9
Jeroj,
tuneꞌ,
u jer yʌjmasir u tꞌʌn Cꞌuj,
a cincojoꞌ,
caj u yutst u mascabir quir u yutstaꞌr mac.
Jeroj tin wiraj sab caj rub ich caꞌanan ich yocꞌor ruꞌum,
a ray saboꞌ u cꞌat yaꞌaric cꞌas yʌjmasir u tꞌʌn Cꞌuj.
Rajiꞌ tsꞌaꞌb ten mac u cꞌʌrʌbar a tu yʌn u jorir ich ruꞌum,
a mʌꞌ u xuraꞌan u taminoꞌ.
2 Rajiꞌ caj u qꞌueꞌ u jor a tu yʌn u jorir ich ruꞌum a mʌꞌ u xuraꞌan u taminoꞌ,
jeroj caj naquij u butsꞌij ich caꞌanan a ir chꞌic yum u butsꞌir cꞌacꞌ.
Quireꞌ a butsꞌoꞌ caj acꞌbirchʌjij a chunqꞌuinoꞌ,
rajen caj u bʌr a qꞌuinoꞌ quireꞌ a butsꞌoꞌ,
a cu nacʌr ich u jorir ruꞌum,
a mʌꞌ xuraꞌan u taminoꞌ.
3 Caj nac u butsꞌir a cu tar tu jorir ich ruꞌum a mʌꞌ u xuraꞌan u tamin.
Jeroj,
tuneꞌ,
quet caj joqꞌuij saꞌacꞌ ich yocꞌocab,
chen jach pim.
Jeroj,
caj tsꞌaꞌb chiꞌbiroꞌ mac soc u chiꞌbirob an ten bic roroch cu chiꞌbar ich yocꞌocab.
4 Caj toc araꞌb tiꞌ a saꞌacꞌoꞌ mʌꞌ a jantiquex a baꞌ pʌcꞌaꞌan ich coroꞌ,
mʌꞌ a jantiquex a cheꞌ xanoꞌ,
mʌꞌ a jantiquex a suꞌuc xanoꞌ chen caꞌ a chiꞌex mac a mʌꞌ tsꞌibtaꞌan u pam ten yʌjmasir u tꞌʌn Cꞌuj uch.
5 Tsꞌaꞌb tiꞌob ten Cꞌuj u mucꞌ quir u chiꞌbir a mac a mʌꞌ tsꞌibaꞌan u pam ten yʌjmasir u tꞌʌn Cꞌuj.
Mʌꞌ u chaꞌbʌr u quinsaꞌrob chen quir u mucꞌyajob cinco ic nʌꞌ.
Robob bin u caj mucꞌyajob an ten bic mac caj chiꞌbir ten roroch.
6 A ray u qꞌuininoꞌ,
a mac a chiꞌbir ten a saꞌacꞌoꞌ,
bin u caꞌ u pachtob u quimin quireꞌ yaj yubicob u chiꞌbirob,
chen mʌꞌ ju bin quiminob cax u cꞌat u quinsicob u bʌj.
7 Caj in wir u winquirir a saꞌacꞌoꞌ,
raꞌ irej yʌrʌcꞌ tsimin a mac a tabar u baꞌtetic mac.
Tu joꞌrob tiꞌ u pꞌoquimʌn u pꞌoc irej u pꞌoc a reyoꞌ,
rajiꞌ caj betaꞌb u mascabir oro.
Chen robob u wich ir u wich xib.
8 A saꞌacꞌoꞌ,
jach cꞌʌrʌb u tsotser u joꞌr irob u joꞌr a xquicoꞌ.
U cojoꞌ a saꞌacꞌoꞌ,
irob u coj barum.
9 A saꞌacꞌoꞌ,
yʌn u boxer u tsem irob a betaꞌb u mascab quir u pixic u tsem mac wa ber cu bin tu baꞌteꞌ u jer soldado.
A saꞌacꞌoꞌ,
caj jumnʌj u xicꞌob,
caj jumʌjob irob u chan carro a cu jitaꞌr ten tsimin quireꞌ chich u bin tu cu yocar baꞌteꞌ mac,
tu jach pim cu bin baꞌteꞌ
10 A saꞌacꞌoꞌ,
yʌn u yach an ten bic u yach roroch.
