Ricꞌben caꞌanan yejer ricꞌben ruꞌum
21
Caj tsꞌoc in wʌyʌcꞌtic tu cu bin u toꞌcar u joꞌr mac ten Cꞌuj.
Jeroj tuneꞌ,
caj in pʌctaj caj in wiraj waysaꞌb a caꞌananoꞌ.
Caj in wiraj waysaꞌb a ich yocꞌocaboꞌ soc irir ten mac jach ricꞌben.
Robob,
a uchbenob mʌnaꞌ,
quij,
caj rʌc tsꞌoquij,
mʌnaꞌ,
quireꞌ waysaꞌb ten Cꞌuj soc yʌn u jer ricꞌben ruꞌum.
Caj waysaꞌb yejer u jer ricꞌben caꞌananoꞌ,
chen a cꞌacꞌnaboꞌ mʌnaꞌ,
rʌc tsꞌoquij.
2 A tenoꞌ,
Juanen,
caj in wiraj u cajar Cꞌuj,
a Jerusalénoꞌ,
irej wa tan yeman teꞌ ich caꞌananoꞌ,
tu cu bin u cʌjtarob a mac a taj u yorob.
A ray cajaroꞌ,
caj in wiraj jach manan tsoy an ten bic a xquicoꞌ a cu buquintic u nocꞌ a jach manan tsoyoꞌ,
quireꞌ tar chꞌabir ten u mam.
Baxuc,
caj in wiraj u cajar Cꞌuj.
3 A tenoꞌ,
caj in wuꞌyaj u tꞌʌn mac,
jach cꞌam caj u puraj u tꞌʌn irej wa jach tꞌʌn Cꞌuj tin wuꞌyaj.
Rajiꞌ caj u yaꞌaraj:
―Cꞌuchij tu qꞌuinin cu bin u cʌjtar Cꞌuj yejer a mac a yerob Cꞌuj.
U bʌjiriꞌ Cꞌuj cu bin u cʌjtar ich a yerob Cꞌuj.
Mʌꞌ u bin pꞌʌtbir,
a baywoꞌ rajiꞌ jeꞌ u yerob Cꞌuj soc ij quet man Cꞌuj.
4 A ray u qꞌuininoꞌ,
Cꞌuj cu bin churic u wich a mac ocꞌnʌj.
Mʌnaꞌ mac cu bin quimin,
mʌnaꞌ mac cu yocꞌar,
mʌnaꞌ mac cu bin yacꞌtic u bʌj,
mʌnaꞌ mac cu bin yajtar.
Quireꞌ tu cotor baꞌ a tiꞌ yʌn uch ich yocꞌocabaꞌ tsꞌoquij,
quireꞌ man ―baxuc caj u yaꞌaraj a mac a cu tꞌʌn uch.
5 Jeroj tuneꞌ,
caj in wuꞌyaj u tꞌʌn Cꞌuj,
a curucbar tu cutanoꞌ,
a jach caremoꞌ.
Rajiꞌ caj u yaꞌaraj:
―Jeroj ―quij―,
a tenoꞌ ―quij―,
tin betic tu cotor baꞌ jach ricꞌben.
Rajen tsꞌibtej a baꞌ quin wac tech Juan,
quireꞌ taj quin wac tech,
rajen jach tsoy caj a wacsej ta wor tiꞌ in tꞌʌn.
6 Pachir,
quij Juan,
a Cꞌujoꞌ caj u wʌcꞌʌs araj ten:
―Jeroj,
toc rʌc tsꞌoc in beyaj tu cotor.
A tenoꞌ,
pʌyber cuxaꞌanen,
bayiriꞌ xan,
a tenoꞌ,
mʌꞌ biqꞌuin quin quimin.
Rajen a mac a ju cꞌat caꞌ in taquej soc u cuxtar munt qꞌuin,
jeꞌ in tsꞌic tiꞌ,
quireꞌ mʌnaꞌ u boꞌorir quir in tsꞌic tiꞌ.
7 Caj yaꞌaraj ten:
―Arej tiꞌob,
a mac a cꞌuchaꞌan yor tiꞌ a baꞌ cu tumtic yor soc u manob tu tsoyir rajiꞌob cu bin acsaꞌbir ten Cꞌuj,
quireꞌ raꞌ u pararob,
soc u cuxtarob munt qꞌuin.
