Sarahõd tadahäng do panyyg n'aa hahỹỹh
9
Ti m' P'op Hagä Do ky n'aa edëng mä Nowéh, ta taah sa hã na-ããj hẽ. Ti m' taber'oot sa hã:—Bë d’ ga'oot, bë panaa da kanekan. 2 Sahõnh hẽ da ta baboo n'aa, tah'ỹỹb, har'ëëng, këg enäh doo, bë da rejeỹỹm. Ỹ haëënh da bë hã. 3 Joom ỹ anoo do hadoo, ti hadoo né da ỹ anoo har'ëëng, taw'ëëd, tah'ỹỹb bë tä pan'aa hỹỹ kä —näng mäh. 4 —Sét hẽ da ti bë nawëh. Ta dab majyyw mahang da ti bë nawëh. Ta majyyw ted'ëëp mawén nawëh —näng mäh. 5 —Jé ta dahadoo do nabooh doo, mabaj näng ta hã ỹ an'oo bä. Dajëp né d’ tii ẽnh. Tabanas'aa dajëëb bä bë seeh, dajëp né d’ tii d’ ẽnh. Bë mas'ããh tadajëëb bä bë seeh, dajëp né d’ tii d’ ẽnh. 6 Ajyy ỹỹj, ỹ pehuunh ỹ hadoo né d’ tii, ti hyb n'aa jé ta dahadoo do nabooh doo, ti hadoo né d’ tii, dajëp né d’ tii d’ ẽnh —näng mä P'op Hagä Do kyyh.
7 Ti m' p'aa hẽnh P'op Hagä Do ky hadoo Nowéh sa hã:
—Ỹ karẽn da hajõng bëëh, bë kanekan hyb n'aa.
8 P'aa hẽnh P'op Hagä Do ky hadoo Nowéh sa hã:
9 —Hỹỹ kä baad hadoo do ỹ ky däng da bë hã. Hahỹ ỹ ky däng doo, bë hã ỹ ky däng, bë panaa hã na-ããj hẽ, 10 sahõnh hẽ ta baboo n'aa bë sii hajëë pëë do paa hã na-ããj hẽ, taw'ëëd, ji mas'ããh, har'ëëng, sahõnh hẽ marakaté gó naa bë sii hanyy do. 11 Hahỹỹ da d’ ky ỹỹ bë hã: Dooh da ỹ ahäj wäd bä sahõnh hẽ hedëp do naëng hag'yyp doo me. Dooh da hag'yyp do kawatsiig wäd bä badäk hahỹỹh —näng mä ta kyyh.
12-13 Ti m' p'aa hẽnh P'op Hagä Do ky hadoo:
—Ỹ dahäng sarahõd wë puh hã, bë hã, sahõnh hẽ ta baboo n'aa hã ỹ ky däng do heen n'aa. Ta ti ỹ ky däng do nahëëj da. Bë panaa panaa rahapäh né d’ tii. Ỹ ky däng do heen n'aa ti sarahõd. 14 Hỹỹ kä da naëng poo wäd bä kyh ỹ kabuuj, taganyyh bä sarahõd, 15 ỹ da hyb n'aa esee bë hã, ta baboo n'aa hã ỹ ky däng doo. Dooh ỹ gawatsig wäd bä hedëp do hag'yyp doo me. 16 Sarahõd ganyyh bä, ỹ heg'ããs, ỹ hyb n'aa es'ee nanäng ỹ ky däng do bë hã, ta baboo n'aa sa hã na-ããj hẽ. Nahëëj ta ti ỹ ky däng doo. 17 Sahõnh hẽ hedëp do hã ỹ ky däng do heen n'aa né ti sarahõd —näng mä P'op Hagä Do kyyh Nowéh hã.
Nowéh taah panyyg n'aa hahỹỹh
18 Tii kä m' Nowéh taah ta sii han'yyh doo kä, tamawob hẽ ta taah marakaté kabuuj. Sa häd mä Sẽm, Hãm, Japét. Kanaãh yb mä ta ti Hãm. 19 Ti né m' Nowéh taah. Tamawoob hẽ hadoo do paa né m' ti kaood bong badäk hahỹỹ hã.
20 Joom jóm tii Nowéh. Tejoom mä uwa häd näng doo. 21 Ti m' Nowéh eëëk uwa s'ëëb mahỹỹnh doo. Aoom mä ta mahỹỹj. Ta tób yt hã tũũ tabajad hõm mä ta sii n'aa hẽ. 22 Ti m' Hãm, Kanaãh yb, ta yb tahapäh saroor tamaa jat mäh. Ti m' tamaher'oot ta wakããn. 23 Tii kä m' Sẽm, Japét daheeh sa yb saroor radoo däk, sa janoo bä m' radasooh, ramahũũm mä sa jó paa me ranahapäh hyb n'aa sa yb. Rajasu jat mäh. Tas'ee hẽnh mä rabeg'ããs ranahapäh hyb n'aa sa yb.
24 Ti m' Nowéh ty gawëëj däg kän haoom do paah. Taty gawëëj däk jawén paa bä m', ky n'aa napäh ta ky n'aa ta t'aah bad'oo doo, tagad'ooh hadoo do bad'oo doo. 25 Ti m' tabaher'oot:
—Ky n'aa kawasee däk Kanaãh! Ta wakããn sa yd jé had'yyt hẽ tii. Daap da tamoo wät ta wakããn sa sii —näng mä Nowéh kyyh Hãm panaa ky n'aa.
26 Ti m' p'aa hẽnh taber'oot:
—Taw'ããts hẽ P'op Hagä Do ỹ h'yy kaha'eeh do ky n'aa edëng Sẽm! Hỹỹ kä Kanaãh Sẽm sii moo wëëd n'aats da.
27 P'op Hagä Do an'oo kah'ũũm da Japét häj n'aa —näng mä ta kyyh. —Séd hã d’ rababok Japét Sẽm daheeh —näng mäh. —Hỹỹ kä Kanaãh Japét sii moo wëëd n'aats da —näng mä Nowéh kyyh.