Hahỹỹh P'op Hagä Doo ky n'aa enooh do panyyg n'aa Abrãm hã
15
Tasee pé noo gó m', Ló takabaanh jawén paa bä m', Tak'ëp Hyb N'aa Jawyk Doo ber'oot kän Abrãm sii ta s'ëë hadoo doo gó. Ti m' taky hadoo Abrãm hã:—Eỹỹm manäh, Abrãm —näng mä ta kyyh. —Ỹ né hẽ ti õm hag'ããs doo, õm mo n'aa jesuu doo. Ỹ anoo da a hã tak'ëp baad had'oop doo —näng mä ta kyyh.
2 Ti m' Abrãm ky gadoo:
—Tak'ëp Hyb N'aa Jawyk Doo, sahõnh bog'ããs doo, hëd n'aa ỹ karẽn pé tii hã ỹỹ maky n'aa enooh doo? Mahapäh né ti ỹỹh, dooh ỹ t'aah nyy bä. Ỹ dajëb bä, sii ỹỹ moo wät do seeh wë da tabaym tii bä maky n'aa enooh doo. Erijese, Damasko buuj, wë da tabaym tii bä —näng mä Abrãm kyyh Tak'ëp Hyb N'aa Jawyk Do hã.
Genesis 15:1-18
3 Ti m' p'aa hẽnh Abrãm ky hadoo:
—Dooh man'oo tah ỹỹ —näng mä ta kyyh. —Ti hyb n'aa da si ỹỹ moo wät doo wë da tabaym wakãb ỹỹ, ỹ dajëb bä —näng mä ta kyyh.
4 Ti m' Tak'ëp Hyb N'aa Jawyk Do ky hadoo Abrãm hã:
—Ta tii maky däng doo, Erijese, dooh da ta wë tayyw bä. A t'aah a hã hana do wë da tabaym —näng mä Tak'ëp Hyb N'aa Jawyk Do kyyh Abrãm hã.
5 Ti m' tamanyyh gadawan doo gó. Ti m' Tak'ëp Hyb N'aa Jawyk Doo ky hadoo:
—Mabegãã wë hã, matsén sakõõh mahajaa bä. Ti hawób da a panaa —näng mä Tak'ëp Hyb N'aa Jawyk Do kyyh.
6 Ti m' Abrãm ky dahé kän Tak'ëp Hyb N'aa Jawyk Doo. Taky daheeh do hyb n'aa né kä m', baad tawén hadoo P'op Hagä Do matym gó.
7 P'aa hẽnh P'op Hagä Do ky hadoo ta hã:
—Ỹ né hẽ Tak'ëp Hyb N'aa Jawyk Doo õm manaa doo Babéw hëj n'aa bä, panang Uh häd näng doo bä naa. Õm ỹ wén manaa hahỹỹh hëëj a hã ỹ banoo hyb n'aa, badanä n'aa mabahadoo hyb n'aa — näng mä P'op Hagä Do kyy kä Abrãm hã.
8 Ti m' Abrãm ky hadoo:
—Tak'ëp Hyb N'aa Jawyk Doo, sahõnh mabog'ããs doo —näng mäh. —Nyy d’ mä ti ỹ bahapäh ỹ ta danäh mahanäng doo? —näng mä Abrãm kyyh.
9 Ti m' Tak'ëp Hyb N'aa Jawyk Doo mejuu Abrãm manaa ta wë sét booj yb ỹỹnh, sét kabara, sét b'éé aj'yy.
—Tamawoob ãn genää däk doo da mamana —näng mä ta kyyh. —Na-ããj hẽ mamana sét mäs papuwpuw, sét muunh yb —näng mä Tak'ëp Hyb N'aa Jawyk Do kyyh Abrãm hã.
10 Ti m' Abrãm manaa P'op Hagä Do mejũũ doo ta hã. Booj yb taganebäh padëëk mäh, b'éé na-ããj hẽ, kabara na-ããj hẽ. Tii kä tat'ëëg bëëh mä pawóp hẽ noo gabäh hẽ. Këg enäh doo ti dooh taganebäh bä m'. 11 Tii kä m' kuruj-du rabehyng, rawëë paawä rakarẽn. Ti m' Abrãm habëë had'yyt hẽ.
12 Tii kä m' tug bä tabadoo däk bä, Abrãm baä̃ jëng. Tak'ëp tabaỹỹh. Ta ä̃ nuujé m' tabana tak'ëp badagyp doo, ä̃m n'aa näng doo. 13 Ti m' Tak'ëp Hyb N'aa Jawyk Do ky hadoo ta hã:
—Õm ỹ maher'oot. A panaa tas'eeh hẽnh da tasii n'aa da ramoo bok ta wób sa wë, sa häj n'aa nado doo bä. Rarahejãã da a panaa 400 ãn —näng mä Tak'ëp Hyb N'aa Jawyk Do kyyh Abrãm hã. 14 —Ta tii moo hed'oo doo, a panaa rejãã doo, ỹ ahäj jëng da ta jawén —näng mä ta kyyh. —Ta jawén, ta tii bä häj n'aa bä naa rabanyyh bä, tak'ëp da rawegããb däk —näng mä P'op Hagä Do kyyh Abrãm hã.
15 Ti m' taky hadoo ẽnh:
—Hỹỹ kä õm ỹ maher'oot. Bäp peej da mabawät nä. A wah'yy me da madajëp. Madajëb bä õm da kataa a ỹb makũũh hã, a oow makũũh hã, a oow oow makũũh hã na-ããj hẽ —näng mä ta kyyh Abrãm hã, P'op Hagä Do kyyh.
16 Ti m' taky hadoo ẽnh:
—A panaa pooj heboo bong do a panaa jawén buuj, ta jawén buuj kä, ta jawén buuj kä, tii da p'aa hẽnh habaaj nä hahỹỹh hëj n'aa bä —näng mäh.—Dooh da nayyw hẽ ỹ an'oo bä hahỹỹh hëëj sa hã. Hỹỹ kä ỹ ky n'aa enooh do hëëj bä, ti abong nä Amoor buuj. Dooh tak'ëp tahadoo nä bä nesaa doo sa hã. Tak'ëp nesa doo ramoo boo däk bä, ỹ anoo da sa häj n'aa paah a panaa sa hã —näng mä P'op Hagä Do kyyh.
17 Tii kä m' ti noo gó atsëm takasee kän tëëg hõõh tsyg näng doo, bag tasonh doo na-ããj hẽ. Ti m' taganebäh bëëh hoo gad'oo bä ratabës tëëg hõõh hã, bag tasonh doo hã. 18 Ti nuujé kä m' Tak'ëp Hyb N'aa Jawyk Do ky n'aa enooh Abrãm hã. Hahỹỹ da m' ta kyyh:
—Ỹ anoo né da a panaa hã hëëj Esito tamii häd näng doo, Eparat tamii häd näng hoo gad'oo bä badäk doo. 19-21 Kẽn buuj sa häj n'aa, Kenis buuj sa häj n'aa, Kadomõn buuj sa häj n'aa, Hiit buuj sa häj n'aa, Peris buuj sa häj n'aa, Repa buuj sa häj n'aa, Amoor buuj sa häj n'aa, Kanaãh buuj sa hëj n'aa, Gigas buuj sa häj n'aa, Jebus buuj sa häj n'aa. Sahõnh hẽ ỹ an'oo da a panaa sa hã —näng mä P'op Hagä Do kyyh Abrãm hã.