỹỹm —näng mä Abraãm kyyh ta ta kaseer n'aa hã.
5 Tii kä m' ta karom beaanh Abraãm hã:
—ỹỹnh tah'yyb nanaa bä, nyy d’ ỹ bad'oo tii bä? ỹ mahũũm tii bä a t'aah mahana p'aa hẽnh? —näng mä ta kyyh Abraãm hã.
6 Ti m' Abraãm ky hadoo ta hã:
—Dooh. Dooh ỹ karẽn bä tah ỹỹ abaaj hõm bä panang ỹỹ paa hẽnh man'oo bä —näng mä Abraãm kyyh ta hã.
Ti m' taky hadoo ẽnh:
7 —Tak'ëp Hyb N'aa Jawyk Doo, P'op Hagä Doo, ỹ tamanaa doo ee tób bä naa, häj ỹ n'aa bä naa; hahỹỹh hëëj panaa ỹỹ hã baad taky däng doo, ti né hẽ ti mejũũ da ta ããs a pooj. Ti hyb n'aa da mabaw'yyt Isaki ỹỹm pan'aa ta tii bä —näng mä Abraãm kyyh ta hã. 8 —Maruus h'yyb nanaa bä, h'yy katón manäh ỹ mejũũ do a hã. Ti tado bä, dooh ỹ karẽn bä tah ỹỹ mamahũũm bä panang ỹỹ paah— näng mä Abraãm kyyh tamejũũ do hã.
9 Tamejũũ do moo dëë kän mä tii bä ta góm yt hã. Tii bä kä m' baad taky däng Abraãm hã ta ti ky n'aa hã.
10 Ti noo gó né kä m' ta karom benyyw hõm ji moo sahõnh hẽ kameer Abraãm masããh wób. Tasog däk mä hajõng tetsëëh do pan'aa na-ããj hẽ. Ti m' tabahõm kän Mesopotãm häj n'aa hẽnh, Naoh panang hẽnh. 11 Ti m' Abraãm mejũũ doo kaja hõm sa panang nedaa bä naëng banäng bä. Takaja hõm bä tamejũũ tamasãã rabehyy bëëh tũũ tabahyy gëët hyb n'aa ta jó naa, ta wób na-ããj ta sii habok doo. Tug bä däg rakaja hõm mä t'ĩĩ hẽnh naëng ỹỹj rabaheg'oop bä. 12 Ti m' Abraãm mejũũ doo rakaja hõm bä taky n'aa etsẽẽ P'op Hagä Do hã. Ti m' taky hadoo:
—Tak'ëp Hyb N'aa Jawyk Doo, P'op Hagä Doo, kariw ỹỹ n'aa h'yy kaha'eeh do õm. Ỹ karẽn paawä sahõnh hẽ baad hadoo do man'oo hã ỹỹh. Mametäh ti õm taw'ããts hẽ kariw ỹỹ n'aa hã —näng mä ta kyyh P'op Hagä Do hã. 13 —Mahapäh né ti babä ỹ gada naëng majat bä, ỹỹj rabaheg'oop bä hahỹỹh buuj. 14 Maruus kajaa bä, hahỹỹ da d’ kyh ỹỹ ta hã, “man'oo ỹ eëg magóp do uuh’’. Taky hadoo bä hã ỹỹ, “meëg’’, ta noo bä hã ỹỹ, “ỹ anoo na-ããj hẽ a masããh sa naëng’’, tanooh bä, tii d’ tedo bä, ỹ hapäh ti d’ né hẽ man'oo bä Isaki ỹỹm pan'aa. Ti tahado bä, ỹ hapäh tii bä õm ky enỹỹm kariw ỹỹ n'aa hã —näng mä ta kyyh P'op Hagä Do hã.
15 Nahëëj nä taky n'aa etsẽẽ doo, Rebéka nu ganä däk mä naëng hagóp doo. Ta hood tadasooh mä ta janoo bä. Rebéka häd näng doo m' Betuéw toog. Naoh Miwka sa t'aah ti Betuéw. Ti Naoh Abraãm hỹỹj.
