―Uꞌyej baꞌ quin wac tech,

Juan.

A tenoꞌ ―quij―,

bin in caꞌ camsech a baꞌ cu bin tar an ten bic a Cꞌujoꞌ bin u caꞌ tsꞌictar yejer u cajar a tu pꞌʌtob u cꞌujinticob Cꞌuj quir u tus cꞌujinticob u jer.

A raꞌ cajaroꞌ,

tiꞌ yʌn tu yʌn cu man yaꞌab yoc yaꞌarir.

2 Mʌꞌ ja wirej,

rajiꞌ caj u pʌy u berob u jer u yet cajarob a tu cu reyinticob rey,

rajiꞌ araꞌb u manob irbir xquic ten xib bayiriꞌ xan,

rajiꞌ araꞌb u manob irbir xib ten xquic xan.

Baxuc caj u toc araj a ray cajaroꞌ soc u tucricob a mac a tiꞌ yʌn ich yocꞌocab wa jach manan tsoy caꞌ u tus cꞌujintob u tus cꞌujob.

3 Tu tin wʌyʌcꞌtaj ich caꞌanan uch,

caj in wuꞌyaj an ten bic caj u pʌyen ich tʌcay ruꞌum.

Rajiꞌ u Tajꞌor u Pixam Cꞌuj caj u pʌyen a tenoꞌ.

Caj in wiraj tuririꞌ xquic.

Tiꞌ yʌn,

curucbar ich yocꞌor a bʌcꞌoꞌ,

a jach caremoꞌ.

Rajiꞌ jach chʌc u pach.

Toc tsꞌibaꞌan tu pach aroꞌ u tꞌʌn quir u pachꞌic Cꞌuj.

A carem bʌcꞌoꞌ yʌn siete u joꞌr,

yejer diez u bac tu joꞌr xan.

4 A ray xquicoꞌ,

u buquinmʌn u chʌc nocꞌ yejer baraꞌan chʌc.

Yʌn oro rʌc nichꞌaꞌan ich u nocꞌ,

bayiriꞌ xan,

tiꞌ nichꞌaꞌan u chan tunichir,

a jach coꞌojoꞌ.

Bayiriꞌ xan,

tiꞌ nichꞌaꞌan ich u nocꞌ a chan sʌc ujoꞌ,

u cꞌabaꞌ perla.

Caj in wiraj u mʌchmʌn tu cꞌʌb u ruch a betaꞌb u mascabir oro,

raꞌ quir u tus etsꞌbaroꞌonex tan u man tu cꞌasir.

5 Caj in wiraj baꞌ tsꞌibaꞌan ich yocꞌor u pam u cꞌabaꞌ a xquicoꞌ.

Rajiꞌ tu mucu araꞌan u cꞌabaꞌ,

tan yaꞌaric:

“Raꞌ u cajar Babilonia,

a jach noꞌjoꞌ.

A xquicoꞌ,

a cu camsic mac caꞌ u pꞌʌt u jach cꞌujinticob Cꞌuj.

Raꞌ cu camsic mac caꞌ manac tu cꞌasirob.”

6 A ray xquicoꞌ irej wa cʌraꞌan.

Rajij carchʌjij yejer u qꞌuiqꞌuer a mac a yacsmʌnob tu yorob tiꞌ Cꞌuj tu tu chucaj u pachob.

Bayiriꞌ xan,

caj carchʌjij yejer u qꞌuiqꞌuer a mac a quinsaꞌb quireꞌ tu yacsob tu yorob tiꞌ u tꞌʌn Jesús.

Wa ber caj in wiraj a xquicoꞌ,

caj jaqꞌuij in wor.

7 Caj cꞌataꞌb ten yʌjmasir u tꞌʌn Cꞌuj:

―Baꞌwir cu jacꞌʌr a wor?

A tenoꞌ,

bin in caꞌ in waꞌarej tech a baꞌ u tus etsꞌbar a xquicoꞌ,

yejer a bʌcoꞌ,

a jach caremoꞌ,

a yʌn siete u joꞌr yejer diez u bac u joꞌr xan.

