Quiꞌquintej u yorob a racꞌob, mʌꞌ ja wʌcꞌʌs bʌjiriꞌex
15
Yʌn mac ich toꞌonex a mac a cu quiꞌ najticob u tꞌʌn,
a quij cacsex tij corex.
Rajen caꞌ ic yamtex a mac a mʌꞌ chichac tu yor tiꞌ u tꞌʌn Cꞌuj.
Caꞌ ic betex aroꞌ,
mʌꞌ jic manex ic betiquex a baꞌ ic wʌcꞌʌs bʌjiriꞌex ij cꞌatex.
2 Wa tiꞌ yʌn tuririꞌ ij quet acsaꞌorirex a cꞌuchaꞌan ij corex ic yamtiquexiꞌ soc quiꞌ yor yejer a baꞌ tsoy tu tꞌʌn Cꞌuj,
caꞌ ic pacran yamtex soc tsꞌaꞌajan yor u yacsic tu yor tiꞌ Cristo.
3 Mʌꞌ ja wirej,
caj tarij Cristo uch,
mʌꞌ tarij quir u betic a baꞌ u wʌcꞌʌs bʌjiriꞌ u cꞌat.
Caj tarij quir u betic a baꞌ u cꞌat u Tet Cꞌuj.
Rajen caj mucꞌyajnʌjij uch,
quireꞌ a baꞌ tsꞌibaꞌan ich u tꞌʌn Cꞌuj uch.
Uꞌyex baꞌ cu yaꞌaric:
“A mac a caj pꞌactaj tech uch,
Cꞌuj,
baxuc caj u pachꞌenob xanoꞌ.”
Baxuc caj yaꞌaraj ich u tꞌʌn Cꞌuj uch.
4 Quireꞌ a baꞌ tsꞌibtaꞌb ich u tꞌʌn Cꞌuj uch,
caj u tsꞌibtob a mac a tsꞌab u tucur ten Cꞌuj uch quir u tsicbar a baꞌ u cꞌat Cꞌuj quir ij cʌniquex a baꞌ quiriꞌ tsoy.
Caj u tsꞌibtob quir u quiꞌtar ij corex.
Caj u tsꞌibtob quir u chichquinticob ij corex.
Rajen nemʌꞌbicoꞌonex quic pajiquex a baꞌ cu tar tu qꞌuinin.
5 Mʌꞌ ja wirej,
a Cꞌujoꞌ,
cu bin u tsꞌic techex a muqꞌuex soc nemʌꞌbiquechex.
Rajraꞌ cu bin u chichquintic a worex.
Caꞌ u yamtechex Cꞌuj quir a quetquintiquex a worex yejer a mac a mʌꞌ chichac u yorob tiꞌ u tꞌʌn Cꞌuj,
cax yejer a chichij u yorob tiꞌ u tꞌʌn Cꞌuj.
Caꞌ a yajquintex mac an ten bic caj u camsoꞌonex Jesucristo.
6 A tenoꞌ,
in jach cꞌat caꞌ u yam techex Cꞌuj soc a cꞌujintiquex Cꞌuj a mac u bʌjiriꞌ u Cꞌuj ic Jaj Tsꞌurirex Jesucristo.
Caꞌ a pꞌeriꞌquint a worex tu ca cꞌujintiquex Cꞌuj.
U jach tsoyir u tꞌʌn Cꞌuj caj tsecꞌtaꞌb ich mʌꞌ ju winiquirob israel
7 Rajen,
an ten bic Cristo caj u cꞌʌmaj jujuturechex,
baxuc caꞌ a cꞌʌmex mac tu ca muchꞌquintiquechex quir a wuꞌyiquex u tꞌʌn Cꞌuj.
Wa ber cu yiric mac aroꞌ cu surʌcticob Cꞌuj.
8 Uꞌyex baꞌ in cꞌat in waꞌaric techex.
Caj tarij Cristo teꞌ ich yocꞌocab quir u yamtic u yet winiquirob israel.
Bayiriꞌ xan,
tarij soc u nupꞌsic a baꞌ toc araꞌb ten Cꞌuj tiꞌ u winiquirob israel uch.
A baywoꞌ toc irir ten mac,
a Cꞌujoꞌ,
mʌꞌ ju tubur tiꞌ u tꞌʌn a caj u toc araj jeꞌ u betiqueꞌ.
9 Bayiriꞌ xan,
tarij Cristo soc a mʌꞌ ju winiquirob israel jeꞌ u yaꞌaricob jach carem Cꞌuj,
quireꞌ caj yajquintaꞌbob ten Cꞌuj.
Mʌꞌ ja wirej,
baxuc caj araꞌb ich u tꞌʌn Cꞌuj uch:
Ich ʌcʌtan a mʌꞌ ju winiquirob israel quin bin in waꞌaric tech Cꞌuj:
Jach caremech Cꞌuj,
quin cꞌʌyiquech quir u quiꞌtar a wor.