16 Rebéka häd näng doo anäm né hẽ m'. Dooh nä m' ajyy tamepëë nä bä. Tii kä m' takajaa bä naëng majat bä ahyng tatyng jó tabagóp hyb n'aa t'õõp majat do uuh. Ti m' as'ëëg kän p'aa hẽnh. Kaja gëëd kän p'aa hẽnh. 17 Tii kä m' Abraãm sii moo bok do sa wahëh nayyw hẽ tabahõm naëng tahagóp hẽnh. Ti m' taky hadoo Rebéka hã:
—Na a naëng uuh —näng mä ta kyyh Rebéka hã.
18 Ti m' Rebéka ky hadoo ta hã:
—Meëg —näng mä ta kyyh.
Ti m' ta janoo bä sooh do paa tan'oo kän mä tabeëëk hyb n'aa. 19 Tii bä kä m' tabeëëk jawén paa bä m', Rebéka ky hadoo ta hã:
—Ỹ da hagóp a masããh sa naëng baad rabeëëk hyb n'aa —näng mä Rebéka kyyh.
20 Tagedu jat mä tii bä kä ta masããh sa naëng rabeheëk doo bä Rebéka hã. Ti m' tamoo n'aa kaw'aat tageduuh doo kä rabeëëk hyb n'aa. Hajõõ nuu me m' tageduuh sahõnh hẽ rabeëëk hyb n'aa. 21 Ti nuujé kä, Rebéka gedu nuujé m', Abraãm mejũũ doo matakëë P'op Hagä Doo an'oo bä né ta hã baad up, tabana doo.
22 Ti m' ta masããh rabeëëg bong jawén paa bä, tanoo däg kän tii bä Rebéka hã gabarëëh doo garĩm sa poo hã radadäk doo. Tets'ëë däk mä na-ããj hẽ pawóp hẽ tamoo heen n'aa k'ããts tëg gabarëëh do s'ëëb. Had jewyk do tii.
23 Tii kä m' Abraãm mejũũ doo eaanh Rebéka hã:
—Jaa a yb? Tahajaa ãã aä̃ bä bë pa sét nuu me a yb tób hẽnh? —näng mä ta kyyh Rebéka hã.
24 Ti m' Rebéka baher'oot ta hã:
—Ỹ Betuéw toog. Miwka, Naoh sa tatoog ỹỹh —näng mä Rebéka kyyh. 25 —Tahajaa bë aä̃ bä ãã pa. Ti anäng a masããh waa jewii — näng mä Rebéka kyyh Abraãm mejũũ do hã.
26 Ti m' Abraãm mejũũ doo ahyy häng ta tarón nu paa me Tak'ëp Hyb N'aa Jawyk Doo hã taj'aa etsë hyb n'aa. 27 Ti m' taky hadoo:
—A hã ỹ j'aa etsë Tak'ëp Hyb N'aa Jawyk Doo, P'op Hagä Doo kariw ỹỹ n'aa h'yy kaha'eeh doo. Õm ky enỹỹw hed'yyt hẽ Abraãm hã. Ỹ mamanaa kariw ỹ n'aa wakããn rahaj'eenh hẽnh —näng mä ky n'aa etsẽẽ do kyyh P'op Hagä Do hã.
28 Ti m' Rebéka waj'aa jëng ta ỹỹn rahaj'eenh hẽnh. Taher'oot mä sa hã tahapäh doo. 29-30 Rebéka hỹỹj, Labãn häd näng doo, tahapäh mä ta ä̃nh moo heen n'aa, ta poo hã hadäk doo na-ããj hẽ. Tamaa newëë ta ä̃nh her'oot doo aj'yy kyyh naëng tahagóp hẽnh. Ti m' nayyw hẽ tabahõm kän tagadoo hyb n'aa Abraãm mejũũ doo. Tagado kän mä naëng majat bä ta masããh mahang tabagëët, ta sii hana do sii.