Rajiꞌob cu bin yamtaꞌbir ten Cꞌuj xan,
quireꞌ raꞌ u Cꞌuj.
8 Chen a mac a tu chꞌaj sajquir tiꞌ u racꞌob,
rajen mʌꞌ tu yacsajob tu yorob,
quet yejer a mac jach taj mʌꞌ tu yacsajob tu yorob mʌꞌ u bin acsaꞌbir ich caꞌanan chen tiꞌ cu binob ich cꞌacꞌ,
a cu toquic azufre,
mʌꞌ u xur u mucꞌyaj.
Rajiꞌ u petjaꞌir cꞌacꞌ.
Tiriꞌ cu bin xan,
a mac a pꞌactaꞌb ten u racꞌob quir u siꞌpirob,
quet yejer a mac a cu cꞌujinticob u tus cꞌuj,
quet yejer tu cotor mac a cu tus,
quet yejer a mac a rajraꞌ cu manob,
cax yejer xquic,
cax yejer xib,
quet yejer a mac a cu quinsicob mac,
quet yejer mac a cunicob u racꞌob ―baxuc tu yaꞌaraj Cꞌuj ten,
quij.
U cajar Jerusalén a ricꞌbenoꞌ
9 Jeroj tuneꞌ,
caj cꞌuchij tu yʌnen tuririꞌ yʌjmasirob u tꞌʌn Cꞌuj.
Rajiꞌ tuririꞌ ich a sietejoꞌ u yʌjmasirob u tꞌʌn Cꞌuj a tu jochꞌquintob u chan ruchob quir u yajtar mac ich yocꞌocab.
Rajiꞌ tu tꞌʌnen quireꞌ a baꞌ tabar yesic ten.
Rajiꞌ caj u yaꞌaraj:
―Cojen teraꞌ Juan ―quij―.
Quin bin in wesic tech an ten bic tu cotor a yacsmʌnob tu yorob.
Robob cu bin cꞌʌmbirob ten u tʌmʌn yuc Cꞌuj irob a xquicoꞌ cu bin chꞌaꞌbir ten u mam ―baxuc caj u yaꞌaraj tenoꞌ u yʌjmasir u tꞌʌn Cꞌuj.
10 Caj in wʌyʌcꞌtaj ich caꞌanan,
rajiꞌ caj u pʌyen ich u joꞌr wits.
Jach carem a witsoꞌ,
bayiriꞌ xan,
jach caꞌanan.
Soc chʌcaꞌan in wiric u cajar Jerusalén,
u cajar Cꞌuj tu cu bin u cʌjtar mac a taj yoroꞌ.
Raꞌ eman u caꞌ tiꞌ caꞌanan.
11 A ray cajaroꞌ,
eman u caꞌ,
caj rembanʌjij yejer u sasirir Cꞌuj an ten bic u sasirir tunich,
a jach manan coꞌojoꞌ.
Rajiꞌ u tunichoꞌ,
u cꞌabaꞌ jasper,
quireꞌ sascꞌʌren ir a nenoꞌ sascꞌʌren.
12 A ray cajaroꞌ,
yʌn u paꞌteꞌ pʌcꞌaꞌan yejer tunich,
jach pim xan u paꞌteꞌir pʌcꞌaꞌan yejer tunich,
bayiriꞌ jach caꞌanan u paꞌteꞌir.
Raꞌ tu bʌcrist u cajaroꞌ.
Yʌn doce u jor ich paꞌteꞌ quir u man mac.
Tu yʌn jujuntur u jor ich paꞌteꞌ,
yʌn tuririꞌ yʌjmasirob u tꞌʌn Cꞌuj tan u cʌnanticob a tiꞌoboꞌ.
Tar ich u jor paꞌteꞌ,
tiꞌ toc tsꞌibaꞌan ich yocꞌor u jor paꞌteꞌ u cꞌabaꞌ a doce yoꞌnen u winiquirob israel.
13 Caj in wiraj u cajar Jerusalén,
a ricꞌbenoꞌ,
caj in wiraj u jor ich u paꞌteꞌ,
tres u jor tu cu tar ic yum.
