Abrãm gabaanh noo gó Ló panyyg n'aa hahỹỹh
14
1-2 Ti noo gó kä m' rakat'aa kaneb'ooh do pan'aa. Pooj jé Aramapéw mäh, Sinah bä wahë n'aa; ta jawén kä m' Ariók, Erasah bä wahë n'aa; ta jawén Kedóh mäh, Erãm bä wahë n'aa; ta jawén Tidaw, Gojĩm bä wahë n'aa m'. Tii kä m', kataa däk mä tii. Ti hadoo né m' sa majĩĩ na-ããj né hẽ m'. Hahỹ sa häd, sa majĩĩ sa häd: Pooj jé Bera, Sodoma bä wahë n'aa m'; ta jawén Bisah, Gomoha bä wahë n'aa m'; ta jawén Sinab, Adamah bä wahë n'aa m'; ta jawén Semebéh, Seboĩh bä wahë n'aa m'. Soah hẽnh bä wahë n'aa, ti na-ããj né hẽ m' rakata däk tii ẽnh. Soah häd seeh mä Bera. 3 Tii kä m', ta jawén kat'aa do sa majĩĩ waëë w'oo hã, ti rakata däk waëë séd pa habëëh kanahang gó. Sidĩm mä ta ti häd, Akajar Tak'ëp Dahëët Do häj n'aa bä tii. 4 P'ooj up mä Kedoh j'aa ketsë ta wób sa hã. Ti hyb n'aa ramoo bok sahõnh hẽ ta h'yyb däng doo, 12 m' ta baab. 12 ta baab tabadoo nä bä m', baad ramoo bok ta hã. Ta jawén kä, 13 tabadoo däg bä m' ta baab, tii bä kä dooh rakarẽn wät mä ramoo booh tamejũũ do hã. Dooh Kedoh raky dahé wäd mäh. Ti p'ãã m' rakaneb'ooh p'aa hẽnh.5 Tii kä m', 14 tabadoo däk bä ta baab, rabahõm kän radu doo rakaneb'ooh doo. Kedoh da h'yyb hedoo do ah'ũũm ta sii. Pooj jé ranebooh mä Repa karapee. J'aa ketsë mä sa hã panang Aseteróh-Karanaĩm häd näng doo bä. Ta jawén mä ranebooh Suus karapee. J'aa ketsë mä sa hã. Panang Hãm häd näng doo bä ti ranebooh. Ta jawén ranebooh Ẽm karapee. J'aa ketsë sa hã panang Sawéh Kiriat häd näng doo bä. Tii bä paa m' ti ranebooh. 6 Ta jawén ranebooh Hoor karapee Seih bä paa m'. Seih häd näng doo mä ti waëë häj n'aa. Tii kä m' rabahõm sa jawén. Panang Er-Paara häd näng doo bä m' rabebë nä. J'aa ketsëë mä sa hã. Er-Paara häd näng do edaa däk mä banawäng do häj n'aa. 7 Tii b’ naa kä m' Kedoh rababaaj nä. Tii kä m' rabahõm Ẽn-Misipat häd näng doo hẽnh. T'ĩĩ hẽnh mä rabebë nä. Ẽn-Mispat häd seeh mä Kades. Amarék karapee sa panang rabado hõm mäh. Amoor karapee na-ããj hẽ, Hasasõn bä haj'eenh do paa na-ããj hẽ rapanang bado hõm mäh, Kedoh ado hõm.
8-9 Tii kä m', Sodoma bä wahë n'aa, Gomoha bä wahë n'aa, Adamah bä wahë n'aa, Seboĩh bä wahë n'aa, Soah bä wahë n'aa rabahõm kän mä kaneb'ooh doo kä Sidĩm bä, waëë w'oo hã séd pa habëëh doo. Tii kä m', rakat'ëëg hõm kaneb'ooh do pan'aa sa majĩĩ sa sii. Hahỹỹ d’ mä sa majĩĩ häd: Kedoh, Erãm bä wahë n'aa; Tidaw, Gojĩm bä wahë n'aa; Amarapéw, Sinah bä wahë n'aa; Ariok, Erasah bä wahë n'aa. 5 hedoo do ti heb'ooh mä 4 hedoo do sii.
