U rubub u cajar Babilonia
18
Caj tsꞌoc in wʌyʌcꞌtic a ray xquicoꞌ,
a curucbar ich u joꞌr wits,
a sietejoꞌ.
Caj in wʌyʌcꞌt u jer yʌjmasir u tꞌʌn Cꞌuj.
Tar emij ich caꞌananoꞌ,
rajiꞌ tuririꞌ u jach tsꞌurir ich u yet yʌjmasirob u tꞌʌn Cꞌuj.
Rajiꞌ caj u yercꞌacꞌtic u ruꞌumin ich yocꞌocab quireꞌ pot sasir u winquirir.
2 A ray yʌjmasir u tꞌʌn Cꞌuj caj u puraj u tꞌʌn,
chꞌic cꞌam caj u puraj u tꞌʌn,
tan yaꞌaric:
―U cajar Babilonia cu bin chꞌesaꞌbir ten Cꞌuj soc u cʌjtar u quisinin tu yʌn u cajar Babilonia uch.
Tiriꞌ xan,
cu bin u cʌjtar a baꞌ jach cꞌas,
bayiriꞌ xan,
a baꞌ pꞌactaꞌb ten mac,
cax chꞌichꞌ,
cax bʌcꞌ.
3 Mʌꞌ ja wirej ―quij―,
a raj cajaroꞌ yaꞌarob u man yirej xquic.
Bayiriꞌ xan,
a xquicoꞌ yaꞌarob u man yirej xib cax ich tu cotor mac ich yocꞌocab.
Bayiriꞌ xan,
u cajar Babilonia caj yaꞌarob a mac a cu coꞌnan quir u manob xan,
an ten bic baxuc a tiꞌoboꞌ.
Rajen a mac a cu coꞌnan tu jach tꞌajʌr u taqꞌuinoꞌ quireꞌ a cu manoboꞌ.
Robob,
caj cuxrajob tiꞌ u nonoj bʌjiriꞌeꞌ,
tan u manob a cu pachticob tu yorob a cꞌaxoꞌ.
A cu coꞌnanob caj u purob ich u cajar Babilonia a baꞌ u pachtajob quir u manob tu cꞌasir ―baxuc caj u yaꞌaraj yʌjmasir u tꞌʌn Cꞌuj.
4 Jeroj,
caj in wuꞌy u jer tꞌʌn mac ich caꞌananoꞌ tun.
Rajiꞌ caj u yaꞌaraj:
―A techexoꞌ,
a mac a tu yacsob tu yorob tiꞌ Cꞌuj.
Cojenex,
caꞌ a pꞌʌtex u cajar Babilonia soc mʌꞌ a pʌyic a siꞌpirex xan,
soc mʌꞌ pꞌeriꞌ ca bin a wuꞌyex u tsꞌiquir Cꞌuj,
quireꞌ raꞌ u boꞌorir u siꞌpir a cu bin tuchiꞌbir tiꞌ ten Cꞌuj.
5 Mʌꞌ ja wirej ―quij―,
u siꞌpir u cajar Babilonia,
quireꞌ jach cꞌas,
rajen yiraj Cꞌuj.
Rajiꞌ mʌꞌ tabar u tubur tiꞌ,
a Cꞌujoꞌ.
Rajiꞌ tu cꞌʌꞌotaj,
rajen bin u caꞌ boꞌot u siꞌpirob.
6 A techoꞌ,
Cꞌuj ―quij yaꞌaraj tiꞌ―,
ar u toc quiꞌ boꞌot u boꞌorir u siꞌpirob u cajar Babilonia.
Toc boꞌot a tiꞌobeꞌ,
mʌꞌ chen teniꞌ,
caꞌ a wʌcꞌʌs caꞌ boꞌotej tiꞌob,
soc jach manan cu yubicob,
quireꞌ baxuc rajiꞌ caj u bet a tiꞌob xanoꞌ.
7 Cꞌuj,
toc ar u mucꞌyaj u cajar Babilonia.
Ar u toc betej caꞌ ocꞌar xan,
quireꞌ nonoj cuxrajob u bʌjiriꞌ u cꞌateꞌ,
tan u beticob a baꞌ cꞌasir cu pachticob tu yorob.
Mʌꞌ ja wirej,
rajiꞌ cu yaꞌaric tu pixam tiꞌ u nonoj bʌjiriꞌeꞌ:
“A tenoꞌ,
quij,
xquiquen,
a tenoꞌ,
u reyintiquenob mac.