8 A bʌcꞌoꞌ,

a jach caremoꞌ a ta wiraj sam,

raꞌ tus etsꞌbar irej wa mac a yʌn u mucꞌ uch,

chen jamach bin u mucꞌ.

Rajiꞌ caꞌ bin tac tu qꞌuinin bin u caꞌ u wʌcꞌʌs es u mucꞌ.

Rajen pʌchaꞌan u cꞌabaꞌ a bʌcoꞌ,

a jach caremoꞌ.

Rajiꞌ u mucꞌ,

tar u tar ich a quisinoꞌ.

Caꞌ bin manac tu qꞌuinin,

tiꞌ cu wʌcꞌʌs bin tu jor ich ruꞌum tu mʌꞌ xuraꞌan u tamin,

tiꞌ cu bin tsꞌocar.

A mac a cʌjaꞌan tu qꞌuinin a rayoꞌ,

a robob a mʌꞌ ju yacsob tu yorob tiꞌ u tꞌʌn Cꞌuj,

a mʌꞌ tsꞌibaꞌan u cꞌabaꞌ tu juꞌunin quir u cuxtar munt qꞌuin,

robob u toc er Cꞌuj,

raꞌ u qꞌuininoꞌ tu yʌnxchun tu cotor baꞌ.

Mʌꞌ ja wirej,

robob a mac a mʌꞌ yerob Cꞌuj,

caj jaqꞌuij u yorob caj u yirob bic tabar a bʌcꞌoꞌ,

a jach caremoꞌ yʌn u mucꞌ uch,

caj u wʌcꞌʌs tar u mucꞌ a ju berer yʌnin a bʌcꞌoꞌ,

a jach caremoꞌ ―baxuc caj araꞌb ten yʌjmasir u tꞌʌn Cꞌuj ten.

9 A yʌjmasir u tꞌʌn Cꞌuj caj yaꞌaraj:

―Arej tiꞌ a mac a jach tꞌojoꞌ,

caꞌ u najtej a jeꞌraꞌ.

U joꞌr a bʌcꞌoꞌ,

a jach caremoꞌ,

a yʌn siete u joꞌroꞌ,

raꞌ u tus etsꞌbar u tajir u jor u pꞌuc wits,

a sietojoꞌ tu cu cutar a xquicoꞌ.

10 A ray siete u jor u pꞌuc witsoꞌ,

robob raꞌ u tus etsꞌbar u tajir a siete reyoboꞌ.

Yʌn cinco a caj tsꞌoc u reyinticob mac.

Tiꞌ yʌn tuririꞌ a bajeꞌrer tan u reyinticob mac.

Tiꞌ toy yʌn u jer rey jeꞌ u yocar u caꞌ reyintac ten mac,

chen tabar u yocar caꞌ reyintac ten mac.

11 A bʌcꞌoꞌ,

a jach caremoꞌ,

a cuxaꞌan uchoꞌ chen bajeꞌrer mʌnaꞌ chen rajiꞌ cu tus etsꞌbar u tajir u rey,

a ochojoꞌ,

chen rajiꞌ quet yejer a siete reyoboꞌ cax rub tu pach a siete reyoboꞌ.

Rajiꞌ cu bin chꞌesaꞌbir ten Cꞌuj.

12 ’Raꞌ u bac u joꞌr a diez ta wiraj ich a bʌcꞌoꞌ,

a jach caremoꞌ a chʌc u pachoꞌ.

A ray diez u bac u joꞌr,

robob cu tus etsꞌbarob u tajir diez reyob a mʌꞌ toy ocacob caꞌ reyintacob mac,

chen robob cu bin tsꞌabʌr u mucꞌ ten a bʌcꞌoꞌ,

a jach caremoꞌ,

soc u yocar caꞌ reyintacob ten mac.

