Hahỹỹh Sarah dajëp do panyyg n'aa
23
Tii kä m' Sarah, Abraãm ỹỹm, bawäd wät 127 ãn. Tii bä kä m' tadajëb kän. 2 Kirijat-Arabah bä häd näng doo bä m' tadajëp. Eberõn ramanaëënh na-ããj hẽ tadajëp bä, Kanaãh häj n'aa bä. Abraãm aoot tii bä tahyb n'aa tadajëp noo gó m'.
Genesis 23:1-20
3 Tii kä m' Abraãm bahõm Hit karapee sa wë tabetsẽẽ hëëj, ta ỹỹm makũũh tadakëë hyb n'aa. Ti m' taky hadoo sa hã:
4 —Ỹ ta s'eeh hẽnh n'aa bë mahang hawät doo —näng mäh. —Ỹ karẽn paawä ỹ etsẽẽ hëëj ỹ dabong hyb n'aa kamag ỹỹ —näng mä Abraãm kyyh.
5 Ti m' Hit karapee raky hadoo ta hã:
6 —Õm né tak'ëp ky n'aa etsëëh ãã mahang. Makarẽn bä, mabasëëw ãã h'ëëd ãã dabong do pan'aa. Dooh ãã mahang baa besĩĩh péh. Mah'yyb däng bä, madakä a ỹỹm makũũh —näk mä sa kyyh.
7 Ti m' raber'oot jawén paa bä Abraãm nu wakoo gëët Hit karapee sa wë, taweh'ëëh ky n'aa ti sa hã. 8-9 Ti m' taky hadoo sa hã:
—Bë karẽn bä ỹ dakëë bä ä̃m ỹỹ makũũh, bë ky n'aa her'ood kyh ỹỹ n'aa Eperõn, Soah t'aah, bes'ëëm hyb n'aa hã ỹỹh. Ỹ karẽn paawä ỹ betsẽẽ ta hã. Ỹ karẽn ỹ etsẽẽ gabaho doo ta gëëw duu däk bä hanäng doo, Mak-Pewa häd näng doo —näng mä Abraãm kyyh sa hã. —Bë etsẽẽ ta hã tabes'ëëm hyb n'aa hã ỹỹ, ỹ badebong do pan'aa. Tabes'ëëm bä hã ỹỹ, tii b’ né hẽ ỹ bep'aak ta hã —näng mä Abraãm kyyh sa hã.
10 Ti m' tabasooh Eperõn sa mahang sa panang noo bä raber'oot bä. Abraãm Eperõn ky gadoo sahõnh hẽ ramaa napäh bä. 11 Tii m' Eperõn ky hadoo:
—Dooh. Ỹ an'oop ti a hã gëëw, gabaho do na-ããj hẽ —näng mäh. —Sahõnh hẽ ramaa napäh ỹ an'oop ti a hã. Ahõm nä t'ĩĩ hẽnh, madagä nä a ỹỹm makũũh —näng mä Eperõn kyyh Abraãm hã.
12 P'aa hẽnh mä Abraãm nu wakoo däk, taweh'ëëh gëët Hit karapee sa matym gó. 13 Ti m' taky hadoo Eperõn hã. Sahõnh hẽ ramaa napäh:
—Mamaa newëë kyh ỹỹ —näng mäh. —Maher'ood nyy hẽ mabes'ëëm hã ỹỹh. Ỹ karẽn ỹ ep'aak a hã maky däng doo bä. Ỹ karẽn magadoo ta säm ỹ badebong do pan'aa tii bä —näng mä Abraãm kyyh Eperõn hã.
14-15 Ti m' Eperõn weh'ëëh Abraãm. Ti m' taky hadoo ta hã:
—Ỹ mamaa newë. Ta säm its tahajaa 4 kilo tabód t'aa its k'ããts tëg hewak doo. H'ëëd tahajaa is ti ër hã? Ahõm nä madakä nä a ỹỹm makũũh —näng mä Eperõn kyyh Abraãm hã.
16 Taw'ããts hẽ tii Abraãm hã. Tanu ety däk mä tii bä k'ããts tëg hewak doo 4 kilo tabód t'aa its, Eperõn ky däng doo da sahõnh hẽ ramaa napäh bä. Rabes'ëëm do pénh, ti pénh né hẽ m' Abraãm nu ety däk. Tan'oo däk mä Eperõn hã. 17-18 Tii da tad'oo do hyb n'aa Abraãm ta danäh ta wén hadoo däk Mak-Pewa Eberõn gëëw paah, gabaho do sii hẽ, b'aah sii hẽ. Mameré nedaa bä paa m' tabadäk. Sahõnh hẽ Hit karapee sa panang noo bä hatoonh doo rabahap'ëëh Abraãm ta danäh tawén hadoo däk.
19 Her'ood wät do paah, Abraãm ahõm kän, ta ỹỹm tadakä jëë kän mä gabaho doo gó, Mak-Pewa rahanäng doo gó. Mameré nedaa bä m' tii. Mameré na-ããj hẽ ramaneëënh mä Eberõn, Kanaãh häj n'aa bä. 20 Ti hadoo né paa m' Hit karapee rawén n'oo däk kän Abraãm hã gëëw, gabaho do sii hẽ tabadabong hyb n'aa ta kamag.