A caꞌtur bʌcꞌoꞌ, a jach manan cꞌasoꞌ
13
A tenoꞌ,
quij Juan,
caj chꞌicrajen ich u chiꞌ cꞌacꞌnab tuj in wʌyʌcꞌtaj ich caꞌanan.
Jeroj,
caj in pʌctaj caj in wiraj u jocꞌar ich cꞌacꞌnab tuririꞌ bʌcꞌ.
A jach carem bʌcꞌoꞌ a tin wiraj,
yʌn siete u joꞌr.
Yʌn diez u bac tu joꞌr xan,
chen ich yocꞌor jujuntur u bac u joꞌr u pꞌoquimʌn u pꞌoc an ten bic u pꞌoquimʌn rey.
Bayiriꞌ xan,
jujuntur u joꞌr yʌn baꞌ tsꞌibaꞌan tiꞌ a tan u pachꞌic Cꞌujoꞌ.
2 A ray bʌcꞌoꞌ,
a jach caremoꞌ,
a caj in wiraj irej jach barum,
chen mʌꞌ bay u yoc,
quireꞌ u yoc irej u yoc saꞌnjoꞌr.
Caj in wir u chiꞌ raꞌ irej u chiꞌ chʌc barum.
Rajiꞌ tsꞌaꞌb u mucꞌ ten u tsꞌurir a mac a ayimoꞌ,
a jach caremoꞌ,
soc rajiꞌ cu tsꞌurinticob a bʌcꞌoꞌ a jach caremoꞌ cax tu cʌjaꞌanob mac ich yocꞌocab rajiꞌ cu tsꞌurintic.
3 A tenoꞌ,
caj in wiraj tuririꞌ u joꞌr a bʌcꞌoꞌ,
a jach caremoꞌ,
rajiꞌ chꞌʌcbir ten mac,
chen orac quimic uch wa mʌꞌ jawsaꞌbij.
Rajen jacꞌsaꞌb yor a mac a tiꞌ yʌnob ich yocꞌocab,
rajen caj sayob tu pach a bʌcꞌoꞌ,
a jach caremoꞌ.
4 Robob caj u cꞌujintob a ayimoꞌ,
a jach caremoꞌ,
quireꞌ tan u tsꞌabʌr u mucꞌ a bʌcꞌoꞌ,
a jach caremoꞌ ten a ayimoꞌ,
a jach caremoꞌ.
Mʌꞌ ja wirej,
robob a mac tiꞌ yʌnoꞌ caj u cꞌujintob a bʌcꞌoꞌ,
a jach caremoꞌ,
quireꞌ caj u yaꞌarob:
―Mac cꞌuchaꞌan yor tiꞌ a bʌcꞌoꞌ,
a jach caremoꞌ quireꞌ jach chich u mucꞌ ―baxuc tu yaꞌaraj a mac a tan u cꞌujinticob tiꞌ.
5 Rajen tan u pachꞌic Cꞌuj,
a bʌcꞌoꞌ,
a jach caremoꞌ,
quireꞌ tsꞌaꞌb u mucꞌ ten a ayimoꞌ,
a jach caremoꞌ soc baxuc cu tsicbar.
Mʌꞌ ja wirej,
rajiꞌ tsꞌaꞌb u mucꞌ ten a ayimoꞌ,
a jach caremoꞌ tiꞌ a bʌcꞌoꞌ,
a jach caremoꞌ soc yʌn u mucꞌ tac u man cuarenta y dos ic nʌꞌ.
6 A bʌcꞌoꞌ,
a jach caremoꞌ,
caj u jach pachꞌaj Cꞌuj tan u pꞌastic u mucꞌ Cꞌuj xan.
Bayiriꞌ caj u pꞌastaj tu cu naj cꞌujinticob Cꞌuj mac,
bayiriꞌ rajiꞌ caj u pꞌastaj a mac a jach taj tan u cꞌujinticob Cꞌuj.
7 A bʌcꞌoꞌ,
a jach caremoꞌ,
caj chaꞌb ten Cꞌuj caꞌ tsꞌicac yejer u winiquirob Cꞌuj quir u chꞌesaꞌr a tiꞌoboꞌ.
Bayiriꞌ xan,
rajiꞌ,
a bʌcꞌoꞌ caj tsꞌaꞌb u mucꞌ quir u tsꞌurinticob mac,
cax a baꞌ yoꞌnen yʌn tiꞌob,
cax a baꞌ u tꞌʌnob,
cax tu yʌn u cajarob,
cax tu cʌjaꞌanobiꞌ.
8 Rajen tu cotor mac a cʌjaꞌan ich yocꞌocab bin u caꞌ u cꞌujinticob a bʌcꞌoꞌ,
a jach caremoꞌ.
Jariꞌ a mac a mʌꞌ tsꞌibaꞌan tu juꞌunin a yʌnin Jesucristo,
a ju tʌmʌn yuc Cꞌuj,
robob cu bin u cꞌujinticob a bʌcꞌoꞌ.
Mʌꞌ ja wirej mʌꞌ toy betaꞌb yocꞌocabiꞌ,
tiꞌ toc tsꞌibaꞌan u cꞌabaꞌ a mac a cu bin u cꞌʌmicob Cꞌuj.
Robob tiꞌ tsꞌibaꞌan ich u juꞌunin u cuxtar a tʌmʌn yuc yʌnin,
quireꞌ rajiꞌ quinsaꞌb tiꞌob.
9 Uꞌyex baꞌ quin wac techex tiꞌ a bʌcꞌoꞌ,
a jach caremoꞌ,
quireꞌ rajiꞌ jach noꞌj.
