22
Tu cajar Jerusalén tu cu bin u cʌjtar mac a cu tocar ten Cꞌuj.
Rajiꞌ u yʌjmasir u tꞌʌn Cꞌuj caj u yesaj ten yicꞌ jaꞌ a cu tsꞌic quir u cuxtar mac.
A yoc yicꞌ jaꞌoꞌ,
tiꞌ cu man yoc yicꞌ jaꞌ ich yaran u cutanoꞌ,
a jach caremoꞌ,
bayiriꞌ xan,
u yoc yicꞌ jaꞌ tu cu man tiꞌ u cutanoꞌ,
a yʌnin u tʌmʌn yuc Cꞌuj.
Chich yoc yaꞌarir,
jach sʌc u wich an ten bic u sasir nen.
2 A yoc yaꞌariroꞌ,
cu man chumuc u berir u cajar Jerusalén.
Tu chiꞌ yaꞌarir tiꞌ yʌn u cheꞌer a cu yaꞌaric u cheꞌer quir u cuxtar mac.
Caꞌ wʌrʌcꞌ jumbuj u chiꞌ yaꞌarir tiꞌ yʌn a ray u cheꞌeroꞌ.
Rajraꞌ cu wichʌncʌr,
quireꞌ caꞌ bin tac u jer ic nʌꞌ yʌn u jer u wich.
U burur yaxꞌquin yʌn u wich.
U wich,
a ray cheꞌeroꞌ,
mʌꞌ u chen tsꞌabʌr u cuxtar mac,
bayiriꞌ xan,
u reꞌ,
a ray cheꞌeroꞌ,
cu jantic caꞌ jawʌc a baꞌ yajir yʌn tu cotor a cajaroꞌ,
cu jantiqueꞌ cu jawʌr u yajir.
3 Mʌꞌ ja wirej,
quireꞌ a ray u qꞌuininoꞌ,
mʌꞌ yacsaꞌ a cꞌasoꞌ,
mix xan,
a mac cꞌasoꞌ mʌꞌ u yacsaꞌ,
mʌnaꞌ baꞌ a cu bin tacꞌbir u joꞌr ten Cꞌuj.
A Cꞌujoꞌ,
jeꞌ u reyinticob mac quet yejer Jesús u tʌmʌn yuc Cꞌuj.
A ray u qꞌuininoꞌ,
a ray yʌninob Cꞌuj jeꞌ u cꞌujinticob Cꞌuj.
4 A ray u qꞌuininoꞌ,
jeroj tuneꞌ,
robob a mac yʌninob Cꞌuj,
rajraꞌ jeꞌ u binob ich ʌcʌtan tiꞌ Cꞌuj,
quireꞌ rajiꞌ yʌninob Cꞌuj.
Jeꞌ u tsꞌibtaj u cꞌabaꞌ tu pam a tiꞌoboꞌ.
5 A ray u qꞌuininoꞌ,
mʌꞌ ju bin acꞌbirchʌjʌr,
mʌꞌ baꞌwir quib xan,
mʌꞌ u sasirir ic yumoꞌ xan,
quireꞌ u sasirir Cꞌuj cu bin u sasiquintic tiꞌ.
Robob u pararob Cꞌuj jeꞌ u reyinticob mac irob quet reyob yejer Cꞌuj munt qꞌuin.
Tabar u yuꞌur Jesucristo
6 Pachir caj u yaꞌaraj ten yʌjmasir u tꞌʌn Cꞌuj ten,
tan yaꞌaric:
―A baꞌ ta wʌyʌcꞌtaj ich caꞌanan Juan ―quij―,
rajiꞌ taj,
mʌꞌ u tusbarech Cꞌuj,
jach taj.
A baꞌ esaꞌb tech ich caꞌanan raꞌ quir a wer tabar u cꞌuchur aroꞌ,
bayiriꞌ jach taj xan.
Mʌꞌ ja wirej,
raꞌiriꞌ Cꞌuj a tu tuchiꞌtaj a mac a tsꞌaꞌb u tucur ten Cꞌuj quir u tsicbar a baꞌ u cꞌat Cꞌuj uch.
Rajiꞌ xan,
caj u tsꞌajaj a tucur tech quir a tsꞌibtic a baꞌ u cꞌat Cꞌuj soc yerob u pararob Cꞌuj a baꞌ cu yʌnxchun,
bayiriꞌ xan,
a baꞌ a tabar u yʌnxchun ich yocꞌocab.
7 An ten bic caj yaꞌaraj ten ic Jaj Tsꞌurirex,
a tenoꞌ,
Juan,
quin wʌcꞌʌs aric tech:
“Tabaren in wuꞌur”,
quij Jesús.
Jach quiꞌ yor a mac a cu bin yubej tu yor,
a cu quibic in tꞌʌn,
u tꞌʌn a tin wesaj tech ich a jeꞌ u juꞌuninaꞌ.
