Hab'aap jëng do naëng panyyg n'aa hahỹỹh
8
Ti m' P'op Hagä Do hyb n'aa esee mä Nowéh. Ta baboo n'aa hejëë pëë do si hẽ m' tahyb n'aa esee. Ti m' P'op Hagä Do mejũũ tabahëm, naëng bab n'aa. Tii bä kä m' naëng ajëë kän mäh. 2 Ti kä m' k'ããts gó hana do paa kawatsik mäh. Naëng hadoos do na-ããj mä kawatsik. 3 150 m' ken'yyh mä ta ä̃h naëng bab'aab kän. 4 7 ta kamarab n'aa däk bä, 17 tabahadoo däk bä ta heen n'aa, marakaté kä m', waëë jó tabaso däk. Ararad mä ta häd mä ti waëë. 5 Tamii m' ajëë magyys hẽ m'. Ji moo sahõnh hẽ ta kamarab n'aa tabahadoo däk mäh, sét däk mä ta ä̃h, nu kas'oob kabë kän waëë.6 Ta jawén mäh, 40 ta ä̃h jawén paa bä m', Nowéh noo gasëës mä marakté. 7 Ti m' tapuung hõm taw'ëëd hasus doo. Tamawäd hõm né m' tii. Ana marakaté hatu hẽnh, dooh m' tajëë wäd. Tab'aab tagada né hẽ m'. 8 Ti m' mäs papopoow tapuung hõm mäh, tabeg'ããs hyb n'aa ta baab jëë bä. 9 Dooh m' tab'aab nä bä. Dooh m' tawyyt pé hëëj takameh'aak hyb n'aa. Ana kän mä paa hẽnh marakaté hatu hẽnh. Ti m' Nowéh banoo ta mooh, mäs papopoow badëë so kän. Ti tamajë suun p'aa hẽnh mä marakaté gó. 10 Ti m' tagada mä 7 ta ä̃h, p'aa hẽnh tapuung hõm mä mäs papopoow. 11 Tug bä m' tabana. Joom oriib häd näng do g'aad mä tamana tii bä kä. Tii bä kä m' Nowéh h'yy ganäng.
—Ab'aab jëng —näng mä ta kyyh.
12 Tagadaa wäd p'aa hẽnh 7 ta ä̃h, tapuung hõm mä mäs papopoow p'aa hẽnh. Tii kä m' dooh tana wäd bä Nowéh wë.
13 Tii bä Nowéh 601 ta baab däk. Tahenäng heen n'aa hã né hẽ m' tabaab jëng mäh. Tii kä m' Nowéh apynd hõm marakaté tób n'aa. Tabegãã kän mäh, ab'aab jëng mä naëng. 14 P'ets up paawä pawóp kamarab jawén paa bä m', tii bä kä m' baad tabawooj däk mä k'ããts.
15 Ti m' P'op Hagä Do ky hadoo Nowéh hã:
16 —Danäh õm, a ỹỹm, a taah, a taah sa ä̃j sii hẽ. 17 Magasëëts nä wë yt habong doo, har'ëëng, sahõnh ta baboo n'aa na-ããj hẽ, raka'oot hyb n'aa, rakanekan hyb n'aa.
18 Ti m' Nowéh, ta ỹỹm, ta taah, ta taah sa ä̃j sahõnh hẽ raban'yyh. 19 Séd uuh had'yyt hẽ ken'yyh ta baboo n'aa an'yyh mäh.
20 Ti m' Nowéh tama pä s'ëëb, tat'ëëg sëëk pä s'ëëb. Har'ëëng tyng, taw'ëëd na-ããj hẽ tii. Ti m' har'ëëng tanabooh ji awëh doo, wë yt habong do ji awëh do na-ããj hẽ. Ti m' tamahũũm ta tyng jó. Ti m' tabajuu P'op Hagä Do h'yy kadajang hyb n'aa. Sét ken'yyh mä ji awëh doo. 21 Ti m' P'op Hagä Do h'yy kadajang tajuu do babuu hã, ti hyb n'aa m' ta ky hadoo ta h'yyb gó:
—Dooh da hỹ jawén ỹ ky n'aa wasee wäd bä badäk hahỹỹh ajyy sa hyb n'aa. Ta karapee noo gó tadu däg nasaa do nadëb h'yyb gó. Dooh hỹỹ kä ỹ gawatsig wäd bä sahõnh hẽ ta baboo n'aa ỹ bed'oo doo da. 22 Badawëët da hỹỹ kä —näng mä ta kyyh. —Ti hyb n'aa tawén näng ji asyyh do heen n'aa, ji asok do heen n'aa, tab'aab heen n'aa, tameeh heen n'aa, banäm do heen n'aa, naëng adoos do heen n'aa, adëb bä, atsëm. Ti hado had'yyt hẽ da —näng mä ta kyyh.