Caꞌtur a mac tsꞌaꞌb u tucur quir u tsicbar a baꞌ u cꞌat Cꞌuj
11
Caj tsꞌoc aroꞌ,
caj tsꞌaꞌb ten tuririꞌ jʌrʌr an ten bic cu chꞌic u pꞌis baꞌ.
Caj araꞌb ten tuneꞌ:
―Riqꞌuen Juan,
caꞌ xiquech a chꞌu pꞌis mun a tu cu naj cꞌujinticob Cꞌuj,
a carem najoꞌ.
Bayiriꞌ xan,
u cuchir tu cu naj tar u quinsic yʌrʌcꞌ quir u tsꞌic tiꞌ Cꞌuj.
Bayiriꞌ xan,
caꞌ a xaquej munob a tan u cꞌujinticob Cꞌuj
2 ―caj araꞌb ten―.
Chen a tancaboꞌ tu cu naj cꞌujinticob Cꞌuj,
rajiꞌ u tirir tiꞌeꞌ.
Mʌꞌ a yʌn chꞌic u pꞌis,
quireꞌ raꞌ yʌnin a winiquirob a mʌꞌ u winiquirob israel,
caꞌ bin cꞌuchuc tu qꞌuinin.
Mʌꞌ ja wirej,
robob u tsꞌurirob a tancaboꞌ,
tu cu naj cꞌujinticob Cꞌuj u winiquirob israel.
Bayiriꞌ xan,
robob u tsꞌurirob u cajar Jerusalén,
raꞌ u cajar Cꞌuj.
Bin u caꞌ u tsꞌurintob u cajar tac u man cuarenta y dos ic nʌꞌ.
3 A mac a cu tꞌʌniquen caꞌch,
caj u yaꞌaraj ten:
“A tenoꞌ,
jeꞌ in tuchiꞌtic caꞌtur xib a cu bin u tsecꞌticob a Cꞌujoꞌ a tiꞌ toy cu betic ich caꞌanan,
bayiriꞌ xan ich yocꞌocaboꞌ tiꞌ cu beticob.
Robob cu bin u tsecꞌticob tꞌʌn tac u man cuarenta y dos ic nʌꞌ.
Robob bin u caꞌ u buquintob ecꞌ nocꞌ soc yer mac caꞌ u cꞌaxob u yorob caꞌ u pꞌʌtob u manob tu cꞌasir.”
4 Robob toc tsecꞌtaꞌb ten a mac tsꞌaꞌb u tucur ten Cꞌuj uch caꞌ u tsꞌibtej an ten bic u cꞌat Cꞌuj uch.
Rajiꞌ u cꞌabaꞌ Zacarías a tu tsecꞌtaj uch.
Mʌꞌ ja wirej,
robob u cheꞌer oliva yejer a rasoꞌ quireꞌ caꞌturoꞌ.
Cu yetsꞌicob caꞌtur u cheꞌer yejer caꞌtur ras ich ʌcʌtan Cꞌuj.
Chen tar cu binob ich yocꞌocab quir u tsecꞌticob Cꞌuj.
5 Wa yʌn mac u cꞌat u chuquic u pachob,
cu jocꞌar cꞌacꞌ tu chiꞌob quir u toquicob a mac a cu pꞌactic a tiꞌoboꞌ.
A baywoꞌ caꞌ bin quimic a mac a cu pachtic u chuquicob u pachob.
6 Robob tsꞌaꞌb u mucꞌ ten Cꞌuj soc caꞌ bin tꞌʌnob Cꞌuj soc mʌꞌ u tar yaꞌarir ich yocꞌocab,
jeroj mʌꞌ ju tar yaꞌarir tac caꞌ bin tsꞌocac u tsecꞌticob u tꞌʌn Cꞌuj.
Bayiriꞌ xan,
tsꞌaꞌb u mucꞌ soc u waysicob jaꞌ irej qꞌuiqꞌuer.
Bayiriꞌ xan,
tsꞌaꞌb u mucꞌ soc u waysicob baꞌ ich ruꞌum quir u cꞌasquinticob mac a mun u qꞌuinin cu pachticob tiꞌ.
