Hahỹỹ P'op Hagä Doo ahäj jëng do Sodoma panang Gomoha panang panyyg n'aa hahỹỹh
19
Ti m' ããs rakaj'aa tug bä däg its Sodoma bä. Kahadë paa m' pä s'ëëb me. Noo näng paa m' tii Sodoma panang. Ããs rakaj'aa noo gó ta noo bä paa m' Ló basooh. Tii kä m' ããs tabahapäh bä, p'op tabas'ëëg gëët tagadoo hyb n'aa. Ti m' sa pooj jé tabahyy häng ta taron nu paa me, tũũ ta maboor hyy jat. 2 Baad mä Ló gadoo. Ti m' taky hadoo sa hã:—Bë ayyw dó pa ỹỹh. Bë tsyym bë hetsyyd. Pa ỹỹ bë aä̃ hõm. Tii da jet'iip bë tabës —näng mä Ló kyyh ããs sa hã.
Ti m' ããs raky gadoo:
—Dooh. Wahoo gó ãã ba'ỹỹh —näk mä sa kyyh Ló hã.
Genesis 19:1-38
3 Ti m' tak'ëp Ló ky kah'ũũm sa hã tets'yyt doo ta tób hẽnh. Ti hyb n'aa rabahõm kän ta sii. Ajëë pä kän ta tób gó. Ti m' Ló moo wäd kän sa waa, pãw. Makuj tamaa m' ti tamoo wät. Rawa kän mä tii bä. 4 Ti m' rabaä̃ jëk do pooj jé m' Sodoma buuj ajyy, pahëëw, wahëh, ranu waho däk mä Ló tób. 5 Ti m' reaaj kän mä Ló hã:
—Nyyh a tób bä han'aa doo? —näk mä h. —Mamanäh wawẽẽ hẽ. ãã karẽn ãã bad'oo ỹỹnh mo n'aa me. Ãã karẽn ãã ba'ỹỹh sa sii— näk mä Sodoma buuj sa kyyh.
6 Ti m' Ló banä kän, tanoo gatsëë däk mä ta tób taber'oot hyb n'aa sa sii. 7 Ti m' taky hadoo sa hã:
—Dooh najis ỹỹ. Bë moo boo manäh ti nasaa doo —näng mä ta kyyh sa hã.
8 Ti m' Ló ky hadoo ẽnh sa hã:
—Ti anäng pawóp hẽ tok ỹỹ, dooh ramepëë nä bä ajyy. Bë karẽn bä ỹ manyyh bë moo booh sa sii bë karẽn doo da —näng mä ta kyyh. —Dooh ỹ karẽn bä ajyy pa ỹỹ haj'eenh doo ỹỹnh mo n'aa me bë adoo bä. Tóp ỹỹ bä rabaj'eenh, ỹ ti hag'ããs sa hã —näng mä Ló kyyh Sodoma buuj sa hã.
9 Tii kä m' Sodoma buuj raky hadoo:
—Jé anäh ãã pooj jé hagëët do! —näk mä sa kyyh. —Tas'ẽẽh hẽnh naa takarẽn tamejũũ ër hã! —näk mä Sodoma buuj sa kyyh Ló ky n'aa hã.
Ti m' raky hadoo Ló hã:
—Ta bahä̃nh da a mo n'aa ãã anoo bä —näk mä sa kyyh.
Kaj'ëëh mä tii bä p'eets ta wë. Rakarẽn mä paawä ragahood jëng Ló tób.
10 Ti m' ããs ta pa haj'eenh doo, Ló rabej'ooj jëng tób gó, ranoo katsëë däk. 11 Tii kä m' ããs ran'oo bä tób woo hã hab'ëëh doo ty temah boo m' ran'oo bä, pahëëw, wahëh na-ããj hẽ. Ti hyb n'aa dooh rahapëë wäd bä tób nooh.
