U tetmʌn u winiquirob israel a cu tar tiꞌ u doce yoꞌnenob u nunquirob
7
Caj tsꞌoc in wʌyʌcꞌtic aroꞌ,
a baꞌ u ber a tʌmʌn yucoꞌ,
a caj u rʌcaj a baꞌ nichꞌaꞌan tu juꞌunin a catsꞌaꞌanoꞌ,
quireꞌ tsꞌoc u rʌquic a seisoꞌ,
a nichꞌaꞌan tu juꞌunin,
soc in wer a baꞌ u ber caꞌ bin cꞌuchuc tu qꞌuinin.
Jeroj tuneꞌ,
caj in wʌyʌcꞌt u jer,
caj in pʌctaj caj in wiraj u yʌjmasirob u tꞌʌn Cꞌuj.
Cuatro caj in wiraj,
tiꞌ yʌn tuririꞌ yʌjmasir u tꞌʌn Cꞌuj ich xʌman caꞌan,
tiꞌ yʌn u jer tuririꞌ yʌjmasir u tꞌʌn Cꞌuj ich nojar,
tiꞌ yʌn u jer yʌjmasir u tꞌʌn Cꞌuj tu cu tar a qꞌuinoꞌ,
tiꞌ yʌn u jer tuririꞌ yʌjmasir u tꞌʌn Cꞌuj tu cu bin qꞌuin.
Robob chꞌiquicbarob caj in wiraj yʌjmasirob u tꞌʌn Cꞌuj mʌꞌ ju chaꞌ u tar icꞌ ich yocꞌocab,
cax tu ruꞌumin,
cax ich cꞌacꞌnab,
cax tu yʌn cheꞌoꞌ xan.
2 Tin wir u jer yʌjmasir u tꞌʌn Cꞌuj,
rajiꞌ caj u nac tu cu tar a qꞌuinoꞌ.
Rajiꞌ u mʌchmʌn a baꞌ tsꞌaꞌb tiꞌ ten Cꞌuj,
a cuxaꞌanoꞌ quir u cꞌʌnic.
Raꞌ quir u tsꞌibtic tu pam mac soc rajiꞌ yer Cꞌuj yʌnin.
Rajiꞌ caj u pur u tꞌʌn tiꞌ yet yʌjmasirob u tꞌʌn Cꞌuj,
a cuatrojoꞌ.
Jach cꞌam caj araꞌb tiꞌob a mac tsꞌaꞌb u mucꞌ quir u cʌrʌxbetic a ruꞌumoꞌ yejer a cꞌacꞌnaboꞌ,
raꞌ a cuatrojoꞌ.
Rajiꞌ caj u yaꞌaraj:
3 ―Mʌꞌ a chaꞌiquex u tar a icꞌoꞌ,
ich ruꞌumoꞌ yejer a cꞌacꞌnaboꞌ yejer a cheꞌoꞌ.
Mʌꞌ ja wirej,
caꞌ batꞌan manʌcoꞌonex ic tsꞌibtex baꞌ tu pam mac a cu beyajob tiꞌ Cꞌuj.
Cu tsꞌocar aro,
jeroj tsoy a chaꞌiquex.
Baxuc caj yaꞌaraj yʌjmasirob u tꞌʌn Cꞌuj tiꞌ u yet yʌjmasirob u tꞌʌn Cꞌuj.
4 A tenoꞌ,
caj in wuꞌyaj yaꞌaraꞌ mun yaꞌabir u winiquirob israel caj tsꞌibtaꞌb tu pam ten u yʌjmasirob u tꞌʌn Cꞌuj.
Caj yaꞌarob,
yʌn ciento cuarenta mil yejer u jer cuatro mil ich u winiquirob israel.
Robob tarob ich tu cotor u yoꞌnen u winiquirob israel.
5 Caj tsꞌibtaꞌb tu pam ten yʌjmasirob u tꞌʌn Cꞌuj,
a cu tar a yʌn yoꞌnen Judá,
tiꞌ yʌn doce mil.
U jer doce mil caj tarob ich a yʌn yoꞌnen Rubén.
U jer doce mil caj tarob ich a yʌn yoꞌnen Gad.
6 Caj tsꞌibtaꞌb tu pam ten yʌjmasirob u tꞌʌn Cꞌuj a cu tarob,
ich a yʌn yoꞌnen Aser,
yʌn doce mil.
Bayiriꞌ xan,
u jer doce mil caj tarob ich a yʌn yoꞌnen Neftalí.
U jer doce mil caj tarob ich a yʌn yoꞌnen Manasés.
7 U jer caj tarob ich a yʌn yoꞌnen Simeón.
U jer doce mil caj tarob ich a yʌn yoꞌnen Leví.
U jer doce mil caj tarob ich a yʌn yoꞌnen Isacar.
8 U jer doce mil caj tarob ich a yʌn yoꞌnen Zabulón.
U jer caj tarob ich a yʌn yoꞌnen José.
U jer doce mil caj tarob ich a yʌn yoꞌnen Benjamín.
Rajiꞌ jach pim a mac u buquimʌnob sʌc nocꞌ
9 Caj tsꞌoc in wʌyʌcꞌtic a baꞌ u ber tiꞌoboꞌ,
caj in wʌcꞌʌs iraj u jer.
Caj in wiraj jach pim winiquirob.
Mʌnaꞌ mac cꞌuchaꞌan yor u xaquej yirej mun yaꞌabir tiꞌ yʌniꞌ.