31 Ti m' Labãn ky hadoo ta hã:
—Hamah sii ỹỹ P'op Hagä Do ky n'aa edëng doo. Hëd n'aa dawëë mabaym? ỹ benyyw däk tób bë yt ‘ỹỹh do pan'aa. Ỹ benyyw däk a masããh rababëëh do pan'aa na-ããj hẽ —näng mä ta kyyh tagadoo do hã.
32 Tii bä kä tamahũũm kän mä ta sii ta tób hẽnh. Rakaja hõm bä tób hẽnh sa wag'ããb sa masããh esëk doo Labãn enyyw bëëh rabaỹỹh bä, tanejëë hyb n'aa Abraãm mejũũ do sa masããh. Ti m' Labãn manaa naëng ajyy sa tsyym hetsyd. 33 Ti m' radasooh sa tä rabawëh hyb n'aa. Ti m' Abraãm mejũũ doo ky hadoo:
—Pooj jé dó ỹ her'oot bë hã ỹ no n'aa na doo. Ti jawén paa bä ỹ bawëh —näng mä Abraãm mejũũ do kyyh sa hã.
—Eej. Maher'ood! —näng mä Laban kyyh.
34 Ti m' taky hadoo:
—Ỹ Abraãm sii moo wät doo. 35 P'op Hagä Doo ky n'aa edëng kariw ỹỹ n'aa Abraãm, tak'ëp tawén ma näng. P'op Hagä Doo anoo hajõng ta masããh, b'éé, booj yb, kameer, jumeto, k'ããts tëg gaberëh doo, hewak doo, ta sii moo bok doo ajyy, ỹỹj —näng mä ta kyyh Labãn sa hã.
36 Ti m' tabeher'oot ẽnh:
—Sarah, Abraãm ỹỹm, sét hẽ ta t'aah ta sii tawah'ëë gó. Sahõnh hẽ ta yb ma tabahaëëj hõm ta t'aah hã —näng mä Abraãm mejũũ do kyyh Labãn sa hã.
37 Ti m' tabedoo ẽnh:
—Kariw ỹỹ n'aa mejũũ ỹ ky däng P'op Hagä Do kyyh gó ỹ tamejũũ doo ỹ bad'oo hyb n'aa. Hahỹỹ d’ ta kyyh ha ỹỹ: “Dooh da ỹ karẽn man'oo bä Isaki gat'ëë bä Kanaãh karapee sa toog ër mahang bong doo. 38 Ahõm nä panang ỹỹ paa hẽnh, wakããn ỹỹ sa wë. Sa uuh mamana Isaki ỹỹm'’, näng kariw ỹỹ n'aa kyyh hã ỹỹ —näng mä ta kyyh sa hã.
39 Taher'oot ẽnh p'aa hẽnh sa hã:
—Ỹ eaanh né hẽ Abraãm hã, “ỹỹnh tah'yyb nanaa bä ẽnh? Nyy d’ ỹ badoo tii bä?’’, näng kyyh ỹỹ Abraãm hã. 40 Ti Abraãm ky hado hã ỹỹ, “Tak'ëp Hyb N'aa Jawyk Doo ỹ ky dah'eeh doo mejũũ da ta ããs a sii sahõnh hẽ baad tabadoo hyb n'aa a hã, wakããn ỹỹ sa uuh mamana hyb n'aa tah ỹỹ Isaki ỹỹm pan'aa. 41 Wakããn ỹỹ sa sii mer'ood wäd bä, ranan'oo bä sa toog a hã Isaki ỹỹm pan'aa, t'yyd kamehĩĩn manäh da õm ỹ mejũũ doo hã’’, näng Abraãm kyyh hã ỹỹ— tii d’ né hẽ Abraãm karom baher'oot Labãn sa hã ta kariw n'aa kyyh.