8 A tenoꞌ Juan,
quij,
caj in wiraj tin wich a baꞌ tin wʌyʌcꞌtaj ich a jeꞌ u juꞌuninaꞌ.
Bayiriꞌ xan,
a baꞌ tin wuꞌyaj ich a jeꞌ tꞌʌnaꞌ,
a quin tsꞌibtic techex ich a jeꞌ u juꞌuninaꞌ.
Quireꞌ a baꞌ tin wʌyʌcꞌtaj yejer a baꞌ tin wuꞌyaj,
jeroj tuneꞌ,
caj xonrajen ʌcʌtan yʌjmasir u tꞌʌn Cꞌuj quir in cꞌujintic yʌjmasir u tꞌʌn Cꞌuj.
Caj in betaj a baxucoꞌ,
quireꞌ a baꞌ caj u yesaj ten caj in cꞌujintaj.
9 Caj yaꞌaraj ten yʌjmasir u tꞌʌn Cꞌuj:
―Mʌꞌ a cꞌujintiquen,
quen,
pꞌeriꞌ ic beyaj yejer Cꞌuj.
Mʌꞌ ja wirej,
pꞌeriꞌoꞌon yejer a mac tsꞌaꞌb u tucur ten Cꞌuj quir u tsicbar a baꞌ u cꞌat Cꞌuj uch.
An ten bic Cꞌuj caj u cꞌanob a tiꞌoboꞌ caj u tsecꞌtob u tꞌʌn,
bayiriꞌ xan,
a tenoꞌ,
a Cꞌujoꞌ caj u cꞌʌnajen xan.
A tenoꞌ,
iren an ten bic tu cotor mac,
yʌn in toc quibic u tꞌʌn Cꞌuj xan,
rajen Juan,
caꞌ a cꞌujintej Cꞌuj ―baxuc caj yaꞌaraj ten.
10 Caj yaꞌaraj ten yʌjmasir u tꞌʌn Cꞌuj:
―Arej tiꞌ a baꞌ tiꞌ yʌn ich a jeꞌ u juꞌuninaꞌ soc yerob mac a baꞌ tiꞌ tsꞌibaꞌan,
quireꞌ tsꞌaꞌb u tucur ten Cꞌuj tiꞌ tech caꞌ a tsꞌibtej ich a jeꞌ juꞌuninaꞌ a baꞌ u cꞌat Cꞌuj.
Quireꞌ tabar u yʌnxchun a baꞌ tsectaꞌb ich a jeꞌ juꞌuninaꞌ.
11 Uꞌyex baꞌ quin waꞌaric techex.
Wa ber caꞌ bin tsꞌocac a baꞌ tin wʌyʌcꞌtaj ich caꞌanan yejer a baꞌ tin wuꞌyaj,
jeroj tuneꞌ,
mʌꞌ tub u cꞌaxicob yorob,
a mac a cꞌasoꞌ,
quireꞌ rajiꞌob mʌꞌ u cꞌat u pꞌʌtob u cꞌasirob,
rajiꞌob u beriꞌ caꞌ bin xicob ich cꞌacꞌ.
A mac a cu manob tu cꞌasirob u beriꞌ caꞌ bin xicob ich cꞌacꞌ xan.
Bayiriꞌ xan,
a mac a cu manob tu tsoyirob u beriꞌ caꞌ bin xicob ich Cꞌuj.
A mac a cu yet man Cꞌuj u beriꞌ caꞌ bin xicob ich Cꞌuj.
12 Cꞌaj techex a baꞌ araꞌb ten ic Jaj Tsꞌurirex uch:
―Quiꞌ cʌnant a bʌjex quireꞌ tabar in wuꞌur.
A tenoꞌ ―quij―,
quin bin in boꞌotej a mac a beyajnʌjij tiꞌ ten an ten bic caj betnʌj tiꞌ Cꞌuj.
13 A tenoꞌ ―quij― Jaj Tsꞌur,
a pʌyber cuxaꞌanen.
Bayiriꞌ xan,
a tenoꞌ mʌꞌ biqꞌuin quin quimin ―quij―.
A tenoꞌ,
u beriꞌ tiꞌ yʌnen,
bayiriꞌ xan,
munt qꞌuin u beriꞌ tiꞌ yʌnen.
A tenoꞌ ―quij Jaj Tsꞌur―,
tin yʌnxchun tu cotor baꞌ,
bayiriꞌ xan,
a tenoꞌ a quin tsꞌocsic tu cotor baꞌ.
14 Jach quiꞌ yor a mac a pꞌob u pixamob ten Cꞌuj,
quireꞌ rajiꞌ cu bin chaꞌbʌr ten Cꞌuj caꞌ u jant u wich cheꞌ ich u cheꞌer cuxtar soc u cuxtar munt qꞌuin,
rajiꞌ xan,
cu bin chaꞌbʌr u yocar tu jor u paꞌteꞌ,
a tiꞌ yʌn ich a ray tu cajaroꞌ.
