Isaki henäng noo gó panyyg n'aa hahỹỹh
21
P'op Hagä Doo ky n'aa enooh doo da ta hã, Sarah hã, tii d’ né m' tabad'oo. Tat'yyd mehĩĩn kän. 2 Sarah etaa däk Abraãm sii. Wah'ëë däk tii bä Abraãm. Ta wah'ëë gó ta t'aah benäng. P'op Hagä Doo ky däng noo gó ta hã, ti noo gó né hẽ tabenäng. 
Genesis 21:1-34
3 Ti m' Abraãm ta häd n'oo däk Isaki. 4 Isaki 8 ta ä̃h tabadoo däk bä tabenäng jawén paa bä, Abraãm ta masuuj byyh noo hõg kän tii bä P'op Hagä Do mejũũ do paa da. 5 100 ãn däk Abraãm ta t'aah Isaki tahenäng noo gó.
6 Tii kä m' Sarah ky hadoo:
—P'op Hagä Doo an'oo däk hã ỹỹ, ỹ tsebé do hyb n'aa. Sahõnh hẽ maa napäh bä ỹ t'aah n'yy däk ỹ wah'ëë däk bä, retsebé na-ããj hẽ nemõn ỹỹ —näng mä Sarah kyyh.
7 Ti m' p'aa hẽnh taky hadoo:
—Jaa paawä ta ti hedoo péh Abraãm hã ỹ nabii nä karapee ỹ wah'ëë gó? —näng mä ta kyyh. —Ỹ etaah nä né paa patug ỹỹ sii ta wah'ëë gó —näng mä Sarah kyyh.
Hahỹỹh Agah ta t'aah daheeh rabah'ũũm do panyyg n'aa
8 Tii kä m' Isaki awäng, ĩe däk, noo keréd hõm habii do paah. Tanoo keréd hõm noo gó habii do paah, ti noo gó Abraãm moo wät jäm ta t'aah hyb n'aa noo keréd hõm do habii do paah.
9 Sarah hapäh mä Isaki Is-maéw ky n'aa ej'ees doo. Agah t'aah, Esito buuj t'aah Abraãm sii ti Is-maéw. 10 Ti hyb n'aa Sarah ky hadoo Abraãm hã:
—Mamejõ hõm rabahõm hyb n'aa Is-maéw ta ỹỹn daheeh. Dooh ỹ karẽn bä séd hã ragado bä tah ỹỹ daheeh ër wë hanäng doo.
11 Ti m' Abraãm hyb n'aa tón wät, ta t'aah né m' ti ta h'yyb Is-maéw. 12 Ti m' P'op Hagä Do ky hadoo Abraãm hã:
—Mahyb n'aa tón manäh Is-maéw ta ỹỹn na-ããj hẽ a sii moo wät doo. Isaki hanaa da a panaa heh'äät. Dooh Is-maéw hanaa tadoo bä. Ti hyb n'aa mamoo wäd sahõnh hẽ Sarah mejũũ doo a hã —näng mä P'op Hagä Do kyyh.
13 Ti m' taky hadoo ẽnh:
—A sii moo wät do t'aah, a t'aah né d’ tii ẽnh. Ti hyb n'aa Is-maéw na-ããj né da hajõng ta panaa —näng mä P'op Hagä Do kyyh.
14 Tii kä m' jet'iip hadoo bäp paa Abraãm ataa däk sa waa pan'aa, sa naëng hood. Ta hood gó tabataa däk mäh. Tadadäg kän mä Agah hã tabesët hyb n'aa. Ti m' tamejũũ rabahõm hyb n'aa kä. Ti m' Agah rabahõm kän daap hẽ banawäng do häj n'aa hẽnh. Beseeba m' ta häd, banawäng do häj n'aa häd.
15 Tii kä m' sa naëng bahëëj jëng bä m', ta t'aah taberéd jat mä b'aah dad'uud is do yt hã. 16 Ti m' tabahõm wät mä dawë hã tanahapäh hyb n'aa. Ta h'yyb gó taky hadoo:
—Dooh ỹ karẽn bä tah ỹỹ dajëb bä matym ỹỹ gó —näng Agah kyyh.
Ti m' Agah bahyy häng tũũ, aoot mä tii bä kä.
