Bic tabar u tsꞌic taꞌquin tiꞌ Cꞌuj
8
Uꞌyex baꞌ quin waꞌaric techex in wet acsaꞌorirex.
A tenoꞌ in cꞌat in waꞌaric techex bic tabar a yacsmʌnob tu yorob ich u ruꞌumin Macedonia,
a tu cʌjaꞌanob tu chan cajarob caj jocꞌob tsoy a tiꞌoboꞌ quireꞌ yamtaꞌbob ten Cꞌuj.
2 Robob cax otsichʌjob quireꞌ chuc u pachob ten mac tu yʌnob,
chen jach manan quiꞌ yorob.
Cax otsichʌjob,
tan u yamticob u yet acsaꞌorirob.
Robob cu tsꞌicob u taqꞌuinob irob wa jach yaꞌab u taqꞌuinob.
3 A tenoꞌ taj quin waꞌaric techex tiꞌob,
cax wa ja baꞌ cu yamticob u yet acsaꞌorirob tan u tsꞌicob quireꞌ u yajob.
Mʌꞌ ja wirej,
a mun caj u tucrob u tsꞌic tiꞌob uch jach manan yaꞌab caj u tsꞌajob tiꞌob.
4 Robob,
a mac a cʌjaꞌanob ich u ruꞌumin Macedonia,
caj u chich cꞌatob ten caꞌ in cꞌʌm u taqꞌuinob quir in tsꞌic tiꞌ a yacsmʌnob tu yorob ich u cajar Jerusalén.
5 A baywoꞌ caj u betob,
chen mʌꞌ an ten bic caj in tucrajiꞌ.
Robob pʌyber u bʌjirirob caj u yʌn cꞌubob u bʌj tiꞌ Cꞌuj soc rajiꞌ yʌnin a tiꞌoboꞌ.
A baywoꞌ,
caj u yʌnxchun u cꞌaticob u yamtenob an ten bic Cꞌuj u cꞌat.
6 Wa ber caj in wuꞌyaj winiquirob ich u ruꞌumin Macedonia tan u yamticob u yet acsaꞌorirob uch,
bayiriꞌ mun cu tsꞌicob tiꞌob.
Caj in waꞌaraj tiꞌ Tito caꞌ wʌcꞌʌs xic tu yʌnechex soc u chichquintic a worex uch soc rajraꞌ a muchꞌquintiquex a taqꞌuinex quir a yamtiquex yejer a taqꞌuinex a ta yʌnxchun a muchꞌquintiquex uch.
7 A techexoꞌ tan a betiquex tsoy ich tu cotor a ta yʌn betex uch.
Tan a quiꞌ acsiquex ta worex,
bayiriꞌ xan,
tan a quiꞌ najtiquex baꞌ,
tan a quiꞌ tsicbarex xan,
bayiriꞌ tan a pachtiquex a manex tu tsoyir.
Bayiriꞌ tan a yajquintiquenob.
Bayiriꞌ xan bajeꞌrer,
in cꞌat caꞌ a quiꞌ yajquintex a wet acsaꞌorirex xan,
tan a tsꞌiquex tiꞌob a baꞌ u cꞌatob bajeꞌrer.
8 A tenoꞌ,
mʌꞌ tan in waꞌariquechex a jeꞌ tꞌʌnaꞌ irej wa tan in tsꞌic u tꞌʌnin techex soc a yamtiquex a wet acsaꞌorirex.
Tan in waꞌariquechex aroꞌ soc a wesiquex tiꞌ tu cotor mac taj tan a yajquintiquex a wet acsaꞌorirex.
Mʌꞌ ja wirej,
jun yarob mac a yacsmʌnob tu yorob tsꞌajaꞌan yorob quir u yamticob u yet acsaꞌorirob.
9 Mʌꞌ ja wirej,
jach chʌcaꞌan ij quirex u jach tsoyir u pixam Cꞌuj a tsꞌaꞌb ten ic Jaj Tsꞌurirex Jesucristo toꞌonex.
Iric rajiꞌ Jesús yʌnin tu cotor baꞌ a tiꞌ yʌn chen rajiꞌ u bʌjiriꞌ caj otsichʌjij quireꞌ u yajoꞌonex.
A bʌjeꞌreroꞌ,
quireꞌ u bʌjiriꞌ otsichʌjij rajen u jach tsoyir u pixam Cꞌuj jach manan cu cꞌuchur tu yʌnoꞌonex.
10 Uꞌyex baꞌ quin tucric a baꞌ caꞌ a betex a techexoꞌ.
Jach tsoy techex wa ca tsꞌocsiquex a baꞌ ta toc arex ca bin a betex uch,
caj manij tuririꞌ u yaxqꞌuinin bajeꞌrer.
11 Caꞌ a tsꞌocsex a ray a beyajex bajeꞌreroꞌ.
Rajen caꞌ a tsꞌajex tiꞌ a wet acsaꞌorirex an ten bic u cꞌuchur a worex a tsꞌajex tiꞌob.
12 Chen jach tsoy caꞌ a tsꞌajex a baxuc mac cꞌuchaꞌan yor u tsꞌic wa ju jach bʌjiriꞌ u cꞌat u tsꞌic.
A toꞌonexoꞌ mʌꞌ jic yʌn tucriquex wa mʌnaꞌ toꞌonex quir ic tsꞌiquex tiꞌob.
