Hahỹỹh Agah, Saraj mejũũ doo, Is-maéw panyyg n'aa
16
Tii kä m' ta see pé noo gó dooh Saraj etaa nä bä. Ti anäng mä sét ỹỹnh Saraj sii moo wät doo Esito buuj. Agah mä ta häd. 2 Tii kä m' ta see pé noo gó Saraj ky hadoo ta patug hã:—Dooh Tak'ëp Hyb N'aa Jawyk Doo an'oo bä ỹ betaah —näng mä ta kyyh. —Aä̃ nä Agah sii. Tii d’ apä da ỹ t'aah näng —näng mä Saraj kyyh.
—éj. Taw'ããts hẽ —näng mä Abrãm kyyh.
Genesis 16:1-16
3 Ti m' Saraj ban'oo däg kän Agah Abrãm hã ta maba tabahadoo hyb n'aa. Ji moo sahõnh hẽ ta baab tabadoo däk bä, Kanaãh bä rabaj'eenh doo, ti noo gó kä m' tii.
4 Ti m' ta sii Abrãm beỹỹh. Ta jawén kä m' Agah eta däk. Ti m' ta heen n'aa nyy däk bä hetaah doo, kamek'yyts kän mä Saraj, ta kariw n'aa. 5 Ti m' Saraj ky hadoo ta patug hã:
—Õm hyb n'aa né hẽ ti ỹ tamakys. Ỹ né paa da tii haëëj däk a hã. Hỹỹ kä tahapäh tii etaah, ti hyb n'aa ỹ tawén makys —näng mä ta kyyh ta patug hã. —Tak'ëp hyb n'aa Jawyk Doo ti d’ né tii hapäh baad hadoo do ta hã, ỹ tadoo bä, õm tadoo bä —näng mä Saraj kyyh ta patug hã.
6 —Taw'ããts hẽ. A sii ti tamoo wät. Õm ti mejũũ ta hã. Mamejõ mah'yyb däng doo da —näng mä Abrãm kyyh ta ỹỹm hã, Saraj hã.
Ti m' tak'ëp mä Saraj mejũũ Agah hã. Tarejãã do hyb n'aa kä m' Agah tawén kejënh hõm ta mahä̃nh. 7 Tii m' tabahõm kän. Tii kä m' ããs kata ta hã naëng banäng bä tatyw n'aa baa bä, Suur tyw n'aa baa bä. Banawëë paa m' tii bä. Tak'ëp Hyb N'aa Jawyk Do ky gabuuj né hẽ, tawén kata kän ta hã ti ããs Agah hã. 8 Ti m' ããs beaanh ta hã:
—N'yy hẽnh mahana Saraj karom. N'yy hẽnh mahahõm?
—Ỹ wajaah kariw ỹ n'aa mahä̃nh —näng mä Agah kyyh ããs hã.
9 Tii kä m' Tak'ëp Hyb N'aa Jawyk Do ããs ky hadoo ta hã:
—Abaaj hõm p'aa hẽnh mahana hẽnh a kariw n'aa wë. Maky dahé a kariw n'aa —näng mä ããs kyyh Agah hã.
10 Ahom nä ããs kyyh ta hã:
—Ỹ anoo da apanaa kanekan up doo. Dooh da ji hajaa bä ji etsén bä.
11 —Õm da t'aah näng. Mahäd n'oo däg da Is-maéwa a kyyh Tak'ëp Hyb N'aa Jawyk Doo maa napäh do hyb n'aa õm rarejãã noo gó —näng mä ããs kyyh.
12 Ti m' ta ky hadoo ẽnh:
—Hahỹỹh a t'aah jumeto mapäh do hadoo da. Sahõnh hẽ ta wakããn taty n'aa ges'yyk da. Ta wakããn na-ããj da raty n'aa ges'yyk da. Ti hadoo da ta wakããn mahang da tabawät —näng mä ããs kyyh Agah hã.
13 Tii kä m' Agah häd noo däk Tak'ëp Hyb N'aa Jawyk Do hã, ta sii her'ood wät doo. “P'op Hagä Doo ti hapäh ỹỹh’’, ta häd tamanäng péh né m' tii.
—Ỹ hapëë däk ỹ tahapäh doo —näng mä ta kyyh.
Ti hyb n'aa né hẽ ta wén häd n'oo däk. 14 Ti m' ta wób ramanaëëj kän ããs kataa bä majat do naëng Beer Rahaj Roj.b Ti majat nä da hẽ karaj'aa häd näng doo. Kadés panang, Beréd panang hoo gad'oo bä m' tamajat.