―Xenex ―quij―,

caꞌ a jochquintex ich yocꞌor mac a tiꞌ yʌn ich yocꞌocab,

a siete chan ruch,

a yʌn u yajirir a Cꞌuj bin u caꞌ u tuchiꞌtoꞌ ―baxuc caj yaꞌaraj a cu tꞌʌnoꞌ.

2 Raꞌ pʌyber u yʌjmasir u tꞌʌn Cꞌuj caj joqꞌuij ich caꞌanan caj bin u jochquint u chan ruchir,

caj u yʌnxchun u yajirir a mac a yʌn u tsꞌib a bʌcꞌoꞌ,

a jach caremoꞌ tu pam.

Bayiriꞌ tiꞌ,

a mac a tu sʌjtob u yochir a bʌcꞌoꞌ,

a jach manan caremoꞌ.

Rajen a mac a tiꞌ yʌn ich yocꞌocab caj u cʌnob a iqꞌuer u caꞌob,

a neyʌn u pujeroꞌ.

3 A caꞌtur u yʌjmasir u tꞌʌn Cꞌuj caj joqꞌuij,

caj bin ich yocꞌocab quir u jochquint u chan ruchir.

Rajiꞌ caj u jochquint ich cꞌacꞌnab,

rajen caj waysaꞌb tiꞌ irej qꞌuiqꞌuer,

raꞌ irej u qꞌuiqꞌuer a mac quimen quireꞌ jach ecꞌ u wich.

Rajen a baꞌ tiꞌ yʌn ich cꞌacꞌnab rʌc quimij,

quij.

4 A mʌnaꞌ u nup yʌjmasir u tꞌʌn Cꞌujoꞌ,

caj joqꞌuij caj bin ich yocꞌocab quir u jochquint u chan ruchir xan.

Rajiꞌ caj u jochquin tu cu yʌnxchun u yicꞌ jaꞌ,

bayiriꞌ xan,

tu cu yʌnxchun yoc yaꞌarir a chan sʌyaboꞌ caj rʌc waysaꞌb tiꞌ irej qꞌuiqꞌuer.

5 Jeroj,

caj in wuꞌy u tꞌʌn yʌjmasir u tꞌʌn Cꞌuj,

a mac a cu cʌnantic a jaꞌoꞌ.

Rajiꞌ caj u yaꞌaraj:

―Jach taj a wor a techoꞌ,

Cꞌuj ―quij yaꞌaraj tiꞌ―,

quireꞌ u yajirir caj a tuchiꞌtaj,

quireꞌ munt qꞌuin tiꞌ yʌnech,

u beriꞌ tiꞌ yʌnech.

Mʌꞌ ja wirej,

a techoꞌ,

caj a chaꞌb u wayʌr a jaꞌoꞌ,

soc u wayʌr irej qꞌuiqꞌuer.

6 Mʌꞌ ja wirej,

a mac a tiꞌ yʌnob ich yocꞌocab,

robob caj u quinsob a winiquirob Cꞌuj,

bayiriꞌ xan,

a mac a tsꞌaꞌb u tucur ten tech Cꞌuj quir u tsicbar a baꞌ a cꞌat Cꞌuj.

Rajen tech Cꞌuj caj a tsꞌaja tiꞌ irejob u yoꞌoch jaꞌ a waysaꞌb tiꞌ qꞌuiqꞌuer quireꞌ raꞌ u boꞌorir tu tu quinsob a winiquirob Cꞌuj ich u cajarob ―baxuc caj yaꞌaraj yʌjmasir u tꞌʌn Cꞌuj a cu cʌnantic a jaꞌoꞌ.

7 A tenoꞌ,

quij Juan,

caj in wʌcꞌʌs uꞌy u jer u tꞌʌn a cu tar tu cuchir tu cu naj toꞌquic baꞌ quir u tsꞌic ti Cꞌuj ich caꞌanan:

―Rajiꞌ taj a baꞌ cu yac yʌjmasir u tꞌʌn Cꞌuj.

Taj ta toc araj tiꞌ a winiquirob Cꞌuj,

rajen taj tan a taquic u joꞌr a mac a tu chucob u pach a winiquirob Cꞌuj,

quireꞌ raꞌ u boꞌorir u cꞌʌb,

quireꞌ a techoꞌ in Jaj Tsꞌurirechob Cꞌuj,

a techoꞌ jach manan a mucꞌ ―baxuc caj araꞌb ten a cu tꞌʌn tu cuchir tu cu naj toꞌquic baꞌ tiꞌ Cꞌuj.

