Abimerék panyyg n'aa Abraãm daheeh hahỹỹh
20
Tii kä m' Abraãm kahỹỹd kän Negéh häj n'aa hẽnh. Tii kä m' tamoo wät ta panang ta hoo gad'oo bä. Ta nu mas'eeh hẽnh mä Suur, ta nu mas'eeh hẽnh Kadés. Gerah mä paa m' tabagëë wät. 2 Tii b’ rahabong noo gó m' Abraãm maneëënh ta ỹỹm ta ä̃nh. Tii kä m' ta see pé noo gó Abimerék, Gerah bä wahë n'aa, mejũũ rehëën Sarah takat'ëë däk hyb n'aa paawä Abraãm ỹỹm.
Genesis 20:1-15
3 Ti m' atsëm P'op Hagä Doo ber'oot Abimerék sii ta s'ëë gó. Ti m' taky hadoo Abimerék hã:
—Õm da dajëp! ỹỹnh makat'ëë däk doo patug näng tii —näng mä P'op Hagä Do kyyh Abimerék hã.
4 Dooh nä Abimerék aä̃ nä bä Sarah sii, ti hyb n'aa né Abimerék ky hadoo P'op Hagä Do hã:
—Mahëëj jëng g'e da ããh, h'yy gatemah doo? —näng mä ta kyyh. 5 —Tadaaj hẽ Abraãm ky hadoo, “ta ti ä̃nh ỹỹ’’. Sarah na-ããj hẽ ky hadoo, “ta ti hä̃j ỹỹ’’. Ti hyb n'aa ỹ wén kat'ëë däk. Hã ỹỹ baad up. Hyp ỹỹ haj'aa hẽ nado tii —näng mä Abimerék kyyh P'op Hagä Do hã.
6 Ti m' P'op Hagä Do ky hadoo Abimerék s'ëë gó:
—Ỹ hapäh né hẽ ti a hã baad up. Dooh ỹ an'oo bä mabaỹỹh bä ta sii, nasaa doo mamoo nawät hyb n'aa wë ỹỹ —näng mä P'op Hagä Do kyyh Abimerék hã.
7 Ti m' taky hadoo ẽnh:
—Mabaj hõm ta ỹỹm p'aa hẽnh. Ta patug kyh ỹỹ n'aa rod n'aa. õm da taky n'aa etsẽẽ manadajëp hyb n'aa. Ta ỹỹm manabaj hõm bä, õm né da dajëp, a karapee sii hẽ —näng mä P'op Hagä Do kyyh Abimerék hã.
8 Ti m' Abimerék ty gawëëj däk bä bäp paah, tanaëënh sahõnh hẽ ta sii moo bok doo ky n'aa ets'ëëh doo. Ti m' tabaher'oot sa hã sahõnh hẽ ta s'ëëh. Sahõnh hẽ rabeỹỹm bong mä tii bä. 9 Ti m' Abimerék mejũũ ranaëënh Abraãm. Ti m' taky hadoo ta hã:
—Mahapëë kän tii d’ mabad'oo do ỹỹh. Nyy da õm ỹ bad'oo tii da mawén d'oo ỹỹh? Ti hyb n'aa né hẽ ỹỹh, karapee haa rawén moo bong nasaa doo —näng mä ta kyyh. —Õm hyb n'aa né tii, manaher'oot do hyb n'aa —näng mä ta kyyh.
Ti m' ta ky hadoo ẽnh:
—Tii d’ mad'oo doo, dooh baad tadoo —näng mä Abimerék kyyh Abraãm hã. 10 —H'ëëd hyb n'aa tii d’ mad'oo hã ỹỹ? —näng mä ta kyyh.
11 Ti m' Abraãm ky gadoo:
—Ti ỹ wén d'oo, dooh hahỹỹh buuj rahyb n'aa es'ee bä P'op Hagä Doo, ỹ ed'oo. Ti hyb n'aa tii d’ ỹ wén ky hadoo, “ỹ ranaboh jat bä, ä̃m ỹỹ rakat'ëë däk tii bä’’, ti hyb n'aa tii da ỹ wén jejën —näng mä Abraãm kyyh Abimerék hã.
12 —Dooh daap ỹ menä bä “ä̃nh ỹỹ’’ ỹ hanäng do paah. Ãnh ỹỹ né tii, ãã yb hyb n'aa. Ta seeh ta ỹỹn, ỹ wén gat'ëë däk —näng mä Abraãm Abimerék hã. 13 —Ỹ P'op Hagä Do mejũũ noo gó yp ỹỹ tób bä naa ãã kah'ỹỹt noo gó, ỹ ky hadoo ä̃m ỹỹ hã, “ër babok hẽnh, ỹ d’ manaëëj a hỹỹj’’ —näng mä Abraãm kyyh Abimerék hã.
14 Abimerék abaj hõm tii bä kä Sarah p'aa hẽnh Abraãm hã. Tets'ëë däk na-ããj hẽ Abraãm masããh booj yb, b'éé, ta sii moo bok do pan'aa na-ããj hẽ ajyy, ỹỹj. 15 Ti m' taky hadoo Abraãm hã:
—Badäk panang ỹỹ, mamoo wäd a panang mah'yyb däng bä— näng mä ta kyyh Abraãm hã.
16 Ti edoo né hẽ m' Sarah hã:
—Ỹ anoo k'ããts tëg hawak doo hajõng doo a hỹỹj hã, manu mebyy wät mahä̃nh a pa habok do sa matym gó. Tii d’ ỹ wén doo, sahõnh hẽ rabahapäh a h'yyb haj'aa hẽ nado né paa tii —näng mä Abimerék kyyh Sarah hã.
17-18 Tii kä m' Sarah Abimerék pa tahegëë nä do hyb n'aa, dooh Abimerék karapee sa ỹỹm eta boo bä, P'op Hagä Doo an'oo bä. Abimerék ỹỹm na-ããj né hẽ m'. Ti m', tababaj hõm jawén paa bä Sarah, Abraãm ky n'aa ets'ẽẽ kän mä tii bä Abimerék P'op Hagä Do hã. Tii bä kä baad däk mä Abimerék. Taky n'aa etsẽẽ do hyb n'aa né hẽ ti ỹỹj kä sahõnh hẽ rabeta hõm p'aa hẽnh. Abimerék ỹỹm na-ããj né hẽ m'.