3 Sahõnh hẽ taw'ëëd na-ããj da 7 né hẽ tii, ỹỹj né takanatëë tii hã. Ta du na pan'aa da tii. 4 7 ta ä̃ wäd ỹ mejũũ da naëng kä. Adoos da 40 ta ä̃h. Dooh da nayyw takeréd bä. Tii da da ỹ bad'oo, ỹ badoo wät ỹ pahuunh do paah —näng mä Tak'ëp Hyb N'aa Jawyk Do kyyh.

5 Ti m' Nowéh kä Tak'ëp Hyb N'aa Jawyk Do kyy gó kä, tii d’ né hẽ m' tabad'oo.

6 Nowéh 600 ãn tabahadoo däk bä kä m', badäk hahỹỹh naëng bagyb kän. 7 Nowéh kä hag'yyb do mahä̃nh kä m', ta taah, ta ỹỹm, ta taah ä̃j rabajëë pä kän marakaté gó kä. 8-9 Ti m' ji awëh do har'ëëng, ji nawëh doo, këg enäh doo, ta baboo n'aats sii hẽ m', ỹỹj né m' sakanatëë, rabana Nowéh wë. Ti m' marakaté gó kä tabajëë pä kän. Tii d’ né m' P'op Hagä Do mejũũ doo da. 10 7 ta ä̃h tabahadoo däk bä kä m', taky däng doo kä, tii bä kä m' tadu däg kän hag'yyp doo kä.

11 Nowéh 600 ta ãn däg kä, pawóp ta kamarab n'aa yt hã, setsi ta ä̃h kä, ti noo gó kä m' ganabëëh mä k'ããts jé pad'yyt hẽ, naëng genä kän. Ti noo gó m' naëng badots kän. 12 40 m' ta ä̃h kä naëng badots kän.

13 Ti noo gó né hẽ, naëng badoos pooj jé kä m', marakaté gó m' rabajëë pä kän ta gó kä Nowéh kä. 14-15 Sahõnh hẽ kä m' har'ëëng wób kä, ji ew'ëëh do wób kä, taw'ëëd wób kä, këg enäh do wób kä, ta baboo n'aa wób kä, kanatëë enä hõm ỹỹj hã kä, pawóp gen'yyh rabana Nowéh wë. Rabajëë pä kän ta sii kä. 16 Ajëë pëë doo, ajyy, ỹỹj. Ti d’ paa m' P'op Hagä Do mejõ kän. Tii bä kä m' P'op Hagä Do noo katsëë däg kän marakaté nooh.

17 Tii kä m' 40 ta ä̃h, 40 m' adëëb, tabadots kän. Tamiih as'ëëg kän. Asëëk, asëëk, asëëk. Marakaté m' sakég tuu kän. 18 T'op däk mä naëng. P'op mä marakaté batuu kän tamii jó. 19-20 P'op mä naëng gedäg näh. T'op mä hëëj badäg hõm. Sahõnh waëë bahä̃nh mä naëng gedäg näh. T'op mä waëë babë hõm, 7 meet mäh. 21 Sahõnh hẽ m' taw'ëëd, ji ew'ëëh doo, har'ëëng, ta baboo n'aa dejëp. Sahõnh hẽ kä m' ajyy ỹj radejëp. 22 Sahõnh hẽ m' k'ããts jó habong do dejëp. 23 Sahõnh hẽ m' habong do paa P'op Hagä Do kawats'iik tii kä. Jããm né hẽ m' hedëp Nowéh sii hajëë pëë doo, marakaté gó.

24 150 m' ta ä̃h naëng majat näh.