7 Chen wa ber caꞌ bin tsꞌocac u beyajob tiꞌ Cꞌuj tu cu yesicob Cꞌuj tiꞌ mac,
jeꞌ u jocꞌar tu jorir ich ruꞌum a mʌꞌ xuraꞌan u taminoꞌ ir a bʌcꞌoꞌ,
a jach manan cꞌas.
Rajiꞌ cu bin u tsꞌictar yejer a caꞌtur mac a tsꞌaꞌb u tucur ten Cꞌuj quir u tsicbar a baꞌ u cꞌat Cꞌuj.
Rajiꞌ cu bin quinsicob,
quireꞌ rajiꞌ jach chich u mucꞌ.
8 Caꞌ bin tsꞌocac u quinsaꞌrob a tiꞌoboꞌ,
robob u baquerob tiriꞌ cu bin pꞌatʌrob tu ber tu cu naj man mac ich a carem cajaroꞌ,
a tu quinsaꞌb ic Jaj Tsꞌurirex uch,
a tus pʌchaꞌan u cꞌabaꞌ Sodoma yejer u cꞌabaꞌ Egipto,
quireꞌ bin u caꞌ yub u tsꞌiquirob Cꞌuj.
9 A mac a cʌjaꞌan tu cajaroꞌ,
yejer a mac a cu tsicbar ich u jer tꞌʌnob,
yejer a mac a yʌn u yoꞌnenob,
yejer a mac cax tu cʌjaꞌanob tu ruꞌumin,
robob bin u caꞌ u yirob u baqueroꞌ tiꞌ charaꞌan ich ber tac u man mʌnaꞌ u nupꞌ u qꞌuinin caꞌ tac u jer chumuc.
Mʌꞌ ju chꞌabʌr mac caꞌ u mucob u baquerob.
10 Mʌꞌ ja wirej,
a mac a cʌjaꞌanob ich yocꞌocab,
a mʌꞌ yerob Cꞌuj,
jach quiꞌ yorob,
quireꞌ quinsaꞌb a caꞌtur mac a tsꞌaꞌb u tucur ten Cꞌuj quir u tsicbarob a baꞌ u cꞌat Cꞌuj.
Mʌꞌ ja wirej,
robob caj u tsꞌaj u mucꞌyaj a mac a mʌꞌ yerob Cꞌuj,
rajen a mac mʌꞌ yerob Cꞌuj caj bin u sijob baꞌ tiꞌ u racꞌob quireꞌ quiꞌ yorob.
11 Chen caꞌ tsꞌoc u man mʌnaꞌ u nupꞌ u qꞌuinin caꞌ tac u jer chumuc u qꞌuinin,
jeroj wʌcꞌʌs ricꞌsaꞌb a caꞌtur mac a tsꞌaꞌb u tucur ten Cꞌuj quir u tsicbarob a baꞌ u cꞌat Cꞌujoꞌ,
quireꞌ wʌcꞌʌs ocob u pixamob,
quireꞌ tsꞌaꞌb tiꞌob ten Cꞌuj.
Jeroj caj wʌcꞌʌs chꞌicrarob,
caj jaqꞌuij yorob a mac caj yiroboꞌ.
12 Jeroj tuneꞌ,
robob,
a caꞌtur mac,
a tsꞌaꞌb u tucur ten Cꞌuj quir u tsicbarob a baꞌ u cꞌat Cꞌujoꞌ,
caj yubob u tꞌʌn mac ich u muyarir,
tan u puric u tꞌʌn tiꞌob.
Cꞌam caj araꞌb tiꞌob:
―Teꞌ a tarexaꞌ.
Jeroj tuneꞌ,
caj binob caꞌanan ich u muyarir.
A mac a cu pꞌacticob a tiꞌoboꞌ caj yirob u binob.
13 A raꞌ u qꞌuininoꞌ caj binob ich caꞌanan,
caj chich pecnʌjij a ruꞌumoꞌ.
A cajaroꞌ a caremoꞌ,
caj pecnʌjij,
rajen tuririꞌ najoꞌ ich a diezoꞌ caj rʌc jubij.
Wa ber caj pecnʌj ruꞌum caj quinsaꞌb siete mil xib tu jubij a najoꞌ ich a carem cajaroꞌ.
