5 Et sema mantoktokkong cha throno, kigwan to i “Si-neng mo, kowan badoin emiin.” Kigwan to ngod si-kak “Isolat mo jay tep naepiyal tan podno ira ja ese-esel.” 6 Et kigwan to i “Etongpal men emiin. Si-kak i Alpha tan Omega. Si-kak i kapoanan tan pengingkaan. Sema toon iya-kow, i-kanan ko na chanom a dibchin naedafod ma temtem a naengi-kan na biyag a nagwariy pengingkaan to. 7 Sema toon naigwak toy ngaaw, itawiran ko iren jay. Et si-kak aliy Chiyos to, tan si-katho diy anak ko. 8 Nem emanekot i mepesamak ired ma nat memasig a memati kagol na tahot to na pandigat, sema iren nagwariy pamati ra, sema iren mengemag na ensekig, sema iren memono, sema iren menechog na nat imbaliy cha, sema iren mena-gway na ngaaw a ispiritos, sema iren manchejaw na sinan chiyos, tan emiin a man-ite-itek. Sema konan iren jay a too, chiwed baybay a manchachalang a sulfur a maykadgwen pathiy.”

9 Et kimowan aliy sa-kin ma pithon anghilis a man-eg-egchi na pithon malokong a iyapno na pithon kaonoran a diga-digat. Kigwan tod si-kak i “Gomali. Ibiybiy kod si-kam i biin imbaliyen na Ngalobon Kalniro.” 10 Et inpakokip toak na Ispirito Santo, et iyodop toak na anghil cha toktok na chontog a banay tan ekayang. Inbiybiy tod si-kak i esantoan a siyodad na Jerusalem a mansa-sa-kod alid Afo Chiyos cha dangit. 11 Mandingsi ma siyodad na nihal Afo Chiyos. Sema dingsi tho, singen epateg a bathon kigwan cha i jasper a inges toy salming tep nagwariy borabod to. 12 Edikmothan iwa siyodad na tofing a mabahed tan ekayang. Gwariy sawal na chegwen pasbol a nabiyantayan na sawal na chegwen anghilis, tan chiwan iren pasbol, iyaysolat i ngaran na sawal na chegwen anak Israel. 13 Sema iren pasbol, gwariy tedod ma bosakan, tedod ma denekan, tan santetdod ma iyanpiniig to. 14 Sema iyaytegwenan na alad na siyodad, sawal na chegwen babenay a batho, et chiwan iren batho, iyaysolat i ngaran na sawal na chegwen apostolis na Ngalobon Kalniro.

15 Sema anghil a mantetebal cha si-kak, man-eg-egchi na ebalitohan a para dohod a osalen ton mandokod na siyodad, pati pasbol to tan alad to. 16 Sema itsora na siyodad, epat a soli tho tan man-iinges i dohod na chokiy to tan banaw to. Diyohod na anghil i siyodad niwa para dohod to. Sema chokiy tan banaw tan kayang to, man-iinges i dohod ton chegwen dibo tan epat a dasos a kilomitro. 17 Et diyohod ngo na anghil i alad, et sema kayang to, enem a polo tan enem a mitro. Sema mitron iyosal ton para dohod, inges to ma mitron naiyosal na too. 18 Aamag i alad na epateg a bathon kigwan cha i jasper, tan sema siyodad, aamag na poron balitok a mandingsin singen salming. 19 Sema iren bathon iyaytegwenan na alad na siyodad, aarti-artian na ekila-kilasin ebanol a batho. Sema pilmiron batho, jasper, sapphire i maykadgwa, agate i maykatdo, emerald i mayka-pat, 20 onyx i maykalima, carnelian i mayka-nem, chrysolite i maykapitho, beryl i maykagwalo, topaz i maykasiyam, chrysoprase i maykasampolo, jacinth i maykasawal na sa-ki, tan amethyst i maykasawal na chegwa. ^a 21 Sema iren sawal na chegwen pasbol, aamag na sawal na chegwen pirlas. Sema sansa-kin pasbol, sa-kin pirlas. Tan sema kalsared siyodad, aamag na poron balitok a mandingsin singen salming.

22 Nagwariy mitak a timplod ma siyodad tep si Afo Chiyos a manakabalin tan sema Ngalobon Kalniro, si-karen mismoy timplo tho. 23 Nat mesepol ngoy silow na akow tan bolan chiwa siyodad tep esilowan i siyodad na nihal Afo Chiyos tan Ngalobon Kalniro. 24 Sema nihal niwa siyodad, silowan ton emiin i toon man-ahad cha dobong, tan emiin a naiyantoray cha dobong, isekep chiy kinabaknang ched ma siyodad. 25 Medohatan na olay i pasbol niwa siyodad. Nat maybengbengbeng tep nagwara wiy dagwid man. 26 Sema kinabaknang na emiin a tood emiin a ili, mayseskep chiwa siyodad. 27 Nem nagwariy ensekig a onsekep chiwa siyodad. Nagwariy toon onsekep chiwan a naengamag na kababaing ono naiyan-ite-itek. Sema toon mahasekep, si-kara bengat iwa gwariy ngaran chen iyaysolat cha dibchon kegwen niwa Ngalobon Kalniro. Chiwa dibcho, iyaysolat a emiin i ngaran iren ma gwariy biyag chen nagwariy pengingkaan to.