Bayiriꞌ xan,
tin wiraj u jor ich paꞌteꞌ,
tres u jor tu cu bin ic yum.
Tin wiraj u jor ich paꞌteꞌ,
tres u jor tu xʌman caꞌan,
bayiriꞌ xan,
tin wiraj u jor ich paꞌteꞌ,
tres u jor ich nojar.
14 Caj in wiraj xan ich yaran u paꞌteꞌir tunich,
u tunichir quir u chichquinticob u yoc u paꞌteꞌir,
quireꞌ jach ar u paꞌteꞌir.
Tiꞌ tsꞌʌpaꞌan doce u tunichir quir u chichquinticob u yoc u paꞌteꞌir.
Tiꞌ tsꞌibaꞌan ich yocꞌor u jujuntur a doce tunichir u cꞌabaꞌ mac tuchiꞌtaꞌb ten u tʌmʌn yac Cꞌuj quir u tsecꞌticob u tꞌʌn uch.
15 A mac a caj tsibanʌjij yejeren,
rajiꞌ u mʌchmʌn u pꞌis quir u chꞌic u pꞌis u cajar Jerusalén.
U pꞌis a ju mʌchmʌnoꞌ a betaꞌb u mascabir oro.
Mʌꞌ chen cu bin u chꞌic pꞌis u cajar,
cu bin u chꞌic u pꞌis u jor a tiꞌ yʌnob ich u paꞌteꞌir.
Bayiriꞌ xan,
cu bin u chꞌic u pꞌis u tunichiroꞌ,
a cu chichquinticob u yoc u paꞌteꞌir.
16 Ber caj betaꞌb u cajar Jerusalén,
yʌn cuatro u tser,
quij,
rajiꞌ u cochir u cajar quet yejer u tan u cajar,
bayiriꞌ xan,
quet u caꞌanirir.
Rajiꞌ tu toc chꞌaj u pꞌis u cajar yejer u pꞌis a ju mʌmʌn caꞌch,
jeroj,
caj jocꞌ dos mil doscientos kilómetros.
Tʌcʌj rʌc quet u cochir u cajar yejer u tan u cajar yejer u caꞌanrir u cajar.
17 Bayiriꞌ xan,
yʌjmasir u tꞌʌn Cꞌuj,
caj u chꞌ u pꞌis u paꞌteꞌ a caj u bʌcrist u cajar Jerusalén.
Rajiꞌ caj u yiraj u pꞌis sesenta y cuatro metros.
A ray u pꞌisoꞌ irej an ten bic tsꞌur cu chꞌic u pꞌis,
cax wa yʌjmasir u tꞌʌn Cꞌuj,
toc quet u pꞌis.
18 Wa ber caj u tsꞌʌpquintob u tunichir quir u pʌqꞌuicob u paꞌteꞌ,
raꞌ u tunichir jaspe,
a jach coꞌojoꞌ,
caj u cꞌʌnob.
Caj u betob u yatochob ich u cajar Jerusalén,
caj u cꞌʌnob u mascabir oro jach sʌc jamen,
irej u nen sasir.
19 Wa ber caj u tsꞌʌpquintob u tunichir quir u chichquinticob u yoc u paꞌteꞌ,
jach coꞌoj u tunichir caj u cꞌʌnob xan.
Caj u pʌcꞌajob quireꞌ jach tsoy yiric mac.
Yaꞌab u tunichir caj u cꞌʌnob,
tʌcʌj coꞌoj.
Tu yʌn tsꞌʌpquintob u tunichir,
jaspe u cꞌabaꞌ.
Ich yocꞌor jaspe tu caꞌ tsꞌʌpquintob u tunichir zafiro.
U jer tu caꞌ tsꞌʌpquintob u tunichir,
u cꞌabaꞌ ágata.
U jer tu caꞌ tsꞌʌpquintob,
tu tsꞌʌpquintob u tunichir,
esmeralda u cꞌabaꞌ.
20 U jer tu caꞌ tsꞌʌpquintob,
caj u tsꞌʌpquintob u tunichir,
ónice u cꞌabaꞌ.
U jer tu caꞌ tsꞌʌpquintob caj u tsꞌʌpquintob u tunichir,
cornalina u cꞌabaꞌ.