A tenoꞌ,
mʌꞌ tucur in caꞌ an ten bic xquic a quim u mam.
A tenoꞌ,
quij,
mʌꞌ jin bin in mucꞌyaj.”
Baxuc cu yaꞌaric u cajar Babilonia.
8 Mʌꞌ ja wirej,
u cajar Babilonia seb cu bin u tsꞌabʌr u mucꞌyaj.
A mac a cʌjaꞌanob tu cajar Babilonia,
jeꞌ u quiminobeꞌ.
Robob jeꞌ u tucurobeꞌ.
Robob jeꞌ u wiꞌijchʌjʌrobeꞌ.
Jeꞌ u tocarob yejer cꞌaqꞌueꞌ xan.
Mʌꞌ ja wirej,
a Jach Tsꞌur Cꞌujoꞌ cꞌuchaꞌan yor u tuchiꞌtaꞌr u yajirej an ten bic caj u toc aꞌaraj Cꞌuj.
9 Mʌꞌ ja wirej,
robob a reyoboꞌ,
a mac a tu pꞌeriꞌquintob u bʌj tu cu manob tu cajar Babilonia a tan u yiricob xquic,
bayiriꞌ a tan yiricob xib.
Robob,
a reyoboꞌ,
caj nonoj cuxracob tiꞌ u bʌjiriꞌeꞌ,
tan u beticob a baꞌ cꞌasir cu pachticob tu yorob.
Robob bin u caꞌ yacꞌtob u cajar Babilonia caꞌ bin chꞌesaꞌ ten Cꞌuj.
Robob bin u caꞌ u tucrob u cajar Babilonia caꞌ bin yirob u tocar,
caꞌ bin yirob u nacʌr u butsꞌir tu cu yerar.
10 Robob,
a reyoboꞌ,
mʌꞌ ju bin u natsꞌob u bʌj quir u taquicob u cajar Babilonia quireꞌ u sajac u yubicob.
Robob bin u caꞌ yaꞌarob:
―Ay,
quen,
ay quen.
Otsir u cajar Babilonia quireꞌ chꞌesaꞌbir ten Cꞌuj.
Cax quiꞌ yorob uch.
Mʌnaꞌ baꞌ caj u tucraj uch,
chen seb caj cꞌuchij tu qꞌuinin u tsꞌiquir Cꞌuj a tiꞌeꞌ ―baxuc cu bin yaꞌaricob.
11 Robob,
a mac a cu coꞌnan,
tiꞌ u cajar Babilonia,
cu bin u caꞌ u jach acꞌtob u bʌj,
tan u yocꞌarob quireꞌ mʌꞌ tu cu bin u canob u baꞌtac ich u cajar Babilonia mʌꞌ cu bin u canejob biqꞌuin.
12 Mʌꞌ ja wirej,
a mac a cu canicob tiꞌ u cajar Babilonia caj u canob tiꞌ a chan tunich,
a jach coꞌojoꞌ yejer a sʌc ujoꞌ,
raꞌ u cꞌabaꞌ perla.
Robob caj u canob tiꞌ u nocꞌ,
raꞌ sʌc nocꞌoꞌ,
u cꞌabaꞌ lino.
Bayiriꞌ xan,
chʌc nocꞌ a cu naj buquinticob a reyoꞌ.
Caj u canob tiꞌ nocꞌoꞌ a sʌctaꞌbir nocꞌ,
a ju cꞌuchoꞌ,
a cu tar ich u cꞌan a nocꞌoꞌ,
u cꞌabaꞌ xan seda,
jeroj caj u canob u jer chʌc nocꞌ xan.
Robob,
caj u canob tiꞌ cheꞌ a nequiꞌ u boqueꞌ irej nabaꞌ,
bayiriꞌ xan,
cu canicob u cheꞌer a jach coꞌojoꞌ irej punʌꞌ,
jach coꞌoj,
bayiriꞌ xan,
cu canicob tiꞌ tu cotor baꞌ a betaꞌb u coj a bʌcꞌoꞌ,
u cꞌabaꞌ elefante,
chen a baꞌ betaꞌ u cojoꞌ,
raꞌ u cꞌabaꞌ marfil.
Robob caj canob tiꞌ a chʌc taqꞌuinoꞌ,
bayiriꞌ xan,
mascab,
bayiriꞌ xan,
tunich a jach yuroꞌ,
u cꞌabaꞌ mármol.
