Abrãm P'op Hagä Do naëënh do panyyg n'aa hahỹỹh
12
Ti kä m' Tak'ëp Hyb N'aa Jawyk Do ky hadoo Abrãm hã:—Maberéd däk mabawät do paah, a wakããn, a yb tób paah —näng mä ta kyyh. —Ahõm da hëëj seeh hẽnh õm ỹ ma metëëh hẽnh —näng mä ta kyyh. 2 —Ỹ anoo da a karapee panaa hajõng da, raka'oot do pan'aa —näng mä ta kyyh. —Baad ỹ h'yyb däng a hã. Baad ỹ ky n'aa edëng a hã. Tak'ëp da maky n'aa etsëëh. Ta wób ky n'aa kedëng a hyb n'aa —näng mäh. 3 —Baad õm ta wób raky n'aa edëng doo, ỹ ky n'aa edëng né d’ tii —näng mä ta kyyh. —Õm ky n'aa wasee doo, ỹ ky n'aa wasee —näng mäh. —A hyb n'aa da sahõnh hẽ badäk hahỹỹ hã habong do ky n'aa kedëng —näng mä P'op Hagä Do kyyh Abrãm hã.
4 Tii kä m' Abrãm beréd däg kän ta panang paah P'op Hagä Do mejũũ doo da né hẽ. Ló mä ta hata. 75 ãn tabahadoo däk ta panang paah Arãn häd näng do taberéd däk noo gó. 5 Ti m' Abrãm rabahõm Kanaãh häj n'aa hẽnh. Tamahũũm mä ta ỹỹm, ta samad Ló, sahõnh hẽ ta karom Arãn panang bä tetsẽẽ do paah. Sahõnh hẽ na-ããj mä tamahũũm ta wak'ããb. Ti m' rakajaa.
6 Rakaja hõm noo gó m', Kanaãh häj n'aa bä kajetsëg hõm panang Sikẽm häd näng doo hẽnh. T'ĩĩ hẽnh ti asooh paa m' b'aah. B'aah bahäng do häd mä Moréh. Kanaãh buuj rabaj'eenh tii bä ti noo gó.
7 Tii kä m' Tak'ëp Hyb N'aa Jawyk Do kasee Abrãm hã. Ti m' taky hadoo ta hã:
—Hahỹ hëëj ỹ anoo da a panaa sa hã —näng mä Tak'ëp Hyb N'aa Jawyk Do kyyh.
Ti m' Abrãm moo wäd kän b'éé tejuu do tyng, Tak'ëp Hyb N'aa Jawyk Do tahyb n'aa jaw'yyk do ky n'aa.
8 Tii b’ naa paa kä m' Abrãm bahõm kän waëë kanekan hẽnh, Betéw panang nemuun. Waëë hã naa ji hegãã bä papỹỹj hahyng hẽnh, Betéw badäk. Tii bä kä m' tadabëëh sa tu pan'aa. Tii bä m' tadasooh ta jó ta tób n'aa ta masããh byyh s'ëëb. Tii b’ naa ji hegãã bä m', Aj panäng badäk papỹỹj hana hẽnh. Tii b’ na-ããj tamoo wät mä b'éé tajejuu do tyng. Ti m' taky hadoo Tak'ëp Hyb N'aa Jawyk Do hã:
—Õm ky enyym! Baad up õm! Tow'ããts hẽ õm —näng mä ta kyyh.
9 Tii b’ naa kä m' tabahõm kän. Kajetsëk mä tahõm bä. Papỹỹj hã, ta s'ỹỹ hẽnh hed'yyt mä papỹỹj hana. Ti m' Kanaãh häj n'aa bód hẽnh takaja hõm. Negéh ta häd mä tii.
Hahỹỹ kä Abrãm panyyg n'aa Esito häj n'aa hẽnh hahõm doo
10 Tii kä m', ta see pé noo gó, ta häj n'aa bä basaah mäh. Dooh wäd mä joom. Bawooj däk mä hëëj. Dooh m' tadots wäd. Has'aah do hyb n'aa kä m' Abrãm rabahõm kän Esito häj n'aa hẽnh. 11 Tii kä m', p'eets hẽ tabadoo däk bä m', Abrãm ky hadoo ta ỹỹm hã:
—Õm anäm da —näng mä ta kyyh ta ỹỹm hã. 12 —Ër kajaa bä, õm rahapëë bä, õm raheg'ããs anäm. Ti da Esito buuj raky hadoo: “Ti ta ỹỹm'’. Tii bä da ỹ da ranabooh a hyb n'aa. 13 Tii da reaaj bä a hã: “Õm ta ỹỹm?’’, ranoo bä a hã, tii da maky hadoo: “Dooh. Ỹ ta ä̃nh’’, noo da, ỹ rananabooh hyb n'aa a hyb n'aa, baad rabadoo hyb n'aa hã ỹỹ na-ããj hẽ —näng mä ta kyyh.
14 Ti m' rakaja hõm bä, Esito buuj raheg'ããs Abrãm ỹỹm Saraj. Anäm né hẽ sa hã. 15 Esito bä wahë n'aa sii mo b'ook do ky n'aa etsëëh doo, anäm né m' sa hã. Ti m' raher'oot sa wahëh hã:
—Anäm né ỹỹnh Abrãm sii hana doo —näk mä sa kyyh.
Ti m' Saraj ramahũũm kän Paraó wë, sa wahëh wë. 16 Abrãm ä̃nh ted'oo do hyb n'aa Paraó ky enyym mä Abrãm hã. Ti m' tan'oo däk, tets'ëë däk ta masããh b'éé, boj yb, kameer, jumeto ajyy ỹỹnh na-ããj hẽ. Ti’ m' tahaëëj däk ta hã ajyy, ỹỹnh ta karom pan'aa.
17 Ti m' P'op Hagä Do mo haj'aa Paraó, ta ỹỹm, ta taah, tak'ëp ranahëë enä kän P'op Hagä Do ky gabuuj. Saraj, Abrãm ỹỹm hyb n'aa m' tii. 18 Ti m' Paraó mejũũ ranaëënh Abrãm. Ana kän mä tii bä Paraó wë. Tii bä kä m' Paraó beaanh ta hã:
—H'ëëd ti tii d’ mad'oo hã ỹỹ? —näng mä ta kyyh. —Hëd n'aa paa ti nayyw manaher'oot hã ỹỹ ti a ỹỹm? —näng mä Paraó kyyh Abrãm hã. 19 —Hëd n'aa “ä̃nh ỹỹ’’ mabanäng? Ti hyb n'aa ti ỹ wén kat'ëë däk —näng mä ta kyyh.
Ti m' Paraó ky hadoo ẽnh:
—Hỹỹ kä ỹ haëëj däk a ỹỹm a hã p'aa hẽnh. Bë ahõm mahä̃nh ỹỹ häj ỹ n'aa bä naa! —näng mä Paraó kyyh Abrãm hã.
20 Ti m' Paraó mejũũ ta sii mo b'ook do rabanoo hyb n'aa baad Abrãm bahõm Esito bä naa. Ti m' Abrãm raky n'aa edëë hõm. Tamahũũm ta sii ta ỹỹm, sahõnh hẽ ta karom, ta sii han'aa do paa na-ããj hẽ, ta ma na-ããj hẽ. Sahõnh hẽ rabahõm.