A mac a cu cꞌujinticob Cꞌuj ich caꞌanan
4
Caj tsꞌoc in wʌyʌcꞌtic Jaj Tsꞌur,
quij Juan,
yejer a baꞌ tu yaꞌaraj ten Jaj Tsꞌur caꞌ in tsꞌibtej.
Jeroj tuneꞌ,
caj in wʌyʌcꞌtaj caꞌanan irej wa baxuc qꞌueb u jor naj quir in wiric ich caꞌanan.
A baꞌ tin yʌn batꞌan uꞌyaj caj tar ich caꞌanan,
caj yaꞌaraj a cu tꞌʌniquenoꞌ:
―Cojen Juan ich caꞌanan,
quir in wesic tech a baꞌ cu bin tar caꞌ bin cꞌuchuc tu qꞌuinin,
cax ich caꞌanan,
cax a tiꞌ yʌn ich yocꞌocab.
Raꞌ cu tꞌʌniquenoꞌ caj u tꞌʌnajen irej jum u bac wacax a cu yutsic mac.
2 Seb caj u tar tin wocꞌor u Tajꞌor u Pixam Cꞌuj soc rajiꞌ quin tsꞌurintic.
A baꞌ tin yʌn iraj ich caꞌanan caj in wʌyʌcꞌtaj,
a Cꞌujoꞌ,
tiꞌ yʌn tu cutan a jach caremoꞌ.
3 A mac a tin wʌyʌcꞌtaj a curucbar tu cutan a jach caremoꞌ,
raꞌ u yochir caj in wiraj,
quij Juan,
an ten bic u tunich a jach coꞌoj u cꞌabaꞌ jaspe yejer u jer a cu yaꞌaricob cornalina.
Tiriꞌ yʌn u cher xan,
tan u bʌcristic u cutanoꞌ a jach caremoꞌ.
A cheroꞌ,
caj in wiraj irej u wich a tunichoꞌ,
jach coꞌoj,
jach yaꞌax u wich,
a pʌchaꞌan u cꞌabaꞌ esmeralda.
4 Tiꞌ yʌnob u jer mac caj in wʌyʌcꞌtaj ich caꞌanan.
Tiꞌ yʌn veinticuatro.
Tiꞌ curaꞌanobiꞌ tu cutanob an ten bic a rey yʌninoꞌ.
Chen robob u cutanob an ten bic a rey yʌninoꞌ,
tan u bʌcristicob tu cutan a jach caremoꞌ a tu curaꞌan mac a tin yʌn iraj.
A robob a veinticuatrojoꞌ,
jach chꞌijob.
U buquimʌnob sʌc nocꞌ.
U pꞌoquimʌnob u chan pꞌoc betmanob oro an ten bic a reyoꞌ cu pꞌoquintic.
5 Caj in wʌyʌcꞌtaj ich caꞌanan tu yʌn u cutanoꞌ a jach caremoꞌ,
a caj in rʌc iraj,
caj tar u raram ich u cutanoꞌ,
a jach caremoꞌ,
bayiriꞌ xan,
caj tarob u pec,
bayiriꞌ xan jach cꞌam u jum.
Bayiriꞌ xan,
ʌcʌtan u cutanoꞌ a caremoꞌ,
tiꞌ yʌn baꞌ a cu yercꞌacꞌtic tu cotor mac,
a yʌn u ras a sietejoꞌ a cu yercꞌacꞌtic tu cotor mac.
Robob u siete pixamob,
a tiꞌ yʌnob ʌcʌtan tu wich Cꞌuj.
6 Bayiriꞌ xan,
caj in wʌyʌcꞌtaj ʌcʌtan ich u cutan a jach caremoꞌ tu curaꞌan mac a tin yʌn iraj caꞌch,
tiꞌ yʌn irej ras a jach sascꞌʌrenoꞌ an ten bic a cꞌacꞌnaboꞌ quire jach coch.
Caj in wiraj xan,
u jer baꞌ a irej bʌcꞌoꞌ,
jach cuxaꞌan,
chen u tiririꞌ tiꞌ u winquirir.
Caj in wiraj cuatro a tiꞌoboꞌ.
Robob xan,
tiꞌ yʌn ich yicnʌn u cutanoꞌ a caremoꞌ,
bayiriꞌ xan,
robob caj u bʌcristob u cutan a caremoꞌ.
Robob tʌcʌj yʌn u wichob,
caj in wiraj tu cotor u winquirir,
quireꞌ wa ca pʌctic u wichob ir u wich.
Wa ca pʌctic u pachob ca wiric u wich xan.
7 A baꞌ tin yʌn iraj,
a baꞌ irej bʌcꞌ,
a cuxaꞌanoꞌ,
raꞌ irej chʌc barum.
A tin wiraj a caꞌtur xanoꞌ,
rajiꞌ irej a ton wacaxoꞌ.
U jer a tin wirajoꞌ,
a tresoꞌ,
rajiꞌ yʌn u wich irej winic.
U jer caj tin wiraj,
a cuatrojoꞌ rajiꞌ irej coticaꞌan a tan u xitꞌic u xicꞌoꞌ.
8 Robob,
a baꞌ cuxaꞌanoꞌ,
a cuatrojoꞌ,
rʌc yʌn u xicꞌ xan.
Jujuntur yʌn seis u xicꞌob.
Cax tu ca wiric tiꞌob yʌn u wich.
Raꞌ u beyajob quir u cꞌʌyicob Cꞌuj.
Rajraꞌ tan u cꞌʌyicob:
Jach caremech Cꞌuj quireꞌ taj a wor,
a techoꞌ Cꞌuj.
Jach chich a mucꞌ a techoꞌ,
munt qꞌuin cuxaꞌanech,
cax a uchoꞌ,
cax a bajeꞌrer,
cax saman.
9 A mun u tenen a cuatrojoꞌ a baꞌ cuxaꞌanoꞌ cu yaꞌaricob tiꞌ,
a mac a curucbar ich u cutan,
a jach caremoꞌ,
tan u caremquinticob u cꞌabaꞌ,
a tan u sʌjticoboꞌ,
tan yaꞌaricob tiꞌ:
“Bayoꞌ Cꞌuj”,
quireꞌ munt qꞌuin tiꞌ yʌnechiꞌ.
10 A raꞌ u qꞌuininoꞌ a cuatrojoꞌ cu yaꞌaricob tiꞌ Cꞌuj aroꞌ,
robob xan a veinticuatro xib a nuxiboꞌ,
a curucbarob tu cutanoꞌ,
an ten bic u cutan rey,
cu rʌc bin xontarob ich ʌcʌtan a mac a curucbar tu cutan a jach caremoꞌ quir u cꞌujinticob,
quireꞌ munt qꞌuin tiꞌ yʌniꞌ.
Bayiriꞌ xan,
cu rucꞌsicob u chan pꞌoc a ju betmʌn oro quir u pichꞌinticob ʌcʌtan tiꞌ a mac curucbar tu yʌn u cutan a jach caremoꞌ.
Robob tan u cꞌʌyicob tiꞌ:
11 Jach manan tsoy caꞌ ij cꞌʌyech Cꞌuj,
quireꞌ jach caremech,
quireꞌ jach chich a mucꞌ,
rajen quic sʌjtiquech Cꞌuj.
Mʌꞌ ja wirej,
ta toc betaj tu cotor baꞌ,
quireꞌ baxuc a cꞌat,
quireꞌ jach tsoy ta wich a techoꞌ.
Baxuc cu cꞌʌyicob tiꞌ Cꞌuj.