17 P'op Hagä Doo maa napäh mä Is-maéw baoot. Tii kä m' P'op Hagä Do ããs p'op naa m' taber'oot Agah sii. Ti m' taky hadoo:
—H'ëëd hado õm? Eỹỹm manäh —näng mä ta kyyh Agah hã. —P'op Hagä Doo maa napäh ta kyyh tabajat bä naa, haoot doo. 18 Ahõm nä tahajat hẽnh mamoo gado s'ëëg. Ỹ anoo da hajõng da ta panaa —näng mä ããs kyyh Agah hã.
19 Tii kä m' P'op Hagä Doo taty heet Agah. Ti m' tabahegãã kän naëng. Ti m' ahõm kän naëng majat hẽnh, ta hood tamahũũm, tageduu däk tii bä kä. Tamanaa ta t'aah wë. Ti m' ta noo dadäk ta t'aah eëëk.
20 Tii kä m' Is-maéw P'op Hagä Doo hagãã had'yyt hẽ tabawäng. Ti m' Is-maéw bawät banawäng do häj n'aa hẽnh. Moo ejëëh mä har'ëëng tesĩĩn bä. 21 Banawäng do häj n'aa bä, Parãn häd näng doo bä tahawät noo gó ta ỹỹn etsẽẽ Is-maéw ỹỹm. Ỹỹm nyy däk kän tii bä kä Esito buuj hã.
Hahỹỹh Abimerék rakaner'oot doo Abraãm daheeh panyyg n'aa hahỹỹh
22 Ti noo gó Abimerék ta warahén sa wahëh daheeh, Pikow ta häd, rabah'ũũm raber'oot hyb n'aa Abraãm sii. Ti m' Abimerék ky hadoo Abraãm hã:
—P'op Hagä Doo hag'ããs õm sahõnh hẽ mamoo wät do hã. 23 ỹ karẽn maky däng P'op Hagä Do hã, dooh ỹ mawadii bä, tah ỹỹ na-ããj hẽ, panaa ỹỹ na-ããj hẽ —näng mäh. —Ỹ karẽn da õm da baad up hã ỹỹh. Mahapäh né ti ỹ ky enỹỹm a hã. Ti hadoo né ti õm ỹ karẽn hã ỹỹ, panang ỹỹ hã na-ããj hẽ —näng mä Abimerék kyyh Abraãm hãa
24 Ti m' Abraãm ky hadoo:
—Ỹ ky däng né hẽ P'op Hagä Do hã.
25 Ti m' Abraãm ky hadoo na-ããj hẽ Abimerék hã naëng ta karapee gagots däk doo hã Abimerék sii moo bok doo rado hõm doo hyb n'aa. 26 Ti m' Abimerék ky hadoo:
—Dooh ỹ hapëë bä tii moo hedoo doo. Dooh maher'ood bä hã ỹỹh. Jããm né ỹ ky n'aa napäh hỹỹh —näng mäh.
27 Ti m' Abraãm manaa b'éé, booj yb na-ããj hẽ. Tetsëë däk mä Abimerék hã. Ti
m' rakaner'oot Abimerék daheeh. 28 Tii kä m' Abraãm ataa bëëh tsyt hẽ 7 b'éé ỹỹj. 29 Ti m' Abimerék beaanh ta hã:
—Nyy da mahanäng pé tii tsyt mawén taa bëëh b'éé?— teaanh mäh.
30 Ti m' Abraãm ky hadoo ta hã:
—Aym a wë ta heen n'aa hadoo, mabahapäh hyb n'aa mo haj'aa ỹỹ ti gagoos naëng —näng mä Abraãm kyyh Abimerék hã.
31 Ti hyb n'aa m' ramaëëj kän Beseeba ta tii bä, P'op Hagä Do hã raky däng do hyb n'aa m'.
32 Beseeba bä rakaner'oot jawén paa bä m' Abimerék Pikow daheeh, abaaj hõm kän Piris sa häj n'aa hẽnh. Piris häj n'aa wahëh mä ti Abimerék. Pikow häd näng doo, ti né paa mejũũ mä Piris bä warahén n'aa. 33 Tii kä m' Beseeba panang bä Abraãm bejoom häng ta joom. Tii bä kä m' taky n'aa etsẽẽ Tak'ëp Hyb N'aa Jawyk Do hã, P'op Hagä Doo Nadajëp Do hã. 34 Abraãm bawäd wät mä Piris häj n'aa bä hajõõ ta baab.