U jer tu caꞌ tsꞌʌpquintob caj u tsꞌʌpquintob u tunichir,
crisólito u cꞌabaꞌ.
U jer tu caꞌ tsꞌʌpquintob caj u tsꞌʌpquintob u tunichir,
berilo u cꞌabaꞌ.
U jer tu caꞌ tsꞌʌpquintob caj u tsꞌʌpquintob u tunichir,
topacio u cꞌabaꞌ.
U jer tu caꞌ tsꞌʌpquintob caj u tsꞌʌpquintob u tunichir,
crisoprasa u cꞌabaꞌ.
Jeroj tuneꞌ,
u jer tu caꞌ tsꞌʌpquintob caj u tsꞌʌpquintob u tunichir,
jacinto u cꞌabaꞌ.
U jer tu caꞌ tsꞌʌpquintob caj u tsꞌʌpquintob u tunichir,
amatista u cꞌabaꞌ.
21 Caj u sinob u mac u jor ich paꞌteꞌ,
raꞌ toc betaꞌb tiꞌ sʌc uj,
u cꞌabaꞌ perla.
Yʌn doce u mac u jor toc betaꞌb tiꞌ sʌc uj,
a perlajoꞌ.
Raꞌ u mac u jor ich u paꞌteꞌ toc betaꞌb tiꞌ tuririꞌ sʌc uj.
U berir tu cu manob mac ich u cajar Jerusalén u mascab toc betaꞌ oro an ten bic u sasir nen.
22 A tenoꞌ,
mʌꞌ jin wiraj tu cu naj cꞌujinticob Cꞌuj,
quireꞌ mʌnaꞌ,
quij,
ich u cajar Jerusalén.
Mʌꞌ baꞌwir tiꞌ,
quireꞌ toc tiꞌ yʌn Cꞌuj,
a mac jach manan chich u mucꞌ,
bayiriꞌ xan tiꞌ yʌn Jesús u tʌmʌn yuc Cꞌuj.
23 A ray u cajaroꞌ,
mʌꞌ baꞌwir a ic yumoꞌ,
quij,
mʌꞌ baꞌwir ic nʌꞌ xan,
quir u sasichʌjʌrob u cajaroꞌ.
Mʌꞌ ja wirej,
yʌn u toc sasirir Cꞌuj tiꞌ,
yejer Jesús u tʌmʌn yuc Cꞌuj.
24 Tu cotor u cajarob ich yocꞌocab a tu yacsob tu yorob cu bin u quiꞌtar u yorob quireꞌ u sasirir tu cajar Jerusalén.
Mʌꞌ ja wirej,
jeꞌ u cꞌuchur u sasirir tu cʌjaꞌanob ich yocꞌocab.
Robob a mac a cu reyinticob ich yocꞌocab jeꞌ u binob purbir ich Cꞌuj a baꞌ noꞌj,
cu binob purbir quir u ricꞌsicob tiꞌ Cꞌuj soc u sʌjticob Cꞌuj.
25 U mac u jor u paꞌteꞌ mʌꞌ ju macʌr,
rajraꞌ qꞌueꞌaꞌan,
rajraꞌ cu yocar mac soc rajraꞌ cu jocꞌar mac xan.
Mʌꞌ ju bin u mʌquicob u jor ich u paꞌteꞌ.
Mʌꞌ biqꞌuin cu yacꞌbirchʌjʌr xan.
26 Robob a cu bin cꞌuchur tu cajar Jerusalén cu binob tar purbir a baꞌ noꞌj tiꞌ mac quir u ricꞌsicob tiꞌ Cꞌuj soc u sʌjticob Cꞌuj.
27 A baꞌ jach cꞌasoꞌ,
quij,
mʌꞌ ju bin acsaꞌbir tu cajar Jerusalén,
mix a cu man tu cꞌasir,
mix a mac a pꞌactaꞌb ten u racꞌob,
quireꞌ u siꞌpir,
mix a cu manob tus.
Chen a mac cu bin ocar,
a mac a tu yiraj Cꞌuj toc tsꞌibaꞌan u cꞌabaꞌ tu juꞌunin quir u cuxtar munt qꞌuin,
a raꞌ yʌnin u tʌmʌn yuc Cꞌuj.