Sema Pantoray Jesus Na Sandibon Tawen
20
Et gwariy mitak a anghil a mansa-sa-kod alid dangit. Man-eg-egchi na banay a kadina tan tolbek na bengbeng na echalek a ebot a nagwariy kaysespaan to. 2 Chinmet na anghil i dragon a iyanparang na oleg nontan den iyanngaran pay na Diablo tan Satanas. Kiyadinaan to ma dragon say mebalod ingkathod mepalabas i sandibon tawen. 3 Et inta-boy na anghil cha echalek a ebot a nagwariy kaysespaan to. Et intolbek toy bengbeng niwa ebot, et engipakpak na malked ma bengbeng say nat mebedin a medokathan. Iyaykalebos i dragon say nat saolen to wiy tood emiin a ili ingkathod mepalabas miy i sandibon tawen. Et no mepalabas miy sandibon tawen, maybolos mowan na sankaatihan.4 Et gwara iriy mitak a throno. Sema iren mantoktokkong chiwa throno, iyay-i-kanan ira na karebengan chen mengowis. Mitak ngoy ispirito na toon biyono ra kagol na inpangamta ra na podnon toro-toro maypangkep Jesus tan sema inpantoro cha na esel Afo Chiyos. Nat chijaw cha ma emanekot a animal tan bolto tho. Et nat emalkaan ira ngo na malka niwa animal chiwa temok cha ono chiwa diwa ra. Iyanpawil ira ja too, et mekitoray ired Cristo na sandibon tawen. 5 Sejay i pilmiron panpawil na too. Sema echom a etiy, nat manpawil ira ingkathod mepalabas miy iwa sandibon tawen. 6 Sema iren mekida-kam niwa pilmiron panpawil, mabindisjonan tan esantoan ira. Tep nat mandigat ira na chosen nagwariy pengingkaan ton sema maykadgwen pathiy, no diket pari di iren Afo Chiyos tan si Cristo, et mekitoray ired Cristo na sandibon tawen.
Sema Ingka-gwak Satanas
7 No mepalabas miy sandibon tawen, maybolos si Satanas chiwa kad-an na iyaykalebosan to. 8 Onkowan a menaol na emiin a tood ma emiin a ilid epat a soli na dobong. Sema iren ili, iyanngaran na Gog tan Magog. Sema iren tood ma ili, sa-nofen iren Satanas a mankobat. Sema karakel cha, singen charat cha kilig na baybay a nat mebedin a mebilang. 9 Maygwadsak iren man-ekad cha enbanaw a tapow na dobong, et dikmothen chiy kampo na toon Afo Chiyos tan sema siyodad a ensemek Afo Chiyos. Nem ma-kas i afoy alid dangit, et kolpin mepoolan a emiin i too. 10 Et sema Diablon iyansao-saol cha si-kara, mayta-boy chiwa baybay a manchachalang a sulfur a kad-an ngo na iyayta-boyan niwa emanekot a animal tan sema naiyan-ite-itek a profita. Et medigathan iren emiin chiwan na san-akow tan sandabi na ingked ingka.
Sema Kaonoran A Pengowis Na Emiin A Too
11 Idi iyakcheng ma, gwariy mitak a banay a thronon polaw, tan mitak ngoy mantoktokkong chiwan. Sema dobong tan iyaykayang, biglen aomas cha sangoanan to, et nagwara wen mesi-neng. 12 Et mitak a emiin i iyangketiy, a sema iyangkebaba tan sema iyangkekayang. Man-ak-akgwat ired sangoanan niwa throno, et edohatan ira ma dibchon iyaysolathan niwa ima-imag cha nonta sibibiyag nin ira. Et edohatan ngoy sa-kin dibchon iyaysolathan na ngaran iren ma gwariy biyag chen nagwariy pengingkaan to. Ekowis ira ma iyangketiy a iyaybagay chiwa iyaysolat ired ma dibcho maypangkep na ima-imag cha. 13 Emiin a iyangketiy cha baybay, iyanparang cha sangoanan Afo Chiyos. Emiin a gwared Hades a kawad-an na iyangketiy, iyanparang ngo ired sangoanan Afo Chiyos. Et ekowis iren emiin a iyaybagay chiwa ima-imag cha. 14 Et sema pathiy tan kawad-an na iyangketiy, iyayta-boy ired ma baybay a manchachalang a afoy. Seja baybay a manchachalang a afoy, si-kathoy maykadgwen pathiy. 15 Et no nat iyaysolat i ngaran na tood ma dibchon iyaysolathan na ngaran iren ma gwariy biyag ton nagwariy pengingkaan to, iyayta-boy maliy tood ma baybay a manchachalang a afoy.