Tak'ëp h'yyb nesa doo panyyg n'aa hahỹỹh
6
Tii kä m' kanekan boo kän mä nadëb, kahũũm kän mäh. Toog enä kän mäh. 2 Ti m' ta wób, P'op Hagä Do taah ramaneëënh doo,a ajyy sa toog rabaheg'ããs; enyym sa hã. Ti m' rah'yy gejäk doo hã m' raket'ëë padëëk.
Genesis 6:1-21
—Dooh da Sahéh ỹỹ awäd wät hed'yyt hẽ ajyy sa mahang. Dejëp doo d’ tii. Hỹỹ kä 120 ãn da sa ãn hỹỹ kä.
4 Ti noo gó ti abong ajyy ky nesaa doo, ta wób mejũũ doo, rejãã doo. Ta jawén, P'op Hagä Do taah ramaneëënh do raketëë noo gó ajyy sa toog hã, ti abóng nä ta ti ajyy ky nes'aa doo. P'op Hagä Do taah ramaneëënh do ajyy toog hã raketëë noo gó, taah enäh mäh. Ky n'aa etsëëh paa m' sa panaa. P'ooj up ta tii. 5 Ti m' Tak'ëp Hyb N'aa Jawyk Do heg'ãã bä ajyy sa hã, tak'ëp däk nesaa doo. Nasaa do hed'yyt paa m' sa h'yyb. Sahõnh hẽ tii d’ paa m' sa h'yyb. 6 Ti m' Tak'ëp Hyb N'aa Jawyk Do hyb n'aa tón wät mäh. T'yyd kamehĩĩn mä ta ti ajyy tapahuunh doo hã kä. 7 Ti hyb n'aa m' taky hadoo:
—Hỹỹ kä ajyy ỹ kawats'iik. Sahõnh hẽ da ỹ bedo bong, sahõnh hẽ ỹ pahuunh do paah, ajyy, har'ëëng, ta baboo n'aa, taw'ëëd sii hẽ da. Ỹ t'yyd kamehĩĩn ỹ pahuunh do hã —näng mä Tak'ëp Hyb N'aa Jawyk Do kyyh.
8 Sét mäh, Nowéh häd näng doo, taw'ããts hẽ P'op Hagä Do hã. Takamahä̃n mä tii.
Nowéh h'yy ganäng do panyyg n'aa hahỹỹh
9 Hahỹỹ kä Nowéh panyyg n'aa kä.
Sét paa m' ti noo gó baad hed'yyt hawät doo. Nowéh mä ta häd. Dooh hyb n'aa raky n'aa tapaa péh ta hã. P'op Hagä Do hã m' ta h'yy ka'eeh, ta ky daheeh mäh. 10 Tamawoob paa m' ta taah ajyy. Ta taah häd mäh: Sẽm, Hãm, Japét.
11 Sahõnh hẽ ta wób paa m' ky nes'aa. Sahõnh mä tabanyy däk nesaa doo, hëëj haw'ããts hẽ. Taw'ããts nadoo wät mä P'op Hagä Do hã. 12 Ti m' P'op Hagä do baheg'ããs badäk hahỹỹh, banes'aa däk. Sahõnh hẽ kä m' ajyy rah'yy kawareem nesaa doo hã kä.
13 Ti m' P'op Hagä Do ky hadoo Nowéh hã:
—Ajyy ỹ hyb n'aa wareem hỹỹ kä. Jé pad'yyt hẽ nesaa däk sa hyb n'aa. Ti hyb n'aa ỹ kawats'iik da hỹỹ kä sahõnh hẽ. Ỹ kawats'iik da hỹỹ kä sa häj n'aa sii hẽ. 14 Mamoo wäd da a hood marakaté, habang pé ta pan'aa. Metyn hõm da ta gawakõ. Manetäg hõm da jari me ta jó, ta gó sii hẽ. 15 Mamoo wäd da marakaté, 133 meet man'oo bä. Madawyyd da. 22 meet da tagagó da. Góeh da man'oo bä. 13 meet da man'oo bä. P'op da tanu däk. 16 Mamoo wäd da ta tób n'aa. Dawë da makadadäg. Makakod enä da. Tamawoob hẽ da ta kakod. Ta póng jé ta kakod seeh, ta baa bä ta kakod seeh, ta yd jé ta kakod seeh. Ta karawaa me da ta noo man'oo bä. 17 Ỹ mejũũ da hag'yyp doo, sahõnh hẽ rakawatsik hyb n'aa. Sahõnh hẽ babä k'ããts jó habong do dejëp da. 18 Õm dooh tii d’ ỹ ad'oo bä. Baad up da ti a hã ỹ bad'oo. Mabahajaa bä da, tii gó da mabajëë suun a ỹỹm daheeh, a taah hẽ da, a taah ä̃j hẽ da. 19-20 Majë pä da a sii pawóp gen'yyh har'ëëng, ta baboo n'aa, taw'ëëd na-ããj da, sahõnh hẽ da ta baboo n'aats. Kanatëë enäh hed'yyt da ỹỹnh hã. Ta ti edëp do pan'aa. 21 Sahõnh hẽ da mamajëë pëë sa waa, bë waa na-ããj hẽ —näng mä P'op Hagä Do kyyh.
22 Ti d’ né kä m' Nowéh bad'oo kän P'op Hagä Do kyy gó.