Yʌn xan u yachob soc cꞌuchaꞌan yor u chiꞌbir mac soc u mucꞌyaj cinco ic nʌꞌ a mac a chiꞌbir ten a saꞌacꞌoꞌ.
11 A saꞌacꞌoꞌ,
yʌn u tsꞌurir,
rajiꞌ u yʌjmasir u tꞌʌn Cꞌuj uch,
a mac jach cꞌas,
a cu tar tu jor ich ruꞌum,
a mʌꞌ xuraꞌan u tamin.
Rajiꞌ pʌchaꞌan u cꞌabaꞌ ich u tꞌʌn hebreo Abadón,
chen u cꞌabaꞌ pʌchaꞌan ich u tꞌʌn griego Apolión.
Raꞌ u cꞌat yaꞌaric,
a mac a cu chꞌesic baꞌ.
12 Caj araꞌb ten mac tu quin wʌyacꞌ uch:
“A saꞌacꞌoꞌ,
quij,
tuririꞌ u mucꞌyaj caj manij,
quij,
tiꞌ toy yʌn u jer caꞌtur quir u tar u jer.
Jeroj tabar u tar,
caꞌ bin tsꞌocac a ray pʌyberoꞌ.”
Baxuc caj u yaꞌaraj mac ten.
13 Caj in wʌyʌcꞌtaj ich caꞌanan caj in pʌctaj caj in wir u yʌjmasir u tꞌʌn Cꞌuj,
caj u yutst u mascabir quir u yutstaꞌr,
rajiꞌ a seisoꞌ.
Caj tsꞌoc u yutstic caj in wuꞌy u tꞌʌn mac tar u tar u tꞌʌn ich yocꞌor u cuchir a tu tocaꞌb ten yʌjmasir u tꞌʌn Cꞌuj a quiꞌ u boqueꞌ caꞌch.
A rayoꞌ tiꞌ yʌn ʌcʌtan ich Cꞌuj,
rajiꞌ betaꞌb u mascabir oro,
rajiꞌ yʌn u bac caj betaꞌb tu yʌn mac irej u bac a wacʌxoꞌ.
Chen yʌn cuatro u bac tu joꞌr u cuchir a tu tocaꞌb ten yʌjmasir u tꞌʌn Cꞌuj a quiꞌ u boc caꞌch.
14 A mac a cu tꞌʌn,
a cu tar tu cuchir a tuj tocaꞌb a quiꞌ u boqueꞌ ich ʌcʌtan Cꞌuj,
rajiꞌ caj u yaꞌaraj tiꞌ u yʌjmasir u tꞌʌn Cꞌuj,
a tsꞌoc u yutstic u mascabir soc u yutsaꞌr mac:
―Caꞌ xiquech a siptej a cuatro yʌjmasirob u tꞌʌn Cꞌuj,
a mac a jach chich u mucꞌ,
a mac tan u susaꞌ ten Cꞌuj quireꞌ cꞌʌxaꞌan bajeꞌrer,
a tiꞌ yʌnoꞌ tu yʌn u yaꞌarir Eufrates.
15 Robob caj siptaꞌb ten a mac a caj u yutstaj u mascabir quir u yutstaꞌr,
rajiꞌob a seisoꞌ,
caꞌ xicob a raj cuatro yʌjmasirob u tꞌʌn Cꞌuj a jach chich u mucꞌob.
Quireꞌ robob tetaꞌb ten Cꞌuj caꞌ tsꞌocac u mucꞌyaj a cu bin tar soc u quinsicob jun xotꞌ a mac a tiꞌ yʌn ich yocꞌocab.
Mʌꞌ ja wirej,
toc pꞌisaꞌan a horajoꞌ,
bayiriꞌ xan,
a qꞌuinoꞌ,
bayiriꞌ xan,
a ic nʌꞌoꞌ bayirir xan,
a yaxqꞌuinoꞌ quir u siptaꞌr u mucꞌyaj.