42 Ti m' Abraãm mejũũ doo ky hadoo ẽnh:
—ãã kajaa bä naga hẽ naëng majat bä, ỹ ky n'aa etsẽẽ P'op Hagä Do hã. Hahỹỹ d’ paa kyh ỹỹ: “Tak'ëp Hyb N'aa Jawyk Doo, P'op Hagä Doo, kariw ỹỹ n'aa h'yy kaha'eeh do õm. Ỹ karẽn paawä sahõnh hẽ baad hadoo do man'oo hã ỹỹh. 43 Mahapäh né ti babä ỹỹ gada naëng majat bä. Maruus kajaa bä, naëng hagóp doo, tii da kyh ỹỹ ta hã, ‘man'oo ỹ eëg magóp do uuh’. 44 Taky hadoo bä hã ỹỹ, ‘meëg’ ta noo bä hã ỹỹ, ‘ỹ an'oo na-ããj hẽ a masããh sa naëng’, tanooh bä, ti d’ tado bä, ti d’ né hẽ man'oo bä Isaki ỹỹm pan'aa’’, näng kyh ỹỹ P'op Hagä Do hã— tii né kä m' Abraãm mejũũ doo tabeher'oot Labãn sa hã.
45 Ti m' tabeher'oot ẽnh sa hã:
—Dooh nä tahëëj nä ỹ ky n'aa etsẽẽ doo hyp ỹỹ gó P'op Hagä Do hã, tii bä Rebéka nu ganä däk naëng hagóp doo. Ta hood tes'ooh ta janoo bä. Tii bä kä tabahyng naëng majat hẽnh, tagóp naëng. Tabanyy bä paa me ỹ ky hadoo ta hã: “na, ỹ eëg’’, näng ỹ ta hã. 46 Nayyw tabahy däk ta janoo bä tes'ooh do uuh. Tanoo ỹ beëëk.
Ti taky hadoo hã ỹỹ: “meëg!’’, näng ta kyyh. “ỹ an'oo na-ããj hẽ a masããh reëëk’’, näng ta kyyh hã ỹỹh. Ỹ eëg wät tii bä. Masããh ỹỹ hã na-ããj né hẽ tanoo reëëk.
47 Tii b’ ỹ beaanh ta hã: “Jaa toog õm?’’, näng kyh ỹỹ ta hã.
Ti taky hadoo hã ỹỹ: “ỹ Betuéw toog. Miwka, Naoh sa tatoog ỹỹh’’, näng Rebéka kyyh hã ỹỹh.
48 Tii bä kä ỹ dadäk ta poo hã gabarëëh doo, ỹ padadëëk ta moo heen n'aa ta moo hã. Tii bä ỹ bahyy häng ta rón ỹỹ nu paa me ỹ j'aa etsë hyb n'aa P'op Hagä Doo.
—Ti ỹ ky hadoo: “A hã ỹ j'aa etsë Tak'ëp Hyb N'aa Jawyk Doo, P'op Hagä Doo kariw ỹỹ n'aa h'yy kaha'eeh doo. Õm né hẽ ti baad manaa ỹỹh, mametëëh hã ỹỹ kariw ỹỹ n'aa hỹỹj ta tatoog tób, baad ỹ wén nu däng ỹ mahũũm hyb n'aa, ta tatoog Abraãm t'aah ỹỹm pan'aa’’, näng kyh ỹỹ P'op Hagä Do hã —näng mä Abraãm mejũũ do kyyh Labãn sa hã.
49 Ti m' taky hadoo ẽnh:
—Hỹỹ kä bë her'ood hã ỹỹ bë ky enyyw bä kariw ỹỹ n'aa hã. Bë her'ood bë an'oo bä, bë nan'oo bä, ỹ heen n'aa näng hyb n'aa, ỹ tyw n'aa esoos hyb n'aa —näng mä Abraãm mejũũ do kyyh Labãn sa hã.
50 Ti m' Labãn Betuéw daheeh raky hadoo Abraãm mejũũ do hã:
—Tak'ëp Hyb N'aa Jawyk Do kyy gó né tii. Dooh ãã keä̃m bä— näk mä sa kyyh ta hã. 51 —Ti agëët né hẽ Rebéka a kariw n'aa t'aah ỹỹm pan'aa Tak'ëp Hyb N'aa Jawyk Doo ky däng doo. Mamahũũm a sii —näk mä sa kyyh ta hã.
