U yʌjmasir u tꞌʌn Cꞌuj a yʌn u juꞌunin
10
Caj in wʌyʌcꞌtaj Cꞌuj ich caꞌanan,
caj in pʌctaj caj in wiraj u jer yʌjmasir u tꞌʌn Cꞌuj.
Rajiꞌ tsꞌaꞌb u mucꞌ soc jach chich u mucꞌ,
quireꞌ eman u caꞌ caj in wiraj ich caꞌanan caꞌ xic ich yocꞌocab.
Caj in wiraj a ray yʌjmasir u tꞌʌn Cꞌuj,
rajiꞌ ir u tapmʌn u bʌj yejer muyar.
Caj in wiraj a baꞌ pꞌoquinmʌn tu joꞌroꞌ,
raꞌ irej a cheroꞌ.
Rajiꞌ u tan u wich xan,
jach sasir ir u sasirir a qꞌuinoꞌ,
chen caj in wiraj tu cotor u yoc yejer u chac bʌqꞌuer yoc robob irej a cꞌacꞌoꞌ a cu nacʌr caꞌananoꞌ.
2 Tiꞌ yʌn tu tan u cꞌʌb tuririꞌ chan juꞌun toc choraꞌan.
U noj u yocoꞌ caj u yachꞌʌctaj ich yocꞌor cꞌacꞌnab.
U tsꞌic u yocoꞌ caj u yachꞌʌctaj ich yocꞌor ruꞌum.
3 Rajiꞌ wa ber caj jocꞌ u tꞌʌn,
cꞌam caj u tꞌʌnaj ir u yacan barum.
Wa ber caj tsꞌoc u cꞌam tꞌʌn,
cu yubic mac ir u jum a cu pec,
chen an ten bic siete cu pecoꞌ cu nuncaꞌr tiꞌ a cu pecoꞌ tiꞌ.
4 A tenoꞌ,
tabar in tsꞌibtic a baꞌ tin wuꞌyaj caj tar u tꞌʌn mac ich a caꞌananoꞌ,
rajiꞌ caj u yaꞌaraj ten:
―Mʌꞌ a waꞌaric baꞌ ta wuꞌyaj yaꞌaric a siete a cu pecoꞌ.
Mʌꞌ a tsꞌibej ―quij,
baxuc caj u yaꞌaraj tenoꞌ,
quij.
5 A ray yʌjmasir u tꞌʌn Cꞌuj a tin wʌyʌcꞌtaj,
a yʌn tuririꞌ u yoc ich yocꞌor ruꞌum yejer u jer u yoc ich yocꞌor a cacꞌnaboꞌ,
caj in wiraj u ricꞌsic u cꞌʌb a nojoꞌ ich caꞌanan.
6 Rajiꞌ caj u chich araj soc Cꞌuj cu yiric,
quireꞌ a Cꞌujoꞌ munt qꞌuin tiꞌ yʌniꞌ,
rajiꞌ caj u betaj tu cotor baꞌ a tiꞌ yʌn ich yocꞌocab uch,
cax a baꞌ tiꞌ yʌn ich caꞌanan,
cax a baꞌ tiꞌ yʌn ich cꞌacꞌnab.
Rajiꞌ caj u yaꞌaraj:
―Jeroj tabar u yutstaꞌr u mascabir quir u yutstaꞌr.
Rajiꞌ cu bin ustic,
a siete yʌjmasir u tꞌʌn Cꞌuj.
7 Mʌꞌ ja wirej ―quij yʌjmasir u tꞌʌn Cꞌuj―,
caꞌ bin yutstac u mascabir quir u yutstaꞌr ten a siete yʌjmasir u tꞌʌn Cꞌuj,
jeroj cꞌuchij tu qꞌuinin a Cꞌujoꞌ bin u caꞌ u betic a baꞌ tu mucu tucraj uch quir u betic.
Jariꞌ a mac tsꞌaꞌb u tucur ten Cꞌuj uch quir u tsicbar a baꞌ u cꞌat Cꞌuj uch robob yerob quireꞌ cu beyajob tiꞌ Cꞌuj.
Robob yerob a baꞌ cu bin u betic Cꞌuj quireꞌ tsꞌaꞌb u tucur soc yerob a baꞌ cu bin tar cax mʌꞌ toy cꞌuchuc tu qꞌuinin.
8 A tenoꞌ,
quij Juan,
a mac a tu tꞌʌnen caꞌch ich caꞌanan caj u wʌcꞌʌs araj ten,
tan yaꞌaric:
―Xen,
Juan,
ich yʌjmasir u tꞌʌn Cꞌuj,
a rayoꞌ,
a yʌn u yoc ich yocꞌor ruꞌum,
yejer u jer u yoc ich yocꞌor cꞌacꞌnab.
A ray chan juꞌunoꞌ,
a tiꞌ yʌn tu tan u cꞌʌb,
toc chꞌaꞌej a techiꞌ,
a tiꞌ yʌn choraꞌan tu cꞌʌb.
9 Rajen caj binen ich yʌjmasir u tꞌʌn Cꞌuj tun,
caj in waꞌaraj tiꞌ caꞌ u chan chuquej ten u juꞌunin a tiꞌ yʌn tu cꞌʌb a chan choraꞌanoꞌ.
Rajiꞌ caj u yaꞌaraj ten:
―Chꞌaꞌej techiꞌ,
toc jantej.
Wa ber caꞌ bin tsꞌocac a jantiqueꞌ,
ca bin a wuꞌyej ta nʌcꞌ cꞌaj,
chen ta chiꞌ ca bin a wuꞌyej chꞌujuc irej wa ta tumtaj cab ―baxuc tu yaꞌaraj yʌjmasir u tꞌʌn Cꞌuj.
10 Caj in chꞌaj u juꞌunin a tiꞌ yʌn tu cꞌʌb a yʌjmasir u tꞌʌn Cꞌuj,
caj in jantaj.
Chꞌujuc caj in wuꞌyaj tin chiꞌ irej wa tin tumtaj cab.
Chen caj tsꞌoc in rʌc jantic,
cꞌaj caj in wuꞌyaj tin nʌcꞌ.
11 Jeroj caj tsꞌoc in jantic u juꞌunin,
caj yaꞌaraj ten yʌjmasir u tꞌʌn Cꞌuj ten:
―Caꞌ xiquech a tsecꞌt u tꞌʌn Cꞌuj ich ʌcʌtan yaꞌab mac tu cʌjaꞌanob,
cax yaꞌab u ruꞌumin tu cʌjaꞌanob.
Bayiriꞌ,
caꞌ a tsecꞌt u tꞌʌn Cꞌuj ich ʌcʌtan reyes,
bayiriꞌ xan,
caꞌ a tsecꞌt u tꞌʌn Cꞌuj tu cu tsicbar mac ich u jer u tꞌʌnob ―baxuc tu yaꞌaraj yʌjmasir u tꞌʌn Cꞌuj tiꞌ ten.