12 Ti m' ããs raky hadoo Ló hã. Reaanh mä ta hã:
—Ti anyyh a toog, a samad, a taah a wakããn sa mahang? Mamanäh rabahõm hyb n'aa. 13 ãã kawats'iik da hahỹỹ bä panang. P'op Hagä Doo ky n'aa napäh ti tak'ëp nesaa doo ramoo bok, ti hyb n'aa tamejũũ ãã kawats'iik Sodoma panang —näk mä sa kyyh Ló hã.
14 Ti m' Ló bahõm kän ta toog patug pan'aa sa wë. Ti m' taky hadoo sa hã:
—Nayyw hẽ! Bë hyb n'aa bawad! —näng mäh. —Bë ahõm panang mahä̃nh. Tak'ëp Hyb N'aa Jawyk Doo kawats'iik da! —näng mä ta kyyh sa hã.
Ti m' ta samad pan'aa ky masuunh red'oo mä Ló, ti hyb n'aa m' dooh rahõm bä.
15 Ta paj'ëë bä kä ããs raky hadoo Ló hã:
—Nayyw hẽ! Bë tsyym n'aa kawaad! Mamahũũm a ỹỹm, a toog na-ããj hẽ. Bë né da sa moo hata n'aa bë tsyym n'aa kanawaad bä!— näk mä ããs sa kyyh Ló hã.
16 Ti m' Ló kewõõt mäh. Ti hyb n'aa kä ramoo masoo däk Ló, ta ỹỹm na-ããj hẽ, ta toog na-ããj hẽ. Ramahũũm kän mä tii bä rababong do paa bä naa, P'op Hagä Doo t'yyd mehĩĩn do hyb n'aa. 17 P'eets hẽ rababok nä bä ããs seeh ky hadoo sa hã:
—Bë tsyym n'aa kawaad! —näng mä ta kyyh. —Bë ahõm had'yyt hẽ da bë bedëp hyb n'aa! Bë begãã manäh da bë jawén p'aa hẽnh! Dooh da bë ayyw bä ta baab bä! Dooh da bë ayyw bä banäm doo bä na-ããj hẽ! Bë waj'aa da waëë hẽnh bë kaja hõm hyb n'aa, bë nadejëp hyb n'aa! —näng mä ããs kyyh sa hã.
18-19 Ti m' Ló ky hadoo ããs hã:
—Ti d’ edoo manäh hã ỹỹh. Bä nado tii waëë hẽnh ỹ ahõm bä. Ta baah bä da takataa P'op Hagä Do mo haj'aa ỹ ahõm bä t'ĩĩ hẽnh —näng mä ta kyyh ããs hã. —Ỹ da dajëp tii bä ta baah bä —näng mä ta kyyh. —Õm ky enyym sét nuu me däk. Ỹ matyyd mehĩĩn ỹ wén edëp. Ti hyb n'aa ỹ beaanh p'aa hẽnh a hã —näng mä Ló kyyh ããs hã.
20 Ti m' Ló ky hadoo ẽnh ta hã:
—Mahapäh badäg is nanäng panang. Edah tii —näng mäh. —Taw'ããts hẽ t'ĩĩ hẽnh ỹ kad'ëëp, ỹ bedëp hyb n'aa. Mahegãã, banad'ëëd its ỹ hanäng doo. Man'oo t'ĩĩ hẽnh ỹ ked'ëëp —näng mä ta kyyh.
21 Tii kä m' ããs ky hadoo ta hã:
—Taw'ããts hẽ —näng mä ta kyyh. —Ỹ anoo a hã metsẽẽ doo —näng mä ããs kyyh Ló hã. —Dooh da ỹ ahëëj bä panang mahahõm hẽnh —näng mä ta kyyh Ló hã.
22 Ti m' ããs ky hadoo ẽnh Ló hã:
—Matsym n'aa kawaad hõm da! Makanajaa nä bä, dooh da ỹ ahëëj nä bä Sodoma. Makaja hõm bä, tii bä da ỹ bahëëj jëng— näng mä ta kyyh.
Ti m' banad'ëëd is do panang hanäng do hyb n'aa Ló kyyh, rawén ramanaëëj kän ta häd Soaha.
23 Rakaja hõm mä Soah hẽnh papỹỹj ty ganäh sii hẽ. 24 Rakaja hõm sii hẽ kä m', Tak'ëp Hyb N'aa Jawyk Doo mejõ hyy kän mä tëëg hõõh, saw'aak doo na-ããj mäh. [Ti mahỹỹj mä radejëp kän Sodoma buuj, Gomoha buuj.] 25 Sa panang paah, sa häj n'aa paah, sahõnh hẽ ta hã hanäng do paah, banäm do paa ahëëj jëng ta n'oo bä. 26 Ló rahah'ũũm noo gó m', nabuuj kahũũm do hyb n'aa m', sa jawén p'aa hẽnh Ló ỹỹm baheg'ããs mäh. Ti hyb n'aa né kä m' jukiir tawén hadoo bëëh.
27 Jet'iip hadoo bäp paa Abraãm ty gawëëj däk bä tabahõm taber'oot paa bä Tak'ëp Hyb N'aa Jawyk Do sii. 28 Taber'oot paa bä naa tabeg'ããs Sodoma, Gomoha tabanäng hẽnh, banäm doo na-ããj hẽ. Ti m' tabahapäh tëëg tsyg tak'ëp hadoo doo.
29 Ti d’ paa m' P'op Hagä Doo bahäj jëng banäm do paa panang. P'op Hagä Doo hyb n'aa es'ee Abraãm. Abraãm hyb n'aa né hẽ ti Ló wén edëp.
Hahỹỹh Ló toog sa panyyg nasaa doo sa yb sii
30 Tii kä m' ta see pé noo gó Ló tabajeỹỹm mä Soah bä takëë bä. Ti hyb n'aa kä tawén hõm kän waëë hẽnh. Séd hã ta toog rabah'ũũm ta sii. Ti bä rabaj'eenh pä gabahó doo gó. 31 Ti m' ta see pé noo gó ta toog wahëëh hadoo doo ky hadoo ta ä̃nh hã:
—Ër yb wah'yy däk its. Dawëë ër babok. Dooh ajyy ër sii ỹỹh péh ër babok hyb n'aa rabad'oo doo da —näng mä ta kyyh ta ä̃nh hã. 32 —Hamäh ër yb ër neëëg däk uwa s'ëëb mahỹỹnh doo me tabaoom hyb n'aa. Taoom nuujé ër baỹỹh ta sii ër betaah hyb n'aa ta sii ër panaa näng hyb n'aa —näng mä ta kyyh.
33 Ti noo gó né kä m' raneëëg kän atsëm. Ti m' sa yb baoom. Ta oom nuujé m' wahëëh hadoo do bawät ta wë. Dooh takahapëë bä ta toog bawät ta wë. 34 Ti m' jet'iip hadoo wahëëh hadoo do ky hadoo ta ä̃nh hã:
—Ỹ aä̃ wät ër yb sii. Hỹỹ kä ër neëëg däk p'aa hẽnh mabaỹỹh hyb n'aa ta sii badah —näng mä ta kyyh ta ä̃nh hã. —Ti d’ ër badoo ër betaah hyb n'aa ër yb sii ër panaa näng hyb n'aa —näng mä ta kyyh ta ä̃nh hã.
35 P'aa hẽnh mä sa yb raneëëg däk ti noo gó kä atsëm. Ta toog tagad'ooh hadoo do bawäd wät ta yb sii. Dooh né hẽ takahapëë bä ti noo gó. 36 Tii d’ né m' rabetaa padäg kän sa yb sii. 37 Wahëëh hado do t'aah benäng bä ta häd n'oo däk mä Mowab. Mowab buuj du n'a do paa m' tii. 38 Ti m' ta jawén näh t'aah nyy däk, ta häd n'oo däk. Ben-Ami paa m' ta häd. Amon karapee du n'a do paa m' tii.