19
Caj tsꞌoc in wʌyʌcꞌtic ich caꞌanan tu tin wir u cajar Babilonia,
jeroj caj in wuꞌyaj u tꞌʌn mac a tu muchꞌaꞌanob ich ʌcʌtan tu cutan a caremoꞌ.
Cꞌam caj u tꞌʌnob tan yaꞌaricob:
Caꞌ ij caremquintex u cꞌabaꞌ ic Jaj Tsꞌurirex Cꞌuj,
quireꞌ tu tacoꞌonex soc mʌꞌ jic binex ich cꞌacꞌ.
Caꞌ ic sʌjtex Cꞌuj,
quireꞌ a baꞌ tu betaj.
Caꞌ ic sʌjtex a tiꞌoꞌ tij corex quireꞌ rajiꞌ yʌn tu cotor u mucꞌ.
Chen rajiꞌ yʌn u mucꞌ tu cotor,
quireꞌ rajiꞌ ij cꞌujirex ic Jaj Tsꞌurirex.
2 Mʌꞌ ja wirej,
a baꞌ u ber tiꞌ u cajar Babilonia,
raꞌ u tajir u boꞌorir u siꞌpir,
rajen tsꞌiquij Cꞌuj,
yejer a xquicoꞌ,
quireꞌ rajiꞌ cu tus etsꞌbar u cajar Babilonia.
Mʌꞌ ja wirej,
rajiꞌ tu pʌy u siꞌpir tu tu yaꞌaraj u man yejer xquic,
bayiriꞌ xan,
tu pʌy u siꞌpir tu tu yaꞌaraj u man yejer xib.
Rajiꞌ tu pʌy u siꞌpirob,
baxucoꞌ tiꞌ a mac a cʌjaꞌan ich yocꞌocab.
A Cꞌujoꞌ,
caj tsꞌiquij yejer quireꞌ tu chuc u pachob a mac a tu yacsob tu yorob tiꞌ Cꞌuj,
quireꞌ tu quinsob.
Baxuc caj yaꞌaraj a mac a muchꞌaꞌan tu cutan a jach caremoꞌ.
3 A jach pimoꞌ,
a muchꞌaꞌanob ich ʌcʌtan u cutan,
a jach caremoꞌ,
caj u wʌcꞌʌs arob:
―Caꞌ ij caremquintex u cꞌabaꞌ ic Jaj Tsꞌurirex Cꞌuj,
quireꞌ tu chꞌes u cajar Babilonia.
Raꞌ u butsꞌir tu cu yerar,
raꞌ ir u butsꞌir tu cu mucꞌyajob a mac a tiꞌ yʌn ich cꞌacꞌ munt qꞌuinoꞌ.
4 Jeroj tuneꞌ,
robob,
a xiboꞌ,
a nuxiboꞌ,
a veinticuatrojoꞌ,
quet yejer a bʌcꞌ cuxaꞌanoꞌ,
a cuatrojoꞌ,
caj rʌc xonrʌjob ich ʌcʌtan mac a curucbar tu cutan,
a jach caremoꞌ,
quir u cꞌujinticob.
Robob caj u yaꞌarob:
―Quireꞌ nupꞌ a tꞌʌn an ten bic caj u rʌc arob tech,
caꞌ ij caremquintex a cꞌabaꞌ ―baxuc caj yaꞌaraj a veinticuatro xib,
a nuxiboꞌ yejer a bʌcꞌ cuxaꞌanoꞌ,
a cuatrojoꞌ.
5 Jeroj tuneꞌ,
a mac a bʌytʌc tu curucbar mac tu cutan,
a jach caremoꞌ,
caj u purob u tꞌʌn,
tan yaꞌaricob:
Caꞌ ij quiꞌ tꞌʌntex Cꞌuj,
a mac quij cꞌujintiquex,
cax a techex ich caꞌananoꞌ,
quij,
cax a techex ich yocꞌocaboꞌ.
Quet yejer a mac a cu sʌjticob Cꞌuj,
a tan u quibicob u tꞌʌn.
Caꞌ a warex:
“Bayoꞌ Cꞌuj”,
cax u caꞌ tsꞌurir,
cax u jach tsꞌurir.