10 Baxuc tiꞌ tsꞌibaꞌan ich u tꞌʌn Cꞌuj xan,
tan yaꞌaric:
Cax tu cotorex a mʌꞌ ju winiquirechex israel,
jeꞌ a waꞌariquex tiꞌ Cꞌuj:
Jach caremech Cꞌuj.
11 Bayiriꞌ tiꞌ tsꞌibaꞌan u jer ich u tꞌʌn Cꞌuj:
Quiꞌquint a worex a mʌꞌ ju winiquirechex israel yejer a mac Cꞌuj yʌninob tu cu cꞌujincob Cꞌuj.
12 Tiꞌ tsꞌibaꞌan ich u tꞌʌn Cꞌuj a caj u tsꞌibtaj Isaias uch,
tan yaꞌaric:
Caꞌ bin rochac chan och ten u nʌꞌ.
Rajiꞌ u parar Jesse,
raꞌ u chꞌic nunquir u winiquirob israel.
Caꞌ bin chꞌijic a raꞌ chan ochoꞌ,
jeꞌ u tsꞌurintaꞌr ten tu cotor a mʌꞌ ju winiquirob israel.
Bayiriꞌ,
robob a cu yacsicob tu yorob,
rajiꞌ cu bin tacbir ten Cꞌuj.
Baxuc araꞌb ich u tꞌʌn Cꞌuj uch.
13 A Cꞌujoꞌ,
a cu yamticoꞌonex ic pajiquex Cristo,
caꞌ quiꞌquintac a worex ten Cꞌuj.
Caꞌ quiꞌac a worex tiꞌ Cꞌuj soc mʌnaꞌ baꞌ ca tucriquex,
quireꞌ caj a wacsex ta worex tiꞌ Cꞌuj.
Mʌꞌ ja wirej,
u Tajꞌor u Pixam Cꞌuj caj u chichquint a muqꞌuex soc a quiꞌ pajiquex Cꞌuj.
14 A tenoꞌ,
in jach er,
in wet acsaꞌorirex jach tsoyechex,
quireꞌ yaꞌab a werex u tajir u tꞌʌn Cꞌuj.
Rajen cꞌuchaꞌan a worex a pacran cꞌasiquex tiꞌ a wet acsaꞌorirex tiꞌ u tꞌʌn Cꞌuj.
15 Chen a tenoꞌ,
in wet acsaꞌorirex,
mʌꞌ jin chꞌaꞌej sajquir quir in cꞌasic techex a baꞌ caj in waꞌaraj techex uch,
quireꞌ tsꞌaꞌb in beyaj ten Cꞌuj.
Rajen caj in tsꞌibta techex bajeꞌrer.
16 Mʌꞌ ja wirej,
a Cꞌujoꞌ,
caj u teten quir in beyaj tiꞌ Jesucristo.
Quin camsic u jach tsoyir u tꞌʌn Cꞌuj ich a mʌꞌ ju winiquirob israeloꞌ.
Baxuc quin beyaj,
soc Cꞌuj tsoy yiric a mʌꞌ ju winiquirob israeloꞌ.
Rajen cꞌamob ten Cꞌuj soc Cꞌuj yʌninob,
quireꞌ tetaꞌb ten u Tajꞌor u Pixam Cꞌuj.
17 Quin waꞌaric:
“Bayoꞌ tech,
Jesucristo,
quireꞌ caj a yamten tin beyaj ich a mʌꞌ ju winiquirob israeloꞌ,
quireꞌ yaꞌab yacsmʌnob tu yorob tech.”
Rajen,
a tenoꞌ tin tꞌʌn,
jach tsoy in beyaj tiꞌ Cꞌuj.
18 A tenoꞌ,
chen jach chich in wor,
in chen aric a baꞌ caj u betaj Jesucristo yejeren,
soc u yacsicob tu yorob a mʌꞌ ju winiquirob israeloꞌ.
Mʌꞌ ja wirej,
robob a mʌꞌ ju winiquirob israeloꞌ,
caj u yacsob u yorob caj yubob in tsecꞌtic tiꞌob.
Baxuc caj yirob a baꞌ caj in betaj xan.
19 Robob caj yirob a carem beyaj caj in betaj,
quireꞌ tsꞌaꞌb in mucꞌ ten u Tajꞌor u Pixam Cꞌuj,
rajen caj u jacꞌ u yorob a mac a tu yirob.
Caj binen ich tu cotor mac caj in tsecꞌtaj u jach tsoyir u tꞌʌn Cristo.
Tar yʌn,
caj in tsecꞌtaj ich u cajar Jerusalén hasta cꞌuchen chꞌic nachir uch,
ich u ruꞌumin Ilírico.
20 Mʌꞌ ja wirej,
jach manan caj in pacht in tsecꞌtic u jach tsoyir u tꞌʌn Cristo tu mʌnaꞌ mac yubmʌnobiꞌ,
soc mʌꞌ jin beyaj tu cu beyaj u jer mac.