52 Ti m' Abraãm mejũũ doo maa napäh bä raher'oot doo, ahyy häng ta tarón nu paa me, tũũ ta maboor hyyj jat Tak'ëp Hyb N'aa Jawyk Do wë. 53 Tii kä m' nayyw he tabets'ëë däk Rebéka h'ëëd k'ããts tëg gaberëh doo, hewak doo, ta saroor na-ããj hẽ. Ta ỹỹn, ta hỹỹj na-ããj hẽ tetsëëh sa hã ky n'aa gebah doo. 54 Ti m' rawëë kän sa tä. Tii bä m' rabaä̃ hõm kän sa pa. Ti m' jet'iip hadoo bäp paah Abraãm mejũũ doo ky hadoo Labãn sa hã:
—Hỹỹ kä man'oo ỹ abaaj hõm kariw ỹỹ n'aa wë —näng mä ta kyyh.
55 Ti m' Rebéka ỹỹn, Rebéka hỹỹj daheeh raky hadoo ta hã:
—Taw'ããts namagëd dó ãã pa. Ta jawén tabahõm. Ji moo sahõnh hẽ ta ä̃h tabahadoo däk bä, tii bä tabahõm —näk mä sa kyyh ta hã.
56 Ti m' Abraãm mejũũ doo ky hadoo sa hã:
—Bë hewaad manäh ỹỹh. Bë hapäh né hẽ sahõnh hẽ baad up P'op Hagä Doo an'oo ỹ bana doo. Nayyw hẽ ỹ karẽn bë an'oo bä ỹ babaaj hõm kariw ỹỹ n'aa wë —näng mä ta kyyh sa hã.
57 Ti m' Rebéka hỹỹj, ta ỹỹn daheeh raky hadoo:
—Taw'ããts hẽ ãã naëënh Rebéka ãã eaanh hyb n'aa ta hã nayyw hẽ takarẽn bä tabahõm —näk mä sa kyyh.
58 Ranaëëj nä kän mäh. Reaanh mä ta hã:
—Makarẽn mabahõm hahỹỹh aj'yy sii?
Ti m' Rebéka ky hadoo:
—ỹỹ. Ỹ karẽn ỹ ahõm ta sii —näng mä Rebéka kyyh.
59 Ti m' Rebéka ahõm kän Abraãm mejũũ do sa sii. Rebéka hagã n'aa na-ããj hẽ m' ahõm sa sii. 60 Ti m' Rebéka rabahõm bä Abraãm mejũũ do sii, ta wakããn raky n'aa edëë wät. Da näk mä sa kyyh ta hã:
—Hajõng doo a panaa. Hajõng ỹỹn pan'aa da õm. A panaa da j'aa getsë sa majĩĩ hã —näk mä Rebéka wakããn ta hã.
61 Tii kä m' Rebéka benyyw hõm kän ta ma. Ta sii moo wät doo na-ããj né hẽ m' tenyyw hõm né tii ẽnh ta h'ëëd. Ti m' Kamelo jó rabes'ëëg toonh. Abraãm mejũũ do jawén rabahõm kän mäh.
62-63 Ti m' p'eets hẽ rababoo däk bä, ti noo gó kä Isaki awät mä joom banäng doo bä. Beer Rahaj Rooj hẽnh mä tahana. Ti noo gó tabagä Negéh häj n'aa bä m'. Joom banäng doo bä tahyb n'aa newëë tabawät tug bä. Ti m' Isaki ty däng, taheg'ããs mäh, ti habok ẽnh mä Kamelo. Tabawät nemuun mä rabana. 64 Rebéka na-ããj hẽ ty däng mäh, tabahapäh mä Isaki. Tii b’ mä tabahyyh gëët. 65 Teaanh ta sii na do hã:
—Jaa wät ta tii ër pooj jé joom banäng bä —näng mä Rebéka kyyh Abraãm mejũũ do hã.
Ti m' taky hadoo Rebéka hã:
—Ta tii né kariw ỹỹ n'aa —näng mä ta kyyh.
Ti m' Rebéka adoo däk ta saroor sawas'aap doo, ty kasapoog däk Isaki mahä̃nh.