10 Cʌnex a jeꞌraꞌ,
a mac a cu chuquic u jer mac quir u cꞌʌnic tu beyaj,
raꞌ cu bin chucbir quir u cꞌanan ten u jer mac xan.
Bayiriꞌ xan,
a mac a cu quinsic u jer mac yejer mascab u bʌjiriꞌ cu bin quinsbir ten u jer mac yejer u mascab xan.
Rajen caꞌ u mucꞌtej a baꞌ cu tar tiꞌ a mac a tu yacsaj tu yor soc pacachbiriꞌ.
11 Caj tsꞌoc in wʌyʌcꞌtic a raj ayimoꞌ,
a jach caremoꞌ,
caj in pʌctaj caj in wiraj u jer a bʌcꞌoꞌ.
Chen rajiꞌ caj jocꞌ ich u ruꞌumin,
rajiꞌ yʌn caꞌtur u bac u joꞌr ir u bac tʌmʌn yuc.
Chen caj jocꞌ u tꞌʌn caj tꞌanajij irej uꞌyu tꞌʌn a ayimoꞌ,
a jach caremoꞌ.
12 A ray bʌcꞌoꞌ,
yʌn u mucꞌ ir u mucꞌ a ayimoꞌ,
a jach caremoꞌ,
a tin yʌn batꞌan iraj uch.
Mʌꞌ ja wirej,
quet bayiriꞌ u mucꞌ caj esaꞌb ten a bʌcꞌoꞌ,
a pachir caj jocꞌ ich ruꞌum.
Rajen,
rajiꞌ caj u tsꞌʌraj u pach tu cotor mac a tiꞌ yʌn ich yocꞌocab caꞌ u sʌjtob a ayimoꞌ,
a chꞌʌcbir tu joꞌr uch,
chen mʌꞌ quimiquiꞌ,
quireꞌ jawsaꞌb tu chꞌaquij.
13 A bʌcꞌoꞌ,
a pachir caj joqꞌuij ich ruꞌum caj u tus betaj jach carem beyaj a baꞌ mʌꞌ yirmʌn mac mʌꞌ biqꞌuin yirmʌn,
cax tu tꞌʌnan cꞌacꞌ caj u rubsaj ich caꞌanan soc u rubur ich yocꞌocab ich ʌcʌtan tu wich a mac tiꞌ yʌnoꞌ.
14 A bʌcꞌoꞌ,
a caj joqꞌuij ich ruꞌum,
caj u tus ara tiꞌ mac a cʌjaꞌanob ich yocꞌocab quireꞌ u tus carem beyajob a ju chaꞌbʌr u betic ʌcʌtan tu wich a bʌcꞌoꞌ a jach caremoꞌ,
a yʌn joqꞌuij ich cꞌacꞌnab.
A bʌcꞌoꞌ,
a jocꞌ ich ruꞌum caj u yaꞌaraj tiꞌ a mac a tiꞌ yʌn ich yocꞌocab:
“Toc betex u yochir a bʌcꞌoꞌ,
a jach caremoꞌ,
a orac quimic uch,
quireꞌ chꞌʌcbir ten mac,
chen jawij.
Toc betex u yochir quir a sʌjtiquexiꞌ.”
Baxuc caj araꞌb ten a bʌcꞌoꞌ a joqꞌuij ich ruꞌum.
15 Barej caj tsꞌoc u beticob u yochir a bʌcꞌoꞌ a joqꞌuij ich cꞌacꞌnab a jach caremoꞌ,
caj chaꞌb u tus jocꞌar u tꞌʌn u yochir a bʌcꞌoꞌ,
a jach caremoꞌ caj chaꞌb u jocꞌar u tꞌʌn soc u quinsic a mac a mʌꞌ ju sʌjt a bʌcꞌoꞌ,
cax a mun a mʌꞌ ju sʌjt a bʌcꞌoꞌ.
Baxuc caj betaj a bʌcꞌoꞌ,
a joqꞌuij ich ruꞌumoꞌ.
16 Mʌꞌ jaꞌririꞌ aroꞌ,
caj araꞌb tiꞌ tu cotor mac ten a bʌcꞌoꞌ,
a joqꞌuij ich ruꞌum,
caꞌ tsꞌibtac ten mac baꞌ ich u noj u cꞌʌboꞌ wa ich u pam,
tsꞌibaꞌan xan.
Cax a reyoꞌ cax a mʌꞌ reyoꞌ,
cax a mac yʌn u taqꞌuinoꞌ,
cax a mʌꞌ yʌn u taqꞌuinoꞌ,
cax a mac u tsꞌurir,
cax a mac a mʌꞌ tsꞌurir u caꞌ.
17 Wa mʌꞌ tsꞌibaꞌan a bʌcꞌoꞌ,
a jach caremoꞌ,
mʌꞌ ju chaꞌbʌr u mʌnic baꞌ,
cax yoꞌoch,
mʌꞌ ju chaꞌbʌr u canic baꞌ xan.
A baꞌ tsꞌibaꞌan tu noj u cꞌʌboꞌ wa tu pam raꞌ u cꞌabaꞌ a bʌcꞌoꞌ a jach manan caremoꞌ bayiriꞌ xan,
raꞌ a mun número cu xaquic u cꞌabaꞌ.
18 A mac a jach tꞌojoꞌ,
arej tiꞌ caꞌ u najtej baꞌ númeroꞌ yʌn tiꞌ a bʌcꞌoꞌ,
a jach caremoꞌ.
Quireꞌ tuririꞌ a númerojoꞌ rajiꞌ an ten bic tuririꞌ letra.
Toc xacaꞌan u número u cꞌabaꞌ,
a bʌcꞌoꞌ,
a jach caremoꞌ,
rajiꞌ cu jocꞌ seiscientos sesenta y seis.