U quiꞌquiꞌ janʌnob tu qꞌuinin caꞌ bin uruc Jesús
6 Tu tin wʌyʌcꞌtaj ich caꞌanan,
caj in wuꞌy u tꞌʌn mac,
rajiꞌ irej wa ju tꞌʌn pim mac cu tꞌʌnob.
Chen cꞌam u tꞌʌnob irej u man u jum yoc jaꞌ,
a chich u yoc jaꞌoꞌ,
chen yaꞌab u man u jum u yoc jaꞌ.
Bayiriꞌ xan,
rajiꞌ u tꞌʌnob uꞌy u man u jum a cu pecoꞌ.
A ray tꞌʌnoꞌ,
caj u yaꞌaraj:
Caꞌ ij caremquintex u cꞌabaꞌ Cꞌuj,
a mac jach chich u mucꞌ.
Mʌꞌ ja wirej,
rajiꞌ u yʌnxchun ij cocar ic reyintex bajeꞌrer.
7 A ray tꞌʌno caj u yaꞌaraj:
Caꞌ ij quiꞌquint ij corex a mac a tiꞌ yʌn ich caꞌananoꞌ,
caꞌ ij quiꞌ tꞌʌnex Cꞌuj.
Mʌꞌ ja wirej,
cꞌuchij tu qꞌuinin caꞌ bin uruc ic Jaj Tsꞌurirex,
a mac a rajiꞌ u tʌmʌn yuc Cꞌuj.
Rajiꞌ cu tar quir u pʌyic a mac a tu yacsaj tu yor tiꞌ,
ir a xiboꞌ a cu tar chꞌ u racꞌoꞌ,
quireꞌ tu quiꞌ cʌnant u bʌj quir u tar pʌybir a tiꞌoꞌ.
8 Ir a mac a cu chꞌic u racꞌoꞌ,
rajiꞌ cu tsꞌic u nocꞌ u racꞌ.
Bayiriꞌ xan,
a Jesúsoꞌ jeꞌ u tsꞌabʌr u nocꞌ tiꞌ,
a jach manan tsoy tiꞌ,
rajiꞌ lino u cꞌabaꞌ.
Jach sʌc,
mʌnaꞌ u yeqꞌuir a tiꞌoꞌ.
Mʌꞌ ja wirej,
rajiꞌ caj u tsꞌajaj tiꞌ a mac a tu yacsaj tu yor tiꞌ,
quireꞌ raꞌ u nocꞌoꞌ sʌc an ten bic a mac a mʌnaꞌ u siꞌpir a tiꞌoꞌ.
9 A ray u qꞌuininoꞌ caj yaꞌaraj yʌjmasir u tꞌʌn Cꞌuj ten,
tan yaꞌaric:
―Tsꞌibtej,
Juan,
a baꞌ quin bin in wac tech.
Arej tiꞌ:
Jach quiꞌ yorob a mac a cu binob titaroꞌ,
wa ber caꞌ bin uruc Jesús,
a mac a rajiꞌ u tʌmʌn yuc Cꞌuj.
A ray u qꞌuininoꞌ,
bin u caꞌ u pꞌeriꞌquint u bʌjob yejer a raꞌ yʌnin Cꞌujoꞌ.
Jach taj a baꞌ quin wac tech Juan,
quireꞌ tin mas u tꞌʌn Cꞌuj tech ―baxuc tu yaꞌaraj yʌjmasir u tꞌʌn Cꞌuj.
10 Jeroj,
caj xonrʌjen ich u yoc u yʌjmasir u tꞌʌn Cꞌuj quir in cꞌujintic.
Chen rajiꞌ caj u yaꞌaraj ten:
―Mʌꞌ a cꞌujintiquen ―quen―.
Pꞌeriꞌ quet ic beyajex tiꞌ Cꞌuj,
quet yejer a mac a tan u quibicob u tꞌʌn Jesús.
Rajiꞌ tu junan caꞌ ij cꞌujintex.
Mʌꞌ ja wirej,
pꞌeriꞌoꞌonex ic beyajex tiꞌ Jesús,
rajen mʌꞌ jic cꞌujintej ic bʌjex.
Mʌꞌ ja wirej,
rajiꞌ ic beyajex caꞌ manacoꞌonex ic tsecꞌtex Jesús rajen pꞌeriꞌoꞌonex ―baxuc caj yaꞌaraj yʌjmasir u tꞌʌn.
