A baꞌ cu cꞌʌyicob a 144,000
14
Caj tsꞌoc in wʌyʌcꞌtic a bʌcꞌoꞌ,
a jach caremoꞌ,
rajiꞌ a caꞌturoꞌ.
Caj in pʌctaj caj in wiraj u jer,
chen raꞌiriꞌ a tʌmʌn yucoꞌ a tin wiraj chꞌiquicbar ʌcʌtan tiꞌ a mac a curucbar tu cutan,
a jach caremoꞌ uch.
Tu yʌn a tʌmʌn yucoꞌ,
tin wiraj tan u chꞌictar ich u joꞌr pꞌuc wits,
raꞌ u cꞌabaꞌ Sión.
Tiꞌ yʌn jach pim mac yejer a tʌmʌn yucoꞌ.
Tiꞌ yʌn ciento cuarenta y cuatro mil mac.
Robob toc tsꞌibaꞌan tu pam u cꞌabaꞌ a tʌmʌn yucoꞌ,
quet yejer u cꞌabaꞌ u Tet Cꞌujoꞌ.
2 Caj in wuꞌy u tꞌʌn mac teꞌ caꞌananoꞌ an ten bic cꞌam u jum u yoc jaꞌ,
chich u man a jach yoc jaꞌoꞌ,
irej wa jach yaꞌab jaꞌ.
A raꞌ tꞌʌnoꞌ a tin wuꞌyoꞌ,
raꞌ ir u tꞌʌn a cu pec.
A werex baꞌ quiriꞌ,
tin wuꞌy u cꞌay a mac a tan u pʌxicob arpa.
Tan u cꞌʌyicob u cꞌay a mʌnaꞌ mac yubmʌn uch.
3 A rayoꞌ,
ich ʌcʌtan a mac a curucbar tu cutan a jach caremoꞌ,
tan u cꞌʌyicob quireꞌ tiꞌ yʌn a baꞌ irej bʌcꞌ,
a cuxaꞌanoꞌ,
a cuatrojoꞌ,
bayiriꞌ xan tiꞌ yʌn a veinte y cuatro xib,
a nuxiboꞌ.
Chen jariꞌ a ciento cuarenta y cuatro mil mac caj u cꞌayob a cꞌayoꞌ a mʌnaꞌ mac yubmʌn uch.
Quireꞌ u jer mʌꞌ ju cꞌuchur yor u cʌnej quireꞌ robob caj tacaꞌb ten Cꞌuj ich tu cotor mac ich yocꞌocab.
Chen robob cu najticob.
4 Robob a cu cꞌayob,
mʌꞌ ju manob yejer xquic uch,
mʌꞌ ju manob yejer xib xan,
mʌꞌ ju chꞌaj u mam xan,
mʌꞌ ju chꞌ u racꞌ xan,
quireꞌ tu quibob u tꞌʌn a tʌmʌn yucoꞌ,
soc raꞌ cu pʌyic u berob.
Robob tiꞌ yʌnob,
quireꞌ toc ten Cꞌuj ich mac tu cotor.
Robob jun yarob ich a mac pʌyber toc ten Cꞌuj a tu yacsaj tu yorob tiꞌ Cꞌuj,
bayiriꞌ xan,
a tu yacsob tu yorob tiꞌ a tʌmʌn yucoꞌ.
5 Robob taj tu yacsob tu yorob,
mʌꞌ ju tus aꞌarobiꞌ,
rajen toc taj yorob ʌcʌtan tu curucbar a Cꞌujoꞌ ich u cutan a jach caremoꞌ.
U tꞌʌn tuchiꞌtaꞌb ten Cꞌuj yejer a mʌnaꞌ u nup yʌjmasirob u tꞌʌn Cꞌuj
6 Caj in wʌyʌcꞌtaj caj in pʌctaj caj in wir u jer yʌjmasir u tꞌʌn Cꞌuj.
Rajiꞌ xicꞌ u caꞌ teꞌ ich caꞌananoꞌ,
soc mʌꞌ jar u bin u tsecꞌt u jach tsoyir u tꞌʌn Cꞌuj,
quireꞌ munt qꞌuin mʌꞌ ju cꞌoxar ten Cꞌuj.
Raꞌ cu bin tsecꞌbir ich tu cotor mac a tiꞌ yʌn ich yocꞌocab,
cax tu cʌjaꞌanob,
cax a baꞌ u tꞌʌnob,
cax a baꞌ yoꞌnen yʌn tiꞌob,
cax a baꞌ cajar tu yʌnob cu rʌc man tsecꞌbir.
7 A ray yʌjmasir u tꞌʌn Cꞌujoꞌ cꞌam caj yaꞌaraj:
―Toc chꞌaꞌex sajquir tiꞌ Cꞌuj tan a caremquintiquex u cꞌabaꞌ,
quireꞌ rajiꞌ tabar u toꞌcar u joꞌr a mac a cu sʌjticob a bʌcꞌoꞌ,
a jach caremoꞌ yejer a ayimoꞌ a jach manan caremoꞌ.