21 Baxuc caj in betaj quir in nupꞌsic u tꞌʌn Cꞌuj tu caj yaꞌaraj uch:
A mac a mʌꞌ yubmʌnob u tꞌʌn a cu yaꞌaricoꞌ,
jeꞌ u cꞌuchur a mac a tuchiꞌtaꞌbir ten Cꞌuj.
A raꞌ u qꞌuininoꞌ bin u caꞌ u najtob.
Baxuc caj yaꞌar u tꞌʌn Cꞌuj uch.
Pablo cu tucric u bin ich u cajar Roma
22 Rajen mʌꞌ cꞌuchaꞌan in wor in tar in wirechex cax in jach cꞌat.
23 Chen tin tꞌʌn,
jeꞌ in tar tu yʌnechex ich a cajarex Roma,
quireꞌ mʌꞌ tu quin beyaj a teraꞌ tu yʌnenaꞌ.
Tsꞌoc in tsecꞌtic tiꞌob quireꞌ tin rʌc tsecꞌtaj ich u ruꞌumin teraꞌ.
Bayiriꞌ caj in pacht in tar uch tu yʌnechex.
24 A tenoꞌ,
seb in cꞌat in tar in wirechex soc pꞌeriꞌ caꞌ quiꞌac ij corex.
Caj tsꞌoc in wiriquechex caj paj a yamtiquenex caꞌ xiquen ich u ruꞌumin España.
25 Chen bajeꞌrer,
bin in caꞌ ich u cajar Jerusalén quir in pure tiꞌ ij quet acsaꞌorirex,
taqꞌuin soc u jasʌꞌr tiꞌob a mac otsichʌjij.
26 Mʌꞌ ja wirej,
tiꞌ yʌn a yacsmʌnob tu yorob ich u ruꞌumin Macedonia yejer u jerob yacsmʌnob tu yorob ich u ruꞌumin Acaya,
caj u tucrob uch,
tiꞌ u yet acsaꞌorirob a tiꞌ yʌnob ich u cajar Jerusalén.
Rajen caj u muchꞌquintob u taqꞌuinob ich u ruꞌumin Acaya,
yejer u ruꞌumin Macedonia quir u tsꞌicob tiꞌ a mac otsichʌjij ich u cajar Jerusalén.
27 Cax robob,
mʌꞌ ju winiquirob israel caj u tucrob u yet acsaꞌorirob ich u cajar Jerusalén.
Quireꞌ tiꞌ tar caj yubob ich u winiquirob israel u jach tsoyir u tꞌʌn Cꞌuj,
a mʌꞌ u winiquirob israel soc cꞌuchaꞌan yorob u yacsicob tu yorob tiꞌ Cristo.
Rajen u jach cꞌat u yamticob u yet acsaꞌorirob ich u cajar Jerusalén soc yʌn u taqꞌuinob quir u mʌnicob yoꞌoch quir u janʌnob.
28 Caꞌ bin tsꞌocac in puric u taqꞌuinob tiꞌ a mac otsichʌjij,
tu cu muchꞌquinticob u bʌj a yacsmʌnob tu yorob ich u cajar Jerusalén.
Tiꞌ tar quin bin cꞌuchur ich u cajar Roma tu yʌnechex quir in wiriquechex.
Pachir in bin ich u ruꞌumin España.
29 A tenoꞌ,
in wer caꞌ bin manʌquen tu yʌnechex,
caꞌ bin cꞌuchuquen,
jach manan tsꞌajaꞌan in wor yejer u jach tsoyir u tꞌʌn Jesucristo.
Baxuc quin bin in tsicbar techex tiꞌ u tꞌʌn Cꞌuj xan.
30 In wet acsaꞌorirex,
a mac a wet manex yejer Jesucristo,
caꞌ a pacran yajquintex a bʌjex an ten bic u Tajꞌor u Pixam Cꞌuj cu yamtic techex.
Rajen quin chich cꞌatic techex caꞌ a tꞌʌnex Cꞌuj ten.
Tsꞌajaꞌan a worex a tꞌʌnex Cꞌuj ten.
31-32 Caꞌ a tꞌʌnex Cꞌuj soc u jach quiꞌtar in wor caꞌ bin cꞌuchuquen tu yʌnechex wa baxuc u cꞌat Cꞌuj,
quir a chichquintiquex in wor.
Caꞌ a cꞌatex tiꞌ Cꞌuj caꞌ u cʌnant in pach Cꞌuj,
tiꞌ a mac a mʌꞌ yacsmʌnob tu yorob tu ruꞌumin Judea.
Caꞌ a tꞌʌnex Cꞌuj xan,
tiꞌ a mac cʌjaꞌanob ich u cajar Jerusalén,
a yacsmʌnob tu yorob,
soc jeꞌ u quiꞌ cꞌʌmicob a jeꞌ taqꞌuinaꞌ a quin bin in purob tiꞌob.
33 A tenoꞌ,
caj in tꞌʌnaj Cꞌuj techex,
soc Cꞌuj a cu tsꞌic toꞌonex quiꞌ ij corex,
soc caꞌ u cʌnant a berex xan.