U taqꞌuin a cu muchꞌquinticobeꞌ quir u tsꞌicob tiꞌ u yet acsaꞌorirob
9
Mʌꞌ baꞌwir quin tsꞌibtic techex bic tabar quir a yamtiquex a wet acsaꞌorirex.
2 Quireꞌ in wer a jach cꞌatex a yamtiquex a tiꞌoboꞌ.
Wa ber caj manen in tsecꞌtob u tꞌʌn Cꞌuj uch ich u ruꞌumin Macedonia tin waꞌaraj tiꞌob:
“Robob a mac a tiꞌ yʌn ich u ruꞌumin Acaya,
raꞌiriꞌ u qꞌuinin tuririꞌ yaxqꞌuin tan u muchꞌquinticob u taqꞌuinob soc u yamticob u yet acsaꞌorirob.”
Bajeꞌrer,
quireꞌ a baꞌ ta betajex tan u man u juminticob techex ich a mac a cʌjaꞌanob ich u ruꞌumin Macedonia teraꞌ.
Raꞌ tu chichquint u yorob soc u muchꞌquinticob u taqꞌuinob quir u yamticob u yet acsaꞌorirob an ten bic techex tan a yamtiquex a tiꞌoboꞌ xan.
3 Rajen tan in tuchiꞌtiquechex ij quet acsaꞌorirex quir u wʌcꞌʌs aricob techex.
Mʌꞌ ja wirej,
a tenoꞌ in cꞌat a muchꞌquintiquex a taqꞌuinex tu ca bin a yamtiquex a wet acsaꞌorirex cax mʌꞌ toy taquen tu yʌnechex quireꞌ tin toc araj tiꞌ mac tsꞌajaꞌan a worex a yamtiquex a wet acsaꞌorirex.
4 A baꞌ u ber in wet taracob a mac a cu tar ich u ruꞌumin Macedonia quir u tarob tu yʌnechex caꞌ bin cꞌuchucob jeroj mʌnaꞌ ta muchꞌquintex a taqꞌuinex soc a yamtiquex a wet acsaꞌorirex.
Chen a tenoꞌ caj in waꞌaraj tiꞌob jach tsꞌajaꞌan a worex a yamtiquex a tiꞌoboꞌ.
Jeroj jeꞌ in chꞌic surʌquireꞌ,
bayiriꞌ xan,
a techexoꞌ jeꞌ a chꞌic surʌquirex quireꞌ mʌnaꞌ a taqꞌuinex quir a yamtiquex a wet acsaꞌorirex.
5 Rajen caj in tucraj wa tsoy caꞌ bin xicob ij quet acsaꞌorirex soc pʌyber cu tꞌʌniquechexob.
Jeroj,
jeꞌ u cꞌasic techexob tiꞌ a taqꞌuinex a ta toc muchꞌquintex uch.
Jeroj,
caꞌ bin cꞌuchuquenob toc tsꞌoc a muchꞌquintiquex tiꞌ.
Mʌꞌ ja wirej,
chʌcaꞌan yiric mac jach tsꞌajaꞌan a worex a yamtiquechex mac.
Jeroj,
mʌnaꞌ mac cꞌuchaꞌan yor yaꞌarej ten tin tsꞌʌraj a pachex a tsꞌiquex tiꞌob a taqꞌuinex.
6 Uꞌyex baꞌ quin waꞌaric techex bajeꞌrer.
A mac a cu tsꞌic chichin bayiriꞌ jeꞌ u tsꞌabʌr ten Cꞌuj chichin xan.
Chen a mac a cu tsꞌic yaꞌab,
bayiriꞌ jeꞌ u tsꞌabʌr ten Cꞌuj yaꞌab.
7 Jujunturechex caꞌ a tsꞌajex a baꞌ ca tucriquex ta worex,
a baꞌ quiꞌ a worex a tsꞌic.
Arex mʌꞌ u yʌn tsꞌic wa mʌꞌ u cꞌat,
mʌꞌ u yʌn tsꞌic quireꞌ tsʌrbir u pach.
8 Mʌꞌ ja wirej,
a Cꞌujoꞌ yʌn u mucꞌ quir u tsꞌic techex a baꞌ a cꞌatex.
Rajiꞌ jeꞌ u tsꞌic techex soc jach manan yʌn techex.
Bayiriꞌ xan,
quir a yamtiquechex a mac a cʌjaꞌanob ich yocꞌocab.
9 Tu tsꞌibaꞌan u tꞌʌn Cꞌuj cu yaꞌaric:
A mac a jach tsoyoꞌ,
rajiꞌ mʌꞌ u xupur baꞌ,
quireꞌ jach manan u yamtic a mac otsichʌjij.
10 Mʌꞌ ja wirej,
a Cꞌujoꞌ a cu tsꞌic u yijir tiꞌ mac quir u pʌqꞌuic soc yʌn yoꞌoch quir u jantic.
Rajiꞌ xan,
jeꞌ u tsꞌic techex tu cotor a baꞌ a cꞌatex.
Jeꞌ u yʌntar techex soc yʌn techex quir a jʌsiquex tiꞌ u jer mac.
11 Rajiꞌ jeꞌ u tsꞌic techex soc jach manan yʌn techex,
a baywoꞌ cꞌuchaꞌan a worex a tsꞌiquex tiꞌ mac a mʌnaꞌ tiꞌ.
A baywoꞌ xan,
a mac a yacsmʌnob tu yorob jeꞌ u yaꞌaricob tiꞌ Cꞌuj:
“Bayoꞌ Cꞌuj”,
quireꞌ jeꞌ in jʌsic a baꞌ ca bin a tuchiꞌtiquex tiꞌ a wet acsaꞌorirex ich u cajar Jerusalén.
12 Quireꞌ wa ber ca tsꞌiquex quir a yamtiquex a wet acsaꞌorirex,
mʌꞌ u chen bin tsꞌaꞌbir tiꞌob a baꞌ u cꞌatob,
bayiriꞌ xan,
wa ber cu bin u cꞌʌmbirob a sijbir tiꞌob jeꞌ u yaꞌaricob:
“Bayoꞌ Cꞌuj”,
quireꞌ a baꞌ ta sijex tiꞌob.
13 Robob xan,
jeꞌ u cꞌujinticob Cꞌuj quireꞌ chʌcaꞌan yiricob mac tu cotor biquiraꞌ a pixamex.
Mʌꞌ ja wirej,
chʌcaꞌan yiricob mac taj ta cꞌʌmajex u jach tsoyir u tꞌʌn Cꞌuj tiꞌ Cristo.
Bayiriꞌ xan,
tan a yamtiquex a wet acsaꞌorirex ich u cajar Jerusalén,
bayiriꞌ xan tan a yamtiquex u jer mac.
14 Robob jeꞌ u tꞌʌnicob Cꞌuj techex quireꞌ jach manan tu yirob a yajquintiquex a tiꞌoboꞌ.
Mʌꞌ ja wirej,
jeꞌ u yiricob bic tabar a Cꞌujoꞌ tu yesaj u jach tsoyir u pixam soc cꞌuchaꞌan a worex a betiquex tsoy tiꞌob.
15 Bajeꞌrer caꞌ ij carex tiꞌ Cꞌuj:
“Bayoꞌ Cꞌuj”,
quireꞌ tu tuchiꞌt u parar teꞌ ich yocꞌocab.
Mʌꞌ ja wirej,
a baꞌ tu betaj toꞌonex Cꞌuj jach manan tsoy.
Mʌꞌ cꞌuchaꞌan ij corex ij carex bic jach manan coꞌoj a baꞌ tu betaj toꞌonex.