Caj tarob u muchꞌquinticob u bʌj tiꞌ tu cotor u ruꞌumin tu cʌjaꞌanobiꞌ.
Bayiriꞌ a tu cotor yʌn yoꞌnenoboꞌ,
bayiriꞌ tu cotor a mac yer tꞌʌn.
Robob caj u toc buquintob sʌc nocꞌ,
bayiriꞌ xan,
u rʌc mʌchmʌnob tu cꞌʌb u reꞌ xaꞌan.
Caj u rʌc muchꞌquintob u bʌj ʌcʌtan tiꞌ u cutan,
a caremoꞌ,
a tin batꞌan iraj uch,
bayiriꞌ xan,
tiꞌ tu muchꞌquintob u bʌj ich ʌcʌtan a ju tʌmʌn yuc Cꞌujoꞌ.
10 A pimoꞌ,
caj u cꞌamquintob u tꞌʌnob,
tan yaꞌaricob:
A techoꞌ caj a taquenob tiꞌ in siꞌpirob,
bayiriꞌ xan,
caj a taquenob uch tiꞌ a mac a tu chucob in pachob uch.
Caꞌ ic sʌjtechex Cꞌuj a curucbarech ich a cutanoꞌ,
a jach caremoꞌ,
bayiriꞌ xan,
tech u tʌmʌn yuquech Cꞌuj.
Baxuc caj yarob a jach pimoꞌ.
11 Jeroj tuneꞌ,
caj in wʌyʌcꞌt u yʌjmasirob u tꞌʌn Cꞌuj,
caj rʌc chꞌicrajob ich ʌcʌtan a cutanoꞌ,
a jach caremoꞌ tan u rʌc bʌcristicob xan.
Bayiriꞌ xan,
a veinticuatro xiboꞌ,
a nuxiboꞌ,
yejer a baꞌ irej bʌcꞌ a cuxaꞌanoꞌ,
a cuatrojoꞌ.
Robob caj xonrajob ʌcʌtan u cutan,
a jach caremoꞌ caj u cꞌujintob Cꞌuj.
12 Caj yaꞌarob tu tu cꞌujinticob Cꞌuj:
Raꞌ jach taj a baꞌ cu cꞌʌyob tech Cꞌuj yejer a tʌmʌn yucoꞌ.
Caꞌ u sʌjtechob Cꞌuj yejerech a tʌmʌn yucoꞌ caꞌ u yajquintechob.
Jach manan caꞌ u quiꞌ tꞌʌnechob an bic jach caremech.
Jach manan a neꞌer.
Caꞌ u yaꞌarechob:
“Bayoꞌ.”
Caꞌ u sʌjtechob quireꞌ jach manan a mucꞌ.
Mʌꞌ ja wirej,
jach manan chichir a mucꞌ,
quireꞌ cꞌuchaꞌan a mucꞌ tu cotor baꞌ munt qꞌuin.
Jeroj tsꞌoquij.
13 Tuririꞌ tuneꞌ,
ich a veinticuatro xiboꞌ,
a nuxiboꞌ,
caj u tꞌʌnen,
tan yaꞌaric:
―Mac a ca wiriqueꞌ ich a pimoꞌ a ju buquimʌnob sʌc nocꞌ.
Tub u tarob?
14 A Juanoꞌ caj u nuncaj tiꞌ tun:
―A techoꞌ,
in tsꞌurirech a wer ix tiꞌ.
Rajiꞌ,
a xiboꞌ a nuxiboꞌ caj u yaꞌaraj ten:
―A ray winic ca wiricoꞌ ―quij―,
robob caꞌ bin jocꞌac tu yajirir a cu bin tar tu qꞌuinin ich yocꞌocab tu cu mucꞌyajob,
chen tsꞌoquij bajeꞌrer.
Robob u nocꞌob,
a ju buquimʌnob caj tsꞌab u nocꞌoboꞌ caj rucꞌsaꞌb u siꞌpirob ten u qꞌuiqꞌuer tʌmʌn yuc.
Rajen sʌc u nocꞌob quireꞌ caj u yacsob tu yorob tiꞌ Cristo.
15 Rajen caꞌ bin chꞌicracob ʌcʌtan tu curaꞌan Cꞌuj ich u cutan,
a jach caremoꞌ,
soc rajraꞌ u cꞌanʌnob ten Cꞌuj tiꞌ a baꞌ u cꞌat,
an ten bic a sacerdotejoꞌ.
Rajiꞌ tan u quiꞌ acsaꞌob tu yʌnoꞌ soc u cʌnantaꞌob.
16 A baꞌ u cꞌatoboꞌ bin u caꞌ tsꞌabʌr tiꞌob,
rajen mʌꞌ ju bin wichʌjʌrob,
mʌꞌ ju bin ucꞌchʌjʌrob,
mʌꞌ ju bin yubob chʌcʌw qꞌuin,
mʌꞌ ju bin qꞌuicꞌab xan.
17 Quireꞌ a tʌmʌn yucoꞌ,
raꞌ cu bin u cʌnantic irej a mac a cu cʌnantic u yʌrʌcꞌ tʌmʌn yuc quir u tsꞌic tiꞌob u yoꞌoch jaꞌ,
a cu tar ich yicꞌ jaꞌ munt qꞌuin.
Quireꞌ a Cꞌujoꞌ bin u caꞌ u chur u wich a mac a cu yocꞌar tu yʌnob a tiꞌoboꞌ.