A mac a cʌpaꞌan tu pach a sʌc tsiminoꞌ
11 A tenoꞌ,
caj in wʌcꞌʌs wʌyʌcꞌtaj ich caꞌanan.
U jer,
caj in wiraj u jeꞌpʌjʌr a caꞌananoꞌ quir in pʌctic ich caꞌanan.
Jeroj tuneꞌ,
tin wiraj sʌc tsimin.
Yʌn mac cʌpaꞌan tu pach a sʌc tsiminoꞌ,
rajiꞌ ic Jaj Tsꞌurirex Jesús.
Rajiꞌ cu betic a baꞌ cu yaꞌaric.
Rajiꞌ cu bin u reyinticob mac tu cotor.
Rajiꞌ cu bin u tsꞌictar yejer a mac a jach cꞌasoꞌ quireꞌ taj u yor Jesús.
12 U wich a mac a cʌpaꞌan tu pach a sʌc tsiminoꞌ.
Rajiꞌ u wichob irej u sasirir cꞌacꞌ.
Tu joꞌroꞌ,
yʌn u pꞌoc,
jach yaꞌab yʌn.
Raꞌ u pꞌocoꞌ irej u pꞌoc a ju pꞌoquinmʌn a reyoꞌ.
Ich yocꞌor u tan yʌn baꞌ tsꞌibaꞌan tiꞌ.
Rajiꞌ u cꞌabaꞌ.
Chen a mac a cu xaquic tiꞌ,
mʌꞌ ju najtej baꞌ u cꞌat yaꞌarej.
Chen u wʌcꞌʌs bʌjiriꞌ cu najtic.
13 A ray winicoꞌ,
u buquinmʌn u nocꞌ.
A nocꞌoꞌ,
rajiꞌ irej u nocꞌ baxtaꞌb ten u qꞌuiqꞌuer.
Rajiꞌ yʌn u cꞌabaꞌ a mʌnaꞌ u jer yʌnin.
Rajiꞌ u tꞌʌn Cꞌuj.
14 Robob a mac a cu sayʌrob tu pach,
a mac a cʌpaꞌan tu pach sʌc tsimin,
robob jach manan pim,
robob u yʌjmasirob u tꞌʌn Cꞌuj yejer a mac a tu yacsob tu yorob tiꞌ u tꞌʌn Cꞌuj.
Robob rʌc cʌpaꞌanob tu pach sʌc tsimin,
u rʌc buquinmʌnob sʌc nocꞌ a jach tsoyoꞌ quireꞌ lino.
Mʌnaꞌ u yeqꞌuir u nocꞌob.
15 Caj jocꞌ u tꞌʌn tu chiꞌ Jesús ir u mascabir a caꞌ wʌrʌcꞌ u yejoꞌ.
Rajiꞌ quir u chꞌesic a mac a cu pꞌacticob a tiꞌoꞌ,
quireꞌ tu quibob u tꞌʌn a bʌcoꞌ,
a jach caremoꞌ,
yejer a mac tsꞌaꞌb u tucur ten quisin quir u tsicbar a baꞌ u cꞌat a quisinoꞌ.
A Jesúsoꞌ,
tu cu bin u reyinticob mac,
mʌnaꞌ mac cu bin cꞌuchur yor tiꞌ.
Robob,
a mac a cu pꞌacticob a tiꞌoꞌ,
bin u caꞌ chꞌesaꞌbirob irej an ten bic u wich uva cu yachꞌʌtʌr soc u jocꞌar u cꞌab,
a baywoꞌ bin u caꞌ chꞌesaꞌbirob ten Cꞌuj.
16 Tiꞌ tsꞌibaꞌan u cꞌabaꞌ a mac a cʌpaꞌan tu pach sʌc tsiminoꞌ.
Tiꞌ tsꞌibaꞌan u cꞌabaꞌ yocꞌor u nocꞌ,
bayiriꞌ xan,
tu chacbʌqꞌuer tiꞌ tsꞌibaꞌan u cꞌabaꞌ.
Rajiꞌ tsꞌibaꞌan.
“Raꞌ u rey a cu reyinticob tu cotor rey.
Raꞌ u tsꞌurir a mac a cu tsꞌurinticob tu cotor mac.”
17 Tu tin wʌyʌcꞌtaj ich caꞌanan,
caj in pʌctaj caj in wiraj u jer yʌjmasir u tꞌʌn Cꞌuj.
Caj in wiraj,
chꞌiquicbar ich ic yum.
Rajiꞌ cꞌam caj u puraj u tꞌʌn tiꞌ a chꞌichoꞌ,
a cu chꞌic u xicꞌ ich caꞌananoꞌ,
soc u yubic u tꞌʌnob.
Rajen rajiꞌ caj yaꞌaraj:
―Cojenex ―quij―,
toc muchꞌquintex a bʌj quir a chiꞌiquex a woꞌoch bʌcꞌ a cu bin tsꞌajic techex ten Cꞌuj.
18 Cojenex ―quij―,
caꞌ a chiꞌex a woꞌoch bʌqꞌuex,
u bʌqꞌuer a reyoꞌ a tu tsꞌurintajob a bʌcꞌ,
a jach carem bʌcꞌoꞌ,
yejer a mac a tsꞌaꞌb u tucur ten quisin quir u tus tsicbar an ten bic u cꞌat a quisin uchoꞌ.
Cojenex caꞌ a chiꞌex a woꞌoch bʌqꞌuex,
u bʌqꞌuer a mac a tu quibajob u tꞌʌn a reyoꞌ,
yejer u soldadob,
yejer u soldadojob a reyoꞌ a cu cʌptarob tu pach u yʌrʌcꞌ tsiminob,
yejer u bʌqꞌuer u tsiminob xan.
Cojenex ―quij―,
caꞌ a chiꞌex a woꞌoch bʌqꞌuex u bʌqꞌuer mac,
cax jach tsꞌurir,
cax mʌꞌ jach tsꞌur,
cax cꞌʌnaꞌan ten mac,
cax mʌꞌ cꞌʌnaꞌan ten mac ―baxuc caj u yaꞌaraj u yʌjmasir u tꞌʌn Cꞌuj,
a chꞌiquicbar ich ic yumoꞌ.
19 A tenoꞌ,
caj in wiraj a bʌcꞌoꞌ,
a jach carem bʌcoꞌ,
yejer u reyob a cu reyinticob mac ich yocꞌocab,
yejer u soldado,
raꞌ quir u quinsicob mac.
Robob tan u muchꞌquinticob u bʌj quir u riqꞌuirob u baꞌteꞌt a mac a cʌpaꞌanoꞌ tu pach a sʌc tsimin yejer u winiquirob,
a pimoꞌ,
a cʌpaꞌanoꞌ tu pach tsiminob xan.
20 Jeroj tuneꞌ,
caj chuc a bʌcꞌoꞌ,
a jach carem bʌcꞌoꞌ quir u bin purbir ich cꞌacꞌ quir yerar ich azufre.
Toc cuxaꞌan caj purij quet yejer a mac a tsꞌaꞌb u tucur ten quisin quir u tus tsicbar a baꞌ u cꞌat a quisinoꞌ,
a tu tus araj mac a cʌjaꞌanob yocꞌocab yejer u tus carem beyajob.
Rajiꞌ tu betaj u tus carem beyajob ich ʌctan a bʌcꞌoꞌ,
a jach carem bʌcꞌoꞌ.
Mʌꞌ ja wirej,
quireꞌ a ray u tus carem beyajob,
rajen tu cꞌʌmajob tu tsꞌibaꞌan u pam a bʌcꞌoꞌ,
a jach carem bʌcꞌoꞌ quet yejer caj u sʌjtob u yochir a bʌcꞌoꞌ,
a jach carem bʌcꞌoꞌ.
21 Chen a mac caj ricsaꞌb tu baꞌteꞌob a paꞌay ten bʌcꞌ,
a jach carem bʌcꞌoꞌ yejer a mac a tsꞌaꞌb u tucur ten quisin quir u tus tsicbar a baꞌ u cꞌat a quisinoꞌ.
Robob caj rʌc quinsaꞌb ten a mac a cʌpaꞌan tu pach a sʌc tsiminoꞌ.
Caj rʌc quinsaꞌb ten a raꞌ cʌpaꞌan tu pach sʌc tsimin yejer u mascabir a cu jocꞌar tu chiꞌ.
Jeroj tuneꞌ,
caj tar chiꞌbirob a u bʌqꞌuer ten chꞌichꞌoꞌ,
caj rʌc najchʌjob a chꞌichꞌoꞌ.