13 Robob cu canicob u sor cheꞌ,
a jach quiꞌ u bocoꞌ,
bayiriꞌ xan,
tsꞌac a quiꞌ u bocoꞌ,
quir u jicꞌtic tu bʌqꞌuerob,
bayiriꞌ u yits,
a quiꞌ u boc,
u cꞌabaꞌ mirra,
bayiriꞌ xan,
a quiꞌ u bocoꞌ a cu jicꞌticob tu joꞌrob,
bayiriꞌ xan,
u yucꞌur u cꞌab u wich uva,
a cu yuqꞌuicob.
Robob caj u canicob tiꞌ sas yejer u wich bax nʌr,
a jach tsoyoꞌ,
yejer u yoꞌoch trigo.
Robob caj u canob tiꞌ u yʌrʌcꞌ burro yejer u carro a cu jitaꞌr ten yʌrʌcꞌ tsimin,
bayiriꞌ xan,
caj u canob u yʌrʌcꞌ tʌmʌn yuc,
bayiriꞌ xan,
u yʌrʌcꞌ chivo,
bayiriꞌ xan,
u yʌrʌcꞌ tsimin quir u cʌptarob tu pach.
Cax winic caj u cꞌʌnob,
cax xib caj u canob,
cax xquic xan,
caj u canob.
14 Caꞌ bin arac tiꞌ u cajar Babilonia:
―Raꞌ u wich cheꞌ caj a pachtex uch,
cax a baꞌ tsoy ta chiꞌex,
mʌnaꞌ mac cu tar purbir techex quir a mʌniquex,
cax a baꞌtaquex,
mʌꞌ biqꞌuin caꞌ bin a wirexiꞌ ta cajarex ―baxuc cu bin araꞌbir tiꞌob.
15 A mac a cu caninob uch tiꞌ a ray cajaroꞌ,
a mac a tu nejarob u taqꞌuinoꞌ tiꞌ u cajar Babilonia.
Robob,
mʌꞌ ju bin u nʌtsꞌob u bʌj tiꞌ a ray cajaroꞌ quireꞌ jacꞌaꞌan yorob tiꞌob,
quireꞌ sajʌcob caj u yirob u tsꞌabʌr u mucꞌyaj ich u cajar Babilonia.
Robob jeꞌ u yacꞌticob u cajar Babiloniajeꞌ,
tan u nequiꞌ acꞌticob.
16 A ray cu conanoboꞌ,
jeꞌ u yaꞌaricobeꞌ:
―Ay,
quen,
ay,
quen,
otsir u cajar Babilonia a jach noꞌjoꞌ.
Irech uch a xquicoꞌ a ju buquinmʌn u sʌc nocꞌ,
u cꞌabaꞌ lino,
quireꞌ jach tsoy.
Toc yʌn tech chʌc nocꞌ yejer baraꞌan chʌc nocꞌ,
raꞌ nichꞌaꞌan ta nocꞌ u mascabir oro yejer u tunichir a jach coꞌojoꞌ yejer a sʌc ujoꞌ,
u cꞌabaꞌ perla.
17 Quireꞌ toꞌonex,
jeꞌ u yaꞌaricob a mac cu conanob,
raꞌ irej tuririꞌ hora mʌꞌ tuririꞌ qꞌuiniꞌ an ten bic caj tsecꞌtaꞌb tiꞌ u cajar Babilonia wa ber caj chꞌesaꞌb ten Cꞌuj tu cotor u baꞌtac tub u tar u taqꞌuin uch ―baxuc jeꞌ u yaꞌaricob a mac a cu conanob caꞌ bin cꞌuchuc tu qꞌuinin.
Tu cotor mac a ju tsꞌurirob u chemicꞌacꞌnab,
yejer a mac a cu bin purbirob tu ruꞌumin yejer a mac u winquirir u chemicꞌacꞌnab,
yejer tu cotor mac a cu jaricob u taqꞌuin tu cu cꞌanob u chem,
robob mʌꞌ ju natsꞌʌrob ich u cajar Babilonia quireꞌ jacꞌaꞌan yorob tiꞌob.
18 Robob,
jeꞌ u bin yiricob u butsꞌir tu cu yerar u cajar Babilonia.
A raꞌ u qꞌuininoꞌ jeꞌ u yacꞌticob u bʌjeꞌ,
tan u yaꞌaricob:
―Jeroj,
esej toꞌonex u jer u cajar an ten bic u cajar Babilonia caj chꞌesaꞌb uch an ten bic u cajar Babilonia caj chꞌesaꞌb.
