Abrãm Ló daheeh raketyn bong do panyyg n'aa hahỹỹh
13
Tii kä m', raberéd hõm Esito häj n'aa, rababaaj na sa panang paa hẽnh, Negéh hẽnh. Ta ỹỹm, ta karom, ta ma na-ããj hẽ tamahũũm mäh. Ló m' ta hata. 2 Tak'ëp paa m' Abrãm ma nyy däk. Wekãb däk mäh. Masããh nyy däk, k'ããts tëg nyy däk gaberëh doo, hewak do na-ããj hẽ m'.
Genesis 13:1-17
3-4 Negéh bä naa kehỹỹt hed'yyt hẽ. Kaja nä kän mä ta tób paa bä, b'éé tyng tamoo wät do paa bä. Ta nu maseeh hẽnh Betéw panang häd näng doo mäh, ta nu maseeh hẽnh Aj panang häd näng doo mäh. Tahoo gad'oo bä m' ti tabadäk ta panang. T'ĩĩ hẽnh taber'ood kän Tak'ëp Hyb N'aa Jawyk Do sii.
5-6 Ló na-ããj hẽ m' hajõng ta masããh, hajõk ta sii moo b'ook doo. Hajõng Abrãm Ló sa masããh do hyb n'aa m', dooh tahaja bä sa masããh waa jewii. Dooh m' tahaja wäd bä séd hã raboo bä sa masããh hyb n'aa. 7 Tii kä m', sa masããh hagã n'aa raky kedäg kän sa masããh waa p'ãã. Kanaãh buuj, Peris buuj na-ããj hẽ tii bä rababong ti noo gó.
8 Ti m' raky kedäg bong do hyb n'aa m' Abrãm ky hadoo Ló hã:
—Taw'ããts hẽ dooh ër ky kedäg bä, dooh ër kawajããn bä, ër masããh hegã hã na-ããj hẽ. ër wakããn had'yyt hẽ —näng mä ta kyyh.
9 Ti m' ta ky hadoo ẽnh:
—Hamäh ër ketyn bong. Maher'ood mah'yyb däng doo. Makarẽn bä s'ỹỹ hẽnh mabahõm bä, hub hẽnh da ỹ bahõm. Hub hẽnh mahõm bä, s'ỹỹ hẽnh da ỹ bahõm —näng mä Abrãm kyyh.
10 Ti m' Ló tabaheg'ããs papỹỹj hana hẽnh. Tahapäh mä dawëë naa banäm do tamiih hëëj Joradãn häd näng doo. Edẽnh panang paa hadoo do ti hëëj. Esito häj n'aa hadoo do na-ããj hẽ. Tanyy had'yyt hẽ m' tii bä naëng. Ta ti häj n'aa kajaa mä Sowah panang hẽnh. Anäm né hẽ m'. (Sodoma, Gomoha häd enäh do panang P'op Hagä Do ajuu do pooj jé tii). 11 Sahõnh hẽ kä näng tahapäh doo kä, banäm doo, tahyb n'aa gadoo doo, t'ĩĩ hẽnh kä Ló bahõm kän mäh. Tii bä kä m' ketyn bong doo kä Ló, Abrãm daheeh. 12 Kanaãh häj n'aa bä Abrãm bawäd wät. Sodoma panang nedaa bä, banäm do häj n'aa babuuj n'aa sa panang mahang mä Ló bawäd wät. 13 Sodoma bä habong doo, dooh taw'ããts hẽ rado bä m'. Tak'ëp nesa do had'yyt mä ti ramoo bok Tak'ëp Hyb N'aa Jawyk Do matym gó.
14 Tii kä m', Abrãm Ló daheeh raketyn bong jawén paa bä m', Tak'ëp Hyb N'aa Jawyk Do ber'ood kän Abrãm sii. Ti m' taky hadoo:
—Mabegãã jé pad'yyt hẽ. Sahõnh hẽ mabegãã, papỹỹj hana hẽnh, papỹỹj hahyng hẽnh, ta karawaa me, ta karawaa s'eeh hẽnh. 15 Sahõnh hẽ da mahapäh do hëëj a matym me ỹ anoo da a hã, a panaa hã na-ããj hẽ. Bë ta danäh hed'yyt hẽ —näng mä Tak'ëp Hyb N'aa Jawyk Do kyh Abrãm hã.
16 Ti m' P'op Hagä Do ky hadoo ẽnh ta hã:
—Ỹ anoo da a hã hajõng a panaa, k'ããts tëg hawób da. Ji nahajaa doo da ji etsén bä k'ããts tëg, ti hadoo né da a panaa, dooh ji hajaa bä ji etsén bä. 17 Sahõnh hẽ hahỹ hëëj ỹ anoo da a hã. Ti hyb n'aa ahõm, mabatsén tagamaéh doo me tamadawyyt doo me —näng mä Tak'ëp Hyb N'aa Jawyk Do kyyh Abrãm hã.
18 Ti m' Abrãm rakahỹỹt kän Eberõn hẽnh. B'aah hewëëh do banäng Mameréh panang bä ta nedaa bä m' ta panang tamoo wät. T'ĩĩ hẽnh kä m' tamoo wät b'éé tyng Tak'ëp Hyb N'aa Jawyk Do h'yy kadajang hyb n'aa.