8 A cuatro yʌjmasir u tꞌʌn Cꞌuj,

caj jocꞌ quir u bin u jochquint u chan ruchir.

Rajiꞌ caj u jochquintaj ich ic yum quir u tsꞌic u mucꞌ soc jach manan u chujur a mac a tiꞌ yʌnob ich yocꞌocab,

a jic yumoꞌ.

9 A mac a jach manan chujij ten ic yum,

mʌꞌ ju cꞌax u yorob quir u pꞌʌticob u cꞌasir,

cax raꞌ u boꞌorir u siꞌpir.

Robob mʌꞌ ju sʌjtob Cꞌuj quir u quibicob u tꞌʌn.

Chen robob caj u pachꞌob Cꞌuj,

quireꞌ rajiꞌ caj u tuchiꞌtaj u mucꞌyajob,

quireꞌ mʌꞌ rucꞌsaꞌb u mucꞌyaj ten Cꞌuj.

Mʌꞌ ja wirej,

a Cꞌujoꞌ yʌn u mucꞌ quir u tuchiꞌtic u mucꞌyaj an ten bic aroꞌ.

10 A cincojoꞌ yʌjmasir u tꞌʌn Cꞌujoꞌ,

caj jocꞌ quir u jochquintic u chan ruchir xan.

Rajiꞌ caj u jochquintaj tu cu jach tsꞌurinticob mac,

a bʌcꞌoꞌ,

a jach manan caremoꞌ.

A mac a tiꞌ yʌnoꞌ,

tu cu tsꞌurinticob mac a bʌcꞌoꞌ,

a jach manan caremoꞌ caj acꞌbirchʌjij.

Robob jach manan mucꞌyajnʌjob,

rajen caj u chiꞌob u yacꞌ quireꞌ yʌn u yajirir.

11 Quireꞌ yʌn u yajirir,

bayiriꞌ xan,

quireꞌ u cʌnmʌnob iqꞌuer u caꞌob uch,

a caj tar tiꞌob,

mʌꞌ ju cꞌax u yorob caꞌ u pꞌʌtob u cꞌasir,

chen caj u pachꞌob Cꞌuj a tiꞌ yʌn ich caꞌananoꞌ.

12 A seisoꞌ u yʌjmasir u tꞌʌn Cꞌuj,

caj jocꞌ quir u jochquintic u chan ruchir.

Rajiꞌ caj u jochquintaj ich u yoc yaꞌarir u cꞌabaꞌ Eufrates,

a ray yaꞌariroꞌ jach coch.

Caj tsꞌoc u jochquintic u chan ruchir caj saꞌb yaꞌarir soc u man a reyob a cu reyinticob mac a tu cu tarob ic yumoꞌ.

Mʌꞌ ja wirej,

raꞌ u berir quir u binob ich u cajar Jerusalén.

13 Tu tin wʌyʌcꞌtaj ich caꞌanan,

caj in pʌctaj caj in wir a ayimoꞌ,

a jach manan caremoꞌ,

yejer u nup,

rajiꞌ a bʌcꞌoꞌ,

a jach caremoꞌ,

yejer u jer mac a tsꞌaꞌb u tucur ten quisin quir u tsicbar a baꞌ u cꞌat a quisinob.

Caj in wiraj caj jocꞌob tu chiꞌob a ray mʌnaꞌ u nup u quisinob.

Caj jocꞌob mʌnaꞌ u nup u quisinob tu chiꞌob a yʌn u winquirob irob rerec.

14 Quireꞌ a quisinoꞌ,

rajiꞌ yʌninob,

rajen a rerecoꞌ rajiꞌ bin u caꞌ u tus esob carem beyajob soc u tus aric a reyob,

a cu reyinticob mac ich yocꞌocab,

bayiriꞌ xan,

bin u caꞌ u tus arob a mac a tiꞌ yʌnob ich yocꞌocab soc robob cu bin u muchꞌquinticob u bʌj quir u ricꞌsicob u baꞌteꞌticob,

quireꞌ raꞌ u qꞌuinin a jach manan noꞌj tiꞌ a Cꞌujoꞌ,

a mac a jach manan chichir u mucꞌ.