Toc cꞌujintex Cꞌuj,
quireꞌ raꞌ tu betaj a ruꞌumoꞌ,
yejer a caꞌananoꞌ yejer a cꞌacꞌnaboꞌ yejer a yicꞌ jaꞌoꞌ ―baxuc caj yaꞌaraj yʌjmasir u tꞌʌn Cꞌuj.
8 Sansam caj in wʌcꞌʌs ir u jer yʌjmasir u tꞌʌn Cꞌuj,
rajiꞌ rub tu pach a yʌn binij.
Rajiꞌ caj yaꞌaraj:
―Toc chꞌesaꞌbir ten Cꞌuj u winiquirob,
raꞌ u cajar Babilonia.
Quiꞌquint a worex,
cax noꞌj u cajar a chꞌesaꞌb ten Cꞌuj,
quireꞌ pay u siꞌpir ten mac a cʌjaꞌan tu cajar Babilonia u yet cajar ich yocꞌocab.
Mʌꞌ ja wirej,
araꞌb u manob irbir xquic ten xib,
bayiriꞌ xan,
araꞌb u manob irbir xib ten xquic,
bayiriꞌ araꞌb mac caꞌ u pʌy u siꞌpir,
rajen tu yubob u tsꞌiquir Cꞌuj.
9 Sansam caj in wʌcꞌʌs ir u jer yʌjmasir u tꞌʌn Cꞌuj,
rajiꞌ say tu pach a caꞌturoꞌ,
a tan tu manob sam.
Caj tarij,
rajiꞌ cꞌam caj u yaꞌaraj:
―Robob,
a mac a cu chaꞌbʌrob caꞌ u tsꞌibt u cꞌabaꞌ a bʌcꞌoꞌ,
a jach caremoꞌ,
cax tu cꞌʌb wa tu pam.
Robob a mac a caj u sʌjtob u yochir a bʌcꞌoꞌ,
a jach caremoꞌ.
10 Robob bin u caꞌ yubob u jach tsꞌiquir Cꞌuj tu cu bin tsꞌabʌr u mucꞌyaj,
quireꞌ jach manan cu bin yubob u tsꞌiquir Cꞌuj.
Tar cu bin ich cꞌacꞌ quir u tsꞌabʌr u mucꞌyajob.
Robob cu bin tsꞌabʌr u mucꞌyajob ich ʌcʌtan u yʌjmasirob u tꞌʌn Cꞌuj,
bayiriꞌ ich ʌcʌtan a tʌmʌn yucoꞌ.
11 A ray winiquirob,
a mac a tu sʌjtob a bʌcꞌoꞌ,
yejer u yochir a betaꞌb ten mac,
cax a mac a yʌn tsꞌibaꞌan u cꞌabaꞌ a bʌcꞌoꞌ,
a jach caremoꞌ tu winquirir,
rajiꞌ mʌꞌ ju bin jawʌr u yajirir,
quireꞌ rajraꞌ cu bin u mucꞌyaj.
U butsꞌir tu cu mucꞌyaj rajraꞌ cu bin u nacʌr caꞌanan.
12 Rajen a mac a tu yacsaj tu yor tiꞌ u tꞌʌn Cꞌuj yejer a mac a tan u quibic u tꞌʌn Cꞌuj caꞌ u cʌnej Jesús soc nemʌꞌ biquiꞌ.
13 Jeroj tuneꞌ,
caj in wuꞌy mac cu tꞌʌniquen caꞌanan.
Rajiꞌ caj u yaꞌaraj ten:
―Tsꞌibtej a jeꞌraꞌ,
quij:
“Jach quiꞌ yor a mac a cu bin quimin tu qꞌuinin bajeꞌrer hasta caꞌ bin tac u xur tꞌʌn quireꞌ tu yacsaj tu yor tiꞌ u tꞌʌn Cꞌuj.”
Rajiꞌ taj cu yaꞌaric u Tajꞌor u Pixam Cꞌuj.
Robob bin u caꞌ u jesob u bʌj tu chich beyajnʌjob uch,
quireꞌ a baꞌ tu betob,
quet cu bin yejerob.
Bic tabar cu bin xur tꞌʌn
14 Tu tin wʌyʌcꞌtaj ich caꞌanan caj in pʌctaj caj in wiraj tuririꞌ u muyarir,
jach sʌc.
Ich yocꞌar u muyaroꞌ,
tiꞌ yʌn mac curucbar,
rajiꞌ irej an ten bic xib,
u pꞌoquinmʌn tu joꞌr u pꞌoc a betaꞌb tiꞌ u mascabir oro,
an ten bic a reyoꞌ cu pꞌoquintic.