Genesis 14:8-23
10 Rakaneb'ooh bä kä, tii kä m', Sodoma, Gomoha buuj waj'aa bok mäh. Rakaneb'ooh bä kä m', rawaj'aah bä m', ta wób rakejäk gadarong doo gó. Sidĩm häd näng doo bä, rakaneb'ooh bä paa m', kabaderoh mä tii bä. Kaderoh doo gó m' tabanäng jari hedoo doo. Tii kä m', ta wób rakej'ëën hõm waëë hã. 11 Tii kä m', 4 hedoo do j'aa kets'ëë sa hã. Sahõnh hẽ Sodoma, Gomoha buuj sa ma rabasog hõm mäh, sa waa hedoo do na-ããj hẽ. Tii b’ naa kä m' rababaaj hõm. 12 Ramahũũm na-ããj hẽ kä m' sa sii Ló, sahõnh hẽ ta ma. Sodoma bä paa m' tabagä. Ti hyb n'aa kä m' rawén mahũũm. Ti d’ né hẽ m' Ló, Abrãm karasee.
13 Tii kä m' sét mä wajaah, Abrãm mä ta panäk. Eber karapee paa m' ti Abrãm. Ti noo gó m' Abrãm bawät b'aah hewëëh do banäng hẽnh, Mameréh panang nedaa hẽnh. Amoor karapee seeh paa né m' ti Mameréh. Mameréh hỹỹj paa né m' ti Eskoor, Aneer na-ããj hẽ. Abrãm nadëb n'aa né paa m' tii. 14 Tii kä m', Abrãm ky n'aa napëë däk bä ramahũũm do Ló, ti m' tabats'yyt ta karapee kaneb'oo do tyw n'aa mepäh doo. 318 ta karapee had'yyt hẽ m'. Ti m' rabahõm kän Ló mahũũm do sa jawén. Dãn bä m' rakataa. 15 Atsëm mä Abrãm betyn hõm mä ta sii han'aa doo, sa majĩĩ wë rakajäk hyb n'aa. Ti m' sa majĩĩ waj'aa bok mäh. Abrãm rewëën bok mä sa majĩĩ. Damasko panang bahä̃nh mä rabebë nä. Obah häd näng doo bä m' rabebëë nä. 16 Ti m' tagabaaj kän p'aa hẽnh Ló, ta ma. Sodoma buuj na-ããj hẽ, ajyy, ỹỹnh ta mahang, sa ma na-ããj hẽ m'.
17 Ti m' Abrãm ramabaaj nä me Kedoh ta moo hata ranebooh jawén paa bä, Sodoma bä wahë n'aa memũũn paawä Sawéh bä. Waëë kanahang gó m' tii. Sa wahëh mä ta danä tii.
18 Tii kä m', Merekisedek Sarẽm bä wahë n'aa tamemũũn kän Abrãm. Merekisedek häd näng doo, P'op Hagä Doo, Tabahä̃nh Hadoo Do ta ky n'aa herod. Tii kä m', taban'oo kän ta waa pãw, uwa bëëh na-ããj hẽ Abrãm hã. 19 Ti m' Merekisedek baad taky n'aa edëë gëët. Ti m' ta ky hadoo:
—P'op Hagä Doo, Tabahä̃nh Hadoo Doo, badäk hahỹỹh mo haj'aa näng doo, ky n'aa edëng da õm. 20 P'op Hagä Doo, Tabahä̃nh Hadoo Do ỹ ky n'aa edëng. Ti né hanoo a moo gó a majĩĩ —näng mä Merekisedek kyyh Abrãm hã.
Ti m' Abrãm bets'ëë hõm ta ma uuh, ta masããh wób na-ããj hẽ. Ji moo sahõnh hẽ ken'yyh doo, sét hẽ ken'yyh tets'ëë däk mä Merekisedek hã.
21 Tii kä m' Sodoma bä wahë n'aa ky hadoo Abrãm hã:
—Ỹ karẽn karapé haa mamanaa doo. Jããm up da ti ỹ karẽn —näng mä Sodoma bä wahë n'aa kyyh Abrãm hã. —Ỹ anoo da sahõnh hẽ a hã ma ỹỹ, mabaaj hõm do paah —näng mä ta kyyh Abrãm hã.
22-23 Ti m' Abrãm ky hadoo ta sii her'oot do hã:
—Takëp Hyb N'aa Jawyk Doo, Tabahä̃nh Hadoo Doo, badäk hahỹỹh mo haj'aa näng do maa napäh ỹ her'oot doo. Dooh ỹ gado bä maky n'aa enooh doo. Dooh ỹ gad'oos péh. Ỹ gadoo bä paawä, ti bë her'oot ỹ wekããb däk bë ma paa hã. 24 Dooh né ỹ gadoo bä a ma. Jããm né karapé haa rawaa jëng do a karapee waa uuh ỹ gadoo —näng mä Abrãm kyyh. —Hata haa Aneer, Eskoor, Mameréh häd enäh do rakarẽn bä sa säm a ma uuh, manoo sa hã. Ỹ ti dooh ỹ karẽn péh —näng mä Abrãm kyyh Sodoma sa wahëh hã.