15 Chen a mac a jach cꞌasoꞌ,
yejer a mac a cu cunic u racꞌob,
yejer a mac a rajraꞌ cu manob yejer mac,
yejer a mac a cu quinsic u racꞌob,
yejer a mac a cu cꞌujintic u tus cꞌujoꞌ,
yejer a mac a quiꞌ yor u tusic mac,
robob mʌꞌ u chaꞌbʌr ten Cꞌuj yocar a ray tu cajaroꞌ.
16 Caj yaꞌaraj ten Jesús,
quij:
―A tenoꞌ ―quij Jesús―,
caj in tuchiꞌtaj yʌjmasir u tꞌʌn Cꞌuj tiꞌ tech Juan,
soc rajiꞌ cu masic tech,
a jeꞌ tꞌʌnaꞌ,
soc yerob mac tu cu muchꞌquinticob u bʌj quir u cꞌujinticob Cꞌuj ich u ruꞌumin Asia,
a siete najoꞌ,
tu cu muchꞌquinticob u bʌjob.
Arej tiꞌob ―quij Jesús―,
a tenoꞌ,
u pararen David quireꞌ rajiꞌ in nunquir a tu reyintajob u winiquirob israel uch,
an ten bic caj toc araj Cꞌuj uch tu tsꞌibaꞌan u tꞌʌn Cꞌuj,
tu cu tsicbar tiꞌ Cristo.
Mʌꞌ ja wirej,
a tenoꞌ,
iren yʌjyacsiryʌjiren qꞌuin,
a coch u wichoꞌ,
quireꞌ quin yercꞌacꞌtic a ruꞌumoꞌ tu yacꞌbirir.
17 Mʌꞌ ja wirej,
rajiꞌ u Tajꞌor u Pixam Cꞌuj quet yejer tu cotor a yacsmʌnob tu yorob tan u tꞌʌnicob Cristo tan yaꞌaricob tiꞌ:
―Cojen.
Bayiriꞌ xan,
tu cotor mac a tan u yubicob a jeroj,
bayiriꞌ xan,
caꞌ yaꞌarej:
―Cojen.
Rajen a mac a ju cꞌat tacbir soc u cuxtar munt qꞌuin,
arej u tar,
jeꞌ u tsꞌabʌr u cuxtar munt qꞌuin quireꞌ mʌnaꞌ u boꞌorir u cꞌat.
18 A tenoꞌ,
Juanen,
a baꞌ tin wʌyʌcꞌtaj yejer a baꞌ tin wuꞌyaj ich a jeꞌ juꞌuninaꞌ,
rajiꞌ taj.
Rajen tu cotor mac a tu cꞌʌꞌotaj a baꞌ tsecꞌtaꞌb ich a jeꞌ juꞌuninaꞌ,
cax tu caj u yubaj,
tub u xacmʌniꞌ,
cax u yubaj u jumintaꞌ tiꞌ.
Arej mʌꞌ u cꞌʌs tꞌajac baꞌ tiꞌ.
Rajiꞌ jeꞌ u yubic u tsꞌiquir Cꞌuj an ten bic caj yubob a tsꞌibtaꞌb tiꞌ ich a jeꞌ juꞌuninaꞌ wa cu tꞌajar tiꞌ baꞌ jeꞌ yubic u tsꞌiquij Cꞌuj.
19 Baxuc xan,
wa mac cu rucꞌsic chichin baꞌ tiꞌ a baꞌ tsecꞌtaꞌb ich a jeꞌ juꞌuninaꞌ,
a Cꞌujoꞌ mʌꞌ ju chaꞌbʌr u yocar ich u cajar Jerusalén tu tsꞌibaꞌan u cꞌabaꞌ mac quir u cuxtar munt qꞌuin.
Rajiꞌ jeꞌ u yubic u tsꞌiquir Cꞌuj,
an ten bic caj yubob a tsꞌibtaꞌb tiꞌ ich a jeꞌ juꞌuninaꞌ wa cu rucꞌsic chichin a baꞌ tsecꞌtaꞌb ich a jeꞌ juꞌuninaꞌ.
20 U bʌjiriꞌ ic Jaj Tsꞌurirex caj yaꞌaraj:
―Jach taj,
quin toc aric,
seb quin wuꞌur.
Caj in nuncaj tiꞌ:
―Cojen in Jaj Tsꞌurir,
an ten bic ta wesaj ten ich a jeꞌ juꞌuninaꞌ.
Cojen in Jaj Tsꞌurir quireꞌ baxuc in cꞌat.
21 A tenoꞌ,
in cꞌat caꞌ u yamtechex ic Jaj Tsꞌurirex quireꞌ otsir yiriquechex.
Jeroj tsꞌoquij,
quij Juan.