Rajiꞌ u mʌchmʌn tu cꞌʌb u chan mascabir a tu cu naj tꞌoj cꞌuptic u chan cꞌʌbir u yaqꞌuir u wich uva,
soc u tꞌaquic u wich uva.
Jach quiꞌ u yej u chan mascabir.
15 Caj in wʌcꞌʌs ir u jer yʌjmasir u tꞌʌn Cꞌuj.
Raꞌ jocꞌ tu cu naj cꞌujinticob Cꞌuj.
Rajiꞌ caj u cꞌamquint u tꞌʌn,
tan yaꞌaric tiꞌ a mac curucbar ich u muyariroꞌ:
―Jup u chan mascabir tu ca naj tꞌojcꞌuptic u wich uva a ta pʌcꞌaj irech a mac tu pʌcꞌaj u yaqꞌuir u wich uva uch.
Quireꞌ cꞌuchij tu qꞌuinin in tꞌojcꞌuptic u wich uva quireꞌ tʌcꞌan u wich ir u corir u pʌcꞌar u wich uva ich yocꞌocab ―baxuc tu yaꞌaraj u yʌjmasir u tꞌʌn Cꞌuj.
16 A mac a curucbar ich u muyarir caj u jup u chan mascabir tu cu naj tꞌojcꞌuptic u wich uva quir u tꞌojcꞌuptic u pʌcꞌar u wich uva,
jeroj caj u rʌc tꞌojcꞌupt u pʌcꞌaj u wich uva ich yocꞌocab.
17 Caj in wʌcꞌʌs ir u jer yʌjmasir u tꞌʌn Cꞌuj.
Rajiꞌ caj joqꞌuij tu cu naj cꞌujinticob Cꞌuj ich caꞌanan.
Bayiriꞌ xan,
rajiꞌ u mʌchmʌn u chan mascabir tu cu naj tꞌojcꞌuptic u wich u pʌcꞌar uva.
Jach quiꞌ u yej u chan mascabir.
18 Caj in wʌcꞌʌs ir u jer yʌjmasir u tꞌʌn Cꞌuj.
Rajiꞌ caj joqꞌuij tu cuchir tu cu naj toquic a baꞌ cu bin u tsꞌic tiꞌ Cꞌuj.
Rajiꞌ tiꞌ yʌn ʌcʌtan tu cu naj cꞌujinticob Cꞌuj.
A ray yʌjmasir u tꞌʌn Cꞌujoꞌ,
cu cʌnantic u cꞌaqꞌuir a tiꞌ yʌnoꞌ,
soc rajraꞌ tꞌʌbaꞌanoꞌ.
Rajiꞌ caj u cꞌamquint u tꞌʌn tiꞌ u yet yʌjmasir u tꞌʌn Cꞌuj a yʌn u chan mascabir a jach quiꞌ yej quir u naj tꞌojcꞌuptic u pʌcꞌar u wich uva.
Caj u yaꞌaraj tiꞌ:
―Jup a chan mascabir,
a quiꞌ yej,
caꞌ a tꞌojcꞌuptej u wich uva,
cax tu yʌniꞌ quireꞌ tʌcꞌan u wich ich yocꞌocab,
quireꞌ ir u corir u pʌcꞌar u wich uva.
19 Rajen a ray yʌjmasir u tꞌʌn Cꞌujoꞌ,
caj u jup u chan mascabir quir u tꞌojcꞌuptic u pʌcꞌar u wich uva irej u corir u pʌcꞌar u wich uva.
Caj tsꞌoc u rʌc tꞌojcꞌuptiqueꞌ,
caj u pichꞌintaj tu cu naj yʌchꞌic u cꞌab uva.
Rajiꞌ u cꞌat yaꞌaric wa ber caꞌ bin tsꞌabʌc u mucꞌyaj ten Cꞌuj quireꞌ jach yaj u mucꞌyaj caꞌ bin tac.
20 A raꞌ u tsꞌiquir Cꞌuj bin u caꞌ yubob mac,
jach manan bin u caꞌ yubob an ten bic cu yʌchꞌic a ray u pʌcꞌar u wich uvajoꞌ ich tancab u cajaroꞌ.
A tu cu naj yʌchꞌic u pʌcꞌar u wich uvajoꞌ ich tancab u cajar jeꞌ u jocꞌar u qꞌuiqꞌuer mac quireꞌ tsꞌiquij Cꞌuj.
Bin u caj turur,
tam ʌcriquic u qꞌuiqꞌuer mac a cu jocꞌar,
hasta cu cꞌuchur tu chiꞌ a tsiminoꞌ a xʌcʌcbaroꞌ.
Jeꞌ u bin u qꞌuiqꞌuer nach tac tresciento kilómetros tu cu yʌchꞌicoꞌ.