16 A mac a ju tsꞌurirob,
a robob a cuatro yʌjmasirob u tꞌʌn Cꞌuj,
robob caj u cꞌʌnob u yʌrʌcꞌ tsimin quir u quinsicob mac.
Caj in wuꞌyaj mun caj u xacobiꞌ,
caj in wuꞌyaj yʌn doscientos millones.
Bayuc caj in wuꞌyaj uch.
17 Caj in wʌyʌcꞌtaj a rayoꞌ,
caj in wiraj a mac cʌpaꞌan tu pach u yʌrʌcꞌ tsiminob,
bayiriꞌ caj in wiraj biquiraꞌ u yʌrʌcꞌ tsiminob.
A mac a cʌpaꞌan tu pach a tsiminob yʌn u nocꞌ a cu buquintic mac wa ber cu bin quinsbirob mac.
Chen robob u nocꞌ cu rembaj irej cꞌacꞌ.
U jer jun xotꞌ u nocꞌ yʌn cꞌʌn,
u jer jun xotꞌ u nocꞌ yʌn baraꞌan chʌc.
Robob u tsiminob a tu cʌpaꞌanob tu pachob,
robob yʌn u joꞌr an ten bic u joꞌr barum.
Tin wiraj u job cꞌacꞌ tu chiꞌob yejer u butsꞌir.
Caj in wuꞌy u chuj cꞌacꞌ ich u chiꞌ tsiminoboꞌ xan.
18 Rajiꞌ caj u quinsa mac a cʌpaꞌan tu pachob a ju yʌrʌcꞌ tsiminoboꞌ.
Jun xotꞌ a mac tiꞌ yʌn ich yocꞌocab caj quinsaꞌb,
quireꞌ a cu jocꞌar tu niꞌob u yʌrʌcꞌ tsimin cꞌacꞌ yejer u chiꞌ,
rajiꞌ cꞌacꞌ yejer u butsꞌir yejer u job cꞌacꞌ.
19 A tsiminoꞌ cꞌuchaꞌan yorob u tsꞌic mucꞌyajob mac yejer u nej xan.
Mʌꞌ ja wirej,
caj in wiraj yʌn chan can tu nej a tsiminoꞌ,
chen a canoꞌ yʌn yaꞌab u joꞌrob.
Rajen quinsaꞌb yaꞌab mac quireꞌ a baꞌ cu tar tu chiꞌ a tsiminoꞌ,
yejer a mac chiꞌbir ten can ten u nej a tsiminoꞌ.
20 A mac a pꞌatob,
a mac a mʌꞌ quinsaꞌb ten yajirir a yʌrʌcꞌ tsiminoboꞌ,
robob mʌꞌ ju tucrob tu yorob u cꞌaxic u yorob caꞌ u pʌtob u tus cꞌuj a cu cꞌujinticob,
cax wa betaꞌb u mascabir oro,
cax u tus cꞌuj betaꞌb u mascabir sʌc taqꞌuin,
cax wa betaꞌb u mascabir chʌc taqꞌuin,
cax u tus cꞌuj betaꞌb tunich,
cax u tus cꞌuj betaꞌb cheꞌ.
Mʌꞌ ja wirej,
robob u tus cꞌujob mʌꞌ ju jocꞌar u tꞌʌn,
mʌꞌ ju yire baꞌ,
mʌꞌ ju ximbar xan,
mʌꞌ ju pꞌʌtob u cꞌujinticob u quisinin u winiquirob a quisinoꞌ.
21 Robob,
a mac pꞌatob a mʌꞌ quinsaꞌb ten a cu tar tu chiꞌ a tsiminoboꞌ baxuc tu nej a tsiminoboꞌ,
robob mʌꞌ ju cꞌaxob tu yorob tan u pꞌʌticob u cꞌasirob quireꞌ tu quinsob mac uch,
mʌꞌ ju pꞌʌtob u cꞌʌyicob u bʌj.
Mʌꞌ ju cꞌaxob tu yorob tan u pꞌʌticob u cꞌasirob quireꞌ cu manob,
mʌꞌ ju cꞌaxob tu yorob tan u pꞌʌticob u cꞌasirob quireꞌ cu yaꞌcrob baꞌ uch.