Jariꞌ tabar cu bin ocarob caꞌ reyintacob ten mac yejer a bʌcꞌoꞌ,

a jach caremoꞌ.

13 Robob a reyoboꞌ,

a diezoꞌ,

pꞌeriꞌ u tucurob quir u yamticob a bʌcꞌoꞌ,

a jach caremoꞌ.

Rajen yejer u mucꞌ tu cu reyintaꞌrob ten mac robob caj u chich yamtob a bʌcꞌoꞌ,

a jach caremoꞌ.

14 A reyoboꞌ,

caj bin u baꞌteꞌtob u tʌmʌn yuc Cꞌuj,

chen mʌꞌ ju bin u cꞌuchur yorob tiꞌ,

quir u chꞌesicob a tʌmʌn yucoꞌ.

Mʌꞌ ja wirej,

a Jaj Tsꞌuroꞌ jach manan chichir u mucꞌ ich yocꞌocab,

cax tiꞌ a reyoboꞌ,

rajen robob bin u caꞌ u quibicob u tꞌʌn Jaj Tsꞌur.

A mac a chuc u pachob ten a diez reyoboꞌ quireꞌ tu quibob u tꞌʌn a Jaj Tsꞌurob.

Robob payob u ber ten u Jaj Tsꞌurob.

Mʌꞌ ja wirej,

robob tetaꞌb quir u manob u tsecꞌticob u tꞌʌn.

Robob jach taj tetaꞌb quireꞌ mʌꞌ ju pꞌʌtob u tꞌʌn Cꞌuj tan u yesicob tiꞌ mac u yajob Jesús,

cax chucob u pachob.

―baxuc caj yaꞌaraj ten yʌjmasir u tꞌʌn Cꞌuj.

15 Caj yaꞌaraj ten yʌjmasir u tꞌʌn Cꞌuj,

tan yaꞌaric:

―Ber caj a wiraj a cajaroꞌ a tiꞌ yʌn tu yʌn jach yaꞌab yaꞌarir sam,

tu curaꞌan a xquicoꞌ,

a ray yaꞌariroꞌ cu tus etsꞌbarob pim winic,

chen robob tan u cʌjtarob ich yaꞌab u cajarob,

a tan u tsicbarob ich u jer yaꞌab u tꞌʌnob.

16 A diez u bacoꞌ a ta wiraj tu joꞌr a bʌcꞌoꞌ,

a jach caremoꞌ,

a chʌc u pachoꞌ,

robob cu tus etsꞌbarob a diez reyoboꞌ,

a cu bin u pꞌactob u cajar,

a tiꞌ yʌn tu yʌn u yoc yaꞌarir yaꞌab,

tu curucbar a xquicoꞌ.

Robob a reyob bin u caꞌ u chꞌesob a ray cajaroꞌ,

soc mʌnaꞌ baꞌ cu pꞌatʌr.

Robob bin u caꞌ u rʌc tocob a ray u cajaroꞌ quir u rubsic u mucꞌ tu cu reyintaꞌr ten mac soc jach saj cajaroꞌ.

17 Mʌꞌ ja wirej,

cꞌan ten Cꞌuj a reyoboꞌ,

soc u quibicob a baꞌ u cꞌat Cꞌuj soc u chꞌesicob a ray u cajaroꞌ.

Rajen periꞌob u tucurob quir u yamticob a bʌcꞌoꞌ a jach caremoꞌ,

quireꞌ rajiꞌ u jach tsꞌurir a reyoboꞌ.

Baxuc cu chaꞌbʌr tiꞌob ten Cꞌuj hasta cu cꞌuchur tu qꞌuinin a Cꞌujoꞌ bin u caꞌ u nupꞌsej a baꞌ tu toc araj uch.

18 A xquicoꞌ a ta wiraj curic,

rajiꞌ cu tus etsꞌbar u cajaroꞌ raꞌ u jach noꞌjoꞌ,

rajiꞌ cu reyintaꞌr ten tu cotor rey cax tu cu reyintaꞌrob ten mac.