A mac a mʌꞌ quinsaꞌb wa ber caj pecnʌjij a ruꞌumoꞌ jach jaqꞌuij yorob,
caj u cꞌʌꞌotajob Cꞌuj rajiꞌ cu tsꞌurinticob mac ich yocꞌocab.
14 Toc araꞌb ten a mac a cu tꞌʌniquen tu quin wʌyʌcꞌtic ich caꞌanan:
―Tsꞌoc u man u jer u yajirir a caꞌturoꞌ.
Chen tiꞌ toy yʌn u jer tuririꞌ quir u tar.
Jach tabar aroꞌ,
rajiꞌ a mʌnaꞌ u nupꞌoꞌ.
Baxuc tu yaꞌaraj a mac a cu tꞌʌniquen uch.
U mascabir quir u yutstaꞌr, a sietejoꞌ
15 Caj in wʌyʌcꞌtaj ich caꞌanan caj in pʌctaj caj in wir u jer yʌjmasir u tꞌʌn Cꞌuj.
Rajiꞌ a sietojoꞌ.
Rajiꞌ caj u yutst,
jeroj caj in wuꞌyaj u tꞌʌn,
tar u taroꞌ ich caꞌanan.
Rajiꞌ cu tꞌʌnob yaꞌab mac.
Cꞌam caj u purob u tꞌʌn tan yaꞌaricob:
Tu cotor u ruꞌumin tu cu reyinticob a reyoꞌ bajeꞌrer,
rajiꞌ yʌnin a Jaj Tsꞌur Cꞌujoꞌ yejer u Cristo a tiꞌeꞌ.
Robob quic reyintiquex munt qꞌuin.
16 Caj in wiraj a veinticuatro xiboꞌ,
a nuxiboꞌ,
a rayoꞌ a tiꞌ yʌn ich ʌcʌtan Cꞌuj tiꞌ curaꞌanob ich u cutan an ten bic u cutan a reyoꞌ.
Robob caj ricꞌob caj u xonrajob ich ʌcʌtan Cꞌuj quir u cꞌujinticob Cꞌuj.
17 Caj araꞌb ten a veinticuatro xiboꞌ,
a nuxiboꞌ:
Bayoꞌ Cꞌuj,
quireꞌ cꞌuchij tu qꞌuinin quir ic reyintiquechex quireꞌ a techoꞌ jach manan chichir a mucꞌ.
A techoꞌ munt qꞌuin tiꞌ yʌnech,
cax a uchoꞌ,
cax a bajeꞌrer,
cax a samʌnoꞌ.
18 Cax caj pꞌujob a mac a cu tsꞌurinticob u tsꞌurir,
cax caj pꞌujob a mac a ju reyinticob u reyob,
quireꞌ cꞌuchij tu qꞌuinin a bin a taꞌc u joꞌrob a mac a mʌꞌ tu cꞌʌmob tech.
Bayiriꞌ cꞌuchij tu qꞌuinin quir a boꞌotic u boꞌorir u cꞌʌbob a mac a beyajnʌjob tech,
a mac a ta tsꞌaj a tucur tiꞌob quir u tsicbarob a baꞌ a cꞌat uch.
Bayiriꞌ xan,
cꞌuchij tu qꞌuinin a boꞌotic u boꞌorir u cꞌʌb a mac a cu sʌjtiquechob,
cax a mac u tsꞌurir,
cax a mac mʌꞌ u tsꞌurir mac.
Cꞌuchij tu qꞌuinin xan,
quir a boꞌotic a mac a tu cꞌasquintob u ruꞌumin ich yocꞌocab,
robob bin u caꞌ chꞌesaꞌbir.
19 Caj in wʌyʌcꞌtaj ich caꞌanan uch,
caj in pʌctaj caj in wiraj tu cu naj cꞌujinticob Cꞌuj,
rajiꞌ caj qꞌueyaꞌb,
jeroj caj in wiraj u chan cuchir,
a cu jach jacꞌʌr yor mac,
a tu tsꞌibtaj Moisés ich u tꞌʌn uch.
Jeroj tuneꞌ,
caj raramnʌj tun,
caj pecnʌjij,
caj jumnʌjij,
caj u jach chich pecnʌjij ruꞌum,
bayiriꞌ,
caj tar u baꞌ jaꞌ,
a jach aroꞌ.