Juan caj u yir u juꞌunin a tsꞌibaꞌan tiꞌ, caj u yiraj tʌmʌn yuc
5
A tin wʌyʌcꞌtaj caj in wʌyʌcꞌtaj ich caꞌanan a caj in wʌyʌcꞌtaj Cꞌuj,
tiꞌ yʌn curucbar tu cutanoꞌ a jach caremoꞌ.
Tin wiraj ich u cꞌʌb Cꞌuj a curucbar tu cutanoꞌ a jach caremoꞌ.
Tin wiraj u mʌchmʌn tu noj u cꞌʌb u juꞌunin toc catsꞌaꞌan.
Toc tsꞌibaꞌan tu pach bayiriꞌ tu tan.
Yʌn baꞌ nichꞌaꞌan quir u suꞌsic jumbuj.
Tiꞌ yʌn siete baꞌ nichꞌaꞌan tu juꞌunin.
2 Caj in wʌyʌcꞌtaj caꞌanan,
caj in wiraj tuririꞌ yʌjmasirob u tꞌʌn Cꞌuj,
a mac jach chich u mucꞌ.
Rajiꞌ cꞌam caj u tsecꞌtaj,
tan u cꞌatic:
A mac jach noꞌj soc cꞌuchaꞌan yor u qꞌueyic a jeꞌ juꞌunaꞌ,
soc u rucꞌsic a baꞌ nichꞌaꞌan tu juꞌunin?
Baxuc caj yaꞌaraj yʌjmasir u tꞌʌn Cꞌuj.
3 Mʌꞌ ja wirej,
quij yʌjmasir u tꞌʌn Cꞌuj,
a mac a betaꞌb ten Cꞌuj,
a tiꞌ yʌn ich caꞌananoꞌ,
mʌꞌ cꞌuchaꞌan u yorob tiꞌ caꞌ u qꞌueꞌej.
Bayiriꞌ xan,
quij yʌjmasir u tꞌʌn Cꞌuj,
mʌnaꞌ mac a betaꞌb ten Cꞌuj a tiꞌ yʌnob ich yocꞌocabaꞌ,
mʌꞌ cꞌuchaꞌan yorob tiꞌ.
Mʌnaꞌ mac cꞌuchaꞌan yor caꞌ u pʌctej quir u xaquic.
Baxuc caj u yaꞌaraj yʌjmasirob u tꞌʌn Cꞌuj.
4 Rajen a tenoꞌ,
quij Juan,
jach chich ocꞌnʌjenoꞌ,
quireꞌ mʌꞌ irir ten Cꞌuj a mac jach noꞌjiꞌ quir u qꞌueꞌic a juꞌunoꞌ,
a tiꞌ yʌn ich u cꞌʌb Cꞌuj,
cax cu pʌctic quir u xaquic.
5 Caj araꞌb ten a tuririꞌ mac a curucbar tu cutan,
an ten bic u cutan a reyoꞌ.
Rajiꞌ tuririꞌ ich a xiboꞌ a nuxiboꞌ.
Rajiꞌ caj u yaꞌaraj ten:
―Chur a wich.
Mʌꞌ ja wirej,
tiꞌ yʌn tuririꞌ mac a cꞌuchaꞌan yor caꞌ u qꞌueꞌej,
quireꞌ rajiꞌ cꞌuchaꞌan yor tiꞌ a quisinoꞌ,
rajij yʌn u mucꞌ quir u qꞌueꞌic.
Bayiriꞌ xan,
yʌn u mucꞌ quir u rʌquic a baꞌ nichꞌaꞌan ich a ray juꞌunoꞌ,
a siete baꞌ nichꞌaꞌan tiꞌoꞌ.
Rajiꞌ rey,
cax mʌꞌ toy tac u reyinticob u winiquirob israel David.
Rajiꞌ xan,
u yoꞌnen Judá xan.
Rajiꞌ jeꞌ ic reyintiquex yejer tu cotor mac.
Baxuc caj u yaꞌaraj a mac nuxiboꞌ tenoꞌ.
6 Caj in pʌctaj,
quij Juan,
caj in wiraj xʌcric tu chumuc tu yʌn a cuatro baꞌ,
a cuxaꞌanobeꞌ,
yejer a veinticuatro xiboꞌ,
a nuxiboꞌ.
Caj in wiraj,
tiꞌ xʌcaꞌan u chan tʌmʌn yuc an ten bic quinsaꞌb quir u tsꞌic tiꞌ Cꞌuj.
A tʌmʌn yucoꞌ,
yʌn u bac u joꞌr.
Yʌn siete u bac u joꞌr.
Yʌn u wich xan,
yʌn siete u wich.
Robob a ju wichoꞌ a sietejoꞌ,
raꞌ quir u camsicoꞌonex raꞌ u Tajꞌor u Pixam Cꞌuj quir u bin ich yocꞌocab quir u yiric tu cotor baꞌ.
7 A ray tʌmʌn yucoꞌ an ten bic quinsaꞌboꞌ,
rajiꞌ caj binij caj u chꞌaj a ray juꞌunoꞌ,
a catsꞌmʌnoꞌ,
a tiꞌ yʌn ich u noj a mac a curucbar tu cutan a jach caremoꞌ.
8 Caj tsꞌoc u chꞌic a ray juꞌunoꞌ,
a catsꞌaꞌanoꞌ.
Robob a veinticuatro xiboꞌ,
a nuxiboꞌ,
caj rʌc xonrajob ich ʌcʌtan a tʌmʌn yucoꞌ,
an ten bic quinsaꞌboꞌ,
quir u cꞌujinticob a tiꞌoꞌ.
Quet bayiriꞌ xan,
caj u betaj a cuatro baꞌ a irej bʌcꞌoꞌ,
a cuxaꞌanoꞌ.
Jujunturob a veinticuatro xiboꞌ,
a nuxiboꞌ yʌn tiꞌob arpa quir u pʌxicob.
Yʌn xan tu cꞌʌbob chan ruch u mʌchmʌnob chup yejer pom.
A ruchoꞌ,
rajiꞌ caj betaꞌb oro.
Raꞌ quir u tsꞌic tiꞌ Cꞌuj an ten bic mac tan u tꞌʌnic Cꞌuj,
rajen raꞌ u tꞌʌn a mac a yerob Cꞌujoꞌ.
9 Caj cꞌaynʌjob yubej tʌmʌn yuc a baꞌ mʌꞌ u cꞌʌymʌnob mac uchoꞌ.
Caj u cꞌʌyob a jeraꞌ:
Quireꞌ caj quinsaꞌbech tiꞌ toꞌonex quir a boꞌotic u boꞌorir ic siꞌpirex,
rajen cꞌuchaꞌan a wor a chꞌic u juꞌunin a catsꞌaꞌaneꞌ quir a rʌquic a baꞌ nichꞌaꞌan tiꞌeꞌ.
Mʌꞌ ja wirej,
jocꞌ a qꞌuiqꞌuer quir u pꞌobar tu cotor mac tiꞌ u siꞌpirob,
cax a baꞌ u yoꞌnen,
cax a baꞌ u tꞌʌn,
cax a baꞌ u ruꞌumin tu cʌjaꞌaniꞌ.
10 A techoꞌ,
ca bin a wacsicoꞌonex iroꞌonex rey soc ic yamtiquechex tu ca bin a wocar u reyinticob mac ich yocꞌocab.
Caj a tacoꞌonex soc ic manex tu cu beyaj Cꞌuj iroꞌonex sacerdotejoꞌonex.
Baxuc caj u yaꞌaraj tu cu cꞌayob uch.
11 Caj in wʌyʌcꞌtaj caj in pʌctaj a baꞌ tiꞌ yʌn ich caꞌananoꞌ.
Tin wuꞌy u tꞌʌn u yet cꞌayob.
Chen u jer jach pꞌencʌch millones yʌjmasirob u tꞌʌn Cꞌuj.
Robob caj u rʌc bʌcristajob a mac a curucbar tu cutanoꞌ,
a jach caremoꞌ yejer a cuatro irej bʌcꞌ,
a cuxaꞌanoꞌ yejer a veinticuatro xib,
a nuxiboꞌ.
Rʌc chꞌiquicbarob,
tu rʌc bʌcristob a mac a curucbar ich u cutanoꞌ,
a jach caremoꞌ.
12 Toc jumpuriꞌ caj u rʌc purob u tꞌʌn tiꞌ.
Jach cꞌam caj u purob u tꞌʌn:
Quireꞌ rajiꞌ u tʌmʌn yuquech Cꞌuj,
rajen caj a cꞌubaj a bʌj tiꞌ Cꞌuj quir a quinsaꞌ,
rajen tu tsꞌaj tech a mucꞌ Cꞌuj.
A baꞌ cu bin tsꞌabʌr tech caꞌ bin cꞌuchuc tu qꞌuinin,
jach pajar cu bin tsꞌabʌr tech.
Bin u caꞌ tsꞌa tech a ju neꞌer Cꞌujoꞌ.
Yʌn tech a mucꞌ quir a tsꞌocsic a baꞌ a cꞌat.
Caꞌ ij carex tech:
Jach caremech Cꞌuj quireꞌ quin sʌjtiquechex soc tu cotor mac cu cꞌujinticob techoꞌ,
caꞌ u yajquintechob xan.
Baxuc caj u rʌc purob u tꞌʌn tiꞌ u tʌmʌn yuc Cꞌuj.
13 Tu cotor a baꞌ betaꞌb ten Cꞌuj,
a tiꞌ yʌn ich caꞌanan,
bayiriꞌ a baꞌ tiꞌ yʌn ich yocꞌocab,
bayiriꞌ xan,
a baꞌ tiꞌ yʌn ich cꞌacꞌnab,
bayiriꞌ xan,
a tiꞌ yʌn tu quimirir,
caj in wuꞌyob caj u yaꞌarob:
Caꞌ ij carex tiꞌ a mac a curucbar tu cutanoꞌ,
a jach caremoꞌ,
quet bayiriꞌ tiꞌ a tʌmʌn yucoꞌ.
Caꞌ ij carex,
jach caremech,
caꞌ ic sʌj tech soc tu cotor mac cu cꞌujinticob tech.
Toc yʌn a mucꞌ soc ic reyintiquech mac soc u yajquintiquechob munt qꞌuin.
14 A cuatro baꞌ,
irej bʌcꞌ,
a cuxaꞌanoboꞌ,
caj u yaꞌarob tiꞌ u tʌmʌn yuc Cꞌuj:
“Caꞌ nupꞌuc u tꞌʌnob an ten bic caj u rʌc aꞌarob tech.”
Robob a xiboꞌ a nuxiboꞌ caj rʌc xonrajob ich ʌcʌtan a tʌmʌn yucoꞌ quir u cꞌujinticob a mac a munt qꞌuin cu cuxtaroꞌ.