Hỹỹ kä Babéw panyyg n'aa, p'op tób nu däk doo
11
Tii kä m' ti noo gó sét hẽ dó sa kyyh. 2 Tii kä m' nadëb rakahỹỹd kän papỹỹj hana hẽnh. Ti m' rabaw'yyt Sinah häj n'aa bä hëëj banäm, basatẽ doo. Tii kä m' raky hadoo:—Taw'ããts hẽ babä ër baym, babä ër babok —näk mä sa kyyh.
3 Ti m' rakaner'oot. Ti m' raky hadoo:
—Hamäh ër moo booh tób pan'aa.
Ti m' ramoo bong tsäng s'ëëb. Ta jawén kä m' baad rabajuu. Tapan'aa kä m' tsäng s'ëëb rajuu do paah. Ti m' ta katsa n'aa radoo jari hadoo doo.
4 —Hỹỹ kä —näk mä sa kyyh, —hamäh, ër moo booh ër panang pan'aa. Na-ããj hẽ ër moo bok tób tak'ëp haéh doo, p'op da tanuu däk. Wë hã da tanuu däk —näk mä sa kyyh. —Tii da ër bad'oo tak'ëp ër ky n'aa etsëëh hyb n'aa, ër kanetyn hyb n'aa. Séd hã had'yyt hẽ ër karẽn ër babok —näk mä sa kyyh.
5 Tii kä m' Tak'ëp Hyb N'aa Jawyk Do bahyng, taheg'ããs sa mo haj'aa, sa panang, tób haéh do na-ããj hẽ. 6 Ti m' tabaheg'ããs, ti m' taky hadoo:
—Hahỹ sét karapee né paawä, sét né paawä sa kyyh, sét né paawä rer'oot —näng mä ta kyyh, P'op Hagä Do kyyh. —Hahỹ sa moo du dahäng doo, hỹ jawén sahõnh hẽ da rah'yy kejäk do ramoo bok. Dooh da ranahajaa pé da —näng mä Tak'ëp Hyb N'aa Jawyk Doo.
7 Ti m' taky hadoo ẽnh:
—Ti bä ër ehỹỹd booh sa kyyh, ramaa nanapëë bong hyb n'aa sa da hadoo.
8 Tii d’ P'op Hagä Do wén d'oo, tabetyn hõm hyb n'aa. Ti hyb n'aa né paa kä m' rawén banatamaa wät sa panang. 9 Ti hyb n'aa rahäd n'oo däk Babéw sa panang paa häd. Rawén häd n'oo däk mä Babéw, P'op Hagä Do ehỹỹd hõm do hyb n'aa sahõnh hẽ sa kyyh. Ti b’ naa paa kä raketyn bong badäk hahỹ haw'ããts hẽ P'op Hagä Do an'oo bä.
Hahỹỹh Sẽm karapee panaa panyyg n'aa Abrãm hã gadäk doo
10 Tii käm Sẽm 100 ãn tabahadoo däk bä m', ta t'aah kä Apasad. Pawóp ta baab tabahadoo däg bä m', tabag'yyp jawén paa bä, tabenäng. 11 Apasad benäng jawén paa bä m', Sẽm bawäd wät 500 ãn. Taah nyy wät mäh, toog nyy wät. Tii kä m' tadajëp.
12 Apasad 35 ãn tabahadoo däk bä m', ta t'aah kä Serah. 13 Serah benäng jawén paa bä m', Apasad bawäd wät 403 ãn. Taah nyy wät mäh, toog nyy wät. Tii kä m' tadajëp.
14 Serah 30 ãn tabahadoo däk bä m', ta t'aah kä Eber. 15 Eber benäng jawén paa bä Serah bawäd wät 403 ãn. Taah nyy wät, toog nyy wät. Tii kä m' tadajëp.
16 Eber 34 ãn tabahadoo däk bä m', ta t'aah kä Pereg. 17 Pereg benäng jawén paa bä Eber bawäd wät 430 ãn. Taah nyy wät, toog nyy wät. Tii kä m' tadajëp.
18 Pereg 30 ãn tabahadoo däk bä m', ta t'aah kä Rew. 19 Rew benäng jawén paa bä Pereg bawäd wät 209 ãn. Taah nyy wät, toog nyy wät. Tii kä m' tadajëp.
20 Rew 32 ãn tabahadoo däk bä m', ta t'aah kä Serug. 21 Serug benäng jawén paa bä m', Rew bawäd wät 207 ãn. Taah nyy wät mäh, toog nyy wät. Tii kä m' tadajëp.
22 Serug 30 ãn tabahadoo däk bä m', ta t'aah kä Naoh. 23 Naoh benäng jawén paa bä m', Serug bawäd wät 200 ãn. Taah nyy wät mäh, toog nyy wät. Tii kä m' tadajëp.
24 Naoh 29 ãn tabahadoo däk bä m', ta t'aah kä Terah. 25 Terah benäng jawén paa bä m', Naoh bawäd wät 119 ãn. Taah nyy wät mäh, toog nyy wät. Tii kä m' tadajëp.
26 Terah 70 ãn tabahadoo däk bä m', tamawob hẽ ta taah. Abrãm, Naoh, Arãn sa häd mäh.
27 Hahỹỹ kä Terah panaa panyyg.
Terah mä ti Abrãm, Naoh, Arãn sa yb. Ta jawén kä m' Arãn Ló yb. 28 Arãn dajëp mä awät nä ta yb. Uh bä m' tabenäng. Tabenäng paa bä né m' tadajëp. 29 Tii kä m' Abrãm Naoh daheeh raket'ëë padëëk sa ä̃j. Abrãm ỹỹm häd mä Saraj. Naoh ỹỹm häd mä Miwka. Arãn toog ti Miwka. Miwka, Isakah daheeh sa yb tii Arãn. 30 Saraj, Abrãm ỹỹm, ti netah.
31 Terah pooj jé rabaj'eenh Uh bä, Babéw häj n'aa bä m'. Tii b’ naa paa m' taberéd däk ta panang. Tii kä rabahõm paawä Kanaãh hëj n'aa hẽnh. Ti m' rakajaa ta baa bä. Ti m' rabaj'eenh Arãn häd näng do panang bäa. Terah mahũũm do paa m' ta sii Abrãm, ta takaanh Saraj, ta tat'aah Ló. Ló mä Arãn t'aah paah.
Genesis 11:31-12:20