Hahỹỹh P'op Hagä Do mejũũ doo Abraãm panyyg n'aa hahỹỹh
17
Tii kä m' 99 ãn Abrãm badoo däk bä, Tak'ëp Hyb N'aa Jawyk Doo kasee ta hã. Ti m' Tak'ëp Hyb N'aa Jawyk Do ky hadoo ta hã:—Ỹ né hẽ P'op Hagä Doo, Sahõnh hẽ Haj'aap Doo. Matym ỹỹ gó mabawäd! ỹ karẽn da õm baad had'oop doo —näng mä P'op Hagä Do kyyh Abrãm hã. 2 —P'aa hẽnh ỹ ky n'aa enooh a hã. Hajõng da a panaa!— näng mä P'op Hagä Do kyyh.
Genesis 17:1-27
3 Tii kä m' Abrãm bahyy häng ta taron nu paa me, nuu woow häng, tũũ ta maboor hyy jat. Ti m' P'op Hagä Do ky hadoo ẽnh ta hã:
4 —Hahỹỹh ỹ ky n'aa enooh a hã: õm da panaa kanekan do pan'aa. 5 õm da tak'ëp kanekan up do sa yb. Ti hyb n'aa a häd ỹ banoo hỹỹ kä Abraãm.a Dooh Abrãm tadoo wäd bä. 6 Hajõng da a panaa, kanekan da. Wahëh enäh da sa mahang. Kyh ỹỹ gó da tii —näng. 7 —Ỹ ky n'aa enooh do a hã, a panaa na-ããj hẽ, ti hedoo had'yyt da. Ỹ né hẽ P'op Hagä Doo õm heg'ããs doo, a panaa na-ããj hẽ. Hã ỹỹ bë h'yy ka'eeh da —näng mä Abraãm hã. 8 —Ỹ anoo da a hã, a panaa na-ããj hẽ, bë häj n'aa pan'aa hahỹỹh hëëj makabeh'ỹỹh doo. Tas'ee hẽnh naa õm. Dooh nä õm ta danäh nadoo nä bä hahỹỹh hëëj hã —näng mäh. —Sahõnh hẽ ỹ banoo Kanaãh häj n'aa. Ỹ né da a panaa hagã. Ỹ né da a panaa h'yy ka'eeh doo —näng mä P'op Hagä Do kyyh Abraãm hã.
9 P'aa hẽnh P'op Hagä Doo ber'oot ta sii:
—Õm, a panaa na-ããj hẽ ỹ karẽn da ỹ bë ky daheeh. Raky dahé had'yyt da ỹ karẽn, sa panaa panaa na-ããj hẽ. 10 Hahỹỹh ti ỹ mejũũ a hã, a panaa hã na-ããj hẽ: Taw'ããts hẽ sahõnh hẽ ajyy bë mahang habok doo sa masuuj byyh noo kehõg hõm ër kaner'oot do heen n'aa —näng mäh. 11 Taw'ããts hẽ a masuuj byyh noo kehõg hõm ër kaner'oot do heen n'aa. 12-13 Hỹ jawén bë taah ajyy benäng jawén paa bä, 8 sa ä̃h rabadoo däk bä, tii bä sa masuuj byyh noo bë ehõk —näng mä P'op Hagä Do kyyh. —Ti hadoo né a sii moo bok do sa karapee hã, metsẽẽ do sa karapee hã na-ããj hẽ. Ti hadoo hed'yyt hẽ da ỹ karẽn, ta wób na-ããj hẽ, a panaa na-ããj hẽ. Sahõnh hẽ da ỹ her'oot doo da, tii da bë bad'oo. Dooh tahëëj bä bë ỹ ky n'aa enooh doo.
14 Ti m' P'op Hagä Do ky hadoo ẽnh:
—Ỹ ky nadaheeh doo, ta masuuj byyh noo kanahõk doo, dooh tawäd bä bë mahang, ỹ taky nadaheeh do hyb n'aa —näng mä P'op Hagä Do kyyh.
15 Tii kä m' P'op Hagä Do ky hadoo ẽnh:
—Dooh manaëëj wäd a ỹỹm “Saraj’’. Hỹỹ kä manaëënh “Sarahb’’ —näng mä ta kyyh.
16 —A ỹỹm da baad ỹ ky n'aa edëng. Ỹ anoo da a t'aah ta sii. Baad né hẽ ỹ ky n'aa edëng ta hã. Hajõng da ta panaa. Ta panaa mahang ti anäng da sa wahëh —näng mä P'op Hagä Do kyyh Abraãm hã.
17 Ti m' Abraãm bahyy häng ta taron nu paa me, nuu woow häng mäh, tũũ ta maboor hyy jat mäh. Ti m' tagawew'aam P'op Hagä Do kyyh. Ta h'yyb gó m' taky hadoo:
—Ji g'e da etaah nä 100 ãn ji adoo däk bä? Etaah nä g'e da Sarah 90 ãn hadoo däk doo? —näng mä Abraãm kyyh ta h'yyb gó.
18 Ti m' taky hadoo P'op Hagä Do hã:
—Hëd n'aa ti Is-maéw hã mananoo ti menooh doo? —näng mä Abraãm kyyh.
19 —Dooh. Ỹ ky n'aa enooh do a hã, a ỹỹm Sarah hana da tii. Ta panaa hã d’ tii. A ỹỹm hana d’ tii. Isakic d’ ta häd. Ỹ ky n'aa enooh doo, ỹ anoo, ỹ hanäng do a hã, dooh d’ tahëëj bä— näng mä P'op Hagä Do kyyh Abraãm hã. 20 —Is-maéw hã kä —näng mäh —Ỹ maa napäh a kyyh ta ky n'aa. Ti hyb n'aa baad ỹ wén ky n'aa edëng da Is-maéw. Ỹ anoo da hajõng ta taah ta panaa na-ããj da. 12 da ta taah ta du n'a doo. Ỹ anoo na-ããj hẽ hajõng ta panaa. Ka'oot da ta panaa —näng mäh.
21 Ti m' P'op Hagä Do ky hadoo ẽnh:
—Kyh ỹỹ, ỹ anoo ỹ hanäng do paah, a t'aah sii, Isaki sii. [Is-maéw hã nado paa tii.] Sét da ta baab ti hawäd wät tabenäng da Isaki Sarah hã —näng mä P'op Hagä Do kyyh Abraãm hã.
22 Tii kä m' her'ood wät do paa Abraãm sii, P'op Hagä Doo as'ëëg kän mä p'op.
23 Tii d’ né kä m' Abraãm badoo kän sahõnh hẽ P'op Hagä Doo mejũũ doo da. Pooj jé ta masuuj byyh noo hõk Is-maéw. Tetsẽẽ doo, ta sii moo bok doo, ta pa habong doo, sa taah na-ããj hẽ, sahõnh hẽ kä m' tii d’ né kä m' tabadoo kän P'op Hagä Do mejũũ doo da. 24 Ti noo gó kä m', tii d’ rabed'oo noo gó, Abraãm 99 ãn. 25 Ta t'aah mäh, Is-maéw, ti noo gó kä 13 ãn. 26-27 Ti noo gó kä m' ramasuuj byyh noo gehõk Abraãm ta t'aah na-ããj hẽ, ta wób na-ããj hẽ, ta sii moo bok doo, ta pa hebooh doo, sahõnhe kä m' ti noo gó. P'op Hagä Do mejũũ doo da rabed'oo. Jããm hẽ hahỹỹh.