15 “Rajen a ray u qꞌuininoꞌ,

a mac a mʌꞌ tan u pajicob in tar,

seb quin bin tar,

an ten bic a mac a cu tar u taꞌquic baꞌ,

a mʌꞌ u pajmʌn u tar.

A baxucoꞌ,

seb quin bin tar,

a tenoꞌ.

Rajen quiꞌ irechex soc quiꞌ a worex caꞌ bin uruquenoꞌ,

a techexoꞌ a mac a yacsmʌnob tu yorob ten,

soc ʌcʌtan u yʌjmasirob u tꞌʌn Cꞌuj yejer a mac a yerob Cꞌuj,

mʌꞌ ja bin a chꞌiquex suraquir.”

Baxuc tu yaꞌaraj Cꞌuj.

16 A reyoboꞌ,

yejer a mac a tiꞌ yʌnob ich yocꞌocab,

a tus araꞌbob quir u muchꞌquinticob u bʌj quir u ricꞌsicob u baꞌteꞌticob.

Robob cu bin u baꞌteꞌticob mac ich u ruꞌumin Armagedón,

raꞌ u cꞌabaꞌ ich u tꞌʌn a mac a cu tsicbar hebreo.

17 Caj in wʌyʌcꞌtaj ich caꞌanan,

caj in pʌctaj,

caj in wiraj a siete yʌjmasir u tꞌʌn Cꞌuj caj joqꞌuij.

Rajiꞌ caj joqꞌuij caj u jochquint u chan ruchir ich yocꞌor icꞌ.

A ray u qꞌuininoꞌ,

jocꞌ u tꞌʌn mac tu cu naj cꞌujinticob Cꞌuj tu yʌn u cutan a jach caremoꞌ.

Cꞌam caj u yaꞌaraj:

―Jeroj tabar u tsꞌocar u tsꞌiquir Cꞌuj yejer a mac a tiꞌ yʌn ich yocꞌocab ―baxuc tu yaꞌaraj a mac a cu tꞌʌnoꞌ.

18 Wa ber caj jocꞌ u tꞌʌn quet caj jocꞌ u raram yejer u jum a cu pec,

caj quiꞌ pecnʌj a ruꞌumoꞌ soc jach yaj u pec.

Mʌnaꞌ mac yirmʌn u pec ruꞌum an ten bic baxuc a rayoꞌ.

19 Rajen tu cotor a cajaroꞌ a caremoꞌ caj u rʌc jʌsob u bʌj,

tu pecnʌj a ruꞌumoꞌ,

rajen junxot tu jʌsob u bʌj u jer junxot caj u jʌsob u bʌj,

baxuc,

xan,

u jer junxot caj u jʌsob u bʌj.

Caj rʌc chꞌej a raj cajaroꞌ,

bayiriꞌ xan caj rʌc chꞌej tu cotor u cajarob ich yocꞌocab a tuj tsꞌurintaꞌb u tsꞌurir a ray carem cajaroꞌ quireꞌ raꞌ u cajar Babilonia,

a noꞌjoꞌ,

quireꞌ cꞌuchij tu qꞌuinin u tsꞌictar Cꞌuj.

Rajen bin u caꞌ chꞌesaꞌbir ten Cꞌuj.

20 Rajen tu cotor u peꞌtenin,

cax tu yʌnob,

caj chꞌesaꞌb soc mʌnaꞌ,

bayiriꞌ xan,

a witsoꞌ,

bin u caꞌ chꞌesaꞌbir.

Mʌꞌ ja wirej,

bin u caj tar Cꞌuj,

a mac cu bin u reyinticob ich yocꞌocab.

21 Rajen caj rub ich caꞌanan bar jaꞌ,

a jach caremoꞌ.

Raꞌ caj purij ten Cꞌuj.

Tuririꞌ a bar a jaꞌoꞌ,

yʌn caꞌturꞌ arrobas.

Rajen a mac a tiꞌ yʌn ich yocꞌocab caj u pachꞌob Cꞌuj quireꞌ yʌn u yajirir a cu rubur ich yocꞌor a tiꞌoboꞌ.

Quireꞌ jach manan u yajirir a cu mucꞌyajoboꞌ.