Abraãm P'op Hagä Doo metyy do panyyg n'aa hahỹỹh
22
Tii kä m' ta see pé noo gó Abraãm P'op Hagä Doo metyy. Tanaëënh:—Abraãm! —näng mä ta kyyh.
—Babä agëët ỹỹh—, näng mä ta kyyh P'op Hagä Do hã.
2 Ti m' P'op Hagä Do ky hadoo ta hã:
—Mamahũũm a t'aah tak'ëp makamahä̃n up doo, sét hadoo do a t'aah. Mamahũũm Morija häj n'aa hẽnh waëë kanekan hẽnh, t'ĩĩ hẽnh mabajuu hyb n'aa tëëg me. Ỹ aheet da waëë a hã majajuu do pan'aa —näng mä P'op Hagä Do kyyh Abraãm hã.
Genesis 22:1-18
3 Jet'iip hadoo Abraãm tenyyw hõm mä ta masããh jumeto, takeky däk tëëg tajuu do duuh pan'aa. Ahõm kän mä tii bä P'op Hagä Doo ky däng hẽnh. Ah'ũũm mä ta sii pawóp hẽ ta sii moo bok doo, Isaki sii hẽ. 4 Ti m' tamawob hẽ tabadoo däk bä ta ä̃h, Abraãm hapëë kän P'op Hagä Doo ky n'aa enooh doo tabajuu do pan'aa häj n'aa. 5 Ti m' taky hadoo ta sii moo bok do sa hã:
—Babä bë ayyw masãh ỹỹ bë bahag'ããs hyb n'aa —näng mä ta kyyh sa hã. —Ba hã ãã maab hẽ ãã bah'ũũm tah ỹỹ daheeh. Ãã ky n'aa etsẽẽ P'op Hagä Do hã. Bedah ãã bana paa me —näng mä ta kyyh.
6 Tii kä m' Abraãm asog däk tëëg, tajuu do duuh pan'aa. Tamejũũ ta t'aah asëët. Tadaaj hẽ tamahũũm mariij t'aah tëëg hõõ na-ããj hẽ. Tii kä m' séd hã rabahõm kän ta t'aah daheeh.
7 Tabahä̃nh ta t'aah beaanh ta hã:
—Eeh —näng mä ta kyyh.
—H'ëëd? —näng mä ta yb kyyh.
—Ti anäng ër wë ta duuh pan'aa. Nyyh tadäk ër ajuu do pan'aa, b'éé? —näng mä ta kyyh ta yb hã.
8 —P'op Hagä Doo anoo da ër hã ër ajuu do pan'aa, tah ỹỹ— näng mä Abraãm kyyh ta t'aah hã.
Ah'ũũm nä tii bä séd hã m'.
9 Rakaja hõm bä kä P'op Hagä Do mejũũ hẽnh, tamoo wäd kän mä pä s'ëëb ta tyng, tajuu do tyng. Ti m' tadatooj kän tëëg ta jó. Tii kä m' tamaw'yyd däk ta t'aah Isaki. Tadaso kän mä tëëg jó. 10 Ti m' Abraãm badoo däk mariij t'aah tagahõk hyb n'aa ta t'aah Isaki.
11 Tii kä m' P'op Hagä Do ããs ky hadoo ta hã wë hã naa:
—Abraãm! Abraãm!
—H'ëëd te? Bä agëët ỹỹh —näng mä ta kyyh ããs hã.
12 Tamoo geãm wät mä tii bä:
—Manaboh manäh a t'aah! —näng mä ããs kyyh Abraãm hã. —Tii d’ madoo manäh ta hã, a t'aah hã. Hỹỹ kä ỹ hapäh né hẽ maky daheeh P'op Hagä Doo. Dooh ỹ maky sakããd bä. Manoo né paawä a t'aah sét hẽ hadoos do paa hã ỹỹ —näng mä Tak'ëp Hyb N'aa Jawyk Do ããs kyyh Abraãm hã.
13 Ti m' Abraãm beg'ããs ta jawén p'aa hẽnh. Taw'yyt mä b'éé aj'yy, sããn ts'ëëb këë ganas'aa mahang. Ti m' Abraãm masoo däk b'éé. Tabajuu ta t'aah jawén buuj. 14 Rabajuu do paa Abraãm häd n'oo däk mä “Tak'ëp Hyb N'aa Jawyk Doo anoo’’ ta häd. Ti hyb n'aa né hẽ m' dahẽ ta wób raher'oot:
—Ta waëë hã Tak'ëp Hyb N'aa Jawyk Doo anooh.
—Tii d’ mad'oo do hyb n'aa, man'oo däk do paawä sét hẽ had'oos do a t'aah, ti hyb n'aa ỹ ky däng hät ỹỹ gó hahỹỹh: õm ỹ ky n'aa edëng da. Tak'ëp da takanekan a panaa. Ỹ anoo da a panaa sakõõ hawób, k'ããts tëg hawób —näng mä. —A panaa da raj'aa et'ëëk sa majĩĩ, j'aa kets'ëë sa hã —näng mä ta kyyh. 18 —Sahõnh hẽ da ky n'aa kedëng badäk hahỹỹh habong doo a panaa seeh hyb n'aa, ỹ maky daheeh do hyb n'aa —näng mä P'op Hagä Do kyyh Abraãm hã.
19 Tii kä m' p'aa hẽnh Abraãm ta t'aah daheeh abaaj nä ta sii moo bok doo raberéd b'ëëh paa bä. Abaaj jëk mä p'aa hẽnh sa panang hẽnh séd hã tii bä. Beseeba bä tabagëë däk mäh.
Hahỹỹ Abraãm ky n'aa napäh noo gó ta hỹỹj panyyg n'aa
20 Tii kä m' ta see pé noo gó Abraãm ky n'aa napäh ta hỹỹj ky n'aa. Taky n'aa napäh mä 8 Naoh taah ta ỹỹm Miwka sii. 21-23 Pooj jé ta t'aah häd mä Us, ta jawén ta wakããn wób. Sa häd hahỹỹh: Bus, ta jawén Kemuéw, Arãm yb pan'aa, ta jawén Kesed, ta jawén Hasó, ta jawén Piwdas, ta jawén Jidap, ta jawén Betuéw, Rebéka yb pan'aa. Ti d’ né hẽ m' 8 Abraãm hỹỹj taah Miwka sii. 24 Naoh ỹỹm see ta hata ta häd mä Rewamah. Ta taah ta sii hahỹỹh sa häd: Tebah, Gahãm, Tahas, Makah.