19 Raꞌiriꞌ xan,
jeꞌ u tasicob u noy ruꞌum tu joꞌrob soc yerob mac tan u yacꞌticob u bʌj.
Cꞌam cu bin ocꞌarob tu cu yacꞌticob u bʌj.
Jeꞌ u yaꞌaricob:
―Ay,
quen,
Ay,
quen jach otsir u cajar Babilonia,
a jach noꞌjoꞌ.
Quireꞌ yejer u taqꞌuin caj u mʌnob a baꞌ jach coꞌoj tiꞌ u cajar,
rajen tu nejarob u taqꞌuin a mac a yʌnin u chemicꞌacꞌnab tu tu canob baꞌ.
Rajen tabar u chꞌesaꞌr ten Cꞌuj u cajar Babilonia ―baxuc caj u yacꞌtob u bʌj.
20 Tu tin wʌyʌcꞌtaj ich caꞌanan,
caj in pʌctaj caj in wiraj u yʌjmasir u tꞌʌn Cꞌuj.
Rajiꞌ caj u yaꞌaraj:
―Quiꞌquint a worex a techexoꞌ,
a mac a cʌjaꞌan ich caꞌanan.
Bayiriꞌ xan,
a techexoꞌ a tu tuchiꞌtechex Jesús quir a tsecꞌtiquex u tꞌʌn,
bayiriꞌ xan a techexoꞌ a tsꞌab a tucurex quir a tsicbarex a baꞌ u cꞌat Cꞌuj uch,
bayiriꞌ xan,
a techexoꞌ a mac Cꞌuj yʌninechexoꞌ.
Quiꞌquint a worex,
quireꞌ a Cꞌujoꞌ caj tsꞌiquij yejer u cajar Babilonia quireꞌ a baꞌ tu betaj techex uch.
Mʌꞌ ja wirej,
Cꞌuj caj u yesaj a techexoꞌ caj a cꞌujintex Jach Cꞌuj,
rajen tu chꞌesaj u cajar Babilonia tiꞌ ―baxuc caj u yaꞌaraj yʌjmasir u tꞌʌn Cꞌuj.
21 A ray u quininoꞌ,
u yʌjmasir u tꞌʌn Cꞌuj,
a mac jach chich u mucꞌ caj u chꞌaj tuririꞌ tunich an ten bic u caꞌir juchꞌ,
chen jach manan carem a caꞌoꞌ.
Rajiꞌ caj u pichꞌintaj ich cꞌacꞌnab,
tan yaꞌaric:
―An ten bic caj in pichꞌintaj yejer u chichir in mucꞌ ich cꞌacꞌnab,
baxucoꞌ a Cꞌujoꞌ,
yejer u chichir u mucꞌ cu bin u chꞌesic u cajar Babilonia soc mʌnaꞌ.
22 Caj araꞌb ten yʌjmasir u tꞌʌn Cꞌuj:
―A cu jum a arpajoꞌ,
a cu pʌxicob,
yejer a mac a cu pax,
mʌꞌ ju bin uyibir tu cajar mʌꞌ biqꞌuin.
Cax a chur yejer a mac a cu churoꞌ,
mʌnaꞌ.
Cax a cu yutsic u mascabir quir u yutstaꞌr,
mʌnaꞌ.
Mʌꞌ ju bin irbir ten mac a cu beyaj tu cu jaric u taqꞌuinoꞌ tu cajar.
Mʌꞌ ju bin irbir ten mac,
a xquicoꞌ a tan u juchꞌoꞌ,
mʌꞌ biqꞌuin.
23 Tu cajar Babilonia,
mʌnaꞌ mac cu bin irbir u ras quir u yercꞌacꞌtic u yatoch.
Mʌꞌ ju bin yubob u quiꞌ yor mac a tu cu chꞌic u racꞌ,
cax a cu tarob tu cajar,
a mac a cu conanob,
a mac a jach noꞌjoꞌ ich yocꞌocab.
Chen techex ta tus arex tiꞌob soc a pʌyiquex u siꞌpirob an ten bic techex.
24 ’Caj cꞌuchij tu qꞌuinin quir a bin chꞌesaꞌbir ten Cꞌuj.
Tij quirex bic tabar ta quinsex a mac a tu camsob u tꞌʌn Cꞌuj uch,
yejer a mac a tu quibob u tꞌʌn Cꞌuj uch,
irej wa ta toc quinsex tu cotor mac ta cajarex,
cax nach quinsaꞌbob ―baxuc tu yaꞌaraj yʌjmasir u tꞌʌn Cꞌuj.