Hahỹỹh P'op Hagä Doo ky n'aa enooh do Abraãm hã ta t'aah panyyg
18
Tii kä m' Tak'ëp Hyb N'aa Jawyk Doo kasee Abraãm hã b'aah hewëëh do banäng Mameréh panang bä. Tii bä né paa m' ta tób b'aah hewëëh do panang bä. P'op papỹỹj badäk bä, tabajuu bä, ta tób noo bä Abraãm basooh bä, Tak'ëp Hyb N'aa Jawyk Doo kasee ta hã. 2 Ti m' tabeg'ããs. Taheg'ããs mä tamawob hẽ ajyy ti hab'ëëh ẽnh p'eets hẽ. Ti m' tabahapäh bä m', waj'aa däk rahab'ëëh hẽnh. Ti m' tabahyy häng ta taron nuu paa me, ta maboor hyyj jad mä tũũ. 
Genesis 18:1-33
—Mahegããs ỹ baad tadoo bä, matabëëj manäh mahä̃nh ỹỹa— näng mä ta kyyh. 4 —Ỹ mejũũ da ramanaa naëng bë tsyym hetsyd bë kameh'aak hyb n'aa sooh hahỹỹh b'aah yt hẽ. 5 ỹ anoo da bë waa bë bahejooj padëëk hyb n'aa bë bahõm do pooj jé. Taw'ããts hẽ bë gadoo tii, ỹ bë hegããts wät do hyb n'aa —näng mä ta kyyh sa hã.
Ti m' raky hadoo:
—Taw'ããts hẽ. Maher'oot doo d’ né mabad'oo —näk mä sa kyyh.
6 Tii kä m' Abraham hyb n'aa bawaad wät, ti m' taky hadoo ta ỹỹm hã:
—Naỹỹw hẽ —näng mäh. —Hajõng mamoo wäd pãw —näng mä ta kyyh ta ỹỹm hã.
7 Ti m' tabahõm, ta tsyym n'aa kawaad hõm ta masããh rahabëëh hẽnh. Tasëm baad hadoo doo booj yb t'aah tadoo. Ti m' taky hadoo ta sii moo wät do hã, tamejũũ tamoo wät:
—Mamoo n'aa kawaad da kawëh do pan'aa —näng mä ta kyyh.
8 Rahaja kän mä tamejũũ doo ramoo bok doo kä. Ti m' tamana kän ta dab, tabii gamỹỹj, nu gatarah doo, rahab'ëëh hẽnh, b'aah yt hẽ tabadahẽẽm bä. Tii kä m' Abraãm bagëët tahag'ããs mä rawëh doo. Ti m' rabawëë kän.
9 Tii kä m' reaaj kän mäh:
—N'yy hẽnh a ỹỹm Sarah? —näk mä sa kyyh.
Ti m' Abraãm ky hadoo:
—Ti agä jeep tób hẽnh —näng mä Abraãm kyyh sa hã.
10 Ti m' Tak'ëp Hyb N'aa Jawyk Do ky hadoo ta hã:
—Wät hahỹỹh hã, ta baab, p'aa hẽnh da õm ỹ bahehëën. Õm ỹ bahehëën bä p'aa hẽnh, t'aah nyy däk da a ỹỹm —näng mä ta kyyh Abraãm hã.
Tób noo bä Sarah bagëët tamaa newëë hyb n'aa raher'oot doo. Sa jó paa me ta tób basooh. 11 Ti noo gó kä m' wah'ëë däk Abraãm. Sarah na-ããj hẽ wah'ëë däk. Tabëëj däk tetaah do heen n'aa. 12 Ti hyb n'aa tawén kawewaaw wät ta h'yyb gó ta kyyh. Ti m' taky hadoo ta h'yyb gó:
—Nỹỹd mä ti ỹ betaa wäd ỹ wah'ëë däk, patuk ỹỹ na-ããj hẽ?— näng mä Sarah h'yyb gó.
13 Ti m' Tak'ëp Hyb N'aa Jawyk Do ky hadoo Abraãm hã:
—Hëd n'aa Sarah gawew'aam? Hëd n'aa taky hadoo, “ỹ g'e da etaah nä, ỹ wah'ëë däk’’, tabanäng ta h'yyb gó?
14 Ti m' P'op Hagä Do ky hadoo ẽnh:
—Dooh Tak'ëp Hyb N'aa Jawyk Doo nahajaa péh. Ỹ her'oot doo da a hã wät hahỹỹ hã, õm ỹ bahehëën bä, t'aah nyy däk Sarah— näng mä P'op Hagä Do kyyh Abraãm hã.
15 Tii kä m' Sarah maa napäh bä ta kyyh eỹỹm wät. Ti hyb n'aa tajejëën paawä ta kyyh ta h'yyb gó. Ti hyb n'aa kä m' tawén her'ood däk:
—Dooh ỹ gawewaw bä —näng mä ta kyyh.
Ti m' P'op Hagä Do ky hadoo:
—Makawewaw wät né hẽ —näng mä Tak'ëp Hyb N'aa Jawyk Do kyyh.
Hahỹỹh Abraãm ky n'aa etsẽẽ do Sodoma buuj sa hyb n'aa panyyg n'aa haỹỹh
16 Tii kä m' haw'ëëh do jawén paa bä rabes'ëëg b'ëëh. Ah'ũũm kän mä tii bä tamawob hẽ hadoo doo. Abraãm ahõm mä sa sii tahadaa h'ũũm. Sodoma nemũũn mä rabeg'ããs. 17 Tii kä m' Tak'ëp Hyb N'aa Jawyk Do ky hadoo ta h'yyb gó:
—Dooh da ỹ jejëën bä Abraãm mahä̃nh ỹ moo wät doo —näng mä ta h'yyb gó. 18 —Abraãm hajõng da tapanaa. Ky n'aa etsëëh, karejaan da ta panaa. Sahõnh hẽ da ky n'aa kedëng hëëj haw'ããts hẽ habok doo Abraãm hyb n'aa. 19 Abraãm ỹ h'yyb däng tamejũũ hyb n'aa ta taah, ta panaa na-ããj hẽ, ỹ raky daheeh hyb n'aa ỹ mametëëk doo da, baad rabadoo hyb n'aa baad hadoo doo —näng mä Tak'ëp Hyb N'aa Jawyk Do kyyh ta h'yyb gó. —Tii d’ radoo bä, ỹ raky dahé bä, ỹ anoo sahõnh hẽ ỹ ky n'aa enooh do paa Abraão hã —näng mä ta kyyh ta h'yyb gó.
20 Ti m' Tak'ëp hyb n'aa Jawyk Doo ber'oot ẽnh Abraãm sii. Ti m' taky hadoo:
—Ỹ panyyg nyy däk Sodoma buuj Gomoha buuj tak'ëp nesaa doo ramoo bok. Nesaa do hã had'yyt hẽ rah'yyb padëëk. 21 Ti hyb n'aa ỹ bahyng t'ĩĩ hẽnh ỹ baheg'ããs hyb n'aa, sehub tadoo bä —näng mä Tak'ëp Hyb N'aa Jawyk Do kyyh Abraãm hã.
22 Tii kä m' tamawob hẽ hadoo do pawóp hẽ kä ah'ũũm Sodoma rabeg'ããs. Abraãm Tak'ëp Hyb N'aa Jawyk Doo daheeh ayyw b'ëëh. Tak'ëp Hyb N'aa Jawyk Do matym gó Abraãm bagëët. 23 Ti m' Abraãm beaanh ta hã:
—Madej'ëëp da ky enyym doo ky nesaa do mahang? 24 Tanyy bä sa mahang 50 ky en'ỹỹm doo, madej'ëëp né g'e da sahõnh hẽ? Dooh g'e meréd booh 50 sa mahang habong do hyb n'aa? —näng mä Abraãm kyyh Tak'ëp Hyb N'aa Jawyk Do hã.
25 P'aa hẽnh Abraãm ky hadoo:
—Taw'ããts hẽ da a hã ti madej'ëëp ky enyym doo ky nesaa do sii hẽ? Tii d’ né g'e da mabad'oo ky enyym do ky nesaa do mabad'oo doo da. Ti d’ madoo manäh! õm né sahõnh hẽ badäk hahỹỹ hã habong doo sa ky n'aa her'oot doo, baad rado bä, baad ranado bä. Ti hyb n'aa taw'ããts hẽ baad hadoo doo mamoo wäd —näng mä Abraãm kyyh.
26 Ti m' Tak'ëp Hyb N'aa Jawyk Do ky hadoo Abraãm hã:
—Tanyy bä 50 ky en'ỹỹm doo ky nesa do sa mahang, dooh da ỹ dejëëb booh bä sa hyb n'aa —näng mä Tak'ëp Hyb N'aa Jawyk Do kyyh.
27 P'aa hẽnh Abraãm ky hadoo ta hã:
—Ỹ du doo däk ỹ her'oot do a hã, Tak'ëp Hyb N'aa Jawyk Doo. Mahapäh né ti ta ooj hadoo is ỹỹh a hã. 28 5 bedoo bä ẽnh? 45 radoo bä baad hedo doo sa mahang, madej'ëëp né da 5 bedoh do sa hyb n'aa?
Ti m' Tak'ëp Hyb N'aa Jawyk Do ky hadoo:
— 45 ky en'ỹỹm doo ỹ awyyd bä sa mahang, dooh ỹ dejëëb bä sa hyb n'aa —näng mä ta kyyh Abraãm hã Sodoma buuj ky n'aa.
29 Ti m' p'aa hẽnh Abraãm beaanh:
—40 tadoo ba ẽnh, madej'ëëp g'e tii bä sahõnh hẽ?
—40 sa hyb n'aa dooh ỹ dejëëb bä —näng mä Tak'ëp Hyb N'aa Jawyk Do kyyh.
30 Ti m' Abraãm ky hadoo:
—Kawaj'ããn manäh kyh ỹỹ hã —näng mäh. —30 tadoo bä ẽnh ky en'ỹỹm doo?
Ti m' Tak'ëp Hyb N'aa Jawyk Do ky hadoo:
—30 tadoo bä ky en'ỹỹm do sa mahang, dooh ỹ dejëëb Sodoma buuj.
31 P'aa hẽnh mä teaanh nä, Abraãm eaanh:
—Ỹ ky kah'ũũm ẽnh a hã. 20 tadoo bä ẽnh? —näng mä Abraãm kyyh.
—20 hadoo do sa hyb n'aa dooh ỹ dejëëb bä sahõnh hẽ— nang mä P'op Hagä Do kyyh Abraãm hã.
32 Sét nuu me tagadëëg up taher'oot mäh:
—Kawaj'ããn manäh wë ỹỹ! Jããm né hahỹỹh ỹ eaanh do a hã. Ji moo sahõnh tadoo bä ẽnh ky enỹỹm doo?
—Ji moo sahõnh hẽ hadoo do hyb n'aa dooh ỹ dejëëb bä— näng mä P'op Hagä Do kyyh Abraãm hã.
33 Tii kä m' Tak'ëp Hyb N'aa Jawyk Doo her'oot do paa Abraãm daheeh, as'ëëg kän p'op. Abraãm abaaj nä kän ta tób hẽnh.