13 A tenoꞌ mʌꞌ jin waꞌarej caꞌ a rʌc tsꞌajex tiꞌ u jer tu cotor baꞌ a yʌn techex.
Mʌꞌ jin waꞌarej hasta mʌꞌ ju pꞌatʌr techex.
14 A bajeꞌrer,
yʌn techex quir a janʌnex,
bayiriꞌ xan yʌn techex quir a buquintiquex.
Rajen caꞌ a yamtex a wet acsaꞌorirex quireꞌ robob mʌnaꞌ tiꞌob,
a baywoꞌ quetechex.
Jaj ix tʌcoj caꞌ bin cꞌuchuc tu qꞌuinin wa yʌn tiꞌob quir u janʌnob,
bayiriꞌ quir u buquinticob,
chen a techexoꞌ mʌnaꞌ techex.
Jeroj jeꞌ u yamtiquechex xan,
a baywoꞌ jocꞌ quetechex xan.
15 A baxucoꞌ,
jeꞌ u jocꞌar an ten bic cu yaꞌaric ich tu tsꞌibaꞌan u tꞌʌn Cꞌuj:
“A mac a yʌn yaꞌab quir u janʌn mʌꞌ u pꞌatʌr tu rʌc jantaj.
A mac a yʌn chichin quir u janʌn mʌꞌ u caꞌ yʌn jant u yoꞌoch.”
Baxuc cu yaꞌaric ich u tꞌʌn Cꞌuj.
A Titojoꞌ yejer u nupob
16 A tenoꞌ quin waꞌaric tiꞌ Cꞌuj:
“Bayoꞌ Cꞌuj quireꞌ Tito.”
Mʌꞌ ja wirej,
caj tsꞌaꞌb u tucur ten Cꞌuj a Titijoꞌ caꞌ u yajquin techex an ten bic ten quin yajquintiquechex.
17 Wa ber caj in waꞌaraj tiꞌ Tito caꞌ tac yirechex,
jach quiꞌ yor u bin,
quireꞌ u cꞌat u yiriquechex.
18 Wa ber caꞌ bin tac Tito yejer u jerob ij quet acsaꞌorirob soc u yiricobechex xan.
A jeꞌ ij quet acsaꞌorirex jach tsoy yirir ten ij quet acsaꞌorirex cax tu yʌnobiꞌ quireꞌ tsoy cu tsecꞌticob u jach tsoyir u tꞌʌn Cꞌuj.
19 A jeꞌ ij quet acsaꞌorirex caj tetaꞌb ten a yacsmʌnob tu yorob tiꞌ u tꞌʌn Cꞌuj ich u cajar Jerusalén soc in wet binacob soc quir in pꞌʌtic a taqꞌuinoꞌ a tuchiꞌtaꞌb quir u yamticob yet acsaꞌorirob.
A tenoboꞌ jeꞌ in beticob aroꞌ soc mac cu yaꞌaricob jach carem Cꞌuj,
bayiriꞌ xan,
jeꞌ u yiricob mac wa jin cꞌatob xan in yamticob ij quet acsaꞌorirex.
20 A tenoboꞌ tan in cʌnanticob in bʌjob soc mʌnaꞌ mac cu bin u pʌqꞌuicob in pachob an bic quin man in jʌsicob a taqꞌuinex,
a tan a tsꞌiquex tiꞌ a wet acsaꞌorirex ich u cajar Jerusalén.
21 Mʌꞌ ja wirej,
a tenoboꞌ in cꞌat in beticob a baꞌ tsoyoꞌ ʌcʌtan tu wich a mac a tiꞌ yʌnob ich yocꞌocab.
22 A tenoboꞌ,
jeꞌ in tuchiꞌticobeꞌ u jerob ij quet acsaꞌorirex soc caꞌ bin tacob yejer a caꞌturoꞌ,
a cu bin u pꞌʌticob a taqꞌuinex.
A jeꞌ ij quet acsaꞌorirex in werob bic tabar u beyajob tiꞌ Cꞌuj.
Jach tsꞌajaꞌan yorob u beyajob tiꞌ Cꞌuj.
Jach quiꞌ yorob quir u tarob tu yʌnechex quireꞌ yerob tsꞌajaꞌan a worex a yamtiquex a wet acsaꞌorirex a otsichʌjob bajeꞌrer.
23 Wa tiꞌ yʌn mac tu yʌnechex a cu cꞌatic biquinin tan in tuchiꞌticob Tito tu yʌnechex.
Arex tiꞌob,
rajiꞌ tsoy in wiric,
bayiriꞌ in wet beyajob.
Rajiꞌ tan u cʌxtic bic tabar u betic tsoy techex.
Bayiriꞌ,
tiꞌ a caꞌturob a yet taracob,
a cu tarob tu yʌnechex xan.
Arex tiꞌ a racꞌobex a caꞌturob,
caj tetaꞌb ten a wet acsaꞌorirex teraꞌ soc caꞌ tacob yejer Tito tu yʌnechex.
Mʌꞌ ja wirej,
quireꞌ robob u beyajob tiꞌ u racꞌob,
tsoy yiricob Cristo.
24 Wa ber caꞌ bin cꞌuchucob a jeraꞌ a tin waꞌarajob techex,
toc esex tiꞌob bic tabar a quiꞌ acsiquex tiꞌob soc tu cotor a wet acsaꞌorirex yerob a jach yajquintiquex a wet acsaꞌorirex.
Mʌꞌ ja wirej,
baxuc caj in waꞌaraj tiꞌ tu cotor mac,
a jach manan a